2 Samwẹl16
Devid ọttạra Ziba
1Masẹ Devid kk'osenga oyongu okpecho nwọ, n'ose Ziba kw'ode ọtọhmnạng kw'Mẹphiboshẹt s'obe ma n'utikh-ẹ. Wa ọdạbhẹ achikkọhbhọ k'nnyạnyaang, ọbạra ọtạkha abrẹd-dwuk arạbh jobh, ọttạra igbugbo s'agrep p'agwu-ugwu akwua arạbh asen, ọttạra igbugbo s'fig akwua arạbh asen, ukwu ọttạra k'atwuk p'abẹ age k'ẹkpa ch'abẹ atim otenkpa asi, utima utik Devid.2Wa ọvaarnạng ọbạbhọ Ziba bẹ́, “Atim ekpo mbyama akwu kha mbạng o?”Ziba ubhina bẹ́, “Nnyạnyaang nna ide s'ẹchọhmfhạr ch'ọvaarnạng m'n'ẹyaar. Brẹd ọttạra achidwuk mbọ ade p'adikkobh m'achi. Atwuk mbọ m'abạra n'asi ifor ikpọhkhọ ayok p'ẹfa kk'bẹ ẹsa, k'ibyi s'anạng nạn nárukha.”3Ọvaarnạng n'ọbạbhọ bẹ́, “Nnwa-mfhona kw'aro kwọ mo o?”
Ziba oben bẹ́, “Ẹma uning kha Jẹrusalẹm, ukwuru s'ọkkẹ bẹ́ ‘chemma anạng p'Israẹl m'atte ẹvaar ch'otte kwẹ kwididen ọbọhk, anạng-ẹ.’ ”4Ọvaarnạng oben Ziba bẹ́, “Ọttọhk fidede f'Mẹphiboshẹt ọkhaam node pfọ.”
Ziba ọbẹ́, “Aro ọvaar kwaam, ntwung echo k'ikpukpobha nnạng-ọ, tte nkhaama ọphyaam k'akhọ k'ititikha.”
Shimeyi unnukhu Devid
5Masẹ ọvaar Devid ukpir k'ofhon kw'Bahurim, ujunung wạnọ kw'ubin k'ẹnạmma jạnẹ ọttạra ẹchọhmfhạr ch'Saul uyin kha, ọtạma innukhu kpạkpaak. Ujunung nwọ okpen Shimeyi, kw'ode nnwa kw'Gera.6Wa n'ọbhạrẹ Ọvaar Devid ọttạra ikhaana sẹ ata. Node s'akpongnạng ọttạra anạng p'n'atik Devid aning-ẹ k'udimbọhk ọttạra k'ọkwabọhk.7Wa Shimeyi n'unnukhu Devid oben bẹ́, “Bina maa ibyi nna, sọhng afona! Ọfhọ-anạng masẹ akhọ! Ubyibyanạng!8Ọvaar Ubinọkpaabyi kk'ọ irem ọnạnga kk'anạng p'afhọ k'ẹchọhmfhạr ch'Saul, kw'atạk ẹvaar k'akhẹ k'mbọhk adạbh. Ọvaar Ubinọkpaabyi kk'ẹvaar njọ ọtạkha k'akhọ k'mbọhk, ọnạng nnwa kwọ Absalọm. N'aning k'irem, ukwuru anạng mbọ p'afhọ!”9Ma wọ Abishayi kw'ode nnwa kw'Zẹruya obeni ọvaarnạng bẹ́, “Ukwuru yạn kw'ọpfa-bukhu nwa n'unnukhu aro ọvaar kwaam oche ngwa? Tte-m ọbọhk nta mpe-ẹ echo!”10Okhenka, ọvaarnạng oben bẹ́, “Udik ngwa osengi bạnga yạn o, abạngama iva p'Zeruya? De ode bẹ́ Ọvaar Ubinọkpaabyi wọ oben-ẹ bẹ́ unnukhu amma Devid, anẹ m'ọkhaama ẹfa ọbạbh bẹ́, ‘Ukwuru yạn kw'n'asi udik demakwẹ ngwa?’ ”11Mạnna wọ Devid obeni Abishayi ọttạra atọhmnạng pẹ phyibh bẹ́, “Yeyema kwaam oyeni kw'mfhonu-ofhon, n'oror nden s'm'ọfhọ-m, bạra wạra oBẹnjamin-nạng nwa o! Attẹ-ẹ ọbọhk unnukh-m, khiri Ọvaar Ubinọkpaabyi wọ oben-ẹ bẹ́ usi oche ngwọ.12Nudusi, Ọvaar Ubinọkpaabyi okke-okke ose irem saam, utima idia ch'echekha chẹ, otera innukhu nja ch'Shimeyi unnukh-m chemma.”13Wa Devid ọttạra atọhmnạng pẹ afon ororo k'osenga kwabẹ k'okpe kw'Shimeyi n'ọbạra osenga k'ukhubha kw'okpecho kw'okker-ẹ ititikha, n'unnukhu Devid, ọbhạr-ẹ ata, ofhon-ẹ abubuma.14Wa ọvaarnạng ọttạra anạng phyibh p'atwạnọ abẹ, akwu akpira k'ibyi sabẹ n'afona s'kk'bẹ obhema. Ma wọ wa Devid okwok ọyọhng.Ntọhna s'Hushayi ọttạra Ahitophẹl
15Wa Absalọm ọttạra ajunung p'Israẹl phyibh kk'akpira k'Jẹrusalẹm. Wa Ahitophẹl ọgba ọtwạn abẹ.16Oyok-udikkobh kw'Devid kw'okpen Hushayi, kw'ubin Ark ọta okhebha Absalọm oben-ẹ bẹ́, “Tte ọvaarnạng uruk akpen p'adum-udum!”17Absalọm ọbạbhọ Hushayi bẹ́, “Idạdaakha s'akhọhk oyokh-udikkobh, asẹma rọ maa? Abạnga aseng iyok, ode yạn kw'nạ́n abẹ nátwạna afona?”18Hushayi oben Absalọm bẹ́, “Mma e, amma m'nninga nttạra ọnạng nwọ kw'Ọvaar Ubinọkpaabyi kk'otekha, kw'ode nwọ kw'anạng mba, ọttạra anạng p'Israẹl phyibh atek.19Ọttạra bẹ́, anẹ wọ kw'amma m'nsi ọtọhm nnạng o? Ma nọ́baana bẹ́, nsi ọtọhm nnạng nnwa, k'oche kw'uwa nsi nnạng otte? Amma m'nsi ọtọhm nnạng ọma e.”20Absalọm oben Ahitophẹl bẹ́, “Nạng mạna ntọhna sọ khẹ. M'ansi yạn?”21Ahitophẹl ubhina Absalọm bẹ́, “Yima ayok p'atte abẹ, p'ochokhu bẹ́, abẹ akkeri ọvaarter. Ẹgwọ m'usi anạng p'Israẹl phyibh abhaanga bẹ́, kk'atte idik abạkha. Anạng p'abe atumọ n'abạra ado ẹfa akhaama-ọkhaama.”22Mạnna wọ abẹ asi ukkira k'ọchọhm ẹrạng-ẹrạng anạng Absalọm. Uninga ma uyima ayok p'otte abẹ ma ititikha s'anạng p'Israẹl phyibh.23Ma okpe ngwọ, ntọhna s'Ahitophẹl ide masẹ ntọhna s'ọnạng ọdwạnọ Ubinọkpaabyi. Mạnna wọ kw'uwa Devid ọttạra Absalọm n'atạkha ntọhna sidede s'Ahitophẹl ọnạngẹ.The Seed Company