1 Куг19
1Саул шке Ионафан эргыжлан да чыла тарзыжлан Давидым пушташ кӱштен. Но Ионафан, Саулын эргыже, Давид деке пеш шӱман лийын.2Тудо Давидлан увертарен: «Саул ачам тыйым пушташ кычалеш, садлан эрла шеклане. Шыл да шолып верыште лий.3А мый лектам да нурышто, кушто тый лият, ачам воктеке шогалам, тудын дене тыйын шотышто кутыралтем. Мом пален налам, тылат каласем».4Ионафан Саул ачажлан Давид нерген сай мутым ойлен: «Кугыжа шке Давид тарзыж ваштареш сулыкыш ынже пуро, вет тудо тыланет нимогай осалым ыштен огыл. Тудо шке пашаж дене тылат сайым веле конден.5Шке илышыжым чаманыде, тудо филистим еҥ ваштареш лектын, да Господь пӱтынь Израильлан пеш кугу сеҥымашым колтен. Тый тидым ужынат да куаненат. Молан тый, титакдыме вӱрым йоктарен, сулыкыш пурынет да амал деч посна Давидым пуштнет?»6Саул Ионафаным колыштын да товатлен: «Господь дене товатлем – Давид ок коло».7Ионафан Давидым ӱжын да тудлан чыла тиде мутым каласкален пуэн. Ионафан Давидым Саул деке конден, да тудыжо ончычсо семынак Саул пелен лийын.8Адакат сар тӱҥалын. Давид лектын, филистим-влак дене кредалын да нуным кырен шалатен. Нунышт тудын деч куржыныт.9Саулым адакат Юмын колтымо осал шӱлыш авалтен. Тудо шке пӧртыштыжӧ шинчен, кидыштыже умдо лийын. А Давид кӱслем шоктен.10Саул Давидым умдо дене пырдыжыш керал шындаш тӧчен, но Давид кораҥын шуктен, да умдо пырдыжыш керылтын. Давид тиде йӱдым куржын утлен.11Давидым ваҥаш да эрдене пушташ манын, Саул тудын пӧртшӧ дек шке тарзыж-влакым колтен. Давидлан Мелхола ватыже каласен: «Тиде йӱдым от курж гын, эрла тыйым пуштыт».12Мелхола Давидым окна гыч волтен колтен, да тудо куржын утлен.13Мелхола шояк юмо статуйым налын да вакшышыш пыштен, вуйжым каза коваште дене пӱтыралын да вургем дене леведын.14Давидым кучаш Саул тарзыже-влакым колтен, но Мелхола каласен: «Тудо черле».15Тунам Саул тарзыже-влакым Давид деке угыч колтен, тыге каласен: «Тудым мый декем вакшышыжге кондыза, мый тудым пуштам».16Тарзе-влак толыныт да вакшышыште статуйым муыныт, вуйжо каза коваште дене пӱтыралме лийын.17Тунам Саул Мелхолалан каласен: «Молан тый мыйым ондаленат, тушманемлан куржаш пуэнат?» Мелхола Сауллан вашештен: «Тудо мыланем каласыш: ”Мыйым колто, уке гын тыйым пуштам”».18Давид куржын утлен да Рамашке Самуил деке толын. Давид тудлан Саулын тудын дене мом ыштымыжым чыла каласен. Самуил дене пырля тудо [Рамасе] Навафыш каен, да нуно тушанак кодыныт.19Сауллан увертареныт: «Давид Рамасе Навафыште».20Давидым кучаш Саул шке тарзыже-влакым колтен. Кунам нунышт пророклен ойлышо пророк тӱшкам да нуным вуйлатыше Самуилым ужыныт, Юмын Шӱлыш Саулын тарзыже-влак ӱмбакат волен, да нунат пророклен ойлаш тӱҥалыныт.21Тидын нерген Сауллан увертареныт. Тудо вес тарзыже-влакым колтен, но нунат пророклен ойлаш тӱҥалыныт. Вара Саул кумшо тарзе тӱшкам колтен. Нунат пророклен ойлаш тӱҥалыныт.22Тунам [шыдешкыше] Саул Рамашке шкежак каен, Сефыште улшо кугу таве деке миен шуын да йодын: «Самуил ден Давид кушто улыт?» Тудлан вашештеныт: «Рамасе Навафыште».23Саул Рамасе Навафыш каен, да тудын ӱмбак Юмын Шӱлыш волен. Тудо ошкылын да, Рамасе Навафыш толын шумешкыже, эре пророклен ойлен.24Саулат вургемжым кудашын да Самуил ончылно пророклен ойлен. Кече мучко, йӱдвошт тудо вургем деч посна киен. Садланак вет тыге ойлат: «Саулат пророк лийын мо?»
Institute for Bible Translation, Finland