Nnwẹr kw'Ozenga25
Nnanga s'anọng anangẹ k'iruk-byi s'Ibinọkpaabyi osisi
1Ọvaar Ibinọkpaabyi oben Mosẹs bẹ́,2“Tek anọng p'Israẹl bẹ́, ọnọng-ọnọng ochen-m ẹnanga. Kọ zeng mmo tọka ẹnanga z'ọnọng kpenamkpen kw'ofon-ẹ z'ettem bẹ́, ọnang-m.3Nnanga s'im'atọka z'abẹ k'mbọhk ide gol, ọmaana silva, ọttara opo,4ọmaana ndik s'ide blu, ọmaana s'ikorọ isiso, ọmaana s'ikorọ izizẹ, ọmaana ibara ọkkọkka, ọmaana avu-phyabha,5ọmaana ntenkpa s'arọkimaandim s'mafok asikora, ọmaana ntenkpa ọkkọkka s'ichọr-ọchọrọ, ọttara agbaaka p'akasiya,6ọmaana ana p'oliv p'ekpon oyiyenẹ, ọmaana ekpo py'mad-atima asi ana p'mad-abyenga anọng k'eso, ọmaana insẹns,7ọmaana ata p'oniks, ọmaana ata ọkkọkka mboza p'im'ẹgbana k'ẹphọd†, ọttara k'ibara s'ittemmọma s'ọfọhn-nja.8“Tte masi iruk-byi s'iwur-owur anang-m, ọfha nruk mmaana bẹ.9Tte masi iruk-byi nja, madoka sẹ mbengana k'ose kw'im'nkọhk-ọ.Ẹkkọhbhọ ch'Echekẹ
10“Tte matima agbaaka p'akasiya masi ẹkkọhbhọ ch'mm'ayoma adum pẹ ntọkọ nttaan ọmaana akaana osowanẹ, ẹkpa chẹ ede ntọkọ mfa ọmaana akaana attaan, agoriji pẹ m'ade ntọkọ mfa ọmaana akaana attaan.11Màtima gol ọkkọkka bhọrọ ẹkkọhbhọ ndo maphyir z'ẹtaanga, ọttara k'iyaan, màbir atima gol adoka jẹ akọbha.12Màtima gol rabha aringẹ anna, make ny'mmo sẹ nna. Aringẹ afa maninga k'ẹbhaakẹ danẹ, mboza afa maninga z'ẹbhaakẹ ndoza.13Màtima nchi s'akasiya si achiva p'adum-odum, matima gol abhọrọ jẹ.14Màyika nchi njo ny'aringẹ p'abem p'ẹkkọhbhọ ndo, ọfha mad-atima atinẹ jẹ.15Achiva mbo p'adum-odum m'ayika ny'aringẹ p'ẹkkọhbhọ ndo mach'mayik nya, mmàrọbha.16Ó̱de ikk'asa minna, tọka ata p'apaanga p'im'nnang-ọ, yika ny'Ẹkkọhbhọ ndo ch'Echekẹ.17“Màtima gol ọkkọkka rabha ẹkkọhbhọkpa ch'efokọ. Adum pẹ m'ade ntọkọ nttaan ọmaana akaana osowanẹ, ẹkpa chẹ m'ede ntọkọ mfa ọmaana akaana attaan.18Màbira tima gol kw'nkk'aduka si acherubim afa, mammin ny'aso p'ẹkkọbhọkpa ndo.19Cherub wanẹ m'oninga k'eso danẹ, nwoza oninga z'eso ndoza. Màsi acherubim mbo gbaka ny'ẹkkọhbhọkpa ndo, ny'aso mbo afa.20Mbubaang s'acherubim mbo m'imaama ichina ẹrọng-ẹrọng, ibubha ẹkkọhbhọkpa ndo ch'efokọ. Acherubim mbo maninga akkerẹ ayok ititika, marọn ny'ẹkkọhbhọkpa ndo.21Màtọka ẹkkọhbhọkpa ndo nana ny'Ẹkkọhbhọ ch'Echekẹ, màbir atọka atakpa p'apaanga p'm'nnang bọnga, mayika ny'ẹtaanga.22Ny'ẹrọng kw'ọkpa nwo, ny'njeka kw'acherubim mbo afa p'abubh Ẹkkọhbhọ ch'Echekẹ, nya wọ kw'im'nkebh-ọ, nnang-ọ asana paam maphyir anang anọng p'Israẹl.Ose kw'mm'asi okpokkoro
23“Màtima echi ch'akasiya si okpokkoro. Adum pẹ m'ade ntọkọ nttaan, ẹkpa chẹ ede ẹtọkọ madanẹ ọmaana akaana achadanẹ, agoriji pẹ ade ntọkọ mfa ọmaana akaana attaan.24Màtima gol ọkkọkka bhọr-ẹ, màbir atima gol adok-ẹ akọbha.25Màbir tima gol si edoka ch'ebeng ẹkpa mach'ẹbọhkkpattem akọbha abem pẹ.26Màtima gol si aringẹ anna p'okpokkoro nwo m'agbaka ny'abongọ p'mmo sẹ nna.27Aringẹ mbo m'aninga anyọma akonga mbo mfha mabọka nchi njo s'idum-odum s'mad-atima atinẹ okpokkoro nwo.28Màtima nchi s'akasiya si nchi s'idum-odum s'mm'atima atinẹ okpokkoro nwo. Màtima gol bhọrọ nchi njo.29Màbir tima gol ọkkọkka si agbangbang, ọmaana agbangbang p'insẹns, ọmaana akọbh, ọttara agbangbangva p'mm'ad-atima abyenga atuk p'ẹja.30Sok brẹd kw'awuriji m'okpokkoro nwoma, ọfha od-oning-m m'ititika k'ogbe kpenamkpen.Etorongkkang-nana
31“Màduk gol ọkkọkka tima si etorongkkang-nana. Màtima gol nwo si ẹwọr ọmaana nchi sẹ, ọmaana akọbh pẹ p'akerẹ agbok, ọttara agbok p'nkk'amaama.32Abọhnga achadanẹ mabọka ny'etorongkkang-nana ndo, attaan k'ẹbhaakẹ danẹ, attaan z'ẹbhaakẹ ndoza.33Akọbh attaan p'akerẹ agbok p'almọn p'nkk'amaama, m'aninga k'ẹbọhnga danẹ, attaan z'ẹbọhnga ndoza. Minna kw'im'ode z'abọhnga mbo achadanẹ maphyir p'abọk ny'etorongkkang-nana ndo.34Akọbh anna p'akerẹ agbok p'almọn p'nkk'amaama, m'abira anana ny'etorongkkang-nana ndo.35Ogbok mawanẹ m'oninga k'izek-izek kw'abọhnga afa p'achi eden ny'etorongkkang-nana. Ogbok ttonga afa oninga k'izek-izek kw'abọhnga afa p'attong afa. Ogbok ttong attaan obir oninga k'izek-izek kw'abọhnga afa p'attong attaan. Kibung-kibungọ, m'ode abọhnga achadanẹ.36Agbok ọmaana abọhnga mbo m'ade ọttọhk mavanẹ amaana etorongkkang-nana ndo. Gol ọkkọkka kw'nkk'aduka, kẹ kw'mm'atima asi.37“Màbir si pẹ achenọmfa manana nya, ọfha ẹd-ẹnna ny'ititika sẹ.38Màtima gol ọkkọkka si itorongkkang-nọm ọmaana akkoriya pẹ.39Adọhbhiji p'gol kw'mm'atima asi etorongkkang-nana ndo, ọmaana itorongkkang-nọm ekpo pyẹ maphyir m'ade talẹnt mawanẹ.40Zonga bẹ́, mm'asi ọttọhk kpenamkpen mbengana k'ose kw'nkọhk bọnga ny'egbe.The Seed Company