1 Куг12
1Самуил уло Израильлан каласен: «Мом те мыланем ойлен улыда, мый чыла колыштым да тыланда кугыжам шогалтышым.2Ынде тендам кугыжа вуйлата. Мый шоҥгемынам да чалемынам, но мыйын эргым-влак тендан дене пырля улыт. Мый тендам самырык жапем гыч таче кече марте вуйлатенам.3Теве мый улам. Господь ончылно да Тудын шӱрен палемдымыж ончылно мыйын ваштареш таныклен каласыза: кӧн ӱшкыжшым налынам, кӧн – осёлжым, кӧм темденам, кӧм шыгыремдылынам, судитлыме годым шинчам петыраш манын, кӧн деч пӧлекым налынам – мый тыланда чыла пӧртылтем».4Тудлан вашештеныт: «Тый мемнам темден отыл, шыгыремденат отыл да нигӧн ниможымат налын отыл».5Самуил нунылан каласен: «Господь ден Тудын шӱрен палемдымыже таче кечын тидлан танык улыт – те мыйын ваштареш нимомат муын огыдал». Нунышт маныныт: «Господь тидлан танык».6Тунам Самуил калыклан каласен: «Господь [тидлан танык, Тудо] тыланда Моисей ден Аароным пуэн да ача-кочадам Египет мланде гыч луктын.7Ынде ончыкем шогалза – мый тендам Господь ончылно титаклаш тӱҥалам, Тудын тыланда да кугезыда-влаклан ыштыме чыла поро пашажым шарныктем.8Кунам Иаков Египетыш толын да тендан кугезе кочада-влак Господь деч полышым йодын кычкыреныт, Господь нунын деке Моисей ден Аароным колтен. Нунышт кугезе кочада-влакым Египет гыч луктыныт да тышан вераҥденыт.9Но нуно Господьым, шке Юмыштым, монденыт. Садлан Тудо нуным Асорын Сисара сарзывуйжо кидыш, тыгак нунын дене кредалше филистим-влак ден Моав кугыжан кидышкышт пуэн.10Тунам нуно Господь деч полышым йодын кычкыреныт да тыге ойленыт: ”Ме сулыкыш пуренна: Господьым коден, Ваал ден Астарта-влаклан кумалаш тӱҥалынна. Но кызыт мемнам тушман кид гыч утаре, ме Тыланет служитлаш тӱҥалына”.11Тунам Господь Иероваалым, Варакым, Иеффайым, Самуилым колтен да тендам йыр илыше тушман-влакын кидышт деч утарен – те лӱдыкшым палыде иленда.12Но Наасын, аммон кугыжан, тендан ваштареш толмыжым ужын, те мылам каласышда: ”Уке, тек мемнан дене кугыжа вуйлата”. А тендан кугыжада – Господь, тендан Юмыда.13Тугеже, теве тендан ойырен налме кугыжада, тудым те йодында. Теве ынде Господь тыланда кугыжам шогалтен.14Господь деч лӱдаш, Тудлан служитлаш, Тудым колышташ тӱҥалыда да кӱштымыжлан огыда торешлане гын, теат да вуйлатыше кугыжадат Господь Юмыдан корныж дене коштыда гын, [Господьын кидше тендан ваштареш огеш лий].15А Господьын мутшым огыда колышт, Тудын кӱштымыжлан торешланеда гын, Господьын кидше, тендан кугезыда ваштареш лийме семынак, тендан ваштареш лиеш.16Ынде шогалза да ончалза: Господь тендан шинча ончылныда ӧрыктарыше пашам ышта.17Кызыт шыдаҥ тӱредме жап огыл мо? Но мый Господьым ӱжын йодам, да Тудо кӱдырчӧ ден йӱрым колта. Тунам те пален налыда да умыледа – шкаланда кугыжам йодмо дене Господь шинча ончылно могай кугу сулыкым ыштенда».18Самуил Господьым ӱжын йодын, да Господь тудо кечын кӱдырчӧ ден йӱрым колтен. Уло калык Господь ден Самуил деч пеш чот лӱдын.19Калык Самуиллан каласен: «Мыланна колаш огыл манын, тарзет-влак верч шке Господь Юметлан кумал. Вет шкаланна кугыжам йодмо дене ме чыла сулыкна деке эше тиде сулыкым ешаренна».20Самуил калыклан вашештен: «Ида лӱд. Те сулыкым ыштенда, но ынде Господь деч ида кораҥ, Тудлан уло шӱмда дене служитлыза.21Полган юмо-влак почеш ида кай: нуно пайдам огыт кондо, огыт утаре – нуно нимолан йӧрдымӧ улыт.22Кугу лӱмжылан кӧра Господь шке калыкшым коден ок кай, вет Тудо тендам шке калыкшым ышташ шонен пыштен.23Тыгак мыят Господь ончылно сулыкыш ынем пуро: тендан верч кумалмем ом чарне. Мый тендам поро да чын корныш виктарен шогаш тӱҥалам.24Господь деч гына лӱдса да Тудлан уло шӱмда дене ӱшанлын служитлыза. Вет могай кугу паша-влакым Тудо тыланда ыштен – те ужында.25Но осалым умбакыжат ышташ тӱҥалыда гын, тунам теат, тендан кугыжадат пытеда».
Institute for Bible Translation, Finland