2 Кур.кн19
1А Иосафат, Иудан кугыжаже, мӧҥгыжӧ Иерусалимыш тыныс дене пӧртылын.2Тудын ваштареш ончыкужшо Ииуй, Ананий эрге, лектын. Тудо Иосафат кугыжалан каласен: «Тылат осал еҥлан полшаш да Господьым ужмышудымо-влакым йӧраташ кӱлеш ыле мо? Тидлан тыйын ӱмбакет Господьын шыдыже толеш.3Но тыйын поро пашатат улыт. Тый [Иуда] мландыште Ашера меҥге-влакым пытаренат да шке шӱметым Юмым кычалаш савыренат».4Иосафат Иерусалимыште илен. Тудо шке калыкшым Вирсавий деч Ефрем курыкла марте угыч ончал савырнен, нуным шке ача-кочаштын Господь Юмышт дек савырен.5Иуда мландысе кажне чоткыдемдыме олаште судья-влакым шогалтен.6Нунылан каласен: «Ончыза, мом ыштеда – те айдеме судым огыл, а Господьын судшым ыштеда. Суд пунчалым лукмыда годым Господь тендан дене лиеш.7Господь деч лӱдса, пашадам шот дене шуктыза. Вет мемнан Господь Юмына дене чындымылык, еҥым ойыркалымаш да взяткым налмаш уке».8Иерусалимыштат Иосафат икмыняр левитым, иерейым да Израильын южо урлык вуйлатышыжым Господьын судшым ышташ да ӱчашымашан йодышым лончылаш шогалтен. Нунышт Иерусалимыш толыныт.9Тудо нунылан кӱштен: «Господь деч лӱдын, те ӱшанлын, уло шӱм-чон дене пашам ыштышаш улыда.10Кунам шке олаштышт илыше тукым иза-шольыда-влак тендан ончыко кеч-могай ӱчашымашан пашам кондат, тудо вӱр йоктарымаш, закон йодыш, кӱштымаш, пунчал але йӱла дене кылдалтше лийже, те нуным туныктышаш улыда. Тек нуно Господь ончылно сулыкыш огыт пуро, тек Тудын шыдыже тендан ӱмбалне да иза-шольыда ӱмбалне ок лий. Тыге ыштен шогыза, тунам сулыкыш огыда пуро.11Господь дене кылдалтше чыла пашаште тендам кугу иерей Амарий вуйлатен шогаш тӱҥалеш. Зевадий – Измаил эрге, Иуда тукым вуйлатыше – кугыжа дене кылдалтше чыла пашалан вуйын шогаш тӱҥалеш. А левит-влак тек тыланда полшен шогат. Пеҥгыде лийза, пашадам тыршен ыштыза. Тек Господь порым ыштыше-влак дене пырля лиеш!»
Institute for Bible Translation, Finland