1 Куг27
1Давид шке семынже шонен: «Кунам-гынат мый Саулын кидышкыже логалам. Мылам филистим мландыш куржман, вес семын ок лий. Тунам Саул мыйым поктылаш да пӱтынь Израиль мучко кычалаш ок тӱҥал, да мый тудын кидше деч утлем».2Давид шке кудшӱдӧ еҥже дене Маох эрге Анхус деке, Геф кугыжа деке, каен.3Давид ден тудын еҥже-влак, кажныже шке ешыж дене, Гефыште Анхус дене иленыт. Давид дене пырля тудын кок ватыже – Изреель гыч Ахиноама да Кармил гыч Авигея, Навал деч кодшо тулык вате – лийыныт.4Давид Гефыш куржын манын, Сауллан увертареныт, да тудо Давидым кычалмыжым чарнен.5Давид Анхуслан каласен: «Тыйын шинчаштет поро кумылым суленам гын, тек мылам иктаж изи олаште верым ойырат. Мый тушто илаш тӱҥалам. Молан мылам, тыйын тарзетлан, кугыжан олаште тый денет пырля илаш?»6Тунам Анхус тудлан Секелагым пуэн. Садлан Секелаг кызыт мартеат Иуда кугыжа-влакын кидыштышт улеш.7Давидын филистим мландыште илыме жапше ик идалыкат ныл тылзе шуйнен.8Давид шке еҥже-влак дене лектеден да гесур, гирзей, амалик-влак ваштареш сар дене коштын. Нунышт шукертсек тиде мландым Сур марте, эсогыл Египет марте айленыт.9Давид тиде мландым пустаҥден шоген. Тудо пӧръеҥымат, ӱдырамашымат илышым коден огыл, а тыгыде ден шолдыра вольыкым, осёл ден верблюдым, вургемым пеленже налын да Анхус деке мӧҥгеш пӧртылын.10Кунам Анхус Давид деч йодын: «Тиде гана кӧн ӱмбак керылтында?», Давид тудлан тыге вашештен: «Иуда мландын кечывалвел ужашышкыже», «Кечывалвел мландысе иерахмеел-влак ӱмбаке» але «Кечывалвел мландысе кеней-влак ӱмбаке».11Давид пӧръеҥымат, ӱдырамашымат илышым коден огыл, нуным Гефыш конден огыл. Тудо шонен: «Мемнан нерген нуно тыге каласен кертыт: ”Теве кузе Давид ыштен”». Филистим мландыште лиймыж годым тудо тыге ыштеден.12Анхус Давидлан ӱшанен, тудо тыге ойлен: «Давид шке Израиль калыкшылан йырнык лийын, ынде тудо курымешлан мыйын тарзем лиеш».
Institute for Bible Translation, Finland