2 Samwẹl22
Ẹmạng ch'Devid ch'ẹtọhnga
1Masẹ Ọvaar Ubinọkpaabyi ọkkaan, ọrạbha Devid k'mbọhk s'awawunanạng pẹ phyibh, ọttạra k'mbọhk s'Saul, ma wọ ọkkọhnọ ẹmạng ọnạng Ọvaar Ubinọkpaabyi.2Oben bẹ́:“Ọvaar Ubinọkpaabyi wọ ode ẹtakpa chaam,ọbạra ode ibyittubhasẹ saam,ọttạra ọkkaana kwaam;3Ubinọkpaabyi kwaam wọ ode ẹtakpa chaam, ch'amma nttubh,ode ọkhọhnkpa ọttạra ẹfa ch'ẹnnaanga chaam.Ẹma wọ ode ntumu-k'nnạm kwaam, ọttạra ibyittubhasẹ saam, ọttạra ọkkaana,ẹma wọ ọkkaan-m k'mbọhk s'agbaannạng.4Amma nyeri Ọvaar Ubinọkpaabyi, kw'ọbaan ẹtọhnga,kw'khaam ọkkaana, nnaanga k'mbọhk s'awawunanạng paam.5“Abokhada p'obo kk'aam afhạra,efhobh ch'ikhibha kk'aam ẹfa ẹna.6Ndikhi s'epekwur kk'iyokha ibaabh-m,abẹ aro ọmma kw'obo achokh-m.7“Amma nnyeri Ubinọkpaabyi k'ọyạyạkhẹ kwaam,Amma nnyeri Ubinọkpaabyi kwaam bẹ ọkkaan-m.Ọvaar Ubinọkpaabyi ọbhaang ẹmạng chaam k'ọchọhm kwẹ;ẹmạng chaam kk'Ọvaar Ubinọkpaabyi ikpira k'itọhng.8Iyagbin ifhạnọ, ibạra ipoma,agbaarẹ p'ọrạngkpakpa anyengi,abẹ afhạnọ ukwuru idwạdwạkhọ sẹ.9Isusong iyin-ẹ k'asung-maang,akpon-daak py'akhạm-ọkhạm ayin-ẹ k'ẹmma,akponkạnga abạra ayạma ekpon ma.10Udwu akpaang osenga ma ọsạkha,ebona ch'ipyi bẹ́ kkạạng, ining k'mfhokpatwạkhọ sẹ.11Uvur k'chẹrubim ukwur;Osenga k'abạbaang p'ufum ukwur.12Utim ituntumu usi ukkira ububha ẹma oyeni,usi ebọna ch'ẹrạng achẹ ipyi irungu bẹ́ kkạạng k'ọrạngkpang.13K'ottemkwẹ kw'ọyaanttaana, k'ititikha sẹ,akponkạnga ayạm ekpon.14Ọvaar Ubinọkpaabyi uning kha ọvaar-fhon kwẹ ọtta itum masẹ ẹbhaamkpon.Ọvaar Ubinọkpaabyi kw'Ọyọhng ọbạra ọttạbhẹ ẹmạng k'ẹrạng.15Ọtta ayuk, ukwuru awawuna-nạng,utima akponkạnga p'ayạm ekpon chididen ukhubh bẹ.16Ẹmạng ch'Ọvaar Ubinọkpaabyi ọttạbhẹ,ọttạra iyọhng s'ọjẹ k'asung-maang pẹ,asi adong p'ẹraanga-diden ajạn k'ọyaankpa,ibạra isi agbaarẹ p'ọyagbin atto eje.17Uning k'ẹrạng, onemi ọbọhk ọvạkh-m,owong-m k'asi p'adong-odong utim-m uyin kha.18Ọrạbh-m k'mbọhk s'awawuna-nạng paam p'akhaam ẹfa,ọrạbh-m k'mbọhk s'awawuna-nạng paam p'akpọhkhọ ayọhng-m.19Abẹ arim abamẹ k'iwu ch'idik ikhebh-m,okhenka, Ọvaar Ubinọkpaabyi wọ wa ode itumạm saam.20Ọchọkh-m k'ibyi s'immaam ẹkpa,ọkkaan-m, ukwuru s'ọkhaam ọttennebh abamẹ.21“Ọvaar Ubinọkpaabyi usi-m ẹtaam otor k'atorada paam,kk'aam ọtaama otor k'awurada p'mbọhk saam.22Amma kk'nden s'Ọvaar Ubinọkpaabyi ntora,iponga khaam nípyibha, s'nạn nnạm nạ́mkpa mvạra Ubinọkpaabyi kwaam.23Amma kk'nnyina sẹ phyibh nchokha,nnạm nạ́mbạra mkpa mvạra ntọhna sẹ.24Iponga-pyibha k'akhẹ k'ititikha kạ́nkhaam,kk'ifhor saam nnenga k'ipyibha.25Ọvaar Ubinọkpaabyi kk'aam ọtaama otor k'atorada paam,kk'aam ọtaama otor k'awurada p'mbọhk saam.26“Ẹma nwọ kw'ọsạk echo ọnạng-ọ,ẹwọ m'akhọhkha idạdaakha sọ.M'asi ijibha anạng ọnạng kw'nạn ipina ọkhaam.27Ọnạng nwọ kw'uwur-uwur, ẹwọ kw'm'akhọhkha awurada pọ,okhenka, ọnạng kw'usi ibyibya-dik, ẹwọ m'asi-ẹ igbaan.28M'akkaana ọnạng kw'ọsạk ifhor sẹ,okhenka, m'asạkha ọnạng kw'ose ifhor sẹ ininga.29Ọvaar Ubinọkpaabyi, ọma wọ ade ọyaanttaana kwaam,Ọvaar Ubinọkpaabyi usi uwutuma kwaam otto iyaan.30Ẹkkaana chọ ẹjọ m'ntima nnima akpongnạng abẹ;k'ẹfa ch'Ubinọkpaabyi kwaam, nkke-okẹ mgbe abaakha pabẹ njekha.31“Eden ch'Ubinọkpaabyi etor-otor:Ọkpaakhadik kw'Ubinọkpaabyi ipina kkọ́khaam.Ẹma ode ọkhọhnkpa kw'ububh anạng p'attubh k'akhẹ.32Anẹ wọ m'akpobha kw'ọyọhng Ọvaar Ubinọkpaabyi?Anẹ wọ ode Ẹtakpa chamạna ch'ẹyọhng Ubinọkpaabyi?33Ẹma Ubinọkpaabyi wọ utim ẹfa chẹ ọbaabh-m,ọbaabha eden chaam.34M'usi mfhok saam ikhaama ẹfa masẹ nnọ s'uchimi,usi-m mbe k'ibyi s'igor-ogoru.35M'okpebhi mbọhk saam irima,mbọhk saam ikke-okke immena uyuk kw'brọns.36Ẹkkaana chọ ch'anạng-m ede ọkhọhnkpa kwaam,ẹkkaana chọ kk'aam abạrada ẹnạnga.37Asi-m nsenga k'ọkkaden kw'ọmmaam-ẹkpa,mfhok saam mípyara.38Nkubhu awawuna-nạng paam, mbạra ndimi bẹ,nnạm nạ́mkpa tạrr ndimi bẹ.39Ndimi bẹ phyi-phyibh, abẹ dạk kákke abina,abẹ atto ayim-m k'mfhokpatwạkhọ.40Anạng-m ẹfa ch'ekpong ririma,asi awawuna-nạng paam asạkha ncho anạng-m.41Asi awawuna-nạng paam arạbh-m,mbạra ndimi anạng p'awun-m.42Abẹ agạm aror ẹkkaana, okhenka, ọnạng kw'ọkkaan bẹ kòde.Abẹ agạm ayeri Ọvaar Ubinọkpaabyi, bẹ ẹpọhna nọ́bạra ọnạnga.43Nkokhu bẹ tạrr abẹ ape masẹ ububuma kw'isisek,ndwukhu bẹ, mbạra mbyạrẹ bẹ mfhok masẹ idọhngọ s'inyọhng-ọnyọhngọ k'aden-gbaarẹ.44“Ọma kk'aam akkaana k'mbọhk s'idifhon s'irim abamẹ,achokh-m masẹ ocho kw'idifhon.Anạng p'uwa nạnsóng n'aning k'isekhisek kwaam.45Akhikhennạng n'aning k'ojora k'akhaam k'ititikha;okpe kw'abẹ abhaang ọtọnga kwaam bẹ́ ẹ, abẹ anạng-m ikpukpobha.46Ẹfa ẹsa bẹ bẹ́ phyibh,abẹ abina k'ibyitubhasẹ sabẹ, akwu k'opoma.47“Ọvaar Ubinọkpaabyi urukhu akpen! Ẹtọhnga iyim ẹnạng Ẹtakpa chaam!Tte abạrada ayima anạng Ubinọkpaabyi, kw'ode Ẹtakpa chaam, kw'ọbạra ode Ọkkaana kwaam!48Ẹma wọ ode Ubinọkpaabyi kw'n'utwukha idik k'echo chaam,ẹma wọ ọtạk idifhon ochok k'isekh-isek kwaam,49ẹma wọ ọkkaan-m k'mbọhk s'awawuna-nạng paam.Ọma adir-m k'ebe ch'ẹyọhng ch'awawuna-nạng paam,akkaan-m k'mbọhk s'agbạgbaana.50Ẹgwọ usi amma m'ntọhnga ọma Ọvaar Ubinọkpaabyi, k'ngekha s'idifhon;amma m'nkkọhn mmạng ntima ntọhnga eche chọ.51Ẹma m'ọnạng ọvaarnạng kwẹ nkhema sididen,usi ijibha ọnạng nwọma kw'obyeng ana k'echo,kw'ode Devid ọttạra iva p'iva pẹ, tạrr ipimmanitor.”The Seed Company