1 Куг28
1Тудо жапыште филистим-влак Израиль дене кредалаш сарзывийым погеныт. Анхус Давидлан каласен: «Пален шого: тый да тыйын еҥет-влак мый денем пырля сарыш каеда».2Давид тудлан вашештен: «Йӧра, тунам тый тарзетын мом ыштен кертмыжым ужат». Анхус Давидлан каласен: «Тугеже тый ӱмырешлан мыйын капоролем лият».3Самуил тиде жаплан колен улмаш, израильтян-влак тудын шотышто шортмо йӱлам эртареныт. Самуилым Рамаште, шочмо олаштыже, тоеныт. Саул колышын чонжым ӱжын лукшо ден юзо-влакым чылаштым эл гыч поктен колтен улмаш.4Филистим-влак погынен каеныт да стан дене Сунемыште шогалыныт. Саулат уло израиль сарзывийым поген да стан дене Гелвуйышто шогалын.5Филистим станым ужмеке, Саул лӱдын колтен да шӱмжӧ чот пырткаш тӱҥалын.6Саул Господь деч каҥашым йодын. Но Господь тудлан омо гочат, урим гочат, пророк-влак гочынат вашмутым пуэн огыл.7Тунам Саул шке тарзыж-влаклан каласен: «Колышын чонжым ӱжын лукшо юзо ӱдырамашым кычал муза. Мый тудын деке каем да тудын деч йодам». Саулын тарзыже-влак тудлан каласеныт: «Тыгай юзо ӱдырамаш Ен-Дорышто уло».8Саул шке вургемжым кудашын, весым чиен да, пеленже кок еҥым налын, корныш тарванен. Нуно ӱдырамаш деке йӱдым толыныт. Саул тудлан каласен: «Тыйым йодам: кӧм мый каласем, тудын чонжым мыланем ӱжын лук».9Но ӱдырамаш тудлан вашештен: «Тый вет Саулын мом ыштымыжым палет, кузе тудо эл гыч колышын чонжым ӱжын лукшо ден юзо-влакым поктен колтен. Молан тый мыйын чонемлан оптышым шындет, мыйым пуштнет мо?»10Саул тудлан Господь дене товатлен ойлен: «Господь дене товатлем: тидым ыштыметлан мутым кучаш от тӱҥал».11Тунам ӱдырамаш йодын: «Кӧм ӱжын лукташ?» Саул вашештен: «Мылам Самуилым ӱжын лук».12Самуилым ужын, ӱдырамаш чот кычкырал колтен да Саул деч йодын: «Молан тый мыйым ондаленат? Тый Саул улат!»13Кугыжа тудлан каласен: «Ит лӱд. [Каласе,] мом ужат?» Ӱдырамаш вашештен: «Ужам юмо гайым, мланде гыч лекшым».14«Сынже дене тудо могай?» – йодын Саул. Ӱдырамаш каласен: «Мланде гыч кужу вургемым чийыше шоҥго пӧръеҥ лектеш». Тиде Самуил улмым умылымеке, Саул вуйжым мланде марте савен.15Самуил Сауллан каласен: «Молан мыйым тургыжландарет, молан ӱжат?» Саул вашештен: «Мылам пеш неле. Филистим-влак мыйын ваштарешем кредалыт. А Юмо мый декем тупынь савырнен да тетла пророк-влак гочат, омо денат, [кончымаш гочат] мылам вашмутым ок пу. Садлан мый тыйым ӱжын луктым. Каласе, мом мыланем ышташ?»16Самуил каласен: «Господь тый дечет кораҥын да тушманет лийын гын, молан мый дечем йодат?17Мом Господь мыйын гоч ойлен, тудым ыштен: тыйын кидет гыч кугыжанышым налын да вес еҥлан, Давидлан, пуэн.18Тый Господьым колыштын отыл: Тудын шыдыжым амалик-влак ӱмбаке велен отыл, садлан Господь кызыт тидым тый денет ышта.19Господь тыйым да Израильым филистим-влак кидыш пуа: тый да тыйын эргыч-влак эрла мый денем лийыда, тыгак израиль станымат Господь филистим-шамычлан пуа».20Саул тунам Самуилын шомакше деч пеш чот лӱдын да мландымбак шуҥгалтын. Адакшым тудын вийжат кодын огыл, вет кечыгут нимом кочкын огыл улмаш.21Ӱдырамаш Саул деке лишемын, тудын чот лӱдмыжым ужын да каласен: «Теве тарзет тыйым колыштын да, шке илышыжлан лӱдыкшым ыштен, кӱштыметым шуктен.22Ынде йодам, тыят тарзетын ойжым колышт: мый кинде шултышым кондем, корныш тарванымет деч ончыч пурл – виет пура».23Но Саул тореш лийын да каласен: «Ом коч». Тудын тарзыже-влакат ӱдырамаш дене пырля Саулым сӧрвалаш тӱҥалыныт. Тунам тудо мутыштым колыштын, мландымбач кынелын да теҥгылыш шинчын.24Ӱдырамашын суртыштыжо ӧрдыктарыме презе лийын. Тудо содор презым шӱшкылын. Вара ложашым налын да руашым луген, шергиндым кӱэштын.25Чыла тидым Саул ден тарзыже-влак ончыко конден шынден. Нунышт кочкыныт да тудо йӱдымак каеныт.
Institute for Bible Translation, Finland