1Timoseo6

1Wahusutu wogha wangupalwa kuwatundamila wakulu ghao ili lihina lya Sapanga likotoho kulighwa hata mavulo gha twenga yakotoho kupughanyika.2Wala wahusutu wavile na wakulu ghao ni wakilisito wangupalwa ng'ogha kupungula utundamilu kwaikiva weni ni wakwinila wayao, na badili ghaki wangupalwa wawatumikili maha nesu, kwaikiva hagha wangulinoma na mghalu hau ni wala wakwinila, wavile ni wapalwa ghao. Mavulo gha uhwangi na UTAJILI wa uchakaka
Uwavuli na kuwatangasila mighalu hagha.
3Ikiva mundu yoyosi atevula mavulo kihyetu na mavulo hagha na yula kajumila ng'ogha na mavulo gha uchakaka gha Bambu wa twenga Yesu Kilisito gha kuwatanga wandu walikali vila angupala Sapanga,4hayu angulongoswa na likwinakwina na hata angumanya ng'ogha chochosi. Ni mundu wa kupala masindano na utatala kumilando hela, na hai inguyegha wifu, ukologhanyu, malighu, mawachilo mahakata,5na malongelano yavile ng'ogha na mwihu paghati gha wandu wavile luhala lwao liwachila mahakata, weni kuliwachila yiwa lihengu lya kuvula habali gha Sapanga ni njila gha kuipatila hupo.6Kulikala vila angupala Sapanga kungumghola mundu aweli mundu wa hindu ngoo, ikiva angubaka na hindu ghaki avikola.7Kwaikiva tuhika ng'ogha na vindu vyovyosi kumlimawogha, na tutetola ng'ogha vindu vyovyosi patuhuka.8Hinu ikiva tuvile na mulyo au nguu, tungupalwa tubakwi na vyeni.9Ila wala wangupala kuwela na hindu itangala wangugua kumayeso na watewomelwa na mtegho wa lumatamata lutangala lwa kisiisii, lula lweni kuyegha mahakilo, lula lunguwakwegha wandu mbaka kumkologhanyo na kumayalamiso.10Kwaikiva kupala nesu mapesa ni mtumbulo wa uhakata wogha. Wandu waghangi wapalili kupokela mapesa hata wakaleka ukwinila, na kujihoma weni kwa maghaso yatangala.
11Ila wenga mundu wa Sapanga ulekani na mighalu hai hyogha. Uyangalayi kughola vila ingupalwa kuulongolo gha Sapanga, ulikali vila angupala Sapanga, ukwinila, upalo, ulindila na unyalinyali.12Utovani ngondo maha gha ukwinila, ukoli ukomu hula wa machuwa yayendelela ukemililwi pala pauyitikila ukwinila ghako kuulongolo gha wandu watangala.13Nikiwela kuulongolo gha Sapanga yula anguvipegha vindu vyogha ukomu, na kuulongolo gha Kilisito Yesu yula ailongile uchakaka kuulongolo gha kilongosi Ponitio Pilato ningukulaghila,14ukoli malaghilo ghako na kuyaghola kwa ulungwana mbaka lichuwa lila paatehumila Bambu wa twenga Yesu Kilisito,15yula avile Sapanga atemyegha kwa lipindi lya Sapanga lijumilwa, mweni kutundamilwa, avile weka ghaki kilongosi, Nkosi wa wankosi na Bambu wa mabambu.16Mweni weka ghaki angulama machuwa yayendelela, avile angulikala kumhana uwesa ng'ogha kuhikilwa pabei, kwahela mundu awesili kumlola au anguwesa kumlola hinaa. Utundamilu na makakala uvile kwa mweni machuwa yayendelela. Yinaa.17Walaghili wandu wavile na hindu ngoo kumachuwa hagha, wakotoho kuidumbadumba na wakotoho kuvika ukwinila ghao kuhindu ilikala kwa lipindi mayaghani, ila wamkwinili Sapanga, yula avile kwa ulungwana ghaki hutupegha hindu vyogha tutumili kwa kuhekelela.18Walaghili wagholi mighalu gha maha, wavile wandu wa hindu ngoo kwa kughola ghamaha, na wavile wandu walungwana na waliyandali kuwapegha waghangi hindu ghao.19Kwa kughola nagha watevile wajivikila ngoko na hai itevile kitamilo kya maha kwaikiva gha lipindi lya luulongolo. Na baha watevile wajipatila ukomu hula wa chakaka.
20Timoseo, ugholokeli yala hyogha wakupeghili. Ulikali mihu na malongelano yamhekelesa ng'ogha Sapanga na utatala wa kisiisii kwa ghala wandu waghangi wanguyakema “Mavulo.”21Kwaikiva waghangi wajidumbilila kuwela na hagha mavulo na kumwihu ghaki wakayalamisa ukwinila ghao.
Ninguwatakila mwenga wogha manemu gha Bambu iweli pamonga na mwenga.

The Word for the World International

https://app.library.bible/content/6f6cca05a7913c93