1Yohana2
1Wana ghangu, ninguwayandikila mighalu hai, lukani mkotoho kughola sambi. Ila paikawela mundu yeyosi kaghola sambi, tuwela na mundu wa kutuyupila kwa Tati na hayu ndiwa Yesu Kilisito mweni kujumilwa na Sapanga.2Mweni Kilisito ndiwa litambiko lya kulunguswa lya kuhumisa sambi syetu, na ng'ogha sambi sya twenga hela ila pamonga na sambi sya mlima wogha.3Handa patuyitikila malaghilo gha Sapanga, tunguwesa kulongela kwa chakaka yiwa tungummanya.4Mundu yeyosi mweni kulonga yiwa, “Ningummanya” ila kayitikila ng'ogha laghilo lyaki, hayu ni mhwangi, hata mghati gha mundu hayu muwela ng'ogha na uchakaka,5ila mundu yeyosi mweni kuyitikila lilando lya Sapanga, hayu ndiwa mweni kuwela na upalo wa Sapanga utimilili mghati ghaki. Havi ndiwa tunguwesa kumanya yiwa tungukongine na mweni.6Mundu mweni kulonga yiwa kana umonga na Sapanga, hayu angupalwa kuwela na ndyangilu handa gha Yesu Kilisito vila alamili.7Wapalwa ghangu, laghilo hali ninguwayandikila ng'ogha lya hyonu, ila laghilo lila lila mpeghilwi kuhuma pamkwinilile. Laghilo hali lya dahile, ni hula ujumbi muuhyoghanilili.8Hata nagha ninguwayandikila laghilo hyonu, uchakaka uwoneka kwa mweni na hilahila uwoneka kumioyu gha mwenga, kwaikiva lwisa lihuka na mhana wa chakaka ungulangasa.9Mundu yeyose mweni kulonga yiwa angulama kumhana, ila angumhyomela mkwinila myaki, mundu hayu kambila mlwisa.10Mundu yeyose mweni kumpala mkwinila myaki angulama kumhana, na kahela chochosi kumghati ghaki kyeni kuwesa kumghola myaki agholi sambi.11Ila mundu yeyosi mweni kumhyomela mkwinila myaki hayu kamlwisa, na hayu angutyanga mulwisa, hilahila angumanya ng'ogha kula anguyenda, kwaikiva kanguwesa ng'ogha kulola mlwisa.12Ninguwayandikila mwenga wana kwaikiva sambi sya mwenga zilekeselwa kupitila lihina lya Kilisito.13Ninguwayindikila mwenga akina tati weni kukamala kwa kummanya Yesu Kilisito. Hilahila ninguwayandikila mwenga wahongolo kwaikiva muwela na makakala gha kumsinda hayu muhakata.14Ninguwayandikila mwenga wana kwaikiva mungummanya Tati. Na ninguwayandikila mwenga akina tati kwaikiva mungummanya yula mwenikuwela kuhuma mtumbulo. Na ninguwayandikila mwenga wahongolo kwaikiva muwela na makakala, lilando lya Sapanga liwela mghati gha mwenga na mumsinda yula mhakata.15Mkotoho kuipala mighalu mihakata iwela kumlimawogha hau, wala mkotoho kupala uhakata wowosi weni kuwela kumlimawogha hau. Handa mundu yeyosi kanguupala uhakata, hinu hayu kangumpala ng'ogha Tati Sapanga.16Uhakata weni haku kumlimawogha ni lumatamata luhakata lwa higha na mihu kupala mahakata tunguyalola, na kuitutumulila hindu ngenju tuwela nayu. Mighalu hai hyogha inguhuma ng'ogha kwa Sapanga ila inguhuma haku kumlimawogha.17Mlima wogha pamonga na lumatamata lwaki luhakata lamghati vinguyenda, ila mundu yula mweni kughola ghala anguyapala Sapanga, atelikala machuwa hyogha bila mwihu.18Wana ghangu, hagha ni machuwa gha mwihu! Mhyoghanila yiwa mngingama Kilisito kanguhika, na hinaa wahakata watangala wa Kilisito wahika kala, kukovekelana na hagha tumanya kala yiwa machuwa gha mwihu yahika kala.19Wandu hagha wahuma paghati gha twenga ila wawela ng'ogha wandu wa lipinga lya wandu weni kumkwinila Kilisito lya twenga, hinu kwa nagha watuleka. Handa wangaliwela wandu wa lipinga lya twenga, wangalikala pamonga na twenga. Ila watuleka lukani iwoneki lipala yiwa wawela ng'ogha wandu wa lipinga lyetu lya weni kumkwinila Kilisito.20Ila mwenga, Sapanga kawapegha Mpumulo ghaki, na wogha munguumanya uchakaka.21Ninguwayandikila lihamba hali ng'ogha kwaikiva munguumanya ng'ogha uchakaka, ila kwaikiva munguumanya. Kangi mngumanya yiwa uhwangi wowosi unguhuma ng'ogha kwa mundu mchakaka.22Mhwangi ni ghani? Mhwangi ni mundu yula mweni kulonga yiwa Yesu kang'ogha kilisito. Mundu wa njila hai ndiwa mweni kumngingama Kilisito, angumlema Tati Sapanga na Mwana,23ingumanyika yiwa mundu yeyosi mweni kumlema Mwana, angumlema na Tati, na yeyosi mweni kumjumila Mwana, kana Tati hilahila.24Hinu, ujumbi hula muuhyoghanilili kuhuma mtumbulo, na ulikali kumioyu gha mwenga handa ujumbi muuhyoghanila kuhuma mtumbulo paulikala mghati gha mwenga, hinu mtelikala machuwa hyogha kuumonga wa Mwana na Tati.25Haki ndiwa Kilisito katulongela yiwa atetupegha, tutepokela hau ukomu wa machuwa hyogha bila mwihu.26Niwayandikila mighalu hai ili kuwalangiha mlikali mihu na wandu wala wenikupala kuwabyodosa.27Ila mwenga mumpokela Mpumulo wa Kilisito, mweni angulikala paghati gha mwenga, hinu mungumpala ng'ogha mundu yeyosi awavuli kwaikiva Mpumulo wa Sapanga anguwavula kila kindu, mavulo ghaki ni gha chakaka ng'ogha gha uhwangi hata mayaghani. Hinaa mkovekeli mavulo gha Mpumulo wa Sapanga na muweli na umonga na Kilisito.28Hinaa wana ghangu, myendeleli kumkwinila Kilisito, lukani lipindi atehika kangi tukotoho kutila na tukotoho kuwela na holu na kulihigha lichuwa patehika.29Mungumanya yiwa kilisito kamaha, hinu mngupalwa hilahila kumanya yiwa kila mundu mwenikughola mighalu yeni kujumilika na Sapanga hayu kamwana wa Sapanga.
The Word for the World International