1Avaarnạng6

Sọlọmọn usi Ọchọhm kw'Ubinọkpaabyi

1K'cho kw'ottong innebung, k'ophye kw'Ziv kw'ode ophye kw'ottong afa kw'Sọlọmọn kk'Israẹl ọdạbha, ma wọ kw'uwa ọtạm Ọchọhm kw'Ọvaar Ubinọkpaabyi. Wa node icho ẹnọhna ukuma arạbh annebung s'anạng p'Israẹl kk'abina k'Ijip.
2Ọchọhm kw'uwa ọvaar Sọlọmọn usi ọnạng Ọvaar Ubinọkpaabyi ode ntwạkhọ arạbh annebung ukuma jobh k'adum, ẹkpa chẹ ede ntwạkhọ ẹrạbh ukuma jobh, ebe chẹ ede ntwạkhọ arạbh afa ukuma nsen.3Ẹchọhmma ch'iyaan-iyaan ch'udimpa kw'Ọchọhm kw'Ubinọkpaabyi ede ntwạkhọ ẹrạbh ukuma jobh k'adum, ede obengana ọttạra ẹkpa ch'ọchọhm ngwọ. Ẹkpa ede ntwạkhọ chi, ch'ẹttwạkhọ k'ititikha s'ọchọhm ngwọ.4Usi ufhum-ma p'akkobh-okkobha k'ẹrạng-ẹrạng kw'adimokpon p'ọchọhm ngwọ.5Usi mmangọ k'iyaan-iyaan kw'udimokpon kw'udimpa ọttạra kw'ibyi s'awurada, utima ọfhạrọ ọchọhm ngwọ.6Ọgbaarẹ kw'isekhisek kw'ọchọhm ngwọ ode ntwạkhọ nsenọfa ọmaana ikpokha, ọgbaarẹ kw'ottemkwẹ ode ntwạkhọ sọwạnọ, ọgbaarẹ kw'ibir-ibir ode ntwạkhọ jobh ọmaana ikpokha. Ukwu usi ategba utima ọvạkha mkpạkha s'adimokpon, ọfha anạng nạngẹ ọttọhk k'adimokpon p'ọchọhm ngwọ ammunu.
7Masẹ abẹ n'asi Ọchọhm ngwọ kw'Ubinọkpaabyi, wa abẹ atim ata p'abẹ aphyaakhẹ k'itabyi mạnkkeni asi kwẹ. Ẹkhọhr ch'ọttọhk udwukhafẹ fidede, ọttạra ẹbạr, tạrr oseng k'ọtọhm-ttọhk f'ẹbaanga f'ọnạng ọbhaang k'ibyi sabẹ n'asi ọchọhm ngwọ, kòde.
8Wa ọmmakhubh kw'ọgbaarẹ kw'isekhisek uning k'ẹrạkh-ẹrạkha kw'ọchọhm ngwọ; ibyạrẹ-mfhok ininga itena k'ọgbaarẹ kw'ottemkwẹ ọttạra kw'ibir-ibira.9Wa usi ọchọhm ngwọ akwẹ ọsa, utima agbangbang ububha kwẹ ọttạra mkpaakha s'ichi ch'sida.10Ọbạra usi mmaangọ ọbaabha ọchọhm ngwọ phyibh. Ebe ch'ẹmaanggọ chidede ede ntwạkhọ nsenọfa ọmaana ibhaakha, abẹ asi sẹ akpạna k'agbangbang p'ichi ch'sida.
11Ma wọ Ọvaar Ubinọkpaabyi obeni Sọlọmọn bẹ́,12“Node ọchọhm ngwa kw'n'asi maa, de achokhu nnyina saam, abạra atạkha ntọhna saam, achok nttọhna saam phyibh, asạkha echo anạng-m, amma m'nsenga ọma abẹ nnạng ẹyaakha ch'echekha ch'nkhaam atte Devid abẹ.13Amma m'nnuk k'ikhaana s'anạng p'Israẹl, anạng paam Israẹl ọbọhk mạ́mbạra ntte.”
14Wa Sọlọmọn usi ọchọhm ngwọ akwẹ ọsa.15Ummun mkpaakhakpa s'ichi ch'sida utima ububha adimokpon k'ẹtaanga, ummun sẹ tạma k'ọgbaarẹ kw'ọchọhm ngwọ tạrr akpira k'ibyi s'ikpa ipakhọhnga, ọtạkha mkpaakhakpa s'siprẹs ububha ọgbaarẹ kw'ọchọhm ngwọ.16Utima mkpaakhakpa s'ichi ch'sida okhebh tạma k'ọgbaarẹ tạrr akpira k'ibyi s'ikpa ipakhọhnga, utima usi ẹmaanggọ ch'ibyi s'Awurada p'ayọhng Awurada ch'ede ntwạkhọ ẹrạbh ukuma jobh, k'ẹtaanga kw'ọchọhm ngwọ.17Ọgbaarẹ kw'uning k'ititikha s'ẹmaanggọ njọ, ode ntwạkhọ arạbh attaan k'adum.18Wa abẹ atim ichi ch'sida asi ọchọhm ngwọ k'ẹtaanga. Abẹ abạra agwa adwuk p'isigwua, ọttạra ayoyo p'ammaam-ọmmaama, atima adokha kwẹ. Abẹ atima ichi ch'sida asi ọttọhk fidede f'ọchọhm ngwọ, ẹta jạnẹ-jạnẹ ch'ọnạng ose k'ichen kède.
19Usi ibyi s'awurada k'ẹtaanga kw'ọchọhm ngwọ k'oche kw'abẹ m'anạna Ikwukwur s'Echekha ch'Ọvaar Ubinọkpaabyi.20Wa ibyi nnọ s'awurada ide ntwạkhọ ẹrạbh ukuma jobh k'adum, ide ntwạkhọ ẹrạbh ukuma jobh k'ẹkpa, ibạra ide ntwạkhọ ẹrạbh ukuma jobh k'ebe. Utima gol ọfhạrọ sẹ kha ẹtaanga, ọbạra utima gol ọfhạrọ ijabyi s'sida.21Sọlọmọn utim gol ọkkakwẹ ọfhạrọ ọchọhm ngwọ kha ẹtaanga, ọbạra utima mgbakkọhbhọ s'gol ọkpa k'ititikha s'ibyi s'awurada sabẹ atim gol afhạrọ.22Mạnna wọ utim gol ọfhạrọ ẹtaanga kw'ibyi nnọ phyibh, ọbạra utima gol ọfhạrọ ijabyi s'ining k'ẹtaanga kw'ibyi s'awurada.
23Utima ichi ch'oliv usi chẹrubim afa k'ẹtaanga kw'ibyi s'awurada. Ebe ch'chẹrub kwidede ede ntwạkhọ chi.24Ẹbạbaang jạnẹ ch'chẹrub kw'uchi eden ede ntwạkhọ nsenọfa k'adum, ẹbạbaang njọkha ẹbạra ede ntwạkhọ nsenọfa. Wa abạbaang mbọ ade ntwạkhọ chi, s'ayom k'ẹbạbaang-cho jạnẹ tạrr akpira k'njọkha.25Abạbaang p'chẹrub nwọkha abạra ade ntwạkhọ jobh. Wa chẹrubim mbọ afa ade obengana k'ẹfa ọttạra k'ukhira.26Ebe ch'chẹrub kwidede ede ntwạkhọ chi.27Ọtạkha cherubim mbọ ochok kha ẹtaanga kw'ibyi s'Awurada p'ayọhng Awurada ma ọchọhm ngwọ. Abạbaang p'chẹrubim mbọ ẹmmaam-ọmmaama, ọbạbaang kw'oyok wạnọ utwu udimokpon wạnọ, ọbạbaang kw'chẹrub nwọkha utwu udimokpon nwọkha. Abạbaang mbọ pabẹ atwu ayok ma ottemkwẹ kw'ẹmaanggọ.28Utima gol ọfhạrọ chẹrubim mbọ.
29Usi chẹrubim ọttạra aji, ọttạra ayoyo p'ammaam-ọmmaama, ọfhạrọ adimokpon p'ọchọhm ngwọ phyibh k'mmaangọ ẹtaanga ọttạra k'iyaan.30Ọbạra utima gol ububha ọgbaarẹ kw'ọchọhm ngwọ k'iyaan ọttạra k'ẹtaanga.
31Utim ichi ch'oliv usi ammakhubh k'ẹtaanga kw'ibyi s'awurada. Wa mkpaakha nnọ ide ibyi rạnẹ k'ibyi isen, de akhebhi ẹkpa ch'ibyi s'awurada k'ibyi isen.32Usi chẹrubim ọttạra aji, ọttạra ayoyo p'ammaam-ọmmaama ma ammakhubh mbọ afa p'abẹ atim ichi ch'oliv asi, ọbạra utima gol udwukhakwẹ ọfhạrọ chẹrubim mbọ ọttạra aji.33Ma ukhira ngwọ gwạnọ, utim ichi ch'oliv usi mkpọmmachi s'udimpa s'ide ibyi rạnẹ k'ibyi innebung, de akhebhi ẹkpa ch'ibyi s'awurada.34Utim siprẹs usi ammakhubh afa. Ọmmakhubh kwidede ọkhaam mkpa mfa s'n'igwunga ibaakha k'ayok.35Usi chẹrubim ọttạra aji ọttạra ayoyo p'ammaam-ọmmaama, utima gol udwukhakwẹ ọfhạrọ pyẹ ọbaabh-ọbaabha.
36Utim ata p'abẹ ado-odo, ọttạra agbangbang p'ichi ch'sida p'ẹkwọhng-ọkwọhnga, usi adimpa attaan.
37Wa ọphyaakhẹ ọgbạarẹ kw'ọchọhm kw'Ọvaar Ubinọkpaabyi k'icho kw'ottong innebung, k'ophye kw'Ziv, kw'Sọlọmọn kk'Israẹl ọdạbha.38Wa okker ọchọhm kw'Ubinọkpaabyi phyi-phyibh otor k'ntora s'ọchọhm, k'icho kw'ottong jobh-kawạnọ, k'ophye kw'Bul kw'ode aphye asenọttaan. Wa utim icho isenọfa usi ọchọhm ngwọ.

The Seed Company

https://app.library.bible/content/89c3f9396b94bd6c