2 Samwẹl6
Abẹ atim Ikwukwur s'Echekha ch'Ubinọkpaabyi afona k'Jẹrusalẹm
1Wa Devid ọbạra ọtọhbha adikkobh p'Israẹl p'akpọhkhọ ifor, anạng nnọhna arạbh attaan ukuma chi.2Ẹma Devid ọttạra ajunung pẹ phyibh asengi afona k'Baala, k'ẹkhạma ch'Juda bẹ́, abẹ ata atạkha Ikwukwur s'Echekha ch'Ubinọkpaabyi atima akwu. Abẹ n'ayeri ikwukwur nnọ k'eche ch'Ọvaar Ubinọkpaabyi kw'Ẹfa phyibh, kw'ọnạn ẹvaar-ẹvaar k'ottemkwẹ kw'chẹrubim k'Ikwukur nnọ s'Echekha.3Abẹ atạk Ikwukwur s'Echekha ch'Ubinọkpaabyi anạna k'ọkpaar kw'nnyạnyaang n'itwạr, kw'utim ode ọbhakwẹ, atima sẹ abina k'ọchọhm kw'Abinadab, kw'uning k'okpecho. Uza ọttạra Ahiyo p'ade iva p'Abinadab bọ wa n'akkeri ọkpaar ngwọ ọbhakwẹ,4ọttạra Ikwukwur s'Echekha ch'Ubinọkpaabyi sabẹ anạn ma, wa Ahiyo n'osenga k'ititikha s'ọkpaar ngwọ.5Wa Devid ọttạra anạng p'Israẹl phyi-phyibh atim ọkkọhna, ọttạra abukpọhng, ọttạra agimangim, ọttạra agaang-gang, ọttạra ekpo ikhirapẹ p'ichi ẹkkachẹ, ọttạra achang-kpakpa, atima ẹfa chabẹ phyibh n'asi erobha k'ititikha s'Ọvaar Ubinọkpaabyi.6K'okpe kw'abẹ akpir k'ibyi sabẹ n'aninga ayuk abarli-mạma k'Nakọn, Uza onemi ọbọhk ọvạkha Ikwukwur s'Echekha ch'Ubinọkpaabyi, s'mmaam n'iben bẹ́ ikpena itto.7Ettem ipyibhi Ọvaar Ubinọkpaabyi otenạ Uza ukwuru s'ose Ubinọkpaabyi ẹsẹkha. Ma wọ Ubinọkpaabyi uvun-ẹ ọfhọ, otto k'ọkhaan-ọkhaan kw'Ikwukwur s'Echekha ch'Ubinọkpaabyi, ope.8Ma wọ Devid ọdwạkhẹ ukwuru idwạdwạkhọ s'Ọvaar Ubinọkpaabyi utim ọtor Uza. Tạma ma iwu njọ kpira chemma, abẹ n'ayeri ibyi nnọ Pẹrẹz-Uza. 9Ma iwu njọ, Devid ọkhaama ojora f'Ọvaar Ubinọkpaabyi, oben bẹ́, “Ikwukwur s'Echekha ch'Ọvaar Ubinọkpaabyi bạra isenga yạn itor-m o?”10Wa Devid dạkhẹ ifor núdia, bẹ́, ọtạkha Ikwukwur s'Echekha ch'Ọvaar Ubinọkpaabyi ukwuna k'efhon-diden kw'Devid. Otera utima sẹ ofona k'ọchọhm kw'Ọbẹd-Edom kw'ubin Git.11Wa Ikwukwur s'Echekha ch'Ọvaar Ubinọkpaabyi ining k'ọchọhm kw'Ọbẹd-Edom kw'ubin Git k'aphye attaan. Ma wọ Ọvaar Ubinọkpaabyi odo Ọbẹd-Edom ọttạra ẹchọhmfhạr chẹ phyibh.12Ma wọ abẹ akpaakhẹ ọvaar Devid bẹ́, “Ọvaar Ubinọkpaabyi kk'ẹchọhmfhạr ch'Ọbẹd-Edom udia, ọttạra ọttọhk fidede f'ode pfẹ, ukwuru Ikwukwur s'Echekha ch'Ọvaar Ubinọkpaabyi e.” Wa Devid utim erobha ofona ọta ọtạkha Ikwukwur s'Echekha ch'Ọvaar Ubinọkpaabyi k'ọchọhm kw'Ọbẹd-Edom, utima ukwu k'ofhon-diden kw'Devid.13K'okpe kw'anạng p'attọhk Ikwukwur s'Echekha ch'Ọvaar Ubinọkpaabyi kk'ntwạkhọ nsajạnẹ asenga, Devid ọtạkha ẹbhaamdim ọttạra ọbhaamnwa, utima ọfọhnọ ẹja.14Wa Devid oge ẹphọd oyokhakwẹ, utima ẹfa chẹ phyibh utubh ibin k'ititikha s'Ọvaar Ubinọkpaabyi.15Ẹma Devid, ọttạra anạng p'Israẹl phyi-phyibh atim ọkkọhna ọttạra abukpọhng, atima Ikwukwur s'Echekha ch'Ọvaar Ubinọkpaabyi awuna.16Oche ngwọ kw'abẹ n'atima Ikwukwur s'Echekha ch'Ọvaar Ubinọkpaabyi anwa k'ofhon-diden kw'Devid o, Mikal kw'ode uminanwa kw'Saul obe kha ọmma kw'ufhum n'ose. Masẹ ose s'Devid n'ogbe akwura, ọbạra utubh ibin k'ititikha s'Ọvaar Ubinọkpaabyi, Devid obe ma, ọbạkh-ẹ idik.17Abẹ atima Ikwukwur s'Echekha ch'Ọvaar Ubinọkpaabyi akwu attima k'ibyi s'asẹ ibaan bẹ́ ininga, s'ide ukkira kw'Devid kk'usia ochok sẹ. Wa Devid ọfọhnọ nja ikkạmasẹ, ọttạra nnạnga s'ẹmẹm ọnạng Ọvaar Ubinọkpaabyi.18Masẹ Devid kk'nja ikkạmasẹ ọtttạra s'ẹmẹm ọfọhna phyibh, odo anạng mbọ k'eche ch'Ọvaar Ubinọkpaabyi kw'Ẹfa phyibh.19Ma wọ ọtạk brẹd, ọttạra nten ichẹkhasẹ, ọttạra k'atwuk p'agrep p'agwu-ugwu, ọnạng ọnạng-ọnạng, ajunung ọttạra ipanạng ma ikhaana s'anạng p'Israẹl phyi-phyibh. Mạnna wọ ọnạng-ọnạng ubin ọbhạna k'akhẹ k'ọchọhm.20K'okpe kw'Devid n'ukwun bẹ́, ukwu odo ẹchọhmfhạr chẹ, Mikal kw'ode uminanwa kw'Saul uyini okhebh-ẹ k'iyaan, oben bẹ́, “Chemma oyeni, ọvaarnạng kw'Israẹl kk'ifor sẹ okpobha. N'oseng irinikhum k'ititikha s'aminava p'atọhmnạng p'ikhaana sẹ, masẹ udindingi-nạng!”21Devid oben Mikal bẹ́, “Amma n'nsi erobha k'ititikha s'Ọvaar Ubinọkpaabyi kw'ọkpẹrẹ atte ọttạra ẹchọhmfhạr chẹ ọjẹ, k'okpe kw'oreng-m bẹ́, ndạbh anạng p'Israẹl, p'ade anạng p'Ọvaar Ubinọkpaabyi.22Amma kk'ifor ndia bẹ́ ntubh idindingi ch'ẹyọhng nja, mbạra nsạkha ifor saam ininga. Okhenka, k'ititikha s'aminava mbọ p'ade attọhmnạng p'akpaakhẹ udik akwuru, abẹ m'anạng-m ikpukpobha ọnạng e.”23Wa Mikal, kw'ode uminanwa kw'Saul, nnwa nọ́maana tạrr okhebha ma, ope.The Seed Company