2Timoseo1

1Nenga Paulo, avile Sapanga apalili nivile mndumindumi wa Kilisito Yesu ili niulongeli hula ukomu tulaghililwi kwa kukonganika na Kilisito Yesu,2nakuyandikila wenga mwana ghangu mpalwa Timoseo. Ningukutakila manemu, luhungu na kulikala kwa kukotoho kutovana kuhuma kwa Sapanga Tati na Kilisito Yesu Bambu wa twenga.
3Ningumshukwile Sapanga yula ningumtumikila kwa uchakaka handa wagholili wagogolo wa nenga, namshukwile Sapanga kila paningumbwiki kukuyupila uhiku na pamuhi.4Ningukumbwike masosi ghako na ningupala nesu kukulola, ili niweli na luheku nesu.5Ningukumbwike ukwinila ghako gha uchakaka, ukwinila awelili nau mnahota ghako Loisi, na kangi nyongo ghako Unisi. Ningumanya kwa uchakaka yiwa na wenga kangi uvile nayu.6Kwaikiva hai ningukukumbusa uyimusi hila hupo gha Sapanga upokelili panivika mawoku kumutu ghako.7Kwaikiva Mpumulo atupeghili Sapanga ng'ogha wa kutughola tuweli wandu wa kutila, ila wa makakala na upalo na moyu wa kulilongosa mweni.8Kwa nagha ukotoho kulola honi kumtangasa Bambu wa twenga, na ukotoho kulihola honi kwaikiva gha nenga nivile muuwopwa kwaikiva gha mweni. Ila utoli fwasi ghako na nenga kumahakili gha Habali Maha, kwa hula uweso akupeghili Sapanga.9Sapanga atulokolili na kutuhaghula tuweli wandu wa weka, ng'ogha kwaikiva tugholili maha, ila agholili nagha kwaikiva gha lukani lwaki na manemu ghaki. Atupeghili manemu hagha kwaikiva gha Kilisito Yesu pambila gha kuwela kwa mlima wogha,10ila hinaa ihighiliswa kwa mweni mlokola wa twenga, Kilisito Yesu. avile aghalambulili kuhova na kuyegha ukomu wa machuwa yayendelela na kuhova ng'ogha kwa kupitila Habali Maha.11Nenga nihaghulilwi nivile mndumindumi na mvula kwaikiva gha kutangasa Habali Maha,12na nenga ninguhakilwa kwaikiva gha mighalu hagha, ila nilolili ng'ogha honi kwaikiva ningummanya yula nimkwinilili, nivile na uchakaka atewesa kukigholokela kila anipeghili, mbaka lichuwa lila lya kuhika kwa mweni.13Ukoli kwa umaha mavulo yala gha chakaka nikuvulili. Na kuhighala kuukwinila na upalo wa twenga kwa kukongana na Kilisito Yesu.14Ugholokeli ujumbi wauchakaka upeghilwi na Mpumulo wa Sapanga yula angutama mghati mwa twenga.15Handa ungumanya, wandu wogha mmbwani Asia wanileka, wamonga ghao ni Fegelo na Helimogeni.16Ningumyupa Bambu awawoneli luhungu wandu wa Onesifolo, kwaikiva kanitaya moyu miyanja itangala, kangi alolili ng'ogha honi kuhika kunilola paniwelili kuuwopwa.17Paahikili Loma, anihakulili nesu mbaka akanilola.18Ninguyupa Bambu amuwoneli luhungu lichuwa lila! Na wenga ungumanya vila anitumikila haku ku Efesu.

The Word for the World International

https://app.library.bible/content/6f6cca05a7913c93