2 Кур.кн34
1Кугыжалан шогалмыж годым Иосий кандаш ияш лийын да Иерусалимыште кумло ик ий вуйлатен.2Тудо Господьлан келшыше пашам ыштен. Пурлашкат, шолашкат кораҥде, Иосий чыла шотыштат шке Давид кугезе кочажын корныжым тошкен.3Кандашымше ий кугыжаланымыж годым, эше самырык рвезе, тудо Давид кугезе кочажын Юмыжым кычалаш тӱҥалын. А латкокымшо ий вуйлатымыж годым Иуда ден Иерусалимым кӱкшакаласе кумалме вер, Ашера меҥге, пӱчкын лукмо ден велен ыштыме шояк юмо-влак деч эрыкташ тӱҥалын.4Тудын вуйлатымыж почеш Ваалын жертвенникше ден нунын ӱмбалне улшо тӱтырымӧ жертвенник-влакым шалатеныт. Иосий тыгак Ашера меҥге-влакым руэн, пӱчкын лукмо да велен ыштыме шояк юмо-шамычым шалатен, пуракыш савырен да нунылан надырым кондышо еҥ-влакын шӱгарышт ӱмбаке шавен,5а онаеҥ-шамычын лулегыштым шке жертвенникешышт йӱлалтен. Тыге Иосий Иуда ден Иерусалимым эрныктен.6Тыгак Манассий, Ефрем, Симеон, эсогыл Неффалим тукым мландысе олалаште, нунын йыр улшо пустаҥдыме верлаште7тудо жертвенник ден Ашера меҥге-влакым шалатен, пӱтынь Израиль мланде мучко чыла шояк юмым пуракыш савырен, тӱтырымӧ жертвенник-влакым пытарен да Иерусалимыш пӧртылын.8Латкандашымше ий вуйлатымыж годым, Юмын пӧрт ден элым эрыктымеке, кугыжа Ацалий эрге Шафаным, ола вуйлатыше Маасейым, курымсерышым возышо Иоахым, Иоахаз эргым, Господь Юмыжын пӧртшым олмыкташ колтен.9Нуно кугу иерей Хелкий деке миеныт да тудлан Юмын пӧртыш кондымо чыла шийым пуэныт. Тиде шийжым капка ороллан шогышо левит-влак Манассий ден Ефрем тукымла да моло израильтян-влак деч, тыгак Иуда, Вениамин тукымла да Иерусалимыште илыше-шамыч деч погеныт улмаш.10Тиде шийым Господьын пӧртыштӧ пашам вуйлатен шогышо-влаклан кучыктеныт. Нунышт тудым Господьын пӧртшым олмыктышо пашазе-влаклан –11плотник ден чоҥышо-шамычлан – пуэденыт, тыгак Иуда кугыжа-влакын шалатен кодымо пӧртыштым олмыкташлан руымо кӱм, тӱрлӧ оҥа ден каштам налаш пуэныт.12Нине еҥ-влак пашам чынлын ыштеныт. Нуным вуйлаташ левит-влакым – Мерари урлык гыч Иахаф ден Овадийым, Кааф урлык гыч Захарий ден Мешулламым – шогалтеныт. Семӱзгарым шоктен моштышо левит-влак13нумалше еҥ-шамычлан вуйын шогеныт да моло пашазын пашаштым эскереныт. Икмыняр левит возкалыше, паша вуйлатыше да капка орол лийыныт.14Господьын пӧртыш кондымо шийым лукмо годым иерей Хелкий Моисей гоч пуымо Господьын закон книгажым муын.15Тудо возкалыше Шафанлан каласен: «Господьын пӧртыштӧ мый закон книгам муынам». Хелкий тудым Шафанлан пуэн.16Шафан книгам кугыжа дек намиен да тудлан пашан кузе кайымыж нерген каласкален: «Тыйын тарзет-влак чыла кӱштымӧ пашатым шуктат.17Нуно Господьын пӧртыштӧ аралыме чыла шийым паша вуйлатыше ден пашазе-влаклан пуэныт».18Вара возкалыше Шафан кугыжалан увертарен: «Иерей Хелкий мылам книгам пуыш». Да тудым кугыжа ончылно лудын.19Законысо шомак-влакым колмеке, кугыжа шке вургемжым кушкедын.20Тудо Хелкийлан, Шафан эрге Ахикамлан, Михей эрге Авдонлан, возкалыше Шафанлан да кугыжан тарзыже Асаийлан тыге кӱштен каласен:21«Кайыза да мумо книгаште мом возымо шотышто мыйын верч да Израиль ден Иуда деч кодшо калык верч Господь деч каҥашым йодса. Мемнан ӱмбаке Господьын кугу шыдыже ылыжын! Вет ача-кочана-влак Господьын шомакшым колыштын огытыл, тиде книгаште возымо семын ыштен огытыл».22Хелкий да кугыжан колтымо моло еҥже пророк ӱдырамаш Олдама дек, вургемым аралыше Шаллумын ватыж дек, каеныт. Шаллумжо Тавкегафын эргыже, Хазран уныкаже лийын. Олдама Иерусалимын у ужашыштыже илен. Нуно тудлан чыла каласеныт.23Олдама вашештен: «Тыге Господь, Израильын Юмыжо, ойла. Тендам тышке колтышо еҥлан каласыза:24”Тыге Господь ойла: тиде верыш да тыште илыше-влак ӱмбаке Мый кугу ойгым колтем – Иуда кугыжа ончылно лудмо книгасе чыла каргымаш шукталтеш.25Вет нуно Мыйым коденыт, вес юмо-влаклан тӱтыреныт, шке кидышт дене ыштыме шояк юмышт дене Мыйым сырыктеныт. Тидлан кӧра тиде вер ӱмбаке Мыйын шыдем ылыжеш да ок йӧрӧ”.26А тендам Господь деч йодаш колтышо Иуда кугыжалан каласыза: ”Господь, Израильын Юмыжо, тыйын колмо мут шотышто тыге ойла:27тиде вер да тыште илыше-влак ваштареш каласыме шомакем колмеке, тый ӧкыненат – тый Юмо ончылно ӱҥышемынат, вургемет кушкедын, Мыйын ончылнем шортынат. Тыге ыштыметлан Мыят тыйым кольым, ойла Господь.28Мый тыйым ача-кочат-влак деке пыштем, тый тыныс дене тойымо лият. Тиде вер да тыште илыше-влак ӱмбаке Мыйын колтымо чыла ойгым тыйын шинчат ок уж”». Тиде вашмутым кугыжалан конденыт.29Тунам кугыжа Иуда ден Иерусалимын кугуракышт-влакым поген.30Тудо Господьын пӧртышкыжӧ каен, почешыже Иуда тукым еҥ ден Иерусалимыште илыше-шамыч, иерей ден левит-влак да уло калык – изи гыч кугу марте – миеныт. Кугыжа нунылан Господьын пӧртыштӧ мумо ойпидыш книгаште мом возымым лудын лектын.31Вара шке верышкыже шогалын да Господь чурий ончылно ойпидышым ыштен – Господьлан ӱшанле лияш, Тудын кӱштымашыже, сугыньжо да пунчалже-влакым уло шӱм-чон дене шуктен шогаш, тиде книгаште возымо ойпидышын чыла мутшым шукташ.32Вара кугыжа Иерусалимыште да Вениамин мландыште улшо чыла еҥ тыгаяк сӧрымашым пуышт манын кӱштен. Иерусалимыште илыше-влак Юмын, шке ача-кочаштын Юмыштын, ойпидышыже почеш ышташ тӱҥалыныт.33Иосий Израиль мланде гыч чыла йырнык юмым кораҥден да тушто илыше-влаклан шке Господь Юмыштлан служитлаш кӱштен. Тудын илыме кечылаштыже нуно шке ача-кочаштын Господь Юмышт деч кораҥын огытыл.
Institute for Bible Translation, Finland