Ugubutulo4

1Badili gha hagha nilolili niwonili mlyango uwela lipala kundumba.
Na lila lilowi niliyughanilili pala utumbulo iwelili handa lilowi lya lipembi lya lamgambo, ikalonga, “Uhiki kunu kunani, na nenga nitekulangiha mighalu yatehumila kuulongolu.”
2Lipindi lilalila Mpumulo wa Sapanga akanighola kulola na kuhyoghanila vindu vitangala, nikalola kitamilo kya kinkosi haku kundumba kitamilwi na mmonga.3Hayu atamili kunani ghaki awelili handa lidini lya galama lya yasipi na lidini lya akiki. Hilahila upindi wa ndonya uwelili ungung'anyima handa lidini lya galama lya sumalidi na ukitindila kitamilo kya kinkosi pandi zyogha.4Kuwelili na utindilu wa vitamilu viisilini na njechi kukitindila kitamilo kya kinkosi, na kunani gha vitamilu havi wawelili watamili wagogolo waisilini na njechi wawelili wavalila nguu mbulete na likokoma lya zahabu kumutu ghao.5Ku kila kitamilo kya kinkosi pawelili panguhuma lumuli na mlindimu wa ladi na lilowi. Kuulongolu gha kila kitamilo kya kinkosi, pawelili na limbamba isaba siwelili sikiyaka. Hasi ndiwa Mpumulo isaba zya Sapanga.6Kangi kuulongolu gha kitamilo kya kinkosi pawelili na kindu kiwonekanili handa bahali gha kiou, ingung'anyima handa liganga lingung'anyima nesu.
Ku pandi zyogha zya kila kitamila kya kinkosi, kuwelili na viumbi weni ukomu wanjechi. Viumbi hagha wawelili wamema mihu kuulongolo na kuhyetu.
7Kiumbi wa utumbula awelili handa himba, na waivili awelili handa ng'ombi likambaku na waitatu awelili na wusu handa wusu gha mundu, na wanjechi awelili handa ngwasi mweni kuhuluka.8Kila mmonga wa hagha viumbi weni ukomu wanjechi, awelili na mbapatilu isita na kumema mihu pandi zyogha, mbaka pahi gha mbapatilu. Uhiku na pamuhi wakeleka ng'ogha kulonga, “Bambu, Sapanga kana makakala zyogha, mweni katimila nesunesu. Mweni ni mmaha nesu, Awelili, kawela na atehika.”
9Lipindi lyogha viumbi wala weni ukomu mnjechi pawawelili wangumyinula na kumtundamila na kumshukwile mweni atamili kukila kitamilo kyaki kya kinkosi, avile mkomu machuwa hyogha bila mwihu,10wala wagogolu waisilini na njechi huiguwisa kifulifuli kuulongolu gha hayu atamili ku kitamilo kya kinkosi na kumyupa hayu mweni angulama machuwa hyogha bila mwihu, na huvika mikokoma ghao kuulongolu gha kitamilo kya kinkosi, wakilonga,11“Bambu watwenga na Sapanga wa twenga, wenga upalili kupokela ukulu na utundamilu na uweso, kwaikiva wenga ndiwa uviumbili vindu vyogha, na kwa kupala kwa wenga vila vilumbilwi vikawela.”

The Word for the World International

https://app.library.bible/content/6f6cca05a7913c93