1Avaarnạng7
Sọlọmọn usi ọvaarchọhm kwẹ
1Wa Sọlọmọn utim icho jobh-kantaan okkera ọvaarchọhm kwẹ sisi.2Wa usi ọvaarter kw'oyeri Ọchọhm kw'Ẹkpa ch'Lẹbanọn, kw'ode ntwạkhọ arạbh asenọfa ukuma jobh k'adum, ntwạkhọ arạbh attaan ukuma chi k'ẹkpa, ọbạra ode ntwạkhọ arạbh afa ukuma nsen k'ebe. Ẹchọhmma njọ ẹbạra ẹkhaama akpakhaana annebung p'mkpọmmachi s'ichi ch'sida, p'agbangẹrẹ p'ichi ch'sida akpạn, atima atuma pyẹ.3Utim ichi ch'sida ububha ipakhọhnga s'inạn k'agbangẹrẹ, p'anạn k'akpakhaana mbọ p'mkpọmmachi. Wa abẹ ade agbangẹrẹ arạbh afa ukuma asen p'anạn k'mkpọmmachi chi.4Wa oge afhum-ma attaan-k'attaan k'ẹrạng-ẹrạng, p'akkeri ayok ititikha.5Nchọhmma phyi-phyibh ikhaam mkpọmmachi ukhira gwạnọ s'ining k'nttaan-k'nttaan ikkeri ayok ititikha.6Wa usi adimokpon p'adum pẹ ade ntwạkhọ arạbh attaan ukuma chi, ẹkpa chẹ ede ntwạkhọ arạbh afa ukuma asen, ububha pyẹ. Wa ọkhaam udimokpon kw'uning k'ititikha s'mkpọmmachi nnebung, ọttạra ukkira-kpa kw'uning bẹ k'ititikha.7Ọbạra usi udimokpon kw'm'uninga usi aponga, ọttạra udimokpon kw'eponga-kpaara. Wa usi wẹ tạma k'udimokpon tạrr ukpira k'nchi s'ọraarẹ k'ẹrạng, ọttạra ichi s'sida.8Ọttạra bẹ́, ọvaarchọhm kw'n'oben bẹ́ uruk, kw'uning k'ẹpannạm, ode ukhira ngwọ gwạnọ. Wa Sọlọmọn usi ọchọhm kw'ode masẹ ọvaarchọhm ngwọ ọnạng nnwa kw'Phero kw'ikwanạng, kw'kk'ọtạkha k'ọbada.9Idik nnọ phyibh, tạma k'iyaan kpira k'adimokpon pididen, atạm k'agbaarẹ p'ọchọhm ngwọ tạrr akpira k'ammakpabem p'ọchọhm, wa usi ọttạra ata p'abin k'ata akkapẹ p'abẹ asi, atima ayọmkpọ akpaara ator k'ukhira kw'abẹ ayom pyẹ, tạma k'ẹtaanga kpira k'iyaan.10Abẹ atim ata p'akwọhng ọkwọhnga k'ọsaabh asi agbaarẹ p'ọchọhm ngwọ, bạnọ ade ntwạkhọ chi, bạnọ ade ntwạkhọ jobh-kamfa.11K'ẹrạng, ọbạra ọkhaama ata akkapẹ p'abẹ akpaar ator k'ukhira kw'abẹ aroru, ọttạra agbangẹrẹ p'ichi ch'sida.12Akhaan-ọkhaan p'adimokpon p'ọchọhm ngwọ ẹtaanga, akhaam ntumu s'ata attaan p'akhaam agbangẹrẹ p'ichi ch'sida k'ẹrạng, masẹ ẹtaanga kw'udimokpon kw'ọchọhm kw'Ọvaar Ubinọkpaabyi, ọttạra iyaan-iyaan kw'ọvarrchọhm.Sọlọmọn obeni Hiram bẹ́ usi ọchọhm
13Ọvaar Sọlọmọn ọtọhmọ abẹ ayeri Hiram kw'ubin Taya.14Ẹma nwọ wa ode ujunungnwa kw'opokwa kw'ubin k'ẹkhạma ch'Naphtali, otte ode otepa kw'brons, ubin Taya. Wa ọkhaam emmengkka ọttạra ekkoji ch'ọtọhm fidede f'oten k'brons. Wa ocher eyera ch'ọvaar Sọlọmọn oyer-ẹ bẹ́, usi itọhm sidede s'brons sabẹ anạng-ẹ.15Udwukhu brons utima usi mkpọmmachi mfa; ẹkpọmmachi chidede ede ntwạkhọ ẹrạbh ukuma nsenọfa k'adum, ọttạra ntwạkhọ chi-kanttaan k'iriringi.16Ọbạra udwuk brons afa pididen ọnạna k'ẹrạng kw'mkpọmmachi nnọ. Adum p'wạnọ ade ntwạkhọ nsen, adum p'nwọkha ade ntwạkhọ nsen.17Ọbạra usi ọttọhk f'ode masẹ ibunu f'utim mgbakkọhbhọ oyok ọnạna k'ẹrạng kw'mkpọmmachi nnọ, ọnạna esenọfa k'ẹkpọmmachi chidede.18Usi akhaana afa p'apomegranet ọfhạrọ ibunu nnọ, utima odokha ẹrạng-ẹrạng kw'mkpọmmachi nnọ.19K'ẹrạng-ẹrạng kw'mkpọmmachi nnọ mfa s'ining ma ibyi nnọ, ọkhaam ivạra s'ide ntwạkhọ nsajạnẹ k'adum.20K'ẹrạng-ẹrạng kw'ẹkpọmmachi chidede, ọkhaam ọgbanggbang kw'uning ọbaanga ibunu nnọ s'apomegranet arạbh jobh p'aning k'ọkpakhaana.21Hiram ochokhu mkpọmmachi nnọ k'ẹtaanga kw'ọchọhm ngwọ. Okpe ẹkpọmmachi ch'ining k'ukhubha kw'ẹrạkh-ẹrạkha Jakin, okpe njọkha ch'ining k'ibir-ibira Boaz.22K'ẹrạng-ẹrạng kw'mkpọmmachi nnọ, utim brons usi ayoyo. Ma wọ ọtọhm f'mkpọmmachi sisi ọsa.23Hiram utim brons usi ẹgbanggbang-dim ch'asi ch'ede iriringi, ch'ikpir ntwạkhọ jobh. Tạma k'ẹgbanggbang-yạr tạrr ukpira k'ẹmma ede ntwạkhọ nsen k'adum. Ọtạkha idikhi ch'ikpir ntwạkhọ ẹrạbh ukuma jobh, bẹ́ abẹ ayoma ẹmma chẹ.24K'ẹyạr ch'ọgbanggbang nwọ, ọkhaam akhaana afa p'asigwua p'brons, p'atobh abaabh-ọbaabha, p'akpir ntwạkhọ chi k'adum. Asigwua mbọ aning k'akpakhaana afa k'ibyi rạnẹ ọttạra ọgbanggbang nwọ.25Ọgbanggbang nwọ ọnạn k'mmaam jobh-kamfa p'brons. Attaan akkeri ibir-ibira, attaan akkeri k'ukhubha kw'ududon n'uyin; attaan akkeri k'ukhubha kw'ẹrạkh-ẹrạkha, attaan akkeri k'ukhubha kw'ududon n'udimi.26Adinada p'ọgbanggbang nwọ ade ẹbọhkpattem, ẹmma chẹ ede masẹ ẹmma ch'nkkọhbh, masẹ ogbo kw'oyoyo. Ọgbanggbang nwọ ọnwa agbạre nnọhna ẹrạbh ukuma asen.27Wa Hiram ọbạra utima brons usi ekpo jobh py'ekher ijaar, wa kwidede ukpir ntwạkhọ nsajạnẹ k'adum, ọttạra ntwạkhọ nsajạnẹ k'ẹkpa, ọttạra ntwạkhọ nnebung k'ebe.28Maa wọ ode oche kw'uwa abẹ asi pyẹ: wa apyẹ ẹkhaam mkpa s'ining k'akhaan-ọkhaan.29Ma mkpa nnọ s'ining k'akhaan-ọkhaan, abẹ anạn nkke, ọttạra mmaam, ọttạra chẹrubim. K'mkpọmmachi ẹrạng-ẹrạng ọttạra k'isekhisek ode nkke, ọttạra ẹbhaam, wa ode ọbọhktọhm f'otepa.30Oyongu ma, fidede ọkhaam mfhok nnebung s'brons s'n'ibhạkhẹ-ọbhạkhẹ, ọttạra mkpạkha s'brons, fidede ọbạra ọkhaama ọgbanggbang kw'ọnạn k'mfhok nnebung.31K'ẹtaanga kwẹ, ọkhaam ibyi s'itto eje s'ide iriringi, ibạra ide ntwạkhọ jobh-kawạnọ k'adong. Ibyi nnọ s'itto eje ide iriringi ọttạra udimokpon kwẹ kw'ode ntwạkhọ ẹrạbh ukuma wạnọ. Abẹ abạra afhạrọ akhaan-ọkhaan p'ọmmakhubh. Akhaan-ọkhaan p'ikpaang nnọ ade nkhạbha nnebung, apyẹ iriringi nídia.32Mfhok sẹ nnebung ining k'isekhisek kw'ikpaang, abẹ adạbhẹ mkpạkha s'ivạk mfhok amaana ma. Ariringi p'mfhok ade ntwạkhọ arạbh attaan ukuma asenọttaan k'ebe,33wa mfhok nnọ ide masẹ mfhok s'ọkpaar kw'ẹnyạnyaang n'ẹtwạr; mkpạkha sabẹ ọttạra ariringi p'mfhok, ọttạra mbaanga s'ivạk ottemkwẹ kw'ariringi p'mfhok, phyi-phyibh ade brons.34Ọkpaar kwidede ọkhaam avạkh-ọbọhk annebung, ẹkhạbha chidede ikhaam ivạkh-ọbọhk rạnẹ, s'itọhnọ kisekhisek kw'ikpaang iyin k'iyaan.35K'ẹrạng-ẹrạng kwẹ, ọkhaam udikhikpa kw'ode ntwạkhọ ẹrạbh ukuma mfa, ọbạra ọkhaama avạkh-ọbọhk annebung p'akpạn k'ẹnwyạnga chidede.36Ọkkẹrẹ chẹrubim ọttạra nkke, ọttạra aji k'ibyi sabẹ n'avạkha mbọhk, ọttạra k'aphyaangẹ pabẹ.37Mạnna wọ kw'uwa usi ekpo mbyọ jobh. Wa abẹ adwukhu pyẹ phyibh k'ibyi rạnẹ, apyẹ ẹbạra ekhera ayok.38Hiram ọbạra usi agbanggbang-dim jobh p'brons, ẹgbanggbang-dim chidede ikpir ntwạkhọ nsajạnẹ, ch'ẹnwa agbạre arạbh jobh.39Ọtạkha nnạna nsen ochok k'ukhubha kw'ẹrạkha-ẹrạkha kw'ọchọhm, ọbạra ọtạkha nsen ochok k'ibir-ibira. Ọtạkha ẹgbanggbang-dim ch'asi ochok k'ẹnwyạnga k'ẹrạkh-ẹrạkha kw'ọchọhm kw'okkeri k'ukhubha kw'ududon n'uyin.40Wa ọbạra usi ọsọhkha ọttạra ashọvẹl ọttạra akpobhu-mbọhk p'efokhu.Ma wọ Hiram okker ọtọhm fidede f'kk'usia ọnạng Sọlọmọn k'ọchọhm kw'Ọvaar Ubinọkpaabyi:41mkpọmmachi mfa; ọttạra agbanggbang-dim afa p'anạn k'mkpọmmachi nnọ k'ẹrạng-ẹrạng; ọttạra ategba afa p'abẹ atim adokha agbanggbang-dim mbọ afa k'ẹrạng-ẹrạng kw'mkpọmmachi nnọ;42ọttạra apomegranet ẹnọhna p'ategba mbọ afa (otegba gwạnọ ọkhaam apomegranet akhaana afa p'abẹ atim adokha agbanggbang-dim p'anạn k'ẹrạng-ẹrạng kw'mkpọmmachi nnọ mfa);43ọttạra nnạna jobh, ọttạra agbanggbang-dim pyabẹ;44ọttạra agbanggbang-dim p'asi, ọttạra mmaam jobhkamfa k'isekhisek kwabẹ;45ọttạra ọsọhkha, ọttạra ashọvẹl, ọttạra akpobhu-mbọhk p'efokhu.
Wa Hiram utim brons kw'ọbhaabhẹ k'ekpon usi ekpo mbyọ phyibh ọnạng ọvaar Sọlọmọn k'Ọchọhm kw'Ọvaar Ubinọkpaabyi.46Wa ọvaarnạng obeni abẹ atima idọhngọ abạnga pyẹ k'ẹkpẹmẹ ch'Jọrdan kw'uning k'ottemkwẹ kw'Sukot, ọttạra Zarẹtan.47Wa Sọlọmọn adọhbh py'ekpo mbyọ phyibh nóyoma, ukwuru s'apyẹ ẹsaabhẹ eseng eden; wa abẹ adọhbh py'brons nábạra ayoma.48Wa Sọlọmọn ọbạra usi ekpo phyibh py'abẹ atim adokha Ọchọhm kw'Ọvaar Ubinọkpaabyi, py'ade:
ijabyi s'gol; ọttạra okpokkro kw'gol kw'abẹ n'anạna brẹd kw'awurada;49ọttạra itukkạng-chi ch'gol (asen k'udimbọhk, asen k'ọkwabọhk, k'ititikha s'ibyi s'awurada); ọttạra ayoyo p'gol, ọttạra attukkạng, ọttạra afamgba pabẹ;50ọttạra agbanggbang-dim p'gol, ọttạra atukkạng-nạm, ọttạra akpobhu-mbọhk p'efokhu, ọttạra nsengakpa, ọttạra insẹns; ọttạra mkpạkha s'gol s'ammakhubh p'ẹmaanggọ ch'ẹtaanga ch'ede ibyi s'Awurada p'ayọhng Awurada, ọtạra k'ammakhubh p'udimpa kw'ọchọhm kw'Ubinọkpaabyi.51Masẹ ọtọhm phyibh f'ọvaar Sọlọmọn usi k'Ọchọhm kw'Ọvaar Ubinọkpaabyi kk'ọsa, ofona ọta ọtạkha ekpo py'otte Devid py'ede: silva, ọttạra gol, ọttạra ekpo py'ọchọhm-dudokha, ọtạkha pyẹ ochok k'ibhikha ch'Ọchọhm kw'Ọvaar Ubinọkpaabyi, utima pyẹ ukwu otte ọbọhk ọnạng Ọvaar Ubinọkpaabyi.
The Seed Company