Tito1
1Ayine' Pawl, tmajin Dyos qine' ex apostl qine' te Jesukrist, intchaq'e' tu'n kyoklq'eju' sk'o'nqe' tu'n Dyos toju' okslab'l ex tu'n telkynik' teju' ax toju' qokslab'l ti'j Dyos,2tu'n tqe kyk'u'j ti'j tu'n tten kychwinqlal tejumajx. Tzaj ttziya'n Dyos chwinqlal lu na'mxtoq ttzaj qe tab'q'iyil, ax te Dyos yolin,3atzu'n ja'lo tej xpon tq'ijlalil, matzaj tyek'u'n tpakb'al b'a'n lu ex matchaq' Dyos klolqe tu'n t-xinpakb'a'ne'.4Nxi' ntz'ib'a'ne' u'j lu teya Tito, nk'wal kuxi'xa toj qokslab'l. Awt Qman Dyos ex Jesukrist Klolqe tzaj q'onte t-xtalb'il ex tnak'b'il tib'aja. Taq'un Tito toj Kreta5Tej tkyaj nq'o'na toju' swejtx'otx' Kreta, kyej nq'o'na b'inchalteju' na'mxtoq t-xib'inchet ex tu'ntoq kyoktq'o'na tijwnaq kyxol okslal toj junjun tnam, kse'nx xiwoqxena'ne' teya.6A tijwnaqju' tu'n tok aju' mixti' jun taq'wix ti'j. Naq jun t-xu'jil, okslalqe' tk'wal ex b'a'n che b'in k'otzliqe'.7Qu'mtzun aju' ati toklen kyxol okslal, a ka'yilte taq'un Dyos, ati tu'n tten kychwinqlal b'a'n. Mya pi's, mya xtxinwi', mya tx'ojtenil, mya jyol q'oj, mya jamjol.8Ati tu'n tq'on anb'il kye xjal tu'n kykyajpun ten tja, tu'n tb'inchante b'a'n, b'a'n tnab'l, tnik'alti'j, okslal ex ntjk'u'ntib'.9Ati tu'n ttzyunte tyol Dyos xixnaq'tza'n te, tu'ntzun kyxi' toni'n txqantl tu'n b'a'n xnaq'tzb'il ex tu'n tkub'sante ti'j kynab'lju' nche q'ojin ti'j tyol Dyos.10Qu'n nim pi'sqe' ate', aye'xi'xpe' tzajniqe' toj kyokslab'l aj Juda, nche yolin kyi'j ti'xti' mixti' kynab'l ex nche sb'un kyi'j xjal.11Ilti'j tu'n tmqet kytzi xjal lu, qu'n te'qe'k chukulkye xjal tojile kyja, nche q'on xnaq'tzb'il myab'a'n, naq tu'n kykanb'an pwaq mya toj tu'me'l.12Tma jun pakb'al aj Kreta toju' swejtx'otx' kyi'j twnaqil kjalu: Chalyol qekye' aj Kreta kukxju', txkup xjalqe', nimaq che wan ex ky'ajqe', chij.13Axxi'xte' tma; qu'mtzun tzak'unqe'xa kuw, tu'n kyq'anet toj kyokslab'l14tu'n lalun che'x kyb'i'n la'j jawni kynab'le'n aj Juda, ex tu'n lalun txi' kyb'i'n kychaq'b'ilju' nkychkyinsa'n kyib' teju' ax.15Ẍtilunilete' ax kyeju' ẍtilun toj kyanmi; aye'tzu'n tz'il toj kyanmi ex min nche okslan, mya ẍtilun kye, qu'n o'kx nche ximana' ti'j myab'a'n ex myab'a'n kynab'l.16Nkyma'n qa kyojtzqi'n Dyos, tu'ntzu'n kyb'inchb'aj nela' kynik'tzil qa mya axju' nkyma'n; majx ik'b'ilqe' ex mib'a'n che b'in, mixjun nb'ent kyb'inchante b'a'n. Tu'n tq'etju' b'a'n xnaq'tzb'il1Atzunta, a q'manxju'ya aju' b'a'n xnaq'tzb'il.2Q'manxa kye ichan tijwnaq tu'n lan che ok xja'ja', tu'n tten kychiylal ex ati kynab'l; b'a'nqe' toj kyokslab'l, tu'n tten kyk'u'jlalil ex kyipumal tu'n tik'x yajb'il kyu'n.3Ex q'manxa kye tijwnaq qya, tu'n tten tchiylal Dyos kye, tu'n lalun che ok jk'ulyol mo tx'ojtenil. Tu'n tkub' kyq'o'n b'a'n yek'b'il4ex tu'n kyq'on xnaq'tzb'il kyeju' qya k'walqe'x tu'n kyk'u'jlante kychmil ex kyal,5tu'n kyximan b'a'n, tu'n kysak'sb'ente kyib', tu'n txi' kyb'incha'n kyaq'un toj kyja, tu'n tten kyk'u'jlalil ex tu'n kyniman te kychmil, tu'ntzun lalun che yolin xjal myab'a'n ti'ju' tyol Dyos.6Ex kuwsanqe'xa ku'xun tu'n kyximan b'a'nxi'x7tz'oka te jun yek'b'il kye se'n tu'n tb'incheta' b'a'n. Ajtq'onteya xnaq'tzb'il kye, q'onxa tojxi'x tu'me'l ex ati toklen,8q'manxa b'a'n xnaq'tzb'il tojile ttxolil, mix-a'lo'x tu'n tel ik'onte. Tu'ntzun tkub' ch'ixwi alqexku' maq'ojin, mixti'xte tu'n tmante taq'wix qi'j.9Ex q'onxa kynab'lju' okslal lq'o'n majinqe', tu'n kyb'in kyeju' kyajaw toj tkyaqil; tu'n kyok b'a'n xjal ex mya tzaq'welqe'.10Tu'n lalun che alq'an, tu'npe' kyxi' kyka'yi'n ti'xti', tu'ntzun kyek'unte toj tkyaqil qa tb'anilxi'xte' xnaq'tzb'il tu'n Dyos Klolqe.11Matzaj tyek'u'n Dyos t-xtalb'il tu'n kyklet kykyaqil xjal.12Atzu'n t-xtalb'il Dyos lu nqo t-xnaq'tza'n tu'n tkyaj qik'o'n taq'wix ex tkyaqil achb'il twitz tx'otx', ex tu'n qximan b'a'n, tu'n qanq'in toj tnik'alti'j ex tu'n qniman te Dyos,13b'ankxku' npon tq'ijlalil tb'anilxi'x nqo ayon ti'j: te lab'te'nxi'x ajtul jumajtl Qman Dyos ex Qajaw Jesukrist.14Taq'tib' tu'n tkyim tu'n qklet te tkyaqil taq'wixil ex tu'n qẍtilset toj qil, tu'n qok te ttanamkuxi'x, atixi'x tb'is qk'u'j tu'n qb'inchante b'a'n.15Atzun ati tu'n txi' t-xnaq'tza'nju'ya tuk'i'l toklena kye, q'onxa kynab'l ex tzak'unqe'xa. Mix-a'lo' tu'n tel ik'onteya. Aju' tu'n qb'inchante okslalqo'1Na'nxa kye okslal tu'n kyniman kye kawil ex kye tzyul kawb'il, tu'n kyq'o' kawi'kyib' ex tu'n kyb'inchante b'a'n kukxju'.2Tu'n lalun che yolin taq'wix ti'j juntl, tu'n lalun che q'ojin, tu'n kyok b'a'nwnaq, me's kyanmi kyuk'i'l kykyaqil xjal.3Qu'n ikyxtoqqe tnejel, mixti'xtoq qnab'l ex min nqq'a' kawi'qib'; tzpetni qo'toq ex k'a'yi'nqib' te tkyaqil achb'il te twitz tx'otx'. Tojtoq taq'wixil nqo anq'ina' ex ntoq tx'a'lti'j qk'u'j ti'j juntl, ik'b'il qo'xtoq ex ntoq qik'o'n qib' qxolilex.4Atzunte Dyos Klolqe matzaj tyek'u'n t-xtalb'il ex tk'u'jlalil kyi'j kykyaqil xjal,5mya tu'nwt b'a'nwt nqb'incha'n, tu'nku'te tlaq'b'il tk'u'j xqo tkola', maqo ttx'aj ex maqo ok te ak'a'j wnaq tu'n, matzaj tq'o'n qchwinqlal ak'a'j tu'n Xewb'aj Xjan.6Matzaj tq'o'n Dyos Xewb'aj Xjan nimxi'x qe tu'nel Jesukrist Klolqe,7tu'ntzun qk'met tu'n Dyos naq tu'n t-xtalb'il, ex tu'n qk'monteju' chwinqlal tejumajx nqo ayon ti'j.8Axxi'xte' lu, wajb'ile' ilti'j tu'n txitma'na kye, tu'ntzun kyb'inchante okslalju' b'a'n. B'a'nte' tkyaqil ja'lu ex ati kyajb'en kye kykyaqil.9Naq o'kx lalun taq' anb'ila kyeju' wulje'n mixti'x kyajb'en, kyi'ju' tz'ib'a'n kyi'j ojtxi' qyajilb'en, e'tx'a'ltik'u'jb'aj ex wulje'n kyi'ju' ntma'n toj tkawb'il Moses. Mixti'x kyajb'en ex mixti'x knab'l.10Qa ati jun nkub' tq'o'n pa'jtib'il kyxol okslal, tzak'unxa jumaj mo kamaj; qatzun min nok toj twi', xla'jamixa kyxol okslal,11qu'n kanli twitza, aju' nb'inchante ikju' matxi' tz'el txalpuj toj tokslab'l, ex tu'ntpajxu' til nela' ik'et. Xitma'n Pawl titi' tu'n tb'inchante Tito12Ajtpon nchq'o'ne' Artemas mujqa a Tikyiko, lwix pona ka'yilweye' Nikopolis, qu'n atzu' nximana'ye' tu'n tex jb'alil wu'ne'.13Q'onk tilila tu'n tonina ti'j Senas pjul kawb'il ex ti'j Apolo, q'onxa tkyaqilju' nojqelan kye toju' kyb'e.14Tu'n tel kykno'n qtzik mo qitz'in tu'n kyb'inchante b'a'n ex tu'n kyonin qa ati nojqelan, tu'ntzun twitzan kyaq'unb'en. Q'olb'eb'l te b'ajsb'il15Nxi' q'olb'e'na kyu'n kykyaqilju' ate' nk'etze'. Q'onxa q'olb'eb'l kyeju' nche tzalaj quk'i'l toj okslab'l. Awt Dyos tzaj q'onte t-xtalb'il kyib'aje' kykyaqile'.
Bible Society in Guatemala