Nnwẹr kw'Ozenga19
Odik kw'oyinẹ z'egbe ch'Sinai
1K'echedenwu ch'ophe kw'ottong attaan, ch'anọng p'Israẹl nkk'abina z'Ijip, ny'ewu ndo wọ kw'mapyirẹ Sinai, z'ibyi s'anọng nna arukọ.2Ch'anọng p'Israẹl nkk'abina z'Rẹphidim mapyirẹ z'Sinai, z'ibyi s'anọng nna arukọ, mabhing ny'ititika kw'egbe ndo.3Mosẹs ovura od-okebha Ibinọkpaabyi. Ọvaar Ibinọkpaabyi oninga z'ogbeso oyer-ẹ, oben-ẹ bẹ́, “Kirẹ idik s'im'ad-agbaak echimma ch'Jekọb, p'ade anọng p'Israẹl ma:4‘Bọnga oyenẹ nkk'aza ose kw'nsi anọng p'Ijip, mabir aze ose kw'ntọrọ bọnga mkpẹ k'kaam k'ifor, mach'etingẹ etinẹ iva pẹ k'mbubaang.5Nya o, óde bọnga mm'atima nttem sabọnga maphyir akpobh-m, mabira asok echekẹ chaam, bọnga mm'ade anọng paam p'nsok ettem. Zaabẹ́ iyagbin maphyir ide saam,6bọnga mm'ade obhon kw'afọhn-nja ọmaana ẹkọma ch'ewur-owur anang-m.’ Ma wọ ode idik s'im'agbaak anang anọng p'Israẹl.”7Nya o, Mosẹs ọsaka ny'egbe ndo, od-oyerẹ adidennọng p'anọng mbo osok ibyi majanẹ, otek bẹ idik s'Ọvaar Ibinọkpaabyi ikk'ẹ ẹfa ọnanga bẹ́, ọgbaak bẹ.8Anọng mbo maphyir mapọhna bẹ́, “Mina mm'osi ọttọhk kpenamkpen f'Ọvaar Ibinọkpaabyi ikk'ọgbaaka.” Minna kw'Mosẹs ọtọk ẹpọhna chabẹ ochena Ọvaar Ibinọkpaabyi.9Ọvaar Ibinọkpaabyi oben Mosẹs bẹ́, “Kaam m'nzenga k'ebonọ ch'epyi bẹ́ kaang nkwu nkebh-ọ, mfha óde anọng mbo mabhaang-m ch'im'mgbaak odik mmaan-ọ, mad-achera odik kwọ k'ogbe kpenamkpen.” Mosẹs ọgbaak Ọvaar Ibinọkpaabyi ose kw'anọng mbo mabenẹ.10Ọvaar Ibinọkpaabyi oben Mosẹs bẹ́, “Kpa nnam kebha anọng mbo, asi bẹ masok ifor sabẹ iwur-owur menda ọttara ophyinẹ. Tte magbobhọ ẹfọrakpo pyabẹ ọdọk,11màdo ifor ny'ewu ch'ettong ittaan, okurọ bẹ́, ny'ewu ndo wọ kw'ikaam Ibinọkpaabyi m'nsaka ny'egbe ch'Sinai, nya ch'anọng maphyir aning.12Ke enem kọbha egbe ndo, k'ose kw'anọng nna majeka. Tọr bẹ itọhng bẹ́, ‘Màkkerẹ bọnga ifor o, ọnọng oning egbe ndo ọnyọm o, oning igbemmo njo obira otwu o. Kirẹ ọnọng kpenamkpen kw'otwu egbe nda, mm'afhẹ-ẹ ọfhọ.13M'mbọhk màtima afhọ ọnọng kw'otwu egbe nda. Mm'atọhbh-ẹ ata, wanẹma, mattẹ-ẹ ayuk. Zaabẹ́ ode oyokinọng, obir ode eten, ọttọhk f'mm'atte ọbọhk oruk akpen kode.’ K'ogbe kw'mabhaang ẹmọng ch'enyisa bẹ́ pọọọh, nya kw'mm'akwu anyọma egbe ndo.”14Mosẹs ọsak ny'egbe ndo nya o, od-okebha anọng p'Israẹl, osi bẹ mawur k'ose kw'mm'abe Ibinọkpaabyi k'ititika, mabira agbobhọ ẹfọrakpo pyabẹ.15Obira oben bẹ bẹ́, “Màdo ifor tik ewu ndo ch'ettong ittaan. Ọnọng oning kwanọng ábẹ̀ oyim.”16Ny'ekpebha ch'ewu ch'ettong ittaan, ebonọ epyi bẹ́ kaang, ẹbhaangkpon ẹman ẹwọr bẹ́ jaar, ẹtta bẹ́ kpurr, enyisa eje k'ẹrọng. Ọnọng kpenamkpen kw'oning ny'ibhinga-byi, nọfọn-ọfọnọ.17Minna kw'Mosẹs otim anọng mbo eden, mabina z'ibhinga-byi bẹ́, mad-akebha Ibinọkpaabyi. Mapyirẹ ny'igbemmo, mabe nya.18Wa izizong ibhọrọ egbe ch'Sinai maphyir okurọ ch'Ọvaar Ibinọkpaabyi otim ekpon ọsaka nya. Izizong njo ivura ẹrọng-ẹrọng mach'izizong s'iyinẹ k'okponkkin. Egbe ndo kibungọ eninga k'ifufọnọ.19K'ose kw'ẹmọng ch'enyisa ndo egorọ k'ẹrọng, minna kw'Mosẹs ọd-ọgbaak odik, Ibinọkpaabyi otima ẹbhaangkpon ọpọhn-ẹ.20Minna kw'Ọvaar Ibinọkpaabyi ọsak ny'ogbeso kw'Sinai, oyerẹ Mosẹs. Mosẹs ovur okebh-ẹ za.21Ọvaar Ibinọkpaabyi oben-ẹ bẹ́, “Kpa nnam zọhng tọr anọng mbo itọhng bẹ́, màning ẹfa atim bẹ́, maze Ọvaar Ibinọkpaabyi, mfha anọng saabhada aning ape.22Ozeng k'afọhn-nja p'mm'anyọma Ọvaar Ibinọkpaabyi, tte mado ifor sabẹ iwur-owur, ini minna óde, kaam Ọvaar Ibinọkpaabyi m'nsi bẹ itama.”23Mosẹs oben Ọvaar Ibinọkpaabyi bẹ́, “Ttatta, anọng mbo m'egbe ch'Sinai màkwu e, okurọ bẹ́, atọr mina itọhng bẹ́, ‘Ke enem kọbha egbe ch'Sinai, abira asok-ẹ iwur-owur mach'ibyi s'Ibinọkpaabyi.’ ”24Ọvaar Ibinọkpaabyi ọpọhn-ẹ bẹ́, “Saka, zọhng tọka Aarọn tima vura kebh-m ka. Ṉ́node afọhn-nja, ọttara anọng mboza, tte maning k'ẹfa avur akebha Ọvaar Ibinọkpaabyi ka, ọfha oning bẹ itama osi.”25Minna kw'Mosẹs ọsak okebha anọng mbo za, ọgbaak bẹ k'ose kw'Ọvaar Ibinọkpaabyi obenẹ.The Seed Company