Ugubutulo11
1Hinu, nipeghilwi lidengi lyeni kuwela handa libiki lya kupimila, nikalongelwa, “Uyinuki, ukapimi Lighuta lya Sapanga, na kihanja kya kutumisila mafumba na kuwavalanga wandu weni kuyupa mghati gha Lighuta lya Sapanga hali.2Ila ukotoho kupima lyugha lya panji gha Lighuta lya Sapanga, uleki kwaikiva lyugha hali wapeghwa wandu wamilima ghangi. Hagha wateutimbangatimbanga mbwani wa Sapanga kwa lipindi lya miehi mialobaini na ivili.3Nenga nitewapegha uweso watumikila ghangu waivili watelongela ujumbi ghangu lipalalipala kwa lipindi lya machuwa ielufu imonga na imia ivili na isitini, wakiwela wavala nguu zya magunila.”4Watumikila hagha waivili ndiwa hila mizeituni miivili na vyombo vila viivili vya kuvikila limbamba vyeni kuvikwa kuulongolo gha Bambu mweni kulongosa mlima wogha.5Mundu yoyosi paateyesa kuwatenda, lyoto kuhuma mumlomu gha hagha watumikila utewayalamisa. Havi ndiwa atehova mundu yoyosi mweni kupala kuwatenda.6Wandu hagha wanguwesa kuwopa kunani ili ndonya ikotoho kutonya lipindi lyogha pawatewela wangulonga ulota wau. Na hilahila wetewela na uweso wa kuyaghalambusa masi yaweli mwahi na kuuhakila mlima wogha kwa matovo wekaweka kwa kila lipindi watepala weni.7Lipindi pawateyomola kulonga ujumbi wa Sapanga, likokolo likulunga lyeni kuhuma kuliwumba litali lya kumambi atetovana na weni, na mweni atewasinda na kuwakoma.8Mindumbi ghao itehighala kunjila gha mimbwani mikulunga, mula Bambu ghao avambilwi. Mlima hau uwela na ndyangilu handa gha mmbwani gha Sodoma na mlima wa Misili.9Wandu wa kila likabila na ukolu na mlima na langi watelolesa mindumbi hai kwa lipindi lya machuwa itatu na mayaghani, na watelekesela ng'ogha mundu yoyosi awasiki.10Wandu weni kulikala kumlimawogha watehekelela kwaikiva gha kihu kyau hagha waivili, watehina mhambu na kupeghana hupo, kwaikiva walota hagha waivili wawelili wanguwaghasa nesu.11Ila badili gha ghala machuwa itatu na mayaghani mpumulo wa ukomu kuhuma kwa Sapanga akawayingila na weni wakatandamka, na wogha weni kuwalola wakatila nesu.12Hinu, wala walota waivili wakahyughanila lilowi likulunga kuhuma kundumba likiwalongela, “Mhiki kunu kunani!” Na weni wakayenda kunani kundumba kulihindu, wahakata ghao wakiwela wanguwalola.13Lipindi lilalila, kukahumila mhihimilu mkulunga kumlima, kipandi kimonga kya ikumi gha mbwani kikakologhanywa. Wandu ielufu isaba wakakomwa kwa mhihimilu hula wa kumlima. wandu wahighalili wakatila nesu, wakamtundamila Sapanga wa kundumba.14Mahakilo makulungwa gha ivili lupita, ila uloli! Lung'ai lwa itatu lunguhika kwa kuloposela.15Hinu yula mtumikila waisaba wa Sapanga wa kundumba akapulila lipembi lya limgambo lyaki, Na lilowi likulunga likahyoghanika kundumba likilonga, “Hinaa unkosi wa mlima wogha uwela unkosi wa Bambu wa twenga na Kilisito ghaki. Na atelongosa machuwa hyogha bila mwihu!”16Wala wagogolu waisilini na njechi weni kutama kweni vitamilu ghao vya ukulu kuulongolo gha Sapanga, wakaguwa kufulifuli na wakamyupa Sapanga,17wakilonga, “Tungukushukwile, wenga Bambu Sapanga mweni uweso wogha, uwela na uwelili. Kwaikiva uwonesa uwesa ghako mkulu, na hinaa ungulongosa.18Wandu weni kukwinila ng'ogha wa milima ghangi, wakuhyomela ila lipindi lya lilaka lyako lihika kala. Ndiwa lipindi lya kuwatosa wala wahovili, hilahila ni lipindi lya kuwapegha hupo watumikila ghako walota na wandu ghako wogha na wogha weni kukutundamila wenga, vilongosi na weni kuwela ng'ogha vilongosi, na lipindi lya kuwayalamisa wala weni kuwayaghamisa waghangi kumlimawogha.”19Hinu Lighuta lya Sapanga liwelili kundumba likawopolwa na lisanduku lya Lilaghanu lyaki likawoneka hamu mghati. kukahumila lumuli na lilowi, na mlindimu wa ladi, na mhihimilu wa mlima na ndonya ngulunga gha maganga.
The Word for the World International