Nnwẹr kw'Ozenga6
1Nya o, Ọvaar Ibinọkpaabyi oben Mosẹs bẹ́, “Kọ m'aze ọttọhk f'm'nsi Phero. Kaam m'ntima ẹfa chaam nsẹ-ẹ otte anọng paam ọbọhk, mafona. Ẹfa ndo chaam m'ẹsẹ-ẹ okwubh bẹ ny'ẹkọma chẹ.”2Ibinọkpaabyi obir oben Mosẹs bẹ́, “Kaam wọ nde Ọvaar Ibinọkpaabyi.3Wa kaam kk'nyina nkebha Abraham, ọmaana Isaak, ọttara Jekọb mach'Ibinọkpaabyi kw'Ẹfa maphyir. Okenaka, kaam eche chaam ch'ede Ọvaar Ibinọkpaabyi, kinyaakẹ nnang bẹ.4Wa kaam mbir nchekẹ bẹ́, m'nnang bẹ izek njo s'Kenaan s'iwa marukọ mach'akikennọng.5Kaam kk'ichichinẹ s'anọng p'Israẹl mmaanga k'ebira ch'maning k'mbọhk s'anọng p'Ijip. Kk'echekẹ chaam mbir njima.6“Ofona nya, gbaak anọng p'Israẹl bẹ́, ‘Kaam m'nrọhbha bẹ k'ebira ch'anọng p'ijip. Kaam m'nsi bẹ manaanga, maning ọdọk abira ade anang bẹ. Kaam m'ntima ẹfa chiden, ọttara adik-dim p'm'nsi, nnang bọnga ẹkkaana.7Kaam m'ntọka bọnga mach'anọng paam oyenẹ, mbir nde Ibinọkpaabyi kwabọnga. M'ofona nya, mm'azonga bẹ́, kaam wọ nde Ọvaar Ibinọkpaabyi kwabọnga, kw'ọrọhbh bọnga k'irem s'anọng p'Ijip.8Kaam m'ntima bọnga nchina z'izek njo s'nyaangẹ ọbọhk, nchekẹ bẹ́, m'nnang Abraham, ọmaana Isaak, ọttara Jekọb. M'nnang bọnga izek njo mayena. Kaam wọ nde Ọvaar Ibinọkpaabyi.’ ”9Mosẹs ọd-ọgbaak anọng p'Israẹl ẹkkaabha nda. Okenaka, m'ikẹ itọhng kayong okurọ ch'ifor imọmọ bẹ, ọttara z'atọhmgbọhka p'mad-asi.10Nya o, Ọvaar Ibinọkpaabyi oben Mosẹs bẹ́,11“Zọhng tek Phero kw'ode ọvaarnọng kw'Ijip bẹ́, tte otte anọng p'Israẹl ọbọhk mabina ny'ikẹ k'izek.”12Mosẹs oben Ọvaar Ibinọkpaabyi bẹ́, “Anọng p'Israẹl kaam itọhng kacher ayonga, Phero wọ im'otera oyong-m itọhng o? Kọ azong za bẹ́, ọgbaakadik ọd-ọkaar-m ọkaara.”13Wa Ọvaar Ibinọkpaabyi ọgbaak odik ọnang Mosẹs ọmaana Aarọn kw'ọmaan anọng p'Israẹl ọttara ọvaar Phero kw'Ijip. Ọnang bẹ ẹfa bẹ́, matima anọng p'Israẹl mabina ny'Ijip.14Ma wọ ode aso p'mfona sabẹ: Wa ajinọngva p'Reubẹn kw'ode ocheden-jinọngnwa kw'Israẹl made, Hanọk, ọmaana Palu, ọmaana Hẹzrọn, ọttara Karmi. Minna kw'uwa efona ch'Reubẹn ede.15Ajinọngva p'Simeọn made, Jemuyẹl, ọmaana Jamin, ọmaana Ọhad, ọmaana Jakin, ọmaana Zoha, ọttara Shaul kw'ode ojinọngnwa kw'oKenaan-kwanọng ọmaanẹ. Minna kw'uwa efona ch'Simeọn ede.16Ajinọngva p'Lẹvi obhonọ, atorọ k'ose kw'mammaan, made, Gershon, ọmaana Kohat, ọttara Mẹrari. Wa Lẹvi orukọ k'icho arọbh achadanẹ okwuma ichikkamfa.17Ajinọngva p'Gershon, atorọ k'nnọmma sabẹ, wa made, Libni ọttara Shimei.18Ajinọngva p'Kohat made, Amram, ọmaana Izha, ọmaana Hẹbrọn ọttara Uziyẹl. Kohat wa orukọ k'icho arọbh achadanẹ okwuma ijobh kanttaan.19Ajinọngva p'Mẹrari made, Mali ọttara Mushi. Minna kw'nnọmma s'Lẹvi ide, atorọ k'ose kw'uwa mammaan.20Wa Amram ọtọk Jokẹbẹd, kw'ode ọgbaanọkka kw'otte kwẹ k'ọbada. Jokẹbẹd ọmaan-ẹ Aarọn ọttara Mosẹs. Amram wa orukọ k'icho arọbh achadanẹ okwuma ichikkamfa.21Wa ajinọngva p'Izha made, Kọra ọmaana Nẹphẹg, ọttara Zikiri.22Wa ajinọngva p'Uziyẹl made, Mishayẹl, ọmaana Ẹlzaphan, ọttara Sitri.23Aarọn ọtọk Elisheba, ominanwa kw'Aminadab obhonọ, k'ọbada, kw'obir ode ọgbaanọkka kw'Nashọn. Wa ọmaan-ẹ Nadab, ọmaana Abihu, ọmaana Eleaza, ọttara nkwurọr.24Ajinọngva p'Kọra made, Asir, ọmaana Ẹlkana ọttara Abiyasaph. Ma wọ iwa ode nnọmma s'Kọra.25Eleaza kw'Aarọn obhonọ, ọtọka ominanwa wanẹ kw'Putiyẹl obhonọ k'ọbada, ọmaan-ẹ Phinẹhas.
Minna kw'asonọng p'isọhmmọr s'Lẹvi iwa ide k'ẹnọmma k'ẹnọmma.26Aarọn nwoma ọmaana Mosẹs bọ p'uwa Ọvaar Ibinọkpaabyi obenẹ bẹ́, “Màtima anọng p'Israẹl k'ọsaabh fabẹ, mabina z'izek s'Ijip.”27Bẹ anọng mbo afa, p'ade Aarọn ọmaana Mosẹs bọ iwa agbaak odik anang Phero kw'ode ọvaarnọng kw'Ijip, kw'ọmaan ebina ch'anọng p'Israẹl k'Ijip.28K'ogbe kw'Ọvaar Ibinọkpaabyi ọgbaak odik ọnang Mosẹs z'Ijip,29oben-ẹ bẹ́, “Kaam wọ nde Ọvaar Ibinọkpaabyi. Tek Phero kw'ode ọvaarnọng kw'Ijip odik kpenamkpen kw'mgbaak-ọ.”30Okenaka, Mosẹs oben Ọvaar Ibinọkpaabyi bẹ́, “Ch'ọgbaakadik ọkaar-m minna, ina Phero oyong-m itọhng o?”
Minna kw'asonọng p'isọhmmọr s'Lẹvi iwa ide k'ẹnọmma k'ẹnọmma.26Aarọn nwoma ọmaana Mosẹs bọ p'uwa Ọvaar Ibinọkpaabyi obenẹ bẹ́, “Màtima anọng p'Israẹl k'ọsaabh fabẹ, mabina z'izek s'Ijip.”27Bẹ anọng mbo afa, p'ade Aarọn ọmaana Mosẹs bọ iwa agbaak odik anang Phero kw'ode ọvaarnọng kw'Ijip, kw'ọmaan ebina ch'anọng p'Israẹl k'Ijip.28K'ogbe kw'Ọvaar Ibinọkpaabyi ọgbaak odik ọnang Mosẹs z'Ijip,29oben-ẹ bẹ́, “Kaam wọ nde Ọvaar Ibinọkpaabyi. Tek Phero kw'ode ọvaarnọng kw'Ijip odik kpenamkpen kw'mgbaak-ọ.”30Okenaka, Mosẹs oben Ọvaar Ibinọkpaabyi bẹ́, “Ch'ọgbaakadik ọkaar-m minna, ina Phero oyong-m itọhng o?”
The Seed Company