Nnwẹr kw'Ozenga26

1“Tima nso ijobh s'ọbara ọkkọkka f'matim ndik s'ide blu ayok, ọmaana s'ikorọ isiso, ọttara s'ikorọ izizẹ, si iruk-byi saam. Tte omengkkanọng oyok acherubim nya.2Ọbara mvo f'ọmma maphyir m'ode mbengana. Adum pabẹ m'ade ntọkọ arọbh afa obhirẹ afa, ẹkpa chabẹ m'ede ntọkọ ichadanẹ.3Màkọma nso s'ọbara mvo ochen k'ibyi majanẹ, mabir akọma mvoza ochen k'ibyi majanẹ.4Màtima ibara s'ide blu si aringẹ, magbana ny'aso p'ọbara f'ọmma p'ẹkpa danẹ, mabir asi minna z'aso mboza.5Màsi aringẹ arọbh afa okwuma ijobh magbana k'ibara s'ọmma mawanẹ, mabir asi aringẹ arọbh afa obhirẹ ijobh, magbana k'ẹbaramma ch'ẹkpa ndoza. Tte aringẹ mbo akkerẹ ayok ititika.6Màtima gol si mgbaka arọbh afa obhirẹ ijobh, s'mm'atima abọka ọbara mvo agbak-ọgbaka, ọfha iruk-byi s'Ibinọkpaabyi ide ibyi majanẹ.
7“Màtima avu-phyabha si ọbara ijobh kawanẹ f'ọmma kw'ikkira s'im'ibubha iruk-byi s'Ibinọkpaabyi.8Adum p'ọbara kpenamkpen m'ade ntọkọ arọbh afa obhirẹ achen, ẹkpa chabẹ ede ntọkọ ichadanẹ. Ọbara mvo maphyir m'ode mbengana.9Màkọma ọbara mvo f'ọmma ochen k'ẹkpa madanẹ, makọma mvoza ọchadanẹ k'ẹkpa ndoza. Mànyọhngọ ibara njo s'ọmma s'ittong ichadanẹ k'ibyi ifa ny'ikkiramma.10Màsi aringẹ arọbh afa obhirẹ ijobh magbana ny'ẹmma ch'ẹkpa danẹ ch'ọbara mvo f'ọmma, mabir asi minna z'ẹbaramma ch'ẹkpa ndoza.11Màbir tima opo si mgbaka arọbh afa obhirẹ ijobh magbaka ny'aringẹ mbo, ọfha ẹbọka ikkira njo ibe k'ibyi majanẹ.12Ṉ́nòde z'adum p'attar-ọttara ny'ọbara f'ọmma f'ikkira njo, igboka s'ẹkpa ndo ch'ebek-obek, jẹ jọ im'ilẹbhẹ z'nnam-nnam kw'iruk-byi s'Ibinọkpaabyi.13Ọbara f'ọmma f'ikkira njo m'otima ntọkọ janẹ odum ọyọhnga ayok k'okwubha-k'okwubha; njo s'irikẹ m'ilẹbhẹ ny'abem p'iruk-byi s'Ibinọkpaabyi, ọfha ibubh-ẹ obubha.14Màtima ntenkpa s'arọkimaan s'mafok asikora bubha ikkira njo, mabir abubha ntenkpa s'ichọr-ọchọrọ z'ẹrọng.
15“Màbir tima agbaaka p'akasiya si mkpọmmachi s'ibe-obe s'iruk-byi s'Ibinọkpaabyi.16Ẹkpọmmachi kpenamkpen m'ede ntọkọ ichi, ẹkpa ede ntọkọ mfa ọmaana akaana attaan,17ọttara aso afa p'nna ayok agbaak. Màsi mkpọmmachi njo s'iruk-byi s'Ibinọkpaabyi maphyir ose mawanẹ.18Màsi mkpọmmachi ẹrọbh z'ẹwọn-ẹwọna kw'iruk-byi s'Ibinọkpaabyi,19mabir atima silva asi arin arọbh afa p'mkpọmmachi k'izek-izek, arin afa maninga k'ọmmakwuk kpenamkpen, erin madanẹ eninga izek-izek kw'eso danẹ.20Z'ẹbhaakẹ ndoza ch'ebir-ebir kw'iruk-byi s'Ibinọkpaabyi, masi mkpọmmachi ẹrọbh;21mabir atima silva asi arin arọbh afa. Arin afa m'aninga k'izek-izek kw'ẹkpọmmachi kpenamkpen.22Z'okwubha kw'ewuchen ed-edimẹ kw'iruk-byi s'Ibinọkpaabyi, màsi mkpọmmachi nchadanẹ,23mabir asi mkpọmmachi mfa s'abongọ z'nnam-nnam kw'iruk-byi Ibinọkpaabyi.24Ny'abongọ mbo afa, mkpọmmachi njo m'ide mfa-mfa tọma z'orin maa, id-iyika aso k'oringẹ mawanẹ z'ẹrọng. Mbo afa m'ade ose mawanẹ.25Nya o, mkpọmmachi njo m'ide ochenọnttaan, arin p'silva m'ade ichi kkawanẹ. Ẹkpọmmachi kpenamkpen m'etima arin afa.
26“Màbir tima agbaaka p'akasiya si nzemachi. Nchen m'ide s'mkpọmmachi k'ẹbhaakẹ danẹ ch'iruk-byi s'Ibinọkpaabyi,27nchen m'ininga z'ẹbhaakẹ ndoza, nchen ibira ininga z'ekpongannam kw'iruk-byi s'Ibinọkpaabyi z'ẹbhaakẹ ch'ewuchen ed-edimẹ.28Ezemachi ch'ettem m'ẹtọma k'eso danẹ, ẹbọka z'eso ndoza.29Màtima gol bhọrọ mkpọmmachi njo, mabir atima gol asi aringẹ p'mm'abọka nzemachi njo. Ozeng k'nzemachi njo, màtima gol bhọrọ.
30“Màmin iruk-byi njo s'Ibinọkpaabyi tor k'okkira nwo kw'nkọhk-ọ z'egbe.
31“Màtima ọbara ọkkọkka f'ode blu, ọmaana f'okorọ isiso, ọttara f'okorọ izizẹ, yok ibara s'ọmma. Omengkkanọng m'oyok acherubim ny'ọbara mvo.32Màrena sẹ ny'mgbaka nna s'mkpọmmachi s'akasiya, màtima gol abhọrọ sẹ, ibe k'arin nna p'silva.33Màrena ibara njo s'ọmma ny'mgbaka njo, màtọka Ẹkkọhbhọ ch'Echekẹ asok z'nnam-nnam kw'ibara njo. Ibara njo jọ im'ibhaangẹ Ibyi s'Awuriji z'Ibyi s'Iwurọ-Iyọhng-Ọyọhnga.34Màtọka ẹkkọhbhọkpa ch'efokọ nana ny'Ẹkkọhbhọ ch'Echekẹ, z'Ibyi s'Iwurọ-Iyọhng-ọyọhnga.35Màbera okpokkoro z'iyaan-iyaan kw'ibara njo s'ọmma, z'ebir-ebira kw'iruk-byi s'Ibinọkpaabyi, masok etorongkkang-nana makkerẹ ayok ititika z'ẹwọn-ẹwọna kwẹ.
36“Ṉ́nòde ny'ẹsọhmma ch'ikkira njo, omengkkanọng m'otima ndik s'ide blu, ọmaana s'ide isiso, ọmaana s'ikorọ izizẹ, ọttara ọbara ọkkọkka, odoka ibara njo s'ọmma.37Màtima gol si ẹgbaka ch'ibara njo s'ọmma, mabir atima echi ch'akasiya, asi mkpọmmachi nchen, matima gol abhọrọ jẹ. Pira nnatim opo arabha arin achen pabẹ.

The Seed Company

https://app.library.bible/content/e434d17646502707