Ugubutulo9
1Mtumikila wa mhanuo na mweni akapulila lipembi lya limgambo. Na nenga nikalola ndondwa iguwili pahi gha mlima kuhuma kundumba. Na yeni ipeghilwi ufunguu wa liwumba litali liyendelela.2Ndondwa hai ikawopola liwumba hali lya kumambi, kukahumila lyohi kuhuma kulitanuli likulunga nesu. Lijua na kunani vikatawa lwisa kwa lyohi hali lyeni kuhuma kumambi.3Hinu kulyohi lila wakahuma nzige, wakalandala kumlimawogha, wakapeghwa makakala gha kuluma handa inge.4Wakalongelwa wakotoho kuyalamisa manyahi gha mlima wala mahamba wala libiki lolosi, ila wawayalamisi wala weni kuvikwa ng'ogha muuli wa Sapanga kukivungi kya wuso.5Nzige wala walekeselwa ng'ogha kuwakoma wandu, ila kuwahakila hela kwa lipindi lya miehi mhano. Lusungu yatewakola wala weni kulumwa na hagha nzige ni handa kulumwa na inge.6Lipindi hali wandu watehakula kihu, ila watekilola ng'ogha, watewela na luhujulu lwa kuhova ila kihu kitewatua.7Nzige wala wawonekanili handa falasi wenikuyandalwa kwa ngondu. Kumutu wavwalile hindu iwonekanili handa likokoma lya zahabu. Wuso ghao uwonekanili handa wuso wa mundu.8Hwila zyau ziwelili handa hwila zya wadala, na malino ghao yawelile handa malino gha himba.9Vitivi vyau viwelili vigubikwa vindu handa lipangalala lya lyuma. Lilowi lya mbapatilu ghao liwelile handa lilowi lya mwanja wa mbutuka zya falasi watangala weni kutuwila kungondu.10Wawelili na mikila na mihomi handa inge, na kwa mikila hila, wawelili na makakala gha kuwaluma wandu kwa lipindi lya miehi mhano.11Kangi wawela na nkosi mweni kuwalongosa, na mweni ndiwa mtumikila wa kumambi, lihina lyaki kwa Kiebulania ni Abadoni, na kwa Kigiliki ni Apolioni, ikimaanisa mweni kuyalamisa.12Lung'ai ngulu lwa mtumbulo lupita kala, yambila maghangi maivili yanguhika.13Yapitili hagha mtumikila wa isita akapulila lipembi lya limgambo. Na nenga nikahyoghanila lilowi limonga kuhuma kupembi zinjechi zya kihanja kya zahabu kya kulungusila ubani lyeni kuwela kuulongolo gha Sapanga.14Lilowi hali likamlongela hayu mtumikila wa isita wa Sapanga mweni lipembi lya limgambo, “Uwawoposeleli watumikila wanjechi weni kuwopwa kweni lweni mkulunga Fulati!”15Mweni akawawoposelela watumikila hagha wanjechi weni kuwela wayandalwa kwaikiva gha lisaa lila lya lichuwa lya mwei hula wa lichuva lilalila, kukoma selusi imonga gha wandu wogha.16Nikahyoghanila utangala wa watovangondo wawakwelili falasi wawelili imilioni imia ivili.17Havi ndiwa niwalola hagha falasi na wakwela falasi kumawonu, wakwela falasi wawelile na mapangalala kuvitivi yenikuwela lyotu weka, yeni langi ngeli nesu na buluu na njanu handa langi gha baluti. Nikalola mutu gha falasi uwelili handa wa himba, na kumilomu ghao kuwelili kukihuma lyoto na lyohi na madini gha kibaliti.18Selusi gha wandu wahovili kwa matovo hagha maitatu, kwa lyoto na lyohi na madini gha baluti vyenikuhuma kumilomu gha wala falasi,19kwa vila makakala gha hagha falasi yawelili kumilomu ghao na kumikila ghao. Mikila ghao ilandanili na njoka na iwelili na mutu, na weni watumilili hila kuwahakila wandu.20Wandu waghangi wahighalili wenikuwela wakomilwi ng'ogha na matovo yala, wamyukila ng'ogha Sapanga na waleka ng'ogha sambi bali wayendelelile kutumainila vindu wavigholile kwa mawoko ghao ili kuviyupila. Walekili ng'ogha kuyupa mahoka na ming'omung'omu yenikuhongolwa kwa zahabu na feza na shaba na maganga na mibiki na vindu vyenikuwesa ng'ogha kulola wala kuhyoghanila wala kutyanga.21Wandu wala wamyukila ng'ogha Sapanga na waleka ng'ogha sambi zyao gha kukoma na uhawi na ngongola, na wihi.
The Word for the World International