Nnwẹr kw'Ozenga5
1Nya o, Mosẹs ọttara Aarọn mad-akebha Phero, matek-ẹ bẹ́, “Ọvaar Ibinọkpaabyi kw'ode Ibinọkpaabyi kw'Israẹl, obenẹ bẹ́, ‘Tte anọng paam ọbọhk mafona, ọfha mad-asi odidaama kw'ikpukpobha anang-m, z'ibyi s'owora.’ ”2Phero oben bẹ́, “Anyi wọ ode Ọvaar Ibinọkpaabyi nwo kw'kaam m'mkpobha maa, ntte anọng p'Israẹl ọbọhk mafona? Kaam Ọvaar Ibinọkpaabyi nwo kinzong. Anọng p'Israẹl ọbọhk mìntte mafona.”3Nya o, Mosẹs ọmaana Aarọn maben-ẹ bẹ́, “Ibinọkpaabyi kw'aHiburu kk'ottema ọmaana mina. Ototo, tte mina ọbọhk mosi ozenga k'iwu ittaan ochina z'ibyi s'owora, mọd-ọfọhnọ nja ọnang Ọvaar Ibinọkpaabyi kw'ode Ibinọkpaabyi kwamina, ọfha oning ikọhmaanatama, wanẹma, ọkkangkkang otim osi mina itama.”4Ọvaarnọng kw'Ijip oben Mosẹs ọttara Aarọn bẹ́, “Kayen kw'mawọhkọ anọng akpọka ọtọhm fabẹ osisi? Màkpa nnam z'abọnga k'itọhm!”5Phero obir oben bẹ́, “Kirẹ ose kw'anọng p'izek nja nkk'asaabha, makkerẹ nya makpọka bẹ ọtọhm osisi.”6Ny'ewu ndo madanẹ-danẹ, Phero ọnang akker-abira ọmaana akker-itọhm p'Israẹl ẹfa bẹ́,7“Màkpọka anọng mba azizaarẹ-bukọ p'nd-atima arọhbha ata p'ọsọhm, oninang. Màtte mad-azeng mmo aror.8Okenaka, si bẹ marọhbha ọta-bhik kw'mad-akkikken arọhbha, mawanẹ, oning ẹmma obekẹ. Ọkpọhra vọ f'mad-azeng ábẹ̀ mabhom akpẹk-m bẹ́, ‘Tte mina ọbọhk mofona, mọd-ọfọhnọ ẹja ọnang Ibinọkpaabyi kwamina.’9Nang ajinọng mbo atọhmgbọhka masi, mfha maning ogbe ayen ayonga itọhng k'afọra.”10Nya o, akker-abira ọttara akker-itọhm p'Israẹl mafona mad-atek anọng mbo bẹ́, “Phero obenẹ bẹ́, ‘Kaam ọdọk bọnga azizaarẹ-bukọ p'nd-atima arọhbha ata minang.11Màzọhng ror azizaarẹ-bukọ p'nd-atima arọhbha ata k'ibyi s'mm'akpo aze. Ọtọhm fabọnga m'ottonga obhik mach'od-okkikken ode.’ ”12Minna kw'anọng p'Israẹl makpaang k'ibyi kpenamkpen ny'Ijip, maror azizaarẹ-bukọ p'nd-atima arọhbha ata.13Akker-abira mbo mawọkọ bẹ. Maben bẹ bẹ́, “Màchera itọhm sabọnga si k'ose kw'nd-akkikken asi k'ogbe kw'mad-anang bọnga azizaarẹ-bukọ p'ata orirọhbha.”14Akker-abira p'Phero mabọka akker-itọhm p'Israẹl p'bẹ matek, mattema bẹ nkwur, mabir abọbh bẹ bẹ́, “Kayen kw'ata p'marọhbh chena ọmaana menda nna obhik attong, k'ose kw'mad-akkikken arọhbha?”15Nya o, akker-atọhmnọng mbo p'Israẹl mad-abhom akpẹkẹ Phero, maben-ẹ bẹ́, “Ttatta, ode yen kw'ad-asi atọhmnọng pọ minna o?16M'ọdọk atọhmnọng pọ azizaarẹ-bukọ kanangẹ bẹ́, motima ọrọhbha ata. Mad-atera achina ororo agwa mina bẹ́, ‘Màrọhbha ata!’ Bẹ mad-attema mina nkwur, chibhẹ ch'epinẹ ede chabẹ.”17Phero ọpọhna bẹ bẹ́, “Ọkpọhra vọ! Ọkpọhra f'masi ẹkpẹkpa f'nd-azeng ábẹ̀ maben-m bẹ́, ‘Tte mina ọbọhk mofona mọd-ọfọhnọ ẹja ọnang Ọvaar Ibinọkpaabyi.’18Màkpa nnam z'abọnga k'itọhm. M'ọdọk bọnga azizaarẹ p'ata orirọbha manang. Okenaka, bọnga mm'arọhbha ọta-bhik kw'mad-akkikken arọbha.”19Akker-itọhm mbo p'Israẹl makwu atin bẹ́, odik kk'bẹ oyina ch'matek bẹ bẹ́, “Bọnga mm'achina ororo arọhbha ọta-bhik kw'mad-akkikken arọbha k'ewu k'ewu.”20K'ose kw'mabin arik Phero nya, mad-akebha Mosẹs ọmaana Aarọn ch'mabe nya atik bẹ.21Maben bẹ bẹ́, “Tte Ọvaar Ibinọkpaabyi ọkpaara aponga ọnang bọnga otor k'osisi kwabọnga! Bọnga nkk'mina asa mopyibh z'ititika s'Phero ọmaana atọhmnọng pẹ, mabira atọka ọkkangkkang ake bẹ z'mbọhk bẹ́, matima afhọ mina.”22Ofona nya o, Mosẹs ọkpa nnam z'Ọvaar Ibinọkpaabyi, od-oben-ẹ bẹ́, “O Ttatta, kayen kw'ake anọng pọ k'odik kw'obeng ma o? Ma, kẹ kw'azeng ábẹ̀ atọhm-m o?23Ch'mbe-be ntima eche chọ nd-mgbaak odik nnang Phero, kẹ kk'anọng mboma ẹkọhr ọka. Chibhẹ nya, kọ anọng pọ kabir akkaana maphyir-phyir.”
The Seed Company