2 Кур.кн24
1Кугыжалан шогалмыж годым Иоас шым ияш лийын. Тудо Иерусалимыште нылле ий вуйлатен. Аважын лӱмжӧ Цивья, тудо Вирсавий гыч лийын.2Иерей Иодайын илыме кечылаштыже Иоас Господьлан келшыше пашам ыштен.3Иодай тудлан кок ватым налын, да Иоасын эрге-ӱдыржӧ-влак шочыныт.4Икмыняр жап гыч Иоас Господьын пӧртшым олмыкташ шонен пыштен.5Тудо иерей ден левит-влакым поген да нунылан каласен: «Иуда мландысе олалашке кайыза да чыла израильтян деч Юмын пӧртым олмыкташлан кажне ийын пуышаш шийым погыза. Тиде пашам ида шуйкале». Но левит-влак вашкен огытыл.6Тунам кугыжа Иодайым, нунын вуйлатышыштым, ӱжын да каласен: «Молан тый левит-влакым Иуда ден Иерусалимысе калык деч йозакым кондаш от йод? Господьын Моисей тарзыже да Израиль калык тиде йозакым Юмо дене вашлийме омашлан пуаш палемденыт.7Вет Юмым пагалыдыме Гофолия ден тудын эргыже-влак Юмын пӧртлан зияным ыштеныт да Господьын пӧртшылан пуымо святой арверым Ваал-влаклан служитлаш кучылтыныт».8Кугыжан кӱштымыж почеш шондыкым ыштеныт да тӱжвалне Господьын пӧртшын капкаже воктене шынденыт.9Вара Юмын Моисей тарзыжын ир мландыште израильтян-влак ӱмбаке пыштыме йозакым Господьлан кондышт манын, Иуда ден Иерусалим мучко увертареныт.10Чыла вуйлатыше ден уло калык тидлан куаненыт да шийым шондык теммешке конденыт.11Кажне гана, кунам левит-влак шондыкым кугыжан тӧраже-шамыч деке конденыт, да нунышт тушто ший шуко улмым ужыныт, кугыжан возкалышыже да кугу иерейын колтымо еҥже толыныт да шондыкым ястареныт. Вара тудым угыч шке верышкыже наҥгаен шынденыт. Тыге нуно кече гыч кечыш ыштен шогеныт да пеш шуко шийым погеныт.12Кугыжа ден Иодай тиде шийым Господьын пӧртшым олмыктымо пашам вуйлатыше-влаклан пуэныт. Нунышт Господьын пӧртшым тӧрлаш кӱм руышо ден плотник-шамычым, тыгак пӧртым олмыкташ кӱртньӧ ден той мастар-влакым тарленыт.13Пашазе-шамыч тыршен ыштеныт, кидыштышт паша ушнен толын. Тыге нуно Юмын пӧртым шотыш конденыт да чоткыдемденыт.14Пашам пытарымеке, нуно кугыжа ден Иодайлан кодшо шийым конденыт. Тудын дене Господьын пӧртшылан тӱрлӧ арверым ыштеныт: служитлыме годым да йӱлалтен пуымо надырым кондымо годым кучылтмо ате-ӱзгарым, кӱмыж-влакым, шӧртньӧ ден ший ате-шамычым. Иодай илыме кечылаште Господьын пӧртыштӧ йӱлалтен пуымо надырым эре конден шогеныт.15Иодай кужу, тӱвыргӧ ӱмырым илен да шӱдӧ кумло ияш колен.16Тудым Давид-Олаште кугыжа-влак пелен тоеныт, вет тудо Израильыште Юмылан да Тудын пӧртшылан шуко сайым ыштен.17Иодай колымеке, Иудан вуйлатышыже-влак Иоас кугыжалан вуйым саваш толыныт, да тудо нуным колышташ тӱҥалын.18Тыге кугыжа да вуйлатыше-влак шке ача-кочаштын Господь Юмыштын пӧртшым коденыт да Ашера меҥге ден шояк юмо-влаклан служитлаш тӱҥалыныт. Тиде сулыкыштлан Иуда ден Иерусалим ӱмбалне Господьын шыдыже лийын.19Нуным Шкеж деке савыраш манын, Господь пророк-влакым колтен. Пророк-шамыч шижтарен ойленыт, но нуно колыштын огытыл.20Тунам Юмын Шӱлыш Захарийым, иерей Иодайын эргыжым, авалтен. Тудо калык ончылно кӱкшака верыш шогалын да каласен: «Тыге Господь ойла: молан те Господьын кӱштымашыжым огыда шукто? Тендам сеҥымаш ок вучо. Те Господьым коден улыда, сандене Тудат тендам кода».21Захарий ваштареш шолып кутырен келшеныт, да [Иоас] кугыжан кӱштымыж почеш тудым Господьын пӧртшын кудывечыштыже кӱм кышкен пуштыныт.22Захарийын Иодай ачажын тудлан шуко сайым ыштымыжым Иоас кугыжа шарналтен огыл, тудын эргыжым пуштын. Колымыж годым Захарий тыге каласен: «Тек Господь ужеш да мутым кучыкта!»23Идалык мучаште Иоас ваштареш Сирий сарзывий толын. Тудо Иуда мландыш да Иерусалимыш керылт пурен, калык вуйлатыше-влакым пуштын, а руалтен налме погым шке кугыжаж деке Дамаскыш колтен.24Сирий сарзе-влакын чотышт кугу лийын огыл гынат, Господь нунын кидыш пеш кугу сарзывийым пуэн, вет Иуда эрге-влак шке ача-кочаштын Господь Юмыштым коденыт улмаш. Тыге Иоаслан суд лийын.25Кунам сириян-шамыч тудым пеш чот сусыргышым коден каеныт, иерей Иодайын эргыжым пуштмылан Иоасын лишыл еҥже-влак тудын ваштареш заговорым ыштеныт. Нуно тудым шке вакшешыжак пуштыныт. Тыге Иоас колен, тудым Давид-Олаште, но кугыжа-влакым тойымо шӱгарлаште огыл тоеныт.26Иоас ваштареш заговорым ыштыше-влак Завад, аммон ӱдырамаш Шимеафан эргыже, да Иегозавад, моав ӱдырамаш Шимрифан эргыже, лийыныт.27Иоасын эргыже-влак нерген, тудын ваштареш шуко пророк шомакым ойлымо да Юмын пӧртым олмыктымыж нерген «Кугыжа-влакын курымсерыш книгаштышт» возымо. Иоас олмеш кугыжалан тудын Амасий эргыже шогалын.
Institute for Bible Translation, Finland