2 Samwẹl5
Devid ọdạbhẹ ẹvaar ch'Israẹl
1Wa nkhạma s'Israẹl phyi-phyibh ikwu ikhebha Devid k'Hẹbrọn iben bẹ́, “Amạna mba ande anạng pọ oyeni e.2K'okpe kw'kk'osenga, kw'uwa Saul ọdạbhẹ mạna, ọma wọ wa n'achi eden k'anạng p'Israẹl k'mkpong. Wa Ọvaar Ubinọkpaabyi oben-ọ bẹ́, ‘Ọma wọ ade ọnạng kw'm'okkeri anạng paam Israẹl, abạra ade ọvaarnạng kwabẹ.’ ”3Masẹ adennạng p'Israẹl phyibh kk'ọvaar Devid akhebha k'Hẹbrọn, ọvaar Devid usi echekha ọttạra bẹ k'Hẹbrọn ma ititikha s'Ọvaar Ubinọkpaabyi. Wa abẹ abyeng Devid ana k'echo asi-ẹ ọvaarnạng kw'Israẹl.4Wa Devid ode icho ẹrạbh ukuma jobh k'okpe kw'ọdạbhẹ ẹvaar. Wa ọdạbhẹ ẹvaar k'icho arạbh afa.5K'Hẹbrọn, Devid ọdạbhẹ Juda k'icho isenọfa ọmaana aphye asaajạnẹ, ọbạra ọdạbh Israẹl ọttạra Juda k'Jẹrusalẹm phyi-pyibh k'icho ẹrạbh ukuma jobh-kanttaan.Devid okhem anạng p'Jẹrusalẹm
6Ọvaarnạng ọttạra anạng pẹ aseng afona k'Jẹrusalẹm bẹ́, abẹ ata arima aJẹbus p'uwa arukhu ma, abẹ. AJẹbus aben Devid bẹ́, “Maa mánwa. Akpachen ọttạra aphyạk-mkpẹtẹ bọ m'atera akhubh-ọ.” Wa abẹ akkẹ bẹ́, abẹ m'akke-okke akpa Devid eden.7Oseng ma, Devid ọvạk ibyittubhasẹ sabẹ s'Ziyọn, kw'ode efhon-diden kw'Devid.8Ma iwu njọ, Devid kk'obena bẹ́, “Ọnạng kwidede kw'm'okhema aJẹbus, ọbaan bẹ́ osenga k'efhobh ọkhaan-ọkhaan, okhebha ‘aphyạk-mkpẹtẹ ọttạra akpachen’ p'ade awawuna-nạng p'Devid.” Akwẹma gwọ usi abẹ n'aben bẹ́, “Akpachen ọttạra aphyạk-mkpẹtẹ k'ọvaarchọhm mánwa.”9Ma wọ Devid n'urukhu k'ibyittubhasẹ k'Ziyọn, oyeri ibyi nnọ efhon-diden ch'Devid. Wa usi efhon-diden njọ ọkhạbh-ọkhạbha, tạma k'egbo tạrr ukpira k'ẹtaanga.10Devid n'odo ẹfa ọkhaama-ọkhaama, ukwuru s'Ọvaar Ubinọkpaabyi, kw'ode Ubinọkpaabyi kw'Ẹfa phyibh uning abẹ.11Ma wọ Hiram kw'ode ọvaarnạng kw'Tyrẹ ọtọhmọ akpaakh-ẹkkaabha pẹ k'Devid, p'ọnạngẹ mkpaakha s'sida, ọttạra agwọhr-mkpaakha, ọttạra ammun-ichọhm bẹ́, abẹ ata ammun udimpa anạng Devid.12Osenga ma, Devid utin bẹ́, Ọvaar Ubinọkpaabyi kk'ẹ ẹrạnga uttima masẹ ọvaarnạng kw'Israẹl, ọttạra bẹ́, kk'ọvaarfhon kwẹ abạrada ọnạnga ukwuru anạng pẹ Israẹl.13Masẹ Devid ubin k'Hẹbrọn, ọkhaam ayok k'ọsaabh, ọttạra ipanạng p'ọtạk-ọtạkha k'Jẹrusalẹm. Wa abẹ amaan-ẹ ajunungva ọttạra apanạngva k'ọsaabh.14Maa wọ ode ache p'iva p'uwa ofhonu k'Jẹrusalẹm: Shammua, ọttạra Shobab, ọttạra Natan, ọttạra Sọlọmọn,15ọttạra Ibha, ọttạra Ẹlishua, ọttạra Nẹphẹg, ọttạra Japhiya,16ọttạra Elishama, ọttạra Ẹliyada, ọttạra Ẹliphẹlẹt.Devid okhem aPhilistiya
17Masẹ aPhilistiya abhaang bẹ́, abẹ kk'Devid ana abyenga k'echo asi-ẹ ọvaarnạng kw'Israẹl, abẹ abina k'ẹfa ata aror Devid bẹ́, abẹ avạkha. Wa Devid ọbhaang kwẹ, ubina ọsạkha k'ibyittubhasẹ.18Oche ngwọ gwọ kw'aPhilistiya anwa, anyaamẹ k'ipekhuma s'Rephayim.19Ma wọ wa Devid ọta ọdwạn Ọvaar Ubinọkpaabyi ọbạbh-ẹ bẹ́, “Ma n'nta nnima aPhilistiya abẹ o? S'm'atte bẹ ọbọhk anạng-m?”Ọvaar Ubinọkpaabyi ọpọhn-ẹ bẹ́, “Sọhng, khiri k'udik ọkka, m'ntte aPhilistiya ọbọhk otte nnạng-ọ.”20Ma wọ Devid ubin ofona k'Baal-Pẹrazim, ọta okhema bẹ ma. Oben bẹ́, “Oche ngwọ kw'asi n'amaam, mạnna wọ kw'Ọvaar Ubinọkpaabyi ọmaamẹ k'ibyi s'awawuna-nạng paam k'akhaam k'ititikha.” Osenga ma, oyeri ibyi nnọ Baal-Pẹrazim.21Wa aPhilistiya arạbhọ arik ikha sabẹ ma, Devid ọttạra anạng pẹ atima sẹ afona.22APhilistiya abạra ayin adạkhẹ, anyaamẹ k'Ipekhuma s'Rephayim.23Ma wọ, Devid ọbạra ọdwạn Ọvaar Ubinọkpaabyi, Ọvaar Ubinọkpaabyi ọpọhn-ẹ bẹ́, “Abạnga bẹ́ gbẹng kásenga avura, okhenka, asenga nnạm-nnạm abaabha bẹ age k'ngekha. Arima bẹ abẹ ma ititikha s'nchi s'balsam.24De abạnga abhaang ntwạkhọ s'n'isenga k'ẹrạng-ẹrạng kw'nchi s'balsam bẹ́ ẹ, asenga ẹbhạr-ẹbhạrẹ khiri ma wọ uyini bẹ́, Ọvaar Ubinọkpaabyi k'bạnga eden uchia bẹ́, ọta ọfhọ akpongnạng p'aPhilistiya.”25Ma wọ Devid usi oche kw'Ọvaar Ubinọkpaabyi kk'ẹ ọtọhna. Ọfhọ aPhilistiya tạma k'Gibeọn tạrr ukpira k'Gẹzẹr.
The Seed Company