2 Кур.кн23
1Шымше ийын Иодай вийым налын. Тудо шӱдывуй-влак дене – Иерохам эрге Азарий, Иегоханан эрге Измаил, Овед эрге Азарий, Адай эрге Маасей, Зихри эрге Елишафат дене – ойпидышым ыштен.2Нуно пӱтынь Иуда мланде мучко коштын савырненыт. Тудын чыла олаж гыч левит-влакым да Израильын урлыквуйжо-шамычым погымеке, Иерусалимыш толыныт.3Погынышо-влак Юмын пӧртыштӧ кугыжа дене ойпидышым ыштеныт. Иодай нунылан каласен: «Кугыжан эргыже кугыжа лийшаш! Вет лач тыге Господь Давидын тукымжо нерген ойлен.4Теве мом те ыштышаш улыда. Тендан кокла гыч шуматкечын служитлаш толшо иерей ден левит-влакын икымше ужашыже капкам оролаш тӱҥалеш,5кокымшо ужаш – кугыжан пӧртым, кумшо ужаш – Иесод капкам. А уло калык тыгодым Господьын пӧртшын кудывечылаштыже лиеш.6Иерей да служитлаш толшо левит-влак деч моло нигӧ Господьын пӧртышкӧ пурышаш огыл, вет нуно святитлыме улыт, сандене пурен кертыт. А уло калык тек Господьын мом кӱштымыжым шукта.7Тек левит-влак кугыжа йыр шогалыт, кажныжын кидыштыже саргурал лийже. Кӧ храмыш пура, тыгайым кажныжым пуштса. Кугыжа кеч-кушко кая гынат, воктеныжак лийза».8Левит-влак да уло Иуда калык чылажымат иерей Иодайын кӱштымыж семынак ыштеныт. Кажныже шке еҥжым – шуматкечын служитлаш толшо да шуматкечын кайыше-влакым – поген, вет иерей Иодай черет дене служитлыше пӧлка кокла гыч иктыжымат колтен огыл.9Иодай шӱдывуй-влаклан Юмын пӧртыштӧ улшо Давид кугыжан умдыжо-шамычым, изи ден кугу авыртышыже-влакым пуэден.10Тудо уло калыкым кугыжам оролаш шогалтен, кажныжын кидыштыже саргурал лийын. Нунышт храмын кечывалвел гыч йӱдвел могыржо марте жертвенник ден пӧрт йыр шогеныт.11Вара кугыжан эргым луктыныт, вуйышкыжо кугыжан вуйшӱдышым упшалтеныт, кидышкыже закон книгам кучыктеныт да кугыжалан шогалтеныт. Иодай ден тудын эргыж-влак Иоасым шӱрен палемденыт да кугу йӱкын кычкыреныт: «Эсен лийже кугыжа!»12Куржталше да кугыжам саламлен кычкырыше калыкын йӱк-йӱанжым колмеке, Гофолия нунын дек Господьын пӧртышкӧ миен.13Тудо ужын: пурымаште кӱкшака верыште кугыжа шога, а тудын воктене – сарзывуй ден тӧтыретпучым пуалтыше-влак. Уло калык йывыртен кычкырен, тӧтыретпуч дене пуалтен, а семӱзгарым шоктышо мурызо-влак моктен муреныт. Тунам Гофолия ӱмбал вургемжым кушкедын да кычкыралын: «Заговор, заговор!»14Иерей Иодай сарзывийым вуйлатыше шӱдывуй-влакым ӱжын да нунылан каласен: «Тудым [храм гыч] тӱжваке лукса, а кӧ почешыже кая – керде дене пуштса». Вет иерей тыге каласен улмаш: «Тудым Господьын пӧртыштыжӧ ида пушт».15Гофолиям пӱтырен кученыт, кугыжан пӧртын Имне капкаж гоч луктыныт да тушан пуштыныт.16Господьын калыкше лияш манын, Иодай шкеже, уло калык да кугыжа ойпидышым ыштеныт.17Вара уло калык Ваалын храмышкыже каен да тудым сӱмырен, тыгак Ваалын жертвенникше ден статуйжо-влакым шырпын шалатен. А Матфаным, Ваалын онаеҥжым, жертвенник-влак ончылно пуштыныт.18Тидын деч вара Иодай Господьын пӧртыштӧ ыштышаш пашам Давидын палемдыме радамже почеш иерей ден левит-влаклан ӱшанен, [тыге тудо кажне кечын служитлыме черетым угыч пӧртылтен]. Нуно Давидын кӱштымыж почеш, Моисейын законыштыжо возымо дене келшышын, Господьлан йӱлалтен пуымо надырым куан дене, муро дене конден шогышаш улыт улмаш.19Иктаж амал дене ару огыл лийше еҥ пурен ынже керт манын, Господьын пӧртшын капкаже воктене Иодай орол-влакым шогалтен.20Тудо шӱдывуй, лӱмлӧ еҥ, калык вуйлатыше-влак да элысе уло калык дене пырля Господьын пӧртшӧ гыч кугыжам ужатен каен. Нуно Иоасым Кӱшыл капка гоч кугыжан пӧртыш пуртеныт да кугыжан престолыш шынденыт.21Элысе уло калыкым куан авалтен. Гофолиям керде дене пуштмеке, ола лыпланен.
Institute for Bible Translation, Finland