2 Кур.кн4
1Соломон той жертвенникым ыштен. Тудо коло кынергут кутышан, коло кынергут лопкытан да лу кынергут кӱкшытан лийын.2Вара «теҥыз» манме йыргешке кугу той чаным велен ыштен. Тудын ик тӱржӧ гыч вес тӱржӧ марте – лу кынергут, кӱкшытшӧ – вич кынергут, а йыржын кутышыжым кандыра дене висаш гын, кумло кынергут лийын.3Чанын кӱшыл ужашыштыже кок ратын ӱшкыж-влакын сӱретышт лийын – нуно тудым ик кынергутлан лу дене авыреныт. Ӱшкыж-влак чан дене ик тичмаш семын велыме лийыныт.4Тиде чан латкок ӱшкыж ӱмбалне шинчен. Кум ӱшкыж йӱдвелыш, кумыт касвелыш, кумыт кечывалвелыш да кумыт эрвелыш онченыт. Нунын шеҥгел ужашышт чан йымалне лийын, а ӱмбалнышт чан шинчен.5Чанын кӱжгытшӧ сово лопкытан лийын, а тӱржӧ лилий пеледышла койшо корка гай койын. Чан кум тӱжем бат пурыман лийын.6Соломон изирак лу той чаным ыштен: визытым пурла велыш да визытым шола велыш вераҥден. Тушто йӱлалтен пуышаш надырым мушкыныт, а «теҥыз» манме чаныште иерей-влак мушкылтыныт.7Тудо тыгак лу шӧртньӧ светильникым кӱлеш семын ыштен да храмыште шогалтен: визытым – пурла могырыш, визытым – шола могырыш.8Эше лу ӱстелым ыштен, нунымат храмыште шогалтен: визытым – пурла могырыш да визытым – шола могырыш. Тудо тыгак шӱдӧ шӧртньӧ коркам ыштен.9Эше иерей-влаклан кудывечым, тыгак кугу кудывечым да нунылан омса-влакым ыштен, той дене комыжлен.10«Теҥыз» манме чаным тудо пурлашке, кечывалвел-эрвел могырыш, шынден.11Хирам эше подым, изи кольмым, кӱмыжым, [шӱй атым да надыр кондымо годым кучылтмо чыла моло ӱзгарым] ыштен. Тыге тудо Юмын пӧртыштӧ Соломон кугыжалан ыштышаш чыла пашам мучашлен. Теве мом Хирам ыштен:12кок колонным, чаше семын калыплыме кок колонно вуйым, колонно вуйым сӧрастарыше кок сеткым,13кок сеткыште нылшӱдӧ гранат саскам – чаше семын калыплыме кок колонно вуйым сӧрастарыше кажне сеткылан кок рат гранат саска дене,14лу орвам, орва ӱмбалне улшо лу чаным,15«теҥыз» манме кугу чаным да тудын йымаке латкок ӱшкыжым,16тыгак кӱмыжым, изи кольмо ден шаньык-влакым. Господьын пӧртшым чоҥышо Соломон кугыжалан Хирам-Авий чыла тиде арверым ягылтарыме той дене ыштен.17Кугыжа нуным Иордан кундемысе шун мландыште, Сокхоф ден Цереда коклаште, велен ыштен.18Чыла арверым Соломон пеш шуко ямдылен, сандене мыняр той кучылтмым паленат огытыл.19Эше Соломон Юмын пӧртлан кӱлшӧ чыла ӱзгарым ыштен: шӧртньӧ жертвенникым, надыр киндым пышташлан ӱстел-влакым,20йӱла радам почеш кӧргысӧ святой пӧлем ончылно йӱлышт манын, светильник ден лампаде-влакым – нунышт яндар шӧртньӧ гыч лийыныт,21эн яндар шӧртньӧ гыч пеледыш, лампаде да шипши-влакым,22яндар шӧртньӧ гыч вашкӱзӧ-влакым, изи ден кугу ате-шамычым, тулшол ате-влакым, тыгак храмын омсаже-шамычым – Святой деч святой верыш пурымо да храмысе залын омсаже-влакым. Нунымат шӧртньӧ дене ыштен.
Institute for Bible Translation, Finland