Joshua13
Izek s'irikẹ bẹ́, matọka
1K'ogbe kw'uwa Joshua kk'ọtama mawuriji, Ọvaar Ibinọkpaabyi oben-ẹ bẹ́, “Kọ kk'atama mawuriji, okenaka, izek s'isaabh-ọsaabh itim irikẹ za s'mm'atọka ayena.2“Izek njo s'irikẹ ide ẹbhaakẹ ch'Philistiya maphyir, ọmaana ch'Geshur,3tọma z'Ọraanga kw'Shihọr kw'oning z'ẹbhaakẹ ch'ewuchen ed-eyin z'Ijip maa, pyirẹ z'ebir-ebir kw'enem ch'Ekrọn. Ibyi njo maphyir ide s'anọng p'Kenaan, chibhẹ ch'ode bẹ́, avaar mbo achen afon Philistiya p'abaabh Gaza, ọmaana Ashdọd, ọmaana Ashkẹlọn, ọmaana Gat, ọttara Ekrọn. Wa ẹkọma ndo ede ch'anọng p'Avit4p'aning z'ẹwọn-ẹwọna. Izek njo maphyir ide s'anọng p'Kenaan, tọma z'obhon kw'Arab kw'anọng p'Sidọn maa, pyirẹ z'Aphek kw'ode enem ch'Amọr;5ọmaana izek s'anọng p'Gebal, ọttara izek s'Lebanọn s'ichin z'ẹbhaakẹ ch'ewuchen ed-eyin. Bir tọma z'Baal-Gad kw'oning izek-izek kw'Egbe ch'Hẹrmọn maa, pyirẹ z'Lebo-Hamat.6“Anọng maphyir p'marukọ z'nkọma s'egbe, tọma z'Lebanọn maa, pyirẹ z'Misrẹphọd-maim, kw'ode anọng p'Sidọn maphyir, kaam Ọvaar Ibinọkpaabyi oyenẹ, m'nkwubh bẹ k'ititika s'Israẹl. Nkàzaama bẹ́, mm'akebh izek nja manang anọng p'Israẹl mayena, k'ose kw'kaam ikk'bọnga ntọhna.7Ofona nya, kebh izek nja nang mfonamma osowanẹ s'Israẹl, ọmaana igboka janẹ s'efona ch'Manasẹ.”Ekebha ch'izek s'ẹbhaakẹ ch'ewuchen ed-eyin z'Jọrdan
8Wa igboka njoza s'efona ch'Manasẹ, ọmaana efona ch'Reuben, ọttara ch'Gad, nkk'okebh f'izek sabẹ atọka z'Mosẹs kw'ode ọtọhmnọng kw'Ọvaar Ibinọkpaabyi. Izek njo ining z'okwubha kw'Jọrdan, za ch'ewuchen ed-eyin, mbengana k'ose kw'Moses kw'ode ọtọhmnọng kw'Ọvaar Ibinọkpaabyi, okebhẹ ọnang bẹ.9Izek sabẹ itọhm z'Aroer kw'oning k'enem ch'Ilokodo s'Arnọn, ọmaana ebhondim ch'ening k'njeka kw'ilokodo njo, ọttara izek maphyir s'Medeba, s'ide ẹkpẹmẹ maa, pyirẹ z'Dibọn,10ọmaana ibhondim maphyir s'ọvaar Sihọn kw'Amọr kw'ọbaabh z'Hẹshbọn maa, pyirẹ z'enem ch'anọng p'Amọr.11Izek s'iwa ittar nya ide Gilead, ọmaana ẹbhaakẹ ch'Gẹshur, ọmaana ch'Maaka, ọmaana ch'Egbe ch'Hẹrmọn maphyir, ọttara ẹbhaakẹ ch'Bashan maphyir maa, pyirẹ z'Salẹka,12kw'ode ọvaarbhon kw'Ọg kibungọ kw'oning z'Basha. Kẹ wọ uwa ọbaabh Ashtarọt ọmaana Edrẹi. (Kẹ wọ uwa orikẹ k'anọng p'Rephaim.) Wa Mosẹs kk'anọng mba okema, okwubh bẹ ny'izek njo.13Wa anọng p'Israẹl m'anọng p'Gẹshur, ọmaana p'Maaka kakwubhọ ny'abẹ k'njeka. Anọng mbo atim arukọ amaana Israẹl za maa, pyirẹ menda.14Ṉ́nòde efona ch'Lẹvi, wa Mosẹs bẹ izek s'mm'ayena kọnangẹ, ch'ode bẹ́, nnanga s'ẹja ofufọhnọ s'mad-anang z'ọsọhm kw'Ọvaar Ibinọkpaabyi, kw'ode Ibinọkpaabyi kw'Israẹl, jẹ jọ ide okebh fabẹ.15Ma wọ ode izek s'iwa Mosẹs ọnangẹ efona ch'Reubẹn otor k'nnọmma sabẹ:16Wa izek s'ofonamma kw'Reubẹn itọm z'Aroer kw'oning z'akonga p'Ilokodo s'Arnọn, ọmaana z'ebhondim ch'ening k'njeka kw'ilokodo njo, ọmaana z'ẹkpẹmẹ kibungọ ch'Medeba.17Obir ọttara izek s'Hẹshbọn, ọmaana s'ibhondim s'ining ny'ẹkpẹmẹ ndo; ọmaana s'Dibọn, ọmaana s'Bamot-baal, ọmaana s'Bẹt-baal-meọn,18ọmaana s'Jahaz, ọmaana s'Kẹdẹmọt, ọmaana s'Mephaat,19ọmaana s'Kiriataim, ọmaana s'Sibma, ọmaana s'Zẹrẹt-shahar kw'oning k'egbe ch'ilokodo,20ọmaana s'Bẹt-peor, ọmaana ọsakada f'Pisga, ọmaana s'Bẹt-Jẹshimọt,21kw'ode ibhondim maphyir s'ining k'ẹkpẹmẹ, ọmaana ọvaarbhon kw'Sihọn kw'ode ọvaarnọng kw'anọng p'Amọr. Kẹ wọ uwa oning z'Hẹshbọn ọbaabha. Wa Mosẹs okem kẹ ọmaana avaar p'Midiyan, ọmaana p'Evi, ọmaana p'Rẹkẹm, ọmaana p'Zur, ọmaana p'Hur, ọmaana p'Reba, ọttara ajinọngva p'avaar mboza p'abe k'Sihọn, p'abir aruk ny'ẹkọma ndo.22Balaam kw'ode nnwa kw'Boer, ọttar ny'anọng mbo p'uwa anọng p'Israẹl mafhọ k'egbong. Wa kẹ od-osi ẹbọhk.23Wa ọraanga kw'Jọrdan wọ ode enem ch'anọng p'Reubẹn. Ibhon ọmaana ibhondim nja jọ uwa ide izek s'anọng p'Reubẹn otor k'nnọmma sabẹ.24Ma wọ ode izek s'iwa Mosẹs obira ọnang ofonamma kw'Gad bẹ́, mayena, otor k'nnọmma sabẹ.25Wa ode ẹkọma ch'Jazẹr, ọmaana ibhondim s'Gilead maphyir, ọmaana ẹbhaakẹ danẹ ch'anọng p'Amọn, maa, pyirẹ z'Aroer kw'oning ọnyọma Raba.26Bir tọma z'Hẹshbọn maa, pyirẹ z'Rama-Mizpa, ọttara Bẹtonim, abira atọma z'Mahanaim maa, pyirẹ z'ẹkọma ch'Debir,27ọmaana z'ilokodo, ọmaana z'Bẹt-Haram, ọmaana z'Bẹt-Nimra, ọmaana z'Sukọt, ọmaana z'Zaphon, ọttara ẹbhaakẹ maphyir ch'iwa ọvaar Sihọn kw'Hẹshbọn ọbaabh, (s'itọm z'ẹbhaakẹ ch'ewuchen ed-eyin z'Ọraanga kw'Jọrdan maa, zọhng tto z'Ọraanga kwiden kw'Galili).28Ibhon njoma ọmaana ibhondim sabẹ jọ s'iwa Mosẹs ọnangẹ anọng p'Gad bẹ́, mayena, tor k'nnọmma sabẹ.29Ma wọ ode okebh f'Mosẹs ọnangẹ igboka janẹ s'efona ch'Manasẹ, kw'ode igboka janẹ s'anọng p'Manasẹ, tor kw'nnọmma sabẹ.30Wa ẹkọma ch'ọnangẹ bẹ ẹtọm z'Mahanaim epyirẹ z'Bashan maphyir, ebir epyirẹ z'nkọma s'ọvaar Ọg kw'Bashan ọbaabh, ọmaana ibhon s'Jair kw'oning z'Bashan, ọttara ibhondim arọbh attaan,31ọmaana igboka janẹ s'Gilead, ọmaana Ashtarọt, ọmaana Edrei (kw'ode ivaarbhon s'Ọg z'Bashan). Ibhon s'ẹkọma nda jọ s'iwa Mosẹs okebhẹ ọnang igboka kpenamkpen s'ẹnọmma ch'Makir kw'Manasẹ obhonọ, tor k'nnọmma sabẹ.32Ozek mva vọ f'uwa Mosẹs ọnangẹ bẹ k'ogbe kw'uwa oning z'ẹkpẹmẹ ch'Moab, z'okwubha kw'Ọraanga kw'Jọrdan, z'ẹbhaakẹ ch'ewuchen ed-eyin z'Jẹriko.33Wa Mosẹs efona ch'Lẹvi okebh kpenamkpen f'izek kọnangẹ. Ọvaar Ibinọkpaabyi, kw'ode Ibinọkpaabyi kw'Israẹl wọ ode okebh f'bẹ mayen, otor k'ose kw'uwa ochekẹ ọnang bẹ.The Seed Company