2 Samwẹl23
Ikpongannạm-dik s'Devid
1Maa wọ ode ikpongannạm-dik s'Devid:“Idik s'Devid kw'ode nnwa kw'Jẹsẹ ọkpaakhẹ,idik s'ujunung kw'Ọvaar Ubinọkpaabyi kw'Ọyọhng kk'udira k'erạng,ujunung kw'Ubinọkpaabyi kw'Jekọb kk'ana obyenga k'echo,kw'ode okkemkpa kw'abẹ akkọhnọ k'mmạng s'Israẹl:2“Iguguma s'Ọvaar Ubinọkpaabyi itim-m ikpaak ọtọhnga,ọtọhnga kwẹ uning-m maa k'ẹdaak.3Ubinọkpaabyi kw'Israẹl ọkpaakhẹ ọtọhnga,Ẹtakpa ch'anạng p'Israẹl eben-m bẹ́,‘Ọnạng kw'ọdạbhẹ anạng k'eden ch'ẹtor-otor,utima ojora f'Ubinọkpaabyi odạbhẹ bẹ;4ẹma m'ode masẹ ọyaanttaana kw'ekkekhạra ch'okpebha-dudon,masẹ ekpebha ch'ebona nạn néde,masẹ ọyaanttaana kw'ọmaanẹ k'okpe kw'orạngkpaang kk'ukuma tạtebh,kw'usi asạsaarẹ amen k'isisek.’5“De wạra ẹchọhmfhạr chaam nạn nétora k'ititikha s'Ubinọkpaabyi,k'udik ọkka, wạra echekha ch'ipimmanitor mọ́tạkha ọnạng-m,wạra m'otobha chẹ ochok k'ukhubha kwidede,k'udik ọkka kk'ẹnnaanga chaam usia iyin k'eden,ọbạra ọnang-m fidede f'nnoru.6Okhenka, abyibyanạng ade masẹ akkaangẹ, py'abẹ abhạrẹ ukhubha gwạnọ,py'ọnạng nạ́n k'mbọhk mòkke ọyọhkha.7Ọnạng kwidede kw'm'utwu akkaang-ẹ,m'utima ọttọhk masẹ ẹbaanga, ọbạra ode ẹmma ch'ọkhọhn;abẹ n'akkạmọ akkaangẹ k'ibyi s'apyẹ ining.Akkemkpa p'Devid
8Maa wọ ode ache p'akkemkpa p'Devid:Joshẹb-Bashẹbẹt kw'ubin Takemọn, wọ wa ode ochonạng k'ikhaana s'anạng attaan. Ẹma wọ wa utim ọkhọhn pfẹ urima ajunung nnọhhna mfa abẹ, p'ọfhọ k'okpe gwạnọ.9Ottong anạng afa ode Ẹleaza kw'ode nnwa kw'Dodo kw'ubin Aho. Masẹ ode ọnạng wạnọ kw'ọttạr k'ikhaana s'akkemkpa mbọ attaan, wa uning Devid abẹ k'okpe kw'abẹ asẹkhẹ aPhilistiya p'uwa atobh k'Pas-Damin bẹ́, arima ekpong. Ma wọ akpongnạng p'Israẹl atwạr ifor.10Okhenka, Eleaza ocher obo ọfhọ aPhilistiya tạrr, ọbọhk okwokh-ẹ, ọbạra ọraakhẹ k'ọkkangkkang-kkro. Wa Ọvaar Ubinọkpaabyi ọnạngẹ bẹ ekhema chididen ma iwu njọ. Ma wọ akpongnạng akpa nnạm k'Ẹleaza. Okhenka, wa n'urikhi bẹ́, abẹ achi anạng mbọ p'kk'apua, ekpo.11Ottong anạng attaan ode Shama kw'ode nnwa kw'Agi kw'ubin Harar. K'okpe kw'aPhilistiya atobh k'ibyi mạnna rạnẹ s'achen-meni asaabh-ọsaabh, akpongnạng p'Israẹl arạbh arik bẹ.12Okhenka, Shama odo obe k'ottemkwẹ kw'owonu ngwọ, ọkpa aPhilistiya eden, ọfhọ bẹ. Wa Ọvaar Ubinọkpaabyi ọnạngẹ bẹ ekhema chididen.13K'ọphyakpe, ajunung attaan k'ikhaana s'akkemkpa ẹrạbh ukuma jobh, ata akhebha Devid k'ọmma kw'ẹtakpa kw'Adulam, k'okpe kw'ikhaana s'aPhilistiya ibhingi k'Ẹkpẹmẹ ch'Rephayim.14K'okpe ngwọ kw'Devid uning k'ibyittubhasẹ, atik-ẹbaakhamma ch'Philistiya aning k'Bẹtẹlẹhẹm.15Asi akwu adaak Devid, oben bẹ́, “Uwo o, wạra ọnạng n'ọkhaabh asi k'isipe ch'ẹbaang ẹbaakhama ch'Bẹtẹlẹhẹm ọnạng-m ngwo!”16Ma wọ kw'akkemkpa mbọ attaan adwu ma ibyibhingasẹ s'aPhilistiya, ata akhaabha asi k'isipe ch'ẹbaang ẹbaakhamma ch'Bẹtẹlẹhẹm, atima akkena Devid bẹ́ ogwo. Okhenka, Devid ufhumu asi mbọ gwu-gwo, oter obyenga pyẹ ma ititikha s'Ọvaar Ubinọkpaabyi masẹ ẹnạnga.17Oben bẹ́, “O Ovaar Ubinọkpaabyi, kàchera bẹ́ amma nsi udik demakwẹ ngwa! Asi mba abạrẹ udik masẹ isẹ s'ajunung mbọ p'atạk akpen pabẹ age k'obo.” Devid ufhum asi mbọ gwu-gwo.
Mạnna wọ wa akkemkpa mbọ attaan asi icherobo-dik nnọ.18Abishayi kw'ode nnwotte kw'Joab, kw'ọbạra ode nnwa kw'Zẹruya, wọ wa ode ocho kw'abẹma mbọ anạng attaan. Wa utim ọkhọhn pfẹ urima ajunung arạbh chi abẹ, ọfhọ bẹ. Osenga ma, uyin eche masẹ ayok mbọkha ncho nttaan.19Wa abẹ anạng Abishayi edennạng ch'ẹbạrẹ ọtạm ẹyọhnga ch'ayok mbọkha ncho nttaan. Ẹma wọ node odecho kwabẹ, oseng s'ode bẹ́ wa k'ikhaana sabẹ nọ́ttạra.20Bẹnaya kw'ode nnwa kw'Jẹhoyada, kw'ọbạra ode okkemkpa kw'ubin Kabzil, wa ocher obo usi idik ma. Ọfhọ akkemkpa pididen afa p'Moab. Ọbạra osạkha k'ipekhuma ọta ọfhọ ekke k'iwu ch'ebona etebhi.21Ẹma wa ọbạra ọfhọ uJip-nạng kw'ọbạrẹ ẹfa. Chibhi s'uwa uJip-nạng nwọ utim ọkhọhn k'ọbọhk, Bẹnaya utim uchikwura urima abẹ. Ọvạkha uJip-nạng nwọ ọkhọhn pfẹ ọna, utima ọfhẹ-ẹ.22Obo kw'uwa Bẹnaya, kw'ode nnwa kw'Jẹhoyada, ocher, ẹgwọ ma. Wa ọbạra uyin eche mase akkemkpa mbọkha ncho nttaan.23Wa abẹ akpobh-ẹ ayọhnga ajunung mbọkha ẹrạbh ukuma jobh. Okhenka, ẹma wa k'ikhaana s'akkemkpa mbọkha attaan n'ọ́ttạra. Ma wọ Devid usi-ẹ odecho kw'anạng p'n'atikh-ẹ.24K'ikhaana s'anạng mbọ ẹrạbh ukuma jobh ode: Asahẹl kw'ode nnwotte kw'Joab, ọttạra Ẹlhanan kw'ode nnwa kw'Dodo kw'ubin Bẹtẹlẹhẹm,25ọttạra Shama kw'ubin Harod, ọttạra Ẹlika kw'ọbạra ubina Harod,26ọttạra Hẹlẹz kw'ubin Palti, ọttạra Ira kw'ode nnwa kw'Ikẹsh kw'ubin Tẹkoa,27ọttạra Abiyẹza kw'ubin Anatọt, ọttạra Sibẹkayi kw'ubin Hushat,28ọttạra Zalmọn kw'ubin Aho, ọttạra Maharayi kw'ubin Nẹtophat,29ọttạra Hẹlẹb kw'ode nnwa kw'Baana kw'ọbạra ubina Nẹtophat, ọttạra Ittayi kw'ode nnwa kw'Ribayi kw'ubin Gibea, k'ekhạma ch'Bẹnjamin,30ọttạra Bẹnaya kw'ubin Piraton, ọttạra Hidayi kw'ubin k'ukhubha kw'Gaash,31ọttạra Abi-Albọn kw'ubin Arbat, ọttạra Azmavẹt kw'ubin Barhum,32ọttạra Eliyaba kw'ubin Shaalbọn, kw'Jashẹn ofhonu, ọttạra ajunungva p'Jashẹn, Jonatan33ọttạra Jonatan kw'ode nnwa kw'Shama kw'ubin Hara, ọttạra Ahiyam kw'ode nnwa kw'Shara, kw'ọbạra ubina Harar,34ọttạra Ẹliphẹlẹt kw'Ahasbayi kw'ubin Maakat ofhonu, ọttạra Ẹliyam kw'Ahitophẹl kw'ubin Gilọn ofhonu,35ọttạra Hẹzro kw'ubin Kaamẹl, ọttạra Paarayi kw'ubin Arbit,36ọttạra Igal kw'ode nnwa kw'Natan kw'ubin Zoba, kw'ọbạra ode nnwa kw'Hagri,37ọttạra Zẹlẹk kw'ubin Ammọn, ọttạra Naharayi kw'ubin Berot, kw'ode utim-ekpongkpo kw'Joab, kw'Zẹruya ofhonu,38ọttạra Ira kw'ubin Itri, ọttạra Garẹb kw'ọbạra ubina Itri,39ọttạra Uriya kw'ubin Het. Phyi-phyibh, wa abẹ ade anạng ẹrạbh ukuma chikhamfa.
The Seed Company