1Wakolintu13

1Ninguwesa kuwela na uweso wa kulonga luga zya wandu na zya watumikila wa kundumba wa Sapanga, ila paniwela ng'ogha na upalo, ningughola hela lilowi handa lidebi lyeni kuwela ng'ogha na kindu au kengeli gha kushuli.2Kangi, ninguwesa kuvile na hupo gha kuyughanila na kutangasa ujumbi wa Sapanga, na kumanya kifisu kyogha kuhuma kwa Sapanga na kumanya kila kindu, hata ningaliwela na ukwinila wa kuwesa kuhumisa mitumbi, ila panikawela na nahela upalo nenga nakindu ng'ogha.3Hilahila nikatola hindu ghangu hyogha na kuwapegha wakapuku, hilahila pamonga na yiwa nikatola mhigha ghangu ulunguli kulyoto, ila panikawela nahela upalo nitewesa ng'ogha kupokela fwaida yeyosi.
4Mundu mweni upalo anguwela na ufumilifu na anguwatanga waghangi na kahela wifu na kaitutumula ng'ogha na kanguwela ng'ogha na kinyengu.5Mundu mweni upalo kanguwatundamila wandu waghangi na kanguhakula ng'ogha fwaida kwaikiva gha mwenibaha na kanguyoma ng'ogha kwa kuloposela na kahela ngumbungumbu gha mahakata.6Mundu mweni upalo Kanguhyomela uhakata, ila kanguhekelelela uchakaka.7Mundu mweni upalo kangutenyuka ng'ogha moyu na machuwa hyogha kangukwinila na machuwa hyogha kanguwela na litumaini na hayu angufumilila mighalu hyogha.
8Mundu mweni upalo anguyendelela kulangiha upalo machuwa hyogha. Ila hupo zighangi zivile na mwihu ghaki handa vila kuhyoghanila na kutangasa ujumbi wa Sapanga, havi vitehuka lichuwa limonga, na paikawela hupo gha kulonga luga gha kihenja, hai iteyomoka; na handa pakawela na malangu hagha na yeni yateyomoka.9Kwaikiva kuivula kwa twenga na kumanya mighalu ni mayaghani, hilahila kutangasa kwa twenga ujumbi kuhuma kwa Sapanga tungutangasa mayaghani hela ghala tunguyamanya.10Ila kutimila pakutehika mighalu hyogha itimila ng'ogha itehumiswa.
11Lipindi niwelili mwanachali nilongili handa mwana, nimanyili handa mwana, niwachilili handa mwana. Ila hinaa, nenga niwela mundu mkulunga, mighalu hila gha uwana niileka.12Kila tungukilola hinaa ni handa kujilola kulisinila lihyonu lyeni kung'anyima, ila haku kuulongolo tutelola kwa umaha nesu. Hinaa ningumanya hela kwa mayaghani ila haku kuulongolo nitemanya kwa kutimila handa Sapanga vila angunimanya nenga kwa kutimila.
13Hinu hinaa mighalu miitatu ndiwa itelama machuwa hyogha bila mwihu: ukwinila na litumaini na upalo; ila mghalu mkulu kupiti hyogha ni upalo.

The Word for the World International

https://app.library.bible/content/6f6cca05a7913c93