2 Кур.кн33
1Кугыжалан шогалмыж годым Манассий латкок ияш лийын, тудо Иерусалимыште витле вич ий вуйлатен.2Господьын израиль эрге-влак деч поктен колтымо калык-шамычын йырнык йӱлаштым шуктен, тудо Господь шинча ончылно шуко осал пашам ыштен.3Езекий ачажын кӱкшакалаште шалатыме кумалме вер-влакым Манассий угыч чоҥен да Ваал-шамычлан жертвенник-влакым ыштен. Тудо Ашера меҥге-влакым шогалтен, кавасе шӱдыр-шамычлан кумалын, нунылан вуйжым савен.4Манассий жертвенник-влакым Господьын пӧртыштат чоҥен шогалтен, а вет тудын шотышто Господь «Иерусалимыште Мыйын лӱмем курымеш илаш тӱҥалеш» манын каласен.5Господьын пӧртшын кок кудывечыштыжат тудо кавасе шӱдыр-влаклан жертвенник-шамычым чоҥен,6Енном лапверыште шке эргыже-влакым тул гоч колтен. Манассий тыгак мужедын, юзыланен, юлен, колышын чонжым ӱжын лукшо ден юзо-влакым тарлен. Икманаш, Господь шинча ончылно шуко осал пашам ыштен, Тудын шыдыжым луктын.7Господьын пӧртыштыжӧ пӱчкын лукмо шояк юмым шогалтен. А вет тиде пӧрт шотышто Давид ден тудын Соломон эргыжлан Юмо тыге каласен: «Тиде пӧртыштӧ да израиль тукым-влакын мландыштышт ойырен налме Иерусалим олаштем Мыйын лӱмем курымеш илаш тӱҥалеш.8Мый тыге ыштем: ончыкшым израильтян-шамыч ача-кочаштлан пуымо мландем деч ӧрдыжтӧ кусныл кошташ огыт тӱҥал. Тиде шукталтше манын, нуно Мыйын чыла кӱштымем – Моисей тарзем гоч пуымо законым, пунчал ден кӱштымаш-влакым – тыршен шуктышаш улыт».9Но Манассий Иудам да Иерусалимыште илыше-шамычым чын корно гыч кораҥден, да нуно Господьын израиль эрге-влак чурий ончыч пытарыме калык-шамыч деч шукырак осалым ыштеныт.10Господь Манассий ден тудын калыкшылан ойлен, но нуно Тудым колыштын огытыл.11Тунам Господь ӱмбакышт Ассирий кугыжан сарзывуйжо-влакым колтен. Нуно Манассийым сагыле дене руалтен кученыт, той шинчыр дене шинчырленыт да Вавилоныш наҥгаеныт.12Ойгыш логалмекше, Манассий шке Господь Юмыжым сӧрвалаш тӱҥалын – тудо ача-кочажын Юмыж ончылно пеш чот ӱҥышемын.13Кунам Манассий кумалын, Юмо тудым чаманен, сӧрвалымыжым колын да Иерусалимыш, шке престолышкыжо, пӧртылтен. Тыге Манассий Господьын Юмо улмыжым пален налын.14Тидын деч вара тудо Давид-Олан тӱжвал пырдыжшым Гихон деч касвелкыла, лапвер дене Кол капка дек шумеш, Офел йыр чоҥен. Тудым пеш кӱкшым ыштен. Иуда мландысе чоткыдемдыме олалаште Манассий сарзывуй-влакым шогалтен.15Тудо Господьын пӧртшӧ гыч йот юмо-влак ден шояк юмым кораҥден, Господьын пӧртшын курыкыштыжо да Иерусалимыште чоҥымо жертвенник-шамычым сӱмырен, чыла тидым ола гыч луктын кудалтен.16Господьын жертвенникшым тудо угыч шогалтен да тушан татулык надыр ден тауштымо надырым конден, Иуда калык Израильын Господь Юмыжлан служитлыже манын кӱштен.17Калык надырым ончычсо семынак кӱкшакалаште конден шоген, но шке Господь Юмыжлан гына.18Манассийын моло пашаже, шке Юмыжлан кумалмыже, Израильын Господь Юмыжын лӱмжӧ дене тудлан ойлышо ончыкужшо-влакын мутышт «Израиль кугыжа-шамычын курымсерыш книгаштышт» возымо.19Манассийын кумалмыже да Юмын тудым чаманен налмыже, Юмо ончылно ӱҥышеммыж деч ончыч ыштыме чыла сулыкшо да ӱшанле огыл улмыжо, кӱкшакасе кумалме верлам чоҥымыжо да тушан Ашера меҥге ден шояк юмо-влакым шогалтымыже нерген Хозайын возымаштыже серыме.20Вара тудо шке ача-кочаж-влак деке ушнен, Манассийым шкенжын полатыштыже тоеныт. Тудын олмеш кугыжалан Амон эргыже шогалын.21Кугыжалан шогалмыж годым Амон коло кок ияш лийын да Иерусалимыште кок ий вуйлатен.22Манассий ачаж семынак тудо Господь шинча ончылно шуко осал пашам ыштен. Амон шке ачажын ыштыме чыла шояк юмыжлан надырым конден да нунылан служитлен.23Но тудо Манассий ачаж семын Господь ончылно ӱҥышемын огыл, а шукырак да шукырак сулыкым ыштен.24Амон ваштареш заговорым шке тарзыже-влак ыштеныт да кугыжам шке полатыштыжак пуштыныт.25Но элысе калык Амон кугыжа ваштареш шогалше-шамычым пуштын да олмешыже кугыжалан Иосий эргыжым шогалтен.
Institute for Bible Translation, Finland