Nnwẹr kw'Ozenga18
Jẹtro odibhẹ Mosẹs
1Wa Jẹtro kw'ode otte kw'kwanọng kw'Mosẹs, obir ode ọfọhn-nja kw'Midiyan, ọbhaang idik njo maphyir s'Ibinọkpaabyi ikk'ọsa ọnang Mosẹs, ọttara anọng pẹ Israẹl. Obira ọbhaanga ose kw'Ibinọkpaabyi ozeng otima anọng p'Israẹl eden obina z'Ijip.2Ode ch'iwa Mosẹs okkikken ọtọhm Zipọra kw'ode kwanọng bẹ́, od-obhing otte Jẹtro ábẹ̀. Jẹtro ọtọka kẹ3ọmaana ajinọngva pẹ afa. Ojinọngnwa wanẹ okpen Gẹrshọm , okurọ bẹ́, wa Mosẹs kw'ode otte obenẹ bẹ́, “Kaam n'nde okikennọng k'anọng k'izek.”4Oyok nwoza okpena Eliyeza , okurọ bẹ́, Mosẹs kw'ode otte obir oben bẹ́, “Ibinọkpaabyi kw'atte kwaam wọ ọkkaan-m nnaanga k'ọkkangkkang kw'Phero.”5Jẹtro kw'ode ọnyẹ kw'Mosẹs, otima ajinọngva mbo p'Mosẹs ọttara kwanọng kwẹ obina okwu okebha Mosẹs za ch'obhingẹ z'ibyi s'anọng nna arukọ, za ch'ọnyọm egbe ch'Ibinọkpaabyi.6Ode ch'Jẹtro okkikken ọtọhm ẹkkaabha ọnang Mosẹs bẹ́, “Kaam ọnyẹ kwọ ntim kwanọng kwọ, ọttara ajinọngva pọ afa nkwuma z'eden e.”7Mosẹs obina, okwubh ọnyẹ kwẹ k'eden. Okebh-ẹ nya o, ọraka eso ọnang-ẹ k'ekpikpobha-maana, ọbaak-ẹ bẹ́ baam. Mazima ayok, pira nnadimẹ z'ikkira ẹtaanga.8Mosẹs otek Jẹtro ọttọhk kpenamkpen f'Ọvaar Ibinọkpaabyi ozeng Israẹl ábẹ̀ osi Phero, ọmaana anọng p'Ijip. Obir otek-ẹ ose kw'akpen akọhnọ bẹ ch'iwa mazeng z'eden, ọttara ose kw'Ọvaar Ibinọkpaabyi ozeng ọkkaana bẹ.9Wa ettem ẹdaamẹ Jẹtro mawuriji ch'ọbhaang idik ọkkọkka njo maphyir s'Ọvaar Ibinọkpaabyi kk'ọsa ọnang anọng p'Israẹl, ch'ọrọbh bẹ k'mbọhk s'anọng p'Ijip.10Jẹtro o, oben bẹ́, “Ẹtọhnga ede ch'Ọvaar Ibinọkpaabyi kw'ọrọbh-ọ k'mbọhk s'anọng p'Ijip, ọmaana s'Phero, obira ọrọbha anọng p'Israẹl k'mbọhk s'anọng p'Ijip.11Kaam kk'nzonga k'odik ọkkọkka bẹ́, Ọvaar Ibinọkpaabyi ọbarẹ ẹfa ọyọhnga ọttọhk kpenamkpen f'oyokinọng od-okpobha, okurọ ch'osi idik nja otima otor anọng p'atim ẹgaga asi anọng p'Israẹl ẹyaaka.”12Nya o, Jẹtro kw'ode ọnyẹ kw'Mosẹs, ọtọka ẹnanga ch'ẹkwọmọ, ọttara nnanga ọdọk-ọdọk, otima ọfọhnọ ẹja ọnang Ibinọkpaabyi. Aarọn otima adidennọng p'Israẹl maphyir, makwu bẹ́, maninga ny'Ibinọkpaabyi k'ititika machi ọttọhk amaana ọnyẹ kw'Mosẹs.13Ewu esobh nya, Mosẹs oninga ẹwọr bẹ́, ọttọhna aponga p'anọng. Anọng aninga akọbh-ẹ. Ọtọma k'ekpebha ọttọhna aponga pabẹ maa, opyirẹ k'ẹsọhka.14K'ogbe kw'ọnyẹ kw'Mosẹs okwu oze ọttọhk f'Mosẹs od-osi nya, obenẹ bẹ́, “Bọng-ọttọhk f'ad-asi anang anọng mba ma o? Kayen kw'anọng mba maphyir mm'akkọbh-ọ ake k'ettem, aninga ẹwọr ma manchenẹ, attọhna aponga pabẹ, tọma k'ekpebha maa, opyirẹ k'ẹsọhka?”15Mosẹs ọpọhn-ẹ bẹ́, “Anọng mba mad-akwu aror bẹ́, mazonga idik s'Ibinọkpaabyi.16Ogbe kpenamkpen kw'mayen ẹkọhr, mad-atima akebh-m ma, nttọhna nnang nnam vọ ọfa, mbira ntek bẹ okpebhẹ ọmaana asana p'Ibinọkpaabyi.”17Ọnyẹ kw'Mosẹs ọpọhn-ẹ bẹ́, “Ọttọhk f'ad-asi ma, kojibhẹ.18Ọtọhm f'ad-asi ma, m'ọkọhn-ọ ọkpan eden, ozeng k'anọng mba p'ad-akwu akebh-ọ ma. Ọtọhm mva ọbarẹ ọnọ-ọ ẹfa e. Kọ-kọ makpo asi.19Yonga itọhng k'ntọhna s'im'nnang-ọ. Tte Ibinọkpaabyi oninga ọmaan-ọ. Kọ min'ad-atera eso ch'anọng mba z'Ibinọkpaabyi k'ititika, atọka idik sabẹ achen-ẹ.20Kpebhẹ bẹ apaanga p'Ibinọkpaabyi, abira akpebhẹ bẹ ose kw'mm'azenga aruk, ọmaana idik s'mmin'ad-asi.21Okenaka, teka ajinọng p'makpo ọttọhk osisi ny'ikpakaana s'anọng mbo maphyir. Tte anọng mbo ade anọng p'ayen ojora f'Ibinọkpaabyi, ẹ́mmáaná chabẹ ebir ẹdaak anọng, mabira ade anọng p'nna anọng màtukọ. Si bẹ aso p'nkwurọ s'anọng nnọhna k'nnọhna, ọmaana p'nkwurọ s'anọng arọbh achen achen, ọmaana p'nkwurọ s'anọng arọbh afa okwuma ijobh, ọttara nkwurọ s'anọng ijobh-ijobh.22Tte bẹ mattọhna aponga p'anọng k'ogbe kpenamkpen. Okenaka, tte bẹ nd-atọka aponga kpenamkpen p'agaang-ọgaangẹ machen-ọ. Tte mazeng mmo attọhna aponga p'karẹ. Eden ch'ọtọhm fọ m'otima obhek-ọ dọ nya, okurọ bẹ́, mm'agbaka mbọhk masi.23Ó̱de asi minna, Ibinọkpaabyi obira ọnang-ọ ẹfa, kọ makpo ọtọhm mvo asosi, anọng mba maphyir mabira abhana ọttara ottemlebh bẹ́, nkk'idik sabẹ attọhna mawuriji.”24Mosẹs oyonga ọnyẹ kwẹ itọhng, osi ọttọhk kpenamkpen f'ọtọhn-ẹ.25Minna kw'Mosẹs otek ajinọng p'makpo ọttọhk osisi ny'Israẹl maphyir. Osi bẹ aso p'nkwurọ s'anọng nnọhna k'nnọhna, ọmaana p'nkwurọ s'anọng arọbh achen achen, ọmaana p'nkwurọ s'anọng arọbh afa okwuma ijobh, ọttara nkwurọ s'anọng ijobh-ijobh26Anọng mbo mattọhna aponga anang anọng k'ogbe kpenamkpen. Aponga p'agaang-ọgaangẹ, matọka achena Mosẹs. Mbo p'amọm-ọmọm, mazeng mmo attọhna.27Nya o, Mosẹs od-orik ọnyẹ kwẹ z'eden. Jẹtro o, ọbhana z'ikẹ k'obhon.The Seed Company