1 Samwẹl31

Obo kw'Saul ọttạra iva pẹ

1Ma okpe ngwọ, aPhilistiya ata arima anạng p'Israẹl abẹ. Anạng p'Israẹl arạbh k'ititikha s'aPhilistiya. Wa anạng p'Israẹl sabhaada ape k'okpecho kw'Gilboa.2Wa aPhilistiya akhubh Saul ọttạra iva pẹ ẹkhạm-ẹkhạma, abẹ afhọ iva p'Saul p'ade: Jonatan, ọttạra Abinadab, ọttạra Malki-Shua.3Ekpong njọ efon ororo ẹkhạm tạrr ekọbha Saul ege k'ngekha. Abẹ att-ẹ ayuk, abẹ asi ẹ ebhena ọkkachẹ.
4Ma o, Saul oben utim-ekpongkpo kwẹ bẹ́, “Twạr ọkkangkkang-kkro kwọ fhọm, deja akpatwạr nạng mba ma'kwu akhebh-m ma asim irem abạra afhọm. abạra atim-m asi ọkkọn-yukha.”
Okhenkha, utim-ekpongkpo kwẹ udik ngwọ ojor-ẹ, khẹ nóchera ọfhọ. Osenga ma, Saul ọtạkha ọkkangkkang-kkro kwẹ oyeni, otto ukhum ọfhọ ifor sẹ.
5Masẹ utim-ekpongkpo kwẹ ose bẹ́, Saul kk'upua, ẹma ọbạra otto ọkpẹkhẹ ọkkangkkang-kkro kwẹ oyeni, ope Saul abẹ.6Ma wọ Saul ọttạra iva pẹ attaan, ọttạra utim-ekpongkpo kwẹ, ọttạra ajunung pẹ phyibh, ape ma iwu njọ jạnẹ.
7Masẹ ajunung p'Israẹl p'arukhu k'ukhubha ngwọkha kw'ipekhuma, ọttạra ayok p'arukhu k'Jọrdan ukhubha, n'ase bẹ́, akpongnạng p'Israẹl kk'arạbha, ọttạra bẹ, Saul ọttạra iva pẹ kk'apua, abẹ abina arik ifhon sabẹ, arạbh afona, aPhilistiya akwu atạkha aruk.
8Iwu echobh ma, masẹ aPhilistiya akwu bẹ́, akwu afhạngọ apfura mbọ, abẹ ase abukhu p'Saul ọttạra iva pẹ attaan p'atto ayima k'okpecho kw'Gilboa.9Abẹ akpaara echo ch'Saul, abạra atạkha ekpongkpo pyẹ. Abẹ atọhm akpaakh-nkkaabha bẹ́, abẹ anạng ẹyaakha njọ k'ẹkhạma ch'aPhilistiya bẹ wạạm, ọttạra k'ọkhapa kw'akha pabẹ, ọttạra k'anạng pabẹ.10Abẹ atạkha ekpongkpo py'Saul achok k'ọkhapa kw'akpatava p'Ashtọrẹt. Abẹ atạkha ubukhu kwẹ adạbh k'udimokpon kw'ofhon kw'Bẹt-Shan.
11Masẹ anạng p'Jabẹsh-Gilead abhaang udik kw'aPhilistiya kk'Saul asia,12akkemkpa pabẹ phyibh abina osenga ma irungu njọ afona k'Bẹt-Shan. Abẹ asạkha ubukhu kw'Saul ọttạra iva pẹ k'udimokpon kw'Bẹt-Shan, atima afona k'Jabẹsh ata akkạmọ.13Ma wọ abẹ n'atạk akhạbhọ pabẹ annọhnga k'irin ch'ichi ch'tamarisk k'Jabẹsh. Abẹ ayim okwo k'iwu isenọfa.

The Seed Company

https://app.library.bible/content/89c3f9396b94bd6c