1Wakolintu3
1Walongo wa nenga niwesili ng'ogha kulonga na mwenga handa wandu weni kulongoswa na Mpumulo. Ila nilongili na mwenga handa wandu wa weni kulongoswa na mighalu gha kumlima wogha kangi weni kuwela handa wana wang'enya kukumkwinila Kilisito.2Niwavulili mavulo mayuyughu kumanyika handa vila nyongo angumpegha maweli mwana ghaki. Kwaikiva muwela ng'ogha na uweso wa kupokela mulyo mgangamalu na mmbila kuwesa kupokela mavulo yatimila gha ujumbi wa Sapanga.3Kwaikiva mwenga mmbila mngulama handa vila wandu wa kumlima wogha vila wangulama. Mwenga mngulama mkiwela na wifu pamonga na magombi. Mighalu hai hyogha ingulangiha yiwa mwenga mmbila mwa wandu wa kumlima wogha hau na mngulama handa wandu wa mlima wogha vila wangupala.4Mmonga wa mwenga paalongile, “Nenga ningumkovekela Paulo,” na mghangi, “Paatelonga nenga ningumkovekela Apolo,” ghuli, mghola ng'ogha handa wandu wa kumlima wogha vila wangughola?5Ghuli Apolo ni ghani? Na Paulo ni ghani? Twenga ni watumikila wa Sapanga weni kuwayeghela ukwinila. Na kila mmonga wa twenga angughola lihengu apeghilwi na Sapanga agholi.6Paniwalongela ujumbi wa Sapanga niwelili handa mundu mtenu mweni kukulila mbeyu na kuulongolo Apolo akahika kumwaghilila masi hila mbeyu, ila Sapanga ndiwa mweni kughola imeli na kukula.7Hinu hagha wogha wagholile lihengu lya yaghi yaghi. Ila Sapanga mweni kumelesa na kukula kwa mbeyu ndiwa kaghola kindu.8Yula mweni kukulila mbeyu angulandana hela na hayu wa kumwaghililila masi. Sapanga atemhipa kila mmonga kukovekelana na lihengu aligholile.9Kwaikiva twenga ni watumikila tungughola lihengu pamonga na Sapanga, mwenga ni litawa lya Sapanga, hilahila mwenga ni lighuta lya Sapanga.10Kwa ulungwana Sapanga anipeghili na nenga handa mchenga nikamanya lihengu lyangu, nenga nikachenga mghomba wa maha wenikuwela mundu mghangi anguwesa kuchenga kunani ghaki. Ila mundu yoyosi mweni kuchenga na ailolesi vila anguyenda kuchenga kunani ghaki.11Kwaikiva kwahela mundu mweni kuwesa kuchenga mghomba mghangi kupiti hula uvikwa kala, ingumaanisa mghomba hau ni Yesu Kilisito.12Kunani gha kitamilo haki mundu anguwesa kuchengela kwa sahabu au kwa feza au kwa maganga gha mapesa ghatangala au kwa mibiki au kwa manyahi au kwa mahamba.13Umaha wa lihengu lya mundu yeyosi litewoneka na kuvikwa paluagha kulichuwa lila atehika Kilisito kuwalamula wandu. Kwaikiva kulichuwa hali lyoto litegubutula lihengu lya kila mmonga na lyoto hali liteyesa lihengu lya kila mundu na kulangiwa yiwa ni maha au ng'ogha.14Paikawela kindu achengili mundu kunani gha kitamilo haki kitelungula ng'ogha kwa lyoto hali mundu hayu atepokela hupo.15Ila paikawela kindu kila akichengili kunani gha haki kitamilo kitelungula, hinu, mundu hayu atepokela ng'ogha hupo ghaki, ila mwenibaha atelokolwa handa vila katyelembuka kuhuma kulyoto.16Ghuli, mmanya ng'ogha yiwa mwenga ni lighuta lya Sapanga na Mpumulo wa Sapanga angulikala mghati mwa mwenga?17Hinu handa mundu ateyalamisa lighuta lya Sapanga na hilahila Sapanga atemyalamisa mundu hayu. Mwenga handa lighuta lya Sapanga Kwaikiva mwenga ni hindu gha Sapanga.18Mkotoho kuingonga wenibaha. paikawela mundu yeyosi paghati gha mwenga akaliwachila yiwa kana luhala handa luhala lwa mlima wogha hau, ni mbaha aweli ndyungi ili apati luhala lwa chakaka.19Kwaikiva, luhala lwa kumlimawogha ni undyungi kuulongolo gha Sapanga. Kwaikiva iyandikwa kumayandiko gha Sapanga, “Sapanga anguwawomela wandu weni luhala lwa mlima wogha kuukambenga wa weni.”20Hila hila Mayandiko yangulonga, “Bambu angumanya mawachilo gha wandu wa mlima wogha weni luhala, luhala lwau lwa yaghi yaghi”.21Kwaikiva gha hagha, ungupalwa ng'ogha kuitutumulila kilongosi yeyosi. Vilongosi wogha wavikwa kuwatanga mwenga handa wandu wa Sapanga.22Paiwela Paulo au Kefa au mlima wogha au ukomu au kihu au lipindi lya hinaa au lipindi lya kuulongolo vyogha ni vya mwenga,23na mwenga ni wandu wa Kilisito, na mweni Kilisito ni wa Sapanga.
The Word for the World International