1 Куг24
1Давид тушечын каен да Ен-Гедин сип верлаштыже илен.2Кунам Саул филистим-влак дене кредалмекше пӧртылын, тудлан увертареныт: «Теве, Давид – Ен-Геди ир мландыште».3Пӱтынь Израиль гыч кум тӱжем виян сарзым ойырен налын, Саул Давидым да тудын еҥже-влакым Ирказа курыклашке кычал каен.4Тудо корно воктене улшо шорык пече деке толын. Туштыжо курыкпомыш лийын. Саул тушко кӱлеш сомыл дене пурен. А Давид ден тудын еҥже-влак лач тиде курыкпомышышто эн шеҥгелне шинченыт.5Давидын еҥже-влак тудлан каласеныт: «Теве саде кече, тудын нерген тылат Господь ойлен: ”Мый тушманетым тыйын кидышкет пуэм. Тый тудын дене мом шоныметым ыштет”». Давид кынелын да Саулын ӱмбал вургем урвалтыжым йыштак пӱчкын налын.6Но тидын деч вара Давидын шӱмжылан кочын чучын.7Шке еҥже-влаклан тудо каласен: «Кидем тудын ӱмбак нӧлталаш? Тудо – Господьын шӱрымӧ еҥже! Шке озамлан, Господьын шӱрымӧ еҥжылан, тыгайым ыштыме деч Господь мыйым аралыже!»8Тиде шомакше дене Давид шке еҥже-влакым чарен шогалтен, Саул ваштареш кынелаш пуэн огыл. А Саул кынелын, курыкпомыш гыч лектын да корным умбакыже шуен.9Вара Давидат курыкпомыш гыч лектын да Саул почеш кычкыралын: «Кугыжа, мыйын озам!» Саул шеҥгек савырнен ончалын. Давид тудлан вуйжым мланде марте савен.10Тудо Сауллан каласен: «Молан тый ”Давид тылат осалым ышташ шона” манын ойлышо еҥ-влакым колыштат?11Теве кызыт шке шинчат дене ужат: Господь тыйым таче курыкпомышто мыйын кидышкем пуэн ыле. Мыланем тыйым пушташ ойлышт. Но мый тыйым чаманен кодышым да каласышым: ”Озам ӱмбаке кидем ом нӧлтал, вет тудо Господьын шӱрымӧ еҥже”.12Ончал, ачаем, ончал: мыйын кидыштем – вургем урвалтетын мучашыже! Мый тудым пӱчкын нальым, но тыйым шым пушт. Пален шого: мый нимогай осалым ыштен омыл, вуянче лийын омыл, тыйын ваштарешет сулыкыш пурен омыл. А тый чонем кычалат, мыйым пуштнет.13Тек Господь мемнан коклам ончен лектеш, тек мылам верч ӱчым тыланет Тудо шукта. Но мый ӱмбакет кидем ом нӧлтал.14Вет акрет годсо калыкмут тыге ойла: ”Осал еҥ дечын осал паша лектеш”. А мый кидем ӱмбакет ом нӧлтал.15Кӧн ваштареш Израиль кугыжа лектын? Кӧм тый поктыл коштат? Колышо пийым, ик шуршым!16Тек Господь судья лиеш да мемнан коклам ончен лектеш. Тек Тудо ончен налеш, мыйын пашам шымла да мыйым кидет деч утара».17Кунам Давид ойлымыжым чарнен, Саул каласен: «Тиде тыйын йӱкет мо, Давид эргым?» – да йӱкын шортын колтен.18Тудо Давидлан каласен: «Тый мый дечем чынрак ыштенат, вет тый мылам поро дене тӱленат, а мый тылат – осал дене.19Тый тидым таче мый декем поро лиймет дене ончыктенат. Кунам Господь мыйым тыйын кидышкет пуэн, тый мыйым пуштын отыл.20Кӧ, шке тушманжым мумеке, тудым поро дене колта ыле? Таче мылам мом ыштыметлан Господь тыланет поро дене пӧртылта.21Ынде мый палем: тый, кернак, кугыжа лият, да Израиль кугыжаныш тыйын кидыштет пеҥгыде лиеш.22Господьын лӱмжӧ дене товатле: мый дечем вара тый мыйын урлыкем от пытаре, ачамын тукымыштыжо мыйын лӱмем ӱштын от кудалте».23Давид Сауллан товатлен. Саул мӧҥгышкыжӧ каен, а Давид ден тудын еҥже-влак шке шылме верышкышт кӱзеныт.
Institute for Bible Translation, Finland