Waloma3
1Hinu, Myahudi kana liki kupiti wandu ghangi? Au kuyingiswa jandu kuvile na fwaida liki?2Hina kuvili na fwaida kunjila zitangala. Kwaikiva Sapanga ahaghulile kuwapegha Wayahudi ujumbi ghaki.3Ila itewela ghuli ikiva amonga ghao wawelili ng'ogha wachakaka? Ghuli, Sapanga atewela ng'ogha mchakaka kwa kila angupalwa kukighola?4Katu! Sapanga atewela mchakaka machuwa hyogha bila mwihu, pamonga na yiwa kila mundu kamuhwangi. Handa Mayandiko gha Sapanga yangulonga, “Kila paulonga, ungulonga chakaka, na kukulamula, wenga ungusinda.”5Ila kwa njila gha mahakata ghala tungughola, Sapanga anguwoneka kuwela ni mweni haki, ghuli tulongi Sapanga angukosela paatunyokola? Ningulongela kwa mawachilo gha kimundu.6Katu! Ikiva ingaliwela nagha, Sapanga angaliwesaghuli kulamula wandu?7Mundu anguwesa kukonya, handa uhwangi wa nenga ungutanga kuwonesa chakaka gha Sapanga na kuyongesa ukwilikihi ghaki, kwa kyani hinu nenga ningulamulwa yiwa mweni sambi?8Hai ni handa na kulongela,“Tuweli tukighola sambi ili yahiki gha maha.” Wandu waghangi tukupikila yiwa hata twenga tunguvula handa nagha. Uloli, hagha wogha watanyokolwa kukovekelana na mahakata ghao.9Hinu tunguwesa kulonga liki? Ghuli, twenga Wayahudi ni wamaheli kupiti waghangi? Hata mayaghani. Kwaikiva nilangiha kala yiwa Wayahudi na Wayahudi ng'ogha wogha wavile na sambi.10Handa Mayandiko yangulonga, “Kwahela hata mundu mmonga mweni kuwela mmaha kuulongolo gha Sapanga,11kwahela mundu mweni umanyi wa chakaka, kwahela hata mmonga mweni kupala kumyupa Sapanga.12Wogha wabyodoka, kwahela mweni kughola gha maha, kwa hela mweni kughola ulungwana, kwahela hata mmonga.”13Milando mihakata inguhuma kumilomo ghao handa mnungilo mhakata, Na weni wangungonga wandu machuwa hyogha na kuwaghola watili. Milando ghao inguwahakila wandu handa sumu gha njoka ingughola.14Milando ghao imema vilapo vikalipa kwa waghangi na kuwahakila.15Wandu hagha wanguloposela kuhakila na kukoma waghangi,16Kokosi wanguyenda wangukologhanya na kuyalamisa na kuwaleka wandu wakiwela na unyengemalu.17Njila gha kulikala kwa kuponga waimanya ng'ogha.18“Wavile ng'ogha na utundamilo kwa Sapanga.”19Hinu, tungumanya yiwa chochose kilongelwa na laghilo lya Sapanga ampeghili Musa, kinguwalongela wala weni kulongoswa na laghilo ili kukotoho kuwela na wakulitetela lipindi wandu wa mlima wogha pawalamulwa na Sapanga.20Kwa nagha kwahela mundu hata mmonga atewoneka wamaha kuulongolo gha Sapanga kwa matendu gha selia, kwaikiva selia ingutughola tumanyi sambi weka.21Ila hinaa, njila gha Sapanga gha kuwajumila wandu kuwela wa maha kuulongolo ghaki ihighiliswa kala, bila kuhyaghamila selia. Selia na Walota wanguhighilisa mghalu hau.22Haku kujumilwa na Sapanga kunguhika kupitila kumkwinila Yesu Kilisito kwa wala wogha wamkwinila kwaikiva kwahela mlekanu wowosi paghati gha Myahudi na Wayahudi ng'ogha,23wandu wogha wagholile sambi na kulepelelwa kughola kila akipalile Sapanga wagholi.24Ila wangujumilika kuulongolo gha Sapanga kwa ulungwana ghaki Sapanga kwa njila gha Kilisito Yesu yula atuvikili tuweli pekesu kuhuma kusambi tusighola.25Sapanga kamhumisa Yesu lukani, kwa mwahi ghaki, aweli njila gha kuwahumisila wandu sambi syau kwa ukwinila ghao kwa mweni. Agholile nagha ili apati kulangiha yiwa mweni ni mlungwana. Haku dahile Sapanga awelili angufumilila bila kuziwachilila sambi sya wandu.26Agholili nagha ili kuwonesa uchakaka nesu lipindi hali, kwa kuwaghola wandu wajumiliki kwa mweni wandu wala weni kumkwinila Yesu Kilisito.27Hinu, tunguwesa kujitutumulila kyani? Kwa hela. Kwa kyani? Ghuli, kwaikiva gha kutimilisa selia? Ng'ogha. Ila. Kwa ikiva tungukwinila.28Kwaikiva twalola yiwa Sapanga kamjumila ng'ogha mundu kuwela mlungwana kwa kutimilisa selia ila kwa kumkwinila Yesu.29Ghuli, Sapanga ni Sapanga wa Wayahudi wekayao? Ghuli, mweni ng'ogha Sapanga wa wandu wavile ng'ogha Wayahudi hilahila? Hina, mweni ni Sapanga wa wandu wavile ng'ogha Wayahudi hilahila.30Kwaikiva kuvile na Sapanga mmonga hela. Na ni mweni atewavalanga Wayahudi na wandu wavile ng'ogha Wayahudi kujumilwa kuulongolo ghaki kwa njila gha kukwinila kwa kila mmonga.31Hinu tunguwesa kulonga kwaikiva gha kukwinila tunguwesa kubadilisa selia? Katu hata mayaghani. Ila tunguitimilisa Selia.
The Word for the World International