Waloma4
1Hinu tulonge kyani kulongelela tati wa twenga Ibulahimu? Awesaghuli kumanya vila mundu kangujumilwa kuulongolo gha Sapanga.2Ikiva Ibulahimu ajumilililwi kwa matendu ghaki, hinu, avile na kindu kya kulidumbila ila ng'ogha kuulongolo gha Sapanga.3Kwaikiva Mayandiko gha Sapanga yalongile, “Ibulahimu amkwinilili Sapanga na Sapanga akamjumila.”4Mghola lihengu anguhipwa msahala, msahala ghaki ng'ogha hupo ila anguhipwa kila angupalwa kuhipwa.5Ila mundu mweni kuliwachila ng'ogha yiwa matendu ghaki yangumtanga, badili ghaki angumkwinila Sapanga yula mweni kuwajumila wandu wahakata, kukwinila kwaki mundu hayu ivalangililwa yiwa ni wa chakaka.6Daudi hila hila alongili nagha nagha paalongili habali zya highili kwa mundu yula avile Sapanga angumjumilila, akileka kuvalanga matendu ghaki.7“Wahighilwa wala wavile uwakata wau ulekeselwa wavile sambi zyao zihumiswa.8Kahighilwa mundu yula avile Sapanga kavika ng'ogha ngumbungumbu gha sambi zyaki.”9Ghuli, haku kuhighilwa ni kwa wala wayingiswa jandu wekayao, au na kwa wala wayingiswa ng'ogha jandu? Tungulonga, “Ibulahimu akwinilili, na mweni Sapanga akamjumila.”10Ghuli, Ibulahimu ajumilililwi pambila gha kuyingiswa jandu, au badili gha kuyingiswa jandu? Pambila gha kuyingiswa jandu, na ng'ogha badili gha kuyingiswa jandu.11Ibulahimu ayingisilwi jandu kuulongolo, na kuyingiswa jandu haku kuwelili ni kilangihi kyeni kuhighilisa yiwa Sapanga amjumilili kuwela mweni ulungwana kwaikiva gha ukwinila ghaki hula awelili nau pambila gha kuyingiswa jandu. Kwa nagha Ibulahimu kawela tati wa wala wogha weni kukwinila pamonga na yiwa wayingiswa ng'ogha jandu, wamkwinila Sapanga, wakajumilwa na Sapanga.12Hilahila mweni ni tati wa wala wayingiswa jandu kwa kukwinila, ikiva wangumkwinila Sapanga. Ila ng'ogha kwaikiva gha kuyingiswa jandu, ila ni kwaikiva gha kukovekela njila hila hila gha kukwinila vila tati wa twenga Ibulahimu aikovekelili pambila gha kuyingiswa jandu.13Sapanga amlaghilili Ibulahimu na wawelekwa ghaki yiwa mlima wogha ungaliwela wa weni. Lilaghano hali ligholwa ng'ogha kwaikiva Ibulahimu ayitikilili selia, ila kwaikiva akwinilili, akajumilwa kuwela mlungwana.14Handa alongile Sapanga ni kwa wala weni kuyitikila selia gha Sapanga ampeghili Musa, hinu ukwinila utevile ng'ogha na samani yoyosi, na hagha alongile Sapanga ni yaghi yaghi.15Selia ndiwa ingughola wandu wanyokolwe na Sapanga, hinu papawela ng'ogha na selia kutewela ng'ogha na lilaka kwa Sapanga.16Kwa nagha, akilongile Sapanga kinguhika kwa njila gha ukwinila, hinu mghalu hau unguwela nagha kwa kupitila ulungwana wa Sapanga, na ni chakaka kilongelwa haki ni kwaikiva gha wandu wogha: ng'ogha kwa wala weka weni kukola selia, ila hilahila kwa wala weni kulama kwa ukwinila handa Ibulahimu. Avile ni tati wa twenga wogha.17Handa iyandikilwi, “Nikughola wenga kuwela tati wa milima mitangala.” Mghalu hau uwelili maha kumihu gha Sapanga, yula akwinililwi na Ibulahimu, Sapanga mweni kuwapegha wandu ukomu, na kuvika vindu vila viwela ng'ogha vikawela.18Abulahamu pakalongelwa mighalu hai iwelili yuyughu ng'ogha kukwinila ila ayendelelili kukwinila na kutumainila yiwa Sapanga atemghola kuwela tati wa milima itangala, kwaikiva Sapanga awelili kamlongela Ibulahimu, “Utewela na uwelekwa utangala handa ndondwa.”19Abulahamu lipindi hali awelili mgogolo wa machuva yahika imia imonga, ila ukwinila ghaki usisila ng'ogha pamonga na yiwa amanyilli yiwa higha ghaki iwelili handa kahova, na hilahila mhumbu ghaki Sala, awelili kawesa ng'ogha kukola ndumbu kwaikiva gha ugogolo.20Ila Abulahamu avikili ng'ogha holu kwa kila alongelilwi na Sapanga, ila ayendelelili kuwela na makakala kuukwinila na kumuyinula Sapanga,21kunu Abulahamu akiwela na uhighilisu yiwa Sapanga kana uweso wa kughola lila amlongelili.22Hai ndiwa njila, “Imgholile Sapanga amjumili Abulahamu kuulongolo ghaki yiwa kammaha.”23Pailongwa, “Kamjumila,” ilongwa ng'ogha kwaikiva gha mweni weka yaki hela.24ila mghalu hau ungutulongela twenga hilahila tuvile tungumkwinila Sapanga yula amuhindulili Yesu, Bambu wa twenga, kuhuma kukihu.25Yesu ahumisilwi ahovi kwaikiva gha sambi zyetu, na mweni ahindukili kwaikiva gha twenga ili tujumiliki kuulongolo gha Sapanga.
The Word for the World International