Read Romanos 1

Romanos1

Jun q'olb'eb'l kye okslal toj Rom tu'n Pawl

¹Ayine' Pawl tmajen Jesukrist qine', ntxokliye' tu'n Dyos tu'n tokq'o'n woklene' te chq'o'n ex machin jaw sk'o'ne' tu'n nyoline' ti'ju' tpakb'al b'a'n.

²Aju' tqanil lu tzajni tziya'n atxi'x ojtxi' kyu'nju' t-sanjelal Dyos toju' Xjan Tu'jil.³Aju' tqanil lu atzu' nyolina' ti'j tk'wal Dyos Qajaw Jesukrist, itz'j se'nte xjal ex atzu' tzaja' ti'j tyajajil nimaqkawil Dab'i, ex tej tjatz anq'in kxol kyimni atzuntzu' tyek'uya Xewb'aj Xjan qa tk'wal Dyos tuk'ilju' tipumal.

⁵Naqx tu'nel Jesukrist saja' q'o'n woklene' tu'n wokye' te chq'o'n, ex luqine' nchin ajb'ene' te, tu'ntzun kyokslan xjal toj kkyaqil nimaqtnam.⁶Kxoltzu'n kkyaqil xjal lu ate'qeye' aj Rom. Ate Dyos nche k'u'jlanjtze' tu'n ex matxi' che txokliye' tu'n kyokye' te Jesukrist tu'n ex tu'n kyokye' kxolju' ttanam Xjan. Awttzun Qman Dyos ex Qajaw Jesukrist che k'iwlankyeye' ex tenwitju' nak'b'il kyeye'. Q'ob'l chjonte

⁸Tnejelxi'x nxi' nq'o'n chjonteye' te Dyos toj tb'i Jesukrist kyi'je' kkyaqile', qu'n matxi' kub' puqli tqanil kyi'je' qa wa'lqexixe' toj kyokslab'le'.⁹Ate Dyos nchin ajb'ene' te tu'n tkyaqil wanmiye' ex nchin pakb'ane' tiju' tpakb'al b'a'n ti'ju' Tk'wal, k'okyel te tziyal wi'je' qa jachq'al nche kub' nna'ne' toj nna'j Dyose',¹⁰Ex nchin kub'sane' twitz Dyos toj nna'j Dyose' tu'n ttzaj tq'o'n anb'il weye' tu'n npone' ka'yilkyeye', oklo kb'entel qa ax t-xtalb'ilju'.¹¹Qu'n wajb'ile' tu'n tok nka'yine' kwitze' ex tu'n wonine' kyi'je' toj kyokslab'le', tu'ntzun kwe'xixe';¹²mujqa tu'n qoninte qib' toj qokslab'l, qu'n ajnpone' kxole' chin tzajel kyonine' ex che kxe'l wonine'.

¹³Wajb'ile' tu'n kb'inteye' witz'in ex ntzik qa b'a'npunxi'maj kub' nximane' tu'n npone' ka'yilkyeye', naqtzun aju' mixti'x nb'ent npone'. Awe' wajb'il tu'n npone' pakb'alte tpakb'al b'a'n kxole' se'nxju' matxi' nb'inchaye' kyoj txqantl nimaqtnam.¹⁴Ilxi'xti'j tu'n txi' nma'ne' tpakb'al b'a'n kye kkyaqil xjal; ati kyojtzq'ib'l mujqa mixti' kyojtzqib'l, atixi'x knab'l mujqa mixti' knab'l;¹⁵qu'mtzun inxi'x k'atjne weye' tu'n txi' nma'ne' tpakb'al b'a'n kyeye' ayeye' najlqe'ye' toj Rom. Tipumalte Dyos tpakb'al b'a'n

¹⁶Lay chin ch'ixwiwe' tu'n txi' nma'ne' tpakb'al b'a'n, qu'n tipumalna' Dyos, tu'ntzun kkyaqilju' mache okslan te ok che kletel tu'n, aye'ju' aj Juda tnejelxi'x ex ikqexju' mya aj Juda.¹⁷Qu'n aju' tpakb'al b'a'n ntzaj yek'unte qe se'ntaq'wi tu'n qoka' tnik'alti'j: tu'nju' qokslab'l qo okyela' tz'aqlixi'x. Ikna' ntma'nju' toju' Tu'jil: Atzu' k'anqilaju' xjal tnik'alti'j tu'nju' tokslab'l. Kkyaqil xjal ati kyil

¹⁸Ex nimju' xjal taq'wix ex mya tnik'alkyi'j nkub' kymqo'nju' axxi'x tu'nju' kyb'inchb'aj myab'a'n. Ate Dyos ati toj kya'j kb'el tz'e'ysante kwitz tu'nju' mya tnik'alti'jqe'.¹⁹Qu'n kkyaqil xjal ojtzqi'n kyu'n qa ati Dyos, qu'n axte saj yek'untetib' kye;²⁰maskye minti' q'ancha'lte Dyos, atzu' nela' qnik' ti'j tu'nju' taq'unb'en b'ent ojtxi', tej tkub' tb'incha'n twitz tx'otx' ex layx b'aj tipumal. Qu'mtzun mixti'x tu'me'l tu'n kmante xjal qa mixti' Dyos exqa mixti' kyil.²¹Ex maskye matxi' kyilju' Dyos, mixti'x njaw knimsa'nju' tb'i, naku'j mya Dyos kye ex mixti' nxi' kq'o'n chjonte te. Xipe' nche ximana' tu'n kb'inchante ti'xti' taq'wix mixti'x kyoklen extzunju' kyanmi atzu' ta'ya' toj qxopin.²²Impe' kyma'n qa atixi'x knab'l, extzun mixti'x b'a'n kyu'n.²³Qu'n min nche k'uluntl twitzju' Dyos itz' tejumajx, xi'pe' nche' k'uluna'tl kywitzju' kyilb'ilal xjal nche kyim ex kwitz kyilb'ilal pich', kwitz kyilb'ilal txkup kyaje' kqan ex txup nche qititinje.

²⁴Qu'mtzun matxi' che kyajkolb'e'n tu'n Dyos tu'n tpaju' kyb'inchb'en taq'wix, ex tu'nju' kxim taq'wix matxi' kub' kb'incha'n ti'xti' tuk'i'l kxmilal ch'ixb'ajilx.²⁵Matxi' kub' kych'exb'e'n tyol Dyos axxi'x tuk'ilju' chajyolil, ex atzu' nche k'uluna'tl kwitzju' tch'isb'en Dyos, ex myatzu' twitzku' Dyos b'inchante tkyaqilju' ti'xti' ati twitz tx'otx' aj ati tu'n tnimet tb'i tejumajx. Ikxwitju'.

²⁶Qu'mtzun matxi' che kyej tzaqpi'n tu'n Dyos tu'nju' kb'i'nchb'aj ch'ixb'ajilx. Kse'nqe' qya kyxol min nche kub' kẍetl kyuk'i'l ichan, axtzu' kyajb'ila' tu'n kkub' kẍe kyuk'i'lx qya;²⁷ex ikxqeju' ichan min kyajb'iltl tu'n kkub' kẍe kyuk'i'l qya, xi' npona'tl kk'u'j kyi'jx ichan. Tu'ntzun ja'lu makb'incha txqan ti'xti' ch'ixb'ajilx ex matxi' tzaj q'o'n tz'e'ysb'il kywitz ti'jx kyxmilal tu'n Dyos tu'nju' ẍe' eltxalpuj ti'ju' b'a'n.

²⁸Qu'n mixti'na' xkyaj tu'n telkynik' te Dyos, axte' Dyos xitzaqpinkye tu'n tchukjiju' knab'l ex tu'n kyb'inchante aju' myab'a'n.²⁹Matxi' noj kyanmi tu'n taq'wixil, pi'sqe', jamjolqe' ex b'inchal taq'wixqe'. Intx'a'l ti'j kk'u'j kyi'j xjal, b'yol xjalqe', jyol q'ojqe', sb'ulqe', b'inchal myab'a'n qe' ex jk'ul yolqe'.³⁰Inche yolin myab'a'n kyi'j txqantl, ajq'ojqe' ti'j Dyos, twi' yasulqe', taq'wixqe' ex nimal kyib'; aye'x nche' jaw ximante taq'wixil, min nche okslan kye kyman,³¹mya kyajb'il tu'n tkaneju' axx toj kwitz, mixti' njapunju' kyol, mixti' kyk'u'jlalil, mixti' ntzaj laqj kyk'u'j.³²B'i'n kyu'n b'a'nxi'x intma'n toj tkawb'il Dyos qa ati tu'n kykyimju' xjal nche b'inchante tkyaqil ja'lu; extzun ilti'j teqe'k b'inchalte ex inxi'x che tzalaj kyi'ju' nche'x b'inchante myab'a'n. Tojxi'x tu'me'lju' tz'e'ysb'il witzb'aj tu'n Dyos

¹Qu'mtzun qa ati junkye' nyolin myab'a'n ti'j juntl, tib'ajx kb'el tz'aqa' tyol, qu'n ax ntb'incha'njuya kse'nx nkyb'incha'n txqantl.²Ex b'i'n qu'n qa ate Dyos nkub' ttz'e'ysa'n kwitz xjal toj tu'me'lxi'x qa ati kyil.³Atzunta nyolina kyi'j txqantl extzun ax nxi' tb'incha'nju'ya kse'nkye, lalun kub' t-xima'na qa lay kub' tz'e'ysa'n twitza tojxi'x tu'me'l tu'n Dyos.⁴Inel tik'una tk'u'jlalil Dyos, exju' tpasensi ex tu'nju' nik'x tkyaqil tu'n, ex min nximana ti'j tu'n tk'ujlalil Dyos kb'antela' tanjtzti'j tanmiya.⁵Tu'ntzunju' matxi' kub' tch'uẍsa'na tanmiya ex min tajb'ila tu'n tanjtzti'ja tk'etz Dyos, matxi' tz'oktena ch'uqilte txqan il tib'aja ex majx kb'el tz'e'ysa'n twitza ajtpon tq'ijlalil tu'n Dyos⁶ex ktzajel tq'o'n Dyos tu'me'l t-xel teyile junjun kse'nxju' tb'inchb'en.⁷Tzultq'o'n Dyos chwinqlal tejumajx kyeju' noktilil kyu'n tu'n kb'inchanteju' b'a'n, ex kyeju' noktilil kyu'n tu'n kkanb'ante ninb'ilkye toj kya'j ex tu'n kkanb'anteju' ti'xti' layx che b'aj;⁸extzun kb'el ttz'e'ysa'n kwitzju' pi'sqe' tu'n tkyaqil ttx'u'jil, aye'ju' min nche niman te Dyos ex o'kx nche ximana' ti'j taq'wixil.⁹Tzul yajb'il ex k'ixk'oj kyib'aj kkyaqilju' xjal nche b'inchan myab'a'n, tnejelxi'x kye aj Juda, ex kyeju' xjal mya aj Juda.¹⁰Atzunte Dyos tzul tq'o'nju' ninb'il ex nak'b'il kye kkyaqilju' xjal nche b'inchan b'a'n, tnejelxi'x kye xjal aj Juda, ex kyeju' xjal mya aj Judaqe'.¹¹Qu'n junelni qekye' xjal kykyaqil toj twitz Dyos. Aju' tkawb'il Moyses

¹²Kkyaqilju' mache b'inchan il mixti'toq b'inju' tkawb'il Moyses kyu'n, che kyimel ex mixti' toklen kawb'il kyi'j, aye'tzu'n mache b'inchan il extzun b'i'nju' tkawb'il Moyses kyu'n, tu'nxju' kawb'il lu che okyela' toj xjel.¹³Qu'n myaye'kye tnik'alkyi'ju' b'i'n kawb'il kyu'n, o'qekxkye' in japun kyu'n tnik'alkyi'j twitz Dyos.¹⁴Qu'n aye'ju' xjal mya aj Judaqe' ex mixti'ju' tkawb'il Moyses toj kyq'ob', tu'nx knab'l nkyb'incha'nju' intma'n kawb'il lu ex innelkynik' ti'ju' b'a'n ex myab'a'n.¹⁵Qu'mtzun inkyek'u'n tu'nju' kychwinqlal qa tz'ib'a'nju' kawb'il toj kyanmi. Aye'x nche na'nte ex ajtkub' kxima'n jun ti'xti' lwiy nelkynik' ti'j qa b'a'n mujqa myab'a'n.¹⁶Ajtzun kyok kykyaqil xjal toj xjel tu'n Jesukrist twitz Dyos kse'nx intma'nju' tpakb'al b'a'n nxi' npakb'a'ne', majx che b'je'lel chik'e' kykyaqilju' kb'inchb'en xjal toj ewaj.

¹⁷Aya ntma'na qa aj Judaya, q'uqlok tk'u'ja ti'ju' tkawb'il Moyses, ex njaw tnima'n tib'a tu'n tpaj.¹⁸Noktq'o'n tib'a qa tojtzqi'na tajb'il Dyos, ex aju' kawb'il lu ntzaj yek'unte teya tu'n tjaw tjyo'na ti'xti' b'a'nxi'x.¹⁹Ex q'uqlok tk'u'ja ti'ja qa aya kxe'l ẍaqlunkye moẍ ex kb'el q'onte spik'un toj kb'eju' ate' toj qlolj;²⁰qa aya q'ol xnaq'tzb'il kyeju' mixti' b'a'n kyu'n ex kyeju' mixti'xi'x kyojtzqib'l naq tu'nju' atzu' ta'ju' kawb'il toj tq'ob'a inq'onte ojtzqib'l ex nyolin ti'ju' axx.²¹B'a'nte' qa aya nxnaq'tzan kyeju' txqantl, ¿tiquntzun min nt-xnaq'tza'n tib'a tib'xtib'a? Ina' tpakb'a'na kye xjal qa taq'wix tu'n kyelq'an, ¿tiquntzun nelq'aniya?²²Extzunqa ntma'na kye xjal tu'n lalun che ajpajin, ¿titiquntzun nxa'ya' tb'incha'na? Ex qa nche el tik'una witzileb', ¿tiquntzun netza' telq'ana kyq'inumal toj kja?²³Njaw tnima'n tib'a tu'nju' ati kawb'il tuk'ila, extzun nel tch'ixaw Dyos tu'na qu'n minajun nokslana te.²⁴Tu'me'lx tu'nju' Tu'jil tyol Dyos intma'n kjalu: Aye'ju' xjal mya okslalqe' nche yolin myab'a'n ti'j Dyos tu'n kpaje', chij.

²⁵Ati tajb'enju' techila ti'j tchib'jila qa njapunju' tkawb'il Moyses tu'na; qatzun mixti' njapun tu'na mixti'x tajb'en.²⁶Atzunju' xjal qa mixti' tok techil ti'j tchib'jil extzun njapunju' kawb'il tu'n, ikx tz'elpuna' kse'nju' atok techil ti'j tchib'jil.²⁷Alkyete njapun kawb'il tu'n, maskye mixti' tok techil ti'j tchib'jil, kxe'l q'o'n toklen tu'n tkawin tib'aju' xjal ati kawb'il tuk'i'l ex tok techil ti'j tchib'jil qa min njapun tu'n.²⁸Lalun kub' kyxima'ne' qa aj Juda qe'ye' naq tu'n che anq'ine', ex tu'n tok kyechele' ti'j kychib'jile'.²⁹Ate' xjalju' aj Judaxi'x aju' njapun tkawb'il Dyos tu'n, myaju' kykawb'il xjal te twitz tx'otx'. Alkyetzun xjal ikntb'incha'nju' kjawil nimsa'n tu'n Dyos ex mya kyu'n xjal.

¹¿Titi'xixtzun tajb'en tu'n qok te aj Juda mujqa tu'n tokju' qechil ti'j qchib'jil?²Nim kyoklen toj chukchaq tu'me'l. Tnejelxi'x kyeju' xjal aj Juda saja' q'o'na' tyol Dyos.³¿Titi'tzun kb'ajel ikju'? ¿Ma laytzun japun tyol Dyos tu'n tpaj min nche okslan junjunju' aj Juda te?⁴¡Lay tb'inchate Dyos ikju'! Ate Dyos kjapumelte' tyol tu'n tkyaqil, maskye nche chan kye xjal yol; chiju' Tu'jil kjalu: Ilti'j k'elel tnik'tzil qa axju' ntma'na, ex kb'elkyi'j xjal tu'na ajtoka toj xjel, chij.

⁵Qatzun tu'nju' taq'wix nqb'incha'n nelaxi'x tnik'tzil qa tnik'alte Dyos ti'j ¿Titi' kxe'l qma'n? ¿Ma mya tnik'alti'j Dyos tu'nju' nkub' ttz'e'ysa'n qwitz? (Inchin yoline' kse'nx yolin alkyexku' xjal)⁶¡Mikxa'ju'! Qu'n naqwit mya tnik'alte Dyos ti'j, ¿Se'n taq'witzun kb'entela' ttz'e'ysante kwitzju' xjal?

⁷Extzunqa aju' qchajyolil najb'en tu'n tjaw ajwanlinxi'x tb'i Dyos ex tu'n telxi'x tnik'tzil qa tnik'alti'j, ¿titiquntzun kb'ela' tz'e'ysa'n qwitz?, chechije'.⁸Expe' nkma'ne', ¿Titiqu'n minti' nxi' qb'incha'n taq'wix tu'ntzun tulju' b'a'n? Ape' nkyma'n junjun wi'je' qa a in npakb'anjuye' naqxwit tu'n nkub' b'o'lje'; b'a'n tu'n ttz'e'ysetkye' xjal lu kywitz. Kkyaqil xjal aj ilqe' twitz Dyos

⁹¿Se'ntzun tten? ¿Ma b'a'nqoxi'xtzun tu'n aj Judaqo' kyekwitz txqantl xjal? ¡Minti'! Qu'n qkyaqil toqo'kx tjaq' tkawb'il il maskye aj Judaqe' ex maskye mya,¹⁰qu'n chiju' tz'ib'a'n toj Tu'jil kjalu: ¡Mix-a'loxte xjal tnik'alti'j, tk'ixpewt jun!¹¹Mix-a'lo' jun xjal nkane toj tnab'l; ex mix-a'lox jun xjal njyon ti'j Dyos.¹²Kkyaqil matxi' che'x toju' myab'a'n b'e; ex kkyaqilx matxi' che b'inchan myab'a'n. ¡Mix-a'loxte nb'inchante b'a'n! ¡Mixti'x tk'ixpe'wt jun!¹³Iky toj tqul kse'n jun muqb'il k'ab'li, tu'nju' taq' nchana' yol, ex naku'j tokxju' ttz'u'lub' kan toj ttzi¹⁴ex naqxi'x yasu'n tokx toj ttzi ex myab'a'n yol.¹⁵Ojqelxi'x kyelju' tqan tu'n tb'yon xjal;¹⁶Jaxjaku' nche b'eta' naqx tqe'k xitul ex yajulkye xjal,¹⁷ex min kyojtzqi'nju' b'e te nak'b'il.¹⁸Ex mixti'x ch'i'n tchi Dyos kye, chiju' tz'ib'a'n toj Tu'jil.

¹⁹B'i'n qu'n tkyaqil ntma'nju' tu'jil kawb'il, atzu' ntma'n kyeju' tqe'kx tjaq'u' kawb'il lu, tu'ntzun mix-a'lotl kyolil ex tu'n telkynik' kkyaqilx qa ati kyil twitz Qman Dyos;²⁰qu'n mix-a'lox jun kq'malte qa tnik'alxi'xti'j twitz Dyos tu'nju' qa njapunju' kawb'il tu'n, qu'n aju' u'j te kawb'il o'kx tajb'enju' tu'n telqnik' ti'j qa aj ilqo'. Naq tu'nju' okslab'l qo kletila'

²¹Atzun ja'lo, axte Dyos saj yek'unte se'n tu'n qoka' tnik'alxi'xqi'j, mya tu'nju' kawb'il, expe' axju' kawb'il inq'mante exqe'ju' t-sanjelal Dyos kjalu:²²naqx tu'nju' okslab'l ti'j Qajaw Jesukrist qo k'metela' tu'n Dyos, qu'n junelniqo' toj twitz:²³kkyaqil xjal matxi' che b'inchan il ex matxi' che el lq'e ti'j Dyos.²⁴Atzunte Dyos tu'nju' tk'u'jlalil matxi' kub' tnajsa'nju' qil, ex maqo kolpet tu'n toj il naqx tu'nel Qajaw Jesukrist.²⁵Ate Dyos tzaj chq'onte Jesukrist tu'n tkub' qojlu' tchk'el te najsb'il qil. Kb'el tnajsa'nte qil tu'n qokslab'l ti'j. Iktzu'n ntyek'u'na' Dyos qa tnik'alxi'xti'j tu'nju' makub' tnajsa'n qil ojtxi',²⁶qu'n atina' tpasensi. Ate Dyos ntyek'u'n qa tnik'alxi'xti'j, ex tu'ntzunju' tnik'alti'j nche tk'mo'nju' xjal nche okslan te Jesus.

²⁷¿Se'n taq'wi tu'n tjaw tnima'ntib' jun xjal twitz Dyos? ¡Mixti'x tu'me'l! ¿Tiqu'ntzun? Mya tu'nju' ma japunju' tkawb'il Moyses tu'n, ate' tu'nju' ma tz'okslan te Jesus.²⁸Iktzun tu'me'lju': Intk'mo'nte Dyos xjal noqx tu'n tokslab'l tij Jesus, ex myate' qama japunju' tkawb'il Moyses tu'n.

²⁹¿Ma o'kxtzun kyuk'i'l aj Juda ta'ya' Dyos? ¿Ma mixti'tzun kyuk'ilju' txqantl xjal mya aj Judaqe'? ¡Atite' kyuk'i'l kkyaqil xjal te tkyaqil twitz tx'otx',³⁰qu'n noqna' o'kx jun Dyos ati: aju' Dyos in k'monkye xjal qa ati kyokslab'l, ex myate' nxi' tka'yi'n qa ati kyechel ti'j kychib'jil mujqa mixti'!³¹¿Ma tu'ntzunju' okslab'l nela' qi'nju' tipumal kawb'il? ¡Myate'! Impe'na' nok qq'o'nxi'xtl toklenju' kawb'il tu'nju' qokslab'l. Aju' Ab'raam jun yek'b'il qe

¹¿Ti'tzu'n qma' ti'j Ab'raam ojtxi' qyajilb'en, tiloti' tkanb'a?²Qu'n naqwit tu'n taq'unb'en Ab'raam ok q'ona' te tnik'alti'j, ojewtlo jawtnima'n tib' kwitz xjal ex myawtlo twitz Dyos.³Qu'n chinaju' ntma'n toj Tu'jil: Okslante Ab'raam te Dyos, qu'mtzun oka' q'o'n te tnik'alti'j tu'n Dyos.⁴Qu'mtzun qa ati jun xjal naq'unan, aju' twi'tk'u'j mya jun oyaj te, ate' lu chjob'lte tq'ij.⁵Atzunte Dyos nkub' tnajsa'n tilju' aj il naqx tu'n qama tz'okqe tk'u'j ti'j, kxe'l tq'o'n chojb'ilte te xjal naqx tu'nju' tokslab'l, mya tu'n taq'unb'en.⁶Expe' tmate' Dab'i qa nimxi'x tzalajb'il te jun xjal in mk'onjtz tu'n Dyos mya tu'n taq'unb'en.⁷Iktzu'n tma Dab'i kjalu: ¡Tzalajb'ilxi'xte' kyeju' xjal nkub'najsa'n kb'inchb'aj taq'wixi'x ex ma tzik'tna'lju' kyil.!⁸¡Tzalajb'ilxi'xte' teju' xjal mixti'tl ntzaj na'nju' til! chij.

⁹¿Ma o'kxtzulo kxe'la' q'o'nju' tzalajb'il lu kyeju' ati kyechel ti'j kychib'jil mujqa ikx kyeju' txqantl xjal? Matxi'na' txi' qmane' qa ok q'onte Ab'raam tnik'alti'j naq tu'nju' okqe tk'u'j ti'j te Dyos.¹⁰¿Jtojetzun tokq'o'n Ab'raam tnik'alti'j tu'n Dyos? ¿Ma tzmaxi' tok q'o'nju' techil ti'j tchib'jil mujqa na'mxtaq? Nej ok q'onte Ab'raam tnik'alti'j tu'n Dyos mya tu'nwitju' techil ti'j tchib'jil.¹¹Yajxi'tltzun okq'o'n techil ti'j tchib'jil, te jun techlal qa ma'toq tz'ok q'o'n te tk'wal Dyos naqx tu'n tokslab'l ti'j. Qu'mtzun ate Ab'raam okq'o'n te manb'aj kye kkyaqilju' ati kyokslab'l, maskye mixti' kyechel ti'j kychib'jil; ex kkyaqilju' xjal nche okq'o'n te tnik'alkyi'j tu'n Dyos tu'nju' kyokslab'l ti'j Jesukrist.¹²Ex axte' Ab'raam kmanju' ati kyechel ti'j kychib'jil qa ljo'n kyokslab'l kse'n tokslab'l Ab'raam ojtxi' qyajilb'en tej na'mtoq tok q'o'nju' techil ti'j tchib'jil. Tk'am Ab'raamju' tzajni tziya'n te

¹³Tzaj ttziya'n Dyos te Ab'raam ex kyeju' tyajajil tu'n txi' tq'o'n twitz tx'otx' te kyetzb'il; ex myaju' tu'nwtju' japun kawb'il kyu'n, tu'nte ten kyokslab'l ti'j Dyos.¹⁴Naqwit aye' che k'molteju' etzb'il aye' njapun kawb'il kyu'n, mixti'xwitlo tajb'enju' okslab'l ex k'elel toklenju' yol tziya'n tu'n Dyos.¹⁵Qu'n ati tz'e'ysb'il witzb'aj toju' kawb'il; atzun jamixti'ya' kawb'il mixti'te' tz'e'ysb'il witzb'aj.

¹⁶Qu'mtzun tu'n lalun tz'el toklenju' tzajni tziya'n te Ab'raam tu'n Dyos kyeju' tyajajil, tb'incha Dyos jun xtalb'il te Ab'raam naqx tu'nju' tokslab'l. Aju' tzajni tziya'n mya o'kx kyeju' njapun kawb'il kyu'n, ikxkye kkyaqilju' ati kyokslab'l se'nte Ab'raam. Qu'mtzun oka' q'o'n Ab'raam te manb'aj kye kkyaqilju' ati kyokslab'l,¹⁷kse'n ntma'nju' Tu'jil: Matxi' tz'ok nq'o'na manb'aj kye txqan tnam. Xi' okslana'te Ab'raam teju' Dyos nche jaw anq'in kyimni tu'n ex nche b'ant ti'xti' ak'a'j tu'n.

¹⁸Tej ttzaj ttziya'n Dyos te Ab'raam qa k'okyel te kman txqan xjal, ch'uẍ ela' toj twitz. Tetzunj tokslante Ab'raam ex tej tokqe tk'u'j ti'j Dyos ok te manb'aj kye txqan tnam kse'nxju' tzaj tma'n Dyos te: Txqanju' tyajajil che b'elpuqli twitz tx'otx', chi Dyos.¹⁹Min kub'numjte Ab'raam toj tokslab'l, maskye ch'inxtltoq tjapun toj jo'k'al (100) ab'q'i tuk'i'l Sara ju' t-xu'jil exqa ma'toq che tijin tu'n tul jun kk'wal qu'n ch'inxtltoq kkyim.²⁰Mixti' jawjete' Ab'raam tk'u'j ti'ju' yol ojetoq tzaj tma'n Dyos te, ape' tb'inchaju' kub' tkuwsa'ntib' toj tokslab'l ex xitq'o'n chjonte te Dyos,²¹q'uqloktoq tk'u'j b'a'nxi'x ti'j Dyos qa tu'n tipumal ktb'incha'ya' tzajni ttziya'n te.²²Qu'mtzun oka q'o'n te tnik'alti'j tu'n Dyos, naqx tu'nju' tokslab'l ti'j.

²³Ex aju' tz'ib'a'n toju' Tu'jil tu'nju' k'amliju' Ab'raam tu'n Dyos mya o'kxtzu' nyolina ti'j Ab'raam;²⁴ex atzu' nyolina'te' tz'ib'a'n qi'j toj Tu'jil. Qu'n ikxqe nqo' okq'o'n tnik'alqi'j tu'n Dyos qama qo okslan teju' jaw anq'in Jesus tu'n kxol kyimni,²⁵aju' xiq'o'n toj kamik tu'n tpaj qil ex jaw anq'in tu'n qok te tnik'alqi'j. Twitzlalil tu'nju' k'mo'nqo'tl tu'n Dyos

¹Maqo tk'amte' Dyos ex maqo oktq'o'n tnik'alqi'j naqx tu'n qokslab'l, ja'lo atitzun nak'b'il qxol naqx tu'nelju' Qajaw Jesukrist.²Qu'n naqx tu'nel Jesukrist xqopona' lq'e tk'etz Dyos ex tu'nju' qokslab'l, tu'ntzun qtzalaj toju' t-xtalb'il ex matxi' kub' qwab'a'n qib' ex nimxi'x tzalajb'il qe tu'nju' q'uqlok qk'u'j ti'j tajwalil Dyos.³Ex myanaq o'kxju' lu, ex ikx nqo' tzalaj toju' yajb'ilqe; qu'n b'i'na' qu'n qa aju' yajb'il ntzaj q'onte qipumal tu'n qkub' we' b'a'nxi'x ex tu'n tik'x qu'n,⁴ex tu'ntzunju' nik'x qu'n inqo' ok ka'yi'n tu'n Dyos, ex atzuntzu' noka' qexi'x qk'u'j ti'j Dyos.⁵Atzunju' q'uqb'ab'l tu'n Dyos lay kub'naj, qu'n ina' qna'n toj qanmi ati tk'u'jlalil Dyos qi'j tu'nju' Xewb'aj Xjan tzaj tq'o'n qe.

⁶Qu'n tej mixti'xqe tu'me'l qu'n tu'n qklonte qib' qib'xqib', ul Jesukrist kyimel tu'n tpaj qil tojxi'xju' tq'ijlalil.⁷Axxi'x, mix-a'lox jun xjal jaku' taj tu'n tkyim tu'n tpaj juntl. Maskyepe' tu'n tpaj jun xjal tnik'alti'j; extzulo jaku'x taj jun xjal tu'n tkyim qa tu'n tpaj jun b'a'n xjal.⁸Atzunte Dyos oje tzaj tyek'u'n qe qa nqo tk'u'jla'n, qu'n kyimju' Jesukrist tu'n qpaj maskye aj ilqotoq.⁹Ja'lotzun naqx tu'n xkyim Jesukrist, matxi' qo' mk'et tu'n Qman Dyos ex matxi', qu'mtzun qo kletil tu'n ajttzaju' tz'e'ysb'il witzb'aj toj b'ajsb'il q'ij.¹⁰Qu'n tej ajq'ojqotoq ti'j Dyos, axte Dyos xb'inchante tu'n tb'entl qten tuk'i'l naqx tu'nel tkamik Jesukrist aju' tk'wal, qu'mtzun q'uqlixi'x qk'u'j qa qo' kletel tu'n, tu'nju' majaw anq'in Jesus ex kyetl qten tuk'i'l.¹¹Ex mya o'kx ja'lu, ex inxi'x qotzalaj ti'j Dyos naqx tu'nel Qajaw Jesukrist, qu'n tu'nte Krist xb'enta qten tuk'i'l Dyos. Aju' Adan ex Krist

¹²Ikytzu'n, naq tu'n jun ichan oka' il kyxol kykyaqil xjal ex tu'nju' il oka' kamik, qu'mtzun kykyaqil xjal nche kyim naqx tu'n tpaj mache b'inchan il.¹³Atitltoqte' il kyxol xjal, tej na'mxtoq ttenju' kawb'il; mixpeti' nq'manjtztoq qa atitoq kyil xjal tej na'mxtoq tulju' kawb'il.¹⁴Ttzajlenxpe' qete' toj tq'ijlalil Adan ex pon kanunx toj tq'ijlalil Moyses, kawinju' kamik kyib'aj kykyaqilju' eb'inchan il, maskyepe' aju' kyil mya e'ik'wit tib'aj jun chaq'b'il, kse'n tb'incha Adan, ju' ntechla'n ti'j Krist atitoq tulel.

¹⁵Expe' lay b'ent tok qmujb'a'n til Adan tuk'ilju' xtalb'il matxi' tzaj tq'o'n Dyos qe. Qu'n naq tu'n tpaj jun xjal b'inchan il, nim txqan xjal e'kyim; ex atzunte' t-xtalb'il Dyos naq tu'n jun ichan aju' Jesukrist sula' tq'o'n, nim toklen ex b'a'n sela' kye kkyaqil xjal.¹⁶Aju' til jun xjal layx pon kanun kxe'nju' xtalb'il saj tq'o'n Dyos qe, qu'n naq tu'nju' jun il tb'incha Adan sajaju' kamik ex tz'e'ysb'il witzb'aj kye xjal; atzunte' t-xtalb'il Dyos ntb'incha'n tu'n qok tnik'alti'j maskye ati txqan qil nejku'.¹⁷Qu'n naq tu'n jun il tb'incha Adan nche kyima' xjal kkyaqil, ex ikx naq tu'n jun wnaq aju' Jesukrist qo anq'ila' ex qk'ama' t-xtalb'il Dyos tu'n qok te tnik'alti'j, qu'n naq jun oyaj saj tq'o'n Dyos qe.

¹⁸Naq tu'nju' til Adan saja' tz'e'ysb'il witzb'aj kyib'aj kkyaqil xjal, ex ikxtzu'n naq tu'n jun xjal kyim ex tb'incha tnik'alti'j, xqo' k'monjtza' ex ktzajel q'o'na' qchwinqlal tejumajx tu'n Dyos.¹⁹Iku' se'n e'ok kkyaqil xjal aj il tu'n tpaj til jun xjal; ex ikxtzu'n tu'me'lju' nim xjal knajsetel kyil ex che k'metel tu'n Dyos naqx tu'nel juntl wnaq aju' Jesukrist, ok tnik'alxi'xti'j.

²⁰Tej tulju' kawb'il jaw ch'iyxixtlju' il; ex tetzunj ẍch'iyju' il, ma tzajxi'x laqj tk'u'jtl Dyos kyi'j xjal.²¹Extzunqa matxi' kawinju' il kyib'aj kkyaqil xjal ex ma' che kyim tu'n, ikxtzunte tk'u'jlalil Dyosju' ati tipumal tu'n ttzaj tq'o'n qchwinqlal tejumajx ex tu'n qok te tnik'alti'j naq tu'nel Jesukrist. Kyimnqo' te il

¹¿Titi'tzun kxe'l qma'n? ¿Ma qo b'inchal txqantl il tu'ntzun ttzaj laqjxi'x tk'u'j Dyos qi'j?²¡Laynate'! Qu'n kyimnqo'tlqe te il; ¿Se'n taq'witzun ajtb'ent qanq'in toj il?³¿Ma mixti'tzun b'i'n kyu'ne' qa matxi' qmujb'a qib' tuk'i'l Jesukrist tu'nju' xjaw a' qwi' ex matxi' qmujb'a qib' tuk'ilju' tkamik?⁴Qu'n tu'nju' xjaw a' qwi' oje qoku'x mqu'n tuk'i'l Qajaw Jesukrist, ex maqo' kyim tu'ntzun qjatz anq'in toju' chwinqlal ak'a'j, ikse'nte Qajaw Jesukrist jatz anq'in kxol kyimni tu'nju' tipumal Qman Dyos.

⁵Qama tz'ok qmujb'a'n qib' tuk'i'l Jesukrist toju' tkamik, ex ikx qo jawil anq'in junx tuk'i'l.⁶B'i'nte' qu'n qa aju' qchwinqlal ojtxi' oje jawq'o'n twitz krus junx tuk'i'l Krist, tu'ntzun tkub' naju' tipumal il atitoq toj qxmilal ex tu'ntzun mlalun qo' ajb'entl te il.⁷Qu'n aj qkyim, atzuntzu' nqo' tzaqpaja' tjaq' il.⁸Qa matxi' qo' kyim junx tuk'i'l Jesukrist, q'uqlitzun qk'u'jtz ti'j qa qo' anq'il tuk'i'l.⁹Qu'n b'i'n b'a'nxi'x qu'n qa ate Krist tjatzlen anq'in, layx kyimtl. Qu'n aju' kamik mixti'tl toklen ti'j.¹⁰Qu'n mixti'tl toklenju' kamik ti'jte' Krist tej tkyim, qu'n naq jumajx kyim; ex tej tjatz anq'in tuk'i'l Dyos nanq'ina' ja'lo.¹¹Ikxtzunkyeju'ye' kximanxe' qa mixti'tl toklen il kyi'je' qu'n matxina' che kyime' te il, ex matxi' che jaw itz'jiye' tu'n Qman Dyos junx tuk'i'l Jesukrist.

¹²Qu'mtzun lalun txi' kq'o'ne' anb'il te il toj kxmilale', ex lalun txi' kb'incha'ne' tajb'il kxmilale'.¹³Lalun txi' kq'o'ne' kxmilale' te il tu'n tajb'en te b'inchalte myab'a'n. Ape' kyb'inchamjuye', kq'onx kxmilale' toj tq'ob' Dyos tu'n kyajb'ene' te b'inchalte tnik'alti'j twitz, qu'n matxina' che kyime' te il, ex matxi' che jaw anq'ine' tu'n Dyos.¹⁴Mixti'tlte' il toklen kyi'je' qu'n mixti'tl tqe'kxe' tjaq' kawb'il, atzu' tqe'yatlkye' tjaq' t-xtalb'il Qman Dyos. Techlal ti'j jun lq'o'n majen

¹⁵¿Titi'tzun nkma'ne'? ¿Ma oklo qo b'inchal il tu'nju' mixti' tqo'kx tjaq' kawb'il, atzu' tqo'kxa' tjaq' t-xtalb'il Dyos? ¡Minti'!¹⁶B'i'n kye'kyu'n b'a'nxi'x qama txi' kq'o'n kyib'e' te lq'o'n majen te juntl, ati tu'n tkub' knimane'. Ikxtzunju' qama txi' knimane' il ntzaj q'onte kamik, che okyele' te tmajen ex ikx qama txi' knimane' Dyos che okyel q'o'ne' te tnik'alti'j tu'n Dyos.¹⁷Chjonte te Dyos tu'nju' matxi' kk'ame' t-xnaq'tzb'il tu'n tkyaqil kyanmiye', maskye tmajen ilqetoqe' tnejel.¹⁸Atzun ja'lo tu'nju' matxi' che tzaqpaje' tjaq tkawb'il il, matxi' che txkonjtze' tu'n kyajb'ene' te Dyos toj tnik'alilti'j.¹⁹(Nche'x nma'ne' yol kyeye' aye'j ojtzqi'nqexi'x kyu'ne', tu'ntzun tkane' toj kwitze' b'a'nxi'x.) Ikxse'n ojtxi' kyaq'kyib'e' tu'n kyajb'ene' te il tu'n kyb'inchanteye' myab'a'n, ikxtzu'n ja'lo kyq'om kyib'e' tu'n kyajb'ene' te Dyos tojxi'x tnik'alti'j ex tu'n kxjansante kyib'e'.

²⁰Qu'n tej majinqe'toqe' te il, mixti'toq nkyb'icha'ne' tnik'alilti'j.²¹¿Titi'tzun xkkanb'aye' tu'nju' mache okye' te tmajen il? Ape' xkykanb'ajuye' nche kub' ch'ixwiye' tu'n ja'lo, qu'n tkyaqil xb'aj kb'incha'ne' kamik ntzaj ti'n.²²Atzun ja'lo, tu'nju' matxi' che tzaqpete' tjaq' tkawb'il il ex matxi' che okye' te tmajen Dyos. Atitzunte' tajb'en kyeye' qu'n che okyele' xjan ex tzul q'o'n kychwinqlale' tejumajx tu'n Dyos.²³Ate' kamik ntzaj tq'o'n il qe te chojb'il, atzunte Dyos ntzaj tq'o'nju' chwinqlal tejumajx qe te jun oyaj tu'nju' mujli qten tuk'i'l Qajaw Jesukrist. Jun techlal ti'j mjeb'le'n

¹E'ntzik ex witz'in ojtzqi'nkye' tkawb'il Moyses kyu'n, ex b'i'n kyu'ne' qa aju' kawb'il o'kx atiya' tajb'en kyeju' xjal itz'qe'.²Iku' se'n jun qya mjeb'ni tuk'i'l tchmil ati toklenju' kawb'il ti'j qa itz'ju' ichin; qatzun ma'toq kyimju' tchmil, in tzaqpaju' qya tjaq' kawb'il ex mixti'tl toklen ti'j.³Qatzun aju' qya lu mamje tuk'i'l jun ichan extzun itz'xju' tchmil, in ajpajin, extzunqa ma'toq kyimju' tchmil mixti'te' kawb'il tma' qa in ajpajin, ex b'a'n tu'n tmje tuk'i'l juntl ichan.

⁴Ex ikxtzunkyeju'ye' ntzik ex witz'in, mixti'tl toklenju' kawb'il kyi'je' tu'nju' tkamik Krist ex matxi' kmujb'a' kyib'e' tuk'i'l tej tjatzlenxi' anq'in kxol kyimni. Qu'mtzun ati anb'il qe tu'n qajb'en te Dyos tojxi'x tnik'alti'j.⁵Qu'n tej aj ilqo'toq, intoq ajb'en kawb'il qe tu'n txi' qb'inchanju' tajb'il qxmilal, ex o'kxtoq nqkanb'aju' aju' kamik.⁶Atzun ja'lo mixti'tl toklenju' kawb'il qi'j, qu'n mixti'tl tqo'kx tjaq' tipumal, matxi' qo' tzaqpaj tu'n qajb'en o'kxte Dyos, qu'n matzaj q'o'nju' qchwinqlal ak'a'j tu'nju' Xewb'aj Xjan. Jaw b'ent-xixju' il tib'aju' kawb'il

⁷¿Ma oklo qma' tu'n ja'lu qa ilju' kawb'il? ¡Minti'! Naqtzun aju' naqwit mya' tu'nju' kawb'il mixti'wtlo selqnik' ti'j qa il. Mixti'xwitlo sel nnik'e' ti'j qa myab'a'n tu'n tpon qk'u'j ti'j jun ti'xti' te juntl xjal, naqwit min ntma'nju' kawb'il kjalu: Lalun pon tk'u'ja ti'j.⁸Ate il axju' kawb'il sajb'en tu'n te sb'ub'l weye', qu'n tej nb'inteye' chaq'b'il lu, atzuntzu' pona' nk'u'je' tu'n nb'inchanteye' tajb'il nchib'jile'. Qu'mtzun noqwit mixti'ju' kawb'il, aju' il mixti'wtlo toklen ex kyimniwtlo.⁹Tej na'mtoq tel nnik'e' ti'ju' kawb'il, intoq chin anq'ine' b'a'n toj nwitze'; tetzunj tel nnik'e' ti'ju' chaq'b'il, atzuntzu' kaneya' toj nwitze' qa aj ilqine',¹⁰ex oje chin kyime'. Qu'n aju' chaq'b'il ktzajeltoq q'onte nchwinqlale', ma chinx ti'ne' toj kamik,¹¹qu'n ate il ma tz'ajb'enju' chaq'b'il tu'n te sb'ub'l weye', ex tu'nxtzunju' chaq'b'il ẍin kyimiye'.

¹²Qu'mtzun ate kawb'il tib'xtib' xjante', ex ikxju' chaq'b'il xjan, tnik'alti'j ex b'a'n.¹³Se'ntzulotz, ¿ma aju' kawb'il b'a'n xiq'inweye' toj kamik? ¡Myanate'! Ate' ilju' kub' b'yonweye', qu'n aju' il ma tz'ajb'enju' b'a'n tu'n te sb'ub'l ex atzuntzu' sela' tnik'tzil tu'nelju' chaq'b'il qa mya'x b'a'nju' il.

¹⁴B'inate' qu'n qa atzu' tzajna' kawb'il tk'etz Dyos, ayintzunwe' ja'lo nchin kub' numje' tu'nju' tajb'il nchib'jile' ex lwiy nchin okye' te tmajen il.¹⁵Qu'n aju' nb'incha'ne' mixti'x nkane toj nwitze', qu'n aju' b'a'n wajb'ile' tu'n nb'inchanteye', minti' nb'ent wu'ne', atzunju' taq'wix minti' wajb'ile' tu'n nb'inchanteye' atzun nxi' nb'incha'njuye'.¹⁶Extzun tu'nju' a nxi' nb'incha'njuye' aju' mya wajb'ile', atzuntzu' nela' tnik'tzilju' kawb'il qa b'a'n.¹⁷Qu'mtzun myayinwe' nchinx b'inchante myab'a'n, ate' ilju' nb'inchante toju' nxmilale'.¹⁸Qu'n b'i'n we'wu'n b'a'nxi'x qa toju' nchib'jile' mixti'xju' b'a'n; qu'n maskye wajb'ile' tu'n nb'inchanteye' b'a'n, mixti'x nb'ent wu'ne'.¹⁹Mixti' nxi' nb'incha'ne' b'a'n aju' wajb'ile' tu'n nb'inchanteye', ape'tl nxi' nb'incha'njuye' aju' taq'wix.²⁰Qu'mtzun qa a nb'incha'njuye' aju' minti' wajb'ile' tu'n nb'inchanteye', myayinwe' nchin b'inchante, ate' ilju' ati woje nb'inchante.

²¹Inel nnik'e' ti'j, se'n qa wajb'ile' tu'n nb'inchanteye' b'a'n, atlju' myab'a'n nxi' nma'ne'.²²Qu'n inchin tzalaje' toj wanmiye' tiju' tkawb'il Dyos,²³extzun in nna'ne' juntl kawb'il toj nxmilale' inq'ojin ti'ju' nnab'le', atzun tkawb'il ilju' aj ati woje ex jpu'nqine' tu'n.

²⁴¡Qab'anxwe' nwitz! ¿Qu'n alkye kklol weye' teju' nxmilale' lu inchinx ti'ne' toj kamik?²⁵Naq o'kx Dyos aj nxi' nq'o'ne' chjonte te tu'nel Qajaw Jesukrist. Qu'mtzun in kane toj nwitze' qa ati tu'n toktilil wu'ne' toju' tkawb'il Dyos, naqtzun aju' nchib'jile' a tajb'ilju' tu'n tten tjaq' tkawb'il il. Aju' ak'a'j chwinqlal tu'n Xewb'aj Xjan

¹Qu'mtzun ja'lo mixti'tl tz'e'ysb'il witzb'aj kyeju' mujli kten tuk'i'l Jesukrist.²Qu'n aju' kawb'il te Xewb'aj Xjan ntzaj q'onte qchwinqlal toj tb'i Qajaw Jesukrist, inklonqe teju' tkawb'il il ex kamik.³Qu'n ate Dyos matxi' tb'incha aju' mixti' b'ent tu'nju' tkawb'il Moyses, qu'n aju' tajb'il qchib'jil nimxi'x tipumal kyetwitzju' kawb'il, Ate Dyos matzaj tchq'o'nju' tk'wal te chojb'il kyil xjal, qu'mtzun aju' tk'wal ok te xjal ex kub'ti'j il tu'n tej tjaw twitz krus.⁴Ma tb'inchate Dyos ja'lu tu'n qok tnik'alqi'j ex tu'n tjapunju' kawb'il qu'n, qu'n mixti' nqo' anq'intl se'nxju' tajb'il qchib'jil, naq o'kx se'nxju' tajb'il Xewb'aj Xjan.⁵Qu'n aye' xjal nche anq'in se'nxju' tajb'il kychib'jil, o'kxtzu' nche ximana' ti'j; aye'tzunju' nche anq'in se'nxju' tajb'il Xewb'aj Xjan, o'kxtzu' nche ximana' ti'ju' te Xewb'aj Xjan.⁶Aju' qa o'kxtzu' nqo' ximana' ti'ju' tajb'il qchib'jil in qo'x tiq'i'n toj kamik; atzunju' qa o'kx nqo' ximana' ti'ju' te Xewb'aj Xjan ntzaj tq'o'n qchwinqlal ex nak'b'il qe.⁷Aye'ju' nche xima'n ti'ju' tajb'il kychib'jil nche ok te ajq'oj ti'j Dyos, qu'n mya kyajb'il tu'n tjapunju' kawb'il kyu'n.⁸Qu'mtzun aye'ju' nche anq'in se'nxju' tajb'il kychib'jil mixti' ntzalaj Dyos kyi'j.

⁹Aye'tzunkye' mixti' nche anq'intlkye' se'nxju' tajb'il kychib'jile', naq o'kx se'nxju' tajb'il Xewb'aj Xjan, qu'n aju' Xewb'aj Xjan ati kyoje. Qatzun ati jun xjal mixti' Xewb'aj te Krist toj lay tz'ok te Krist.¹⁰Qatzun najli Krist toj kyanmiye', ex ikxju' Xewb'aj Xjan najli kyoje ex mache k'amliye' tu'n Dyos, maskyepe' aju' kxmilale' kkyimil tu'n tpaju' il.¹¹Qatzun najliju' Xewb'aj kxole' aju' jaw anq'in Jesus tu'n, axtzun kjawil anq'in kxmilaljuye' tu'n kxol kyimni naqx tu'nel T-xew Qman Dyos aj ati kxole'.

¹²Qu'mtzun e'ntzik ex e'witz'in, ati jun ti'xti' ilti'j tu'n qb'inchante, myate tu'n txi' qb'incha'n tajb'il qchib'jil.¹³Qu'n qa nche anq'ine' se'nxju' tajb'il kychib'jile' kche kyimile', qatzun mixti' xikq'o'ne' anb'il teju' tajb'il kychib'jile', oktzun che anq'iltze'.

¹⁴Qu'n kkyaqilju' ẍaqlu'nqe' tu'n Dyos, tk'wal Dyos qe'.¹⁵Aye'tzunkye' mixti' xkk'amkye' jun Xewb'aj Xjan tu'n kyok q'o'ne' tu'n te majen ex tu'n kxob'e', ma kk'amkye' Xewb'aj Xjan lu tu'n kyoke' te tk'wal Dyos ex tu'n txi' kma'ne' te: ¡Qman!¹⁶Ex axju' Xewb'aj Xjan lu in tmujb'a'n tib' tuk'ilju' qanmi tu'n tmante qa tk'wal Dyosqo'.¹⁷Tu'ntzunju' qa tk'wal Dyosqo', ati qoklen ti'ju' etzb'il aj oje tzaj ttziya'n Qman Dyos qe, aj kb'el qaq'pu'n tuk'i'l Qajaw Jesukrist qama tzik'x yajb'il qu'n junx tuk'i'l, ex qo' jawil nimantzuntz junx tuk'i'l. Aju' q'uqb'il qk'u'j

¹⁸Awe' nkub' nxima'n qa aju' yajb'il nik'x qu'n ja'lo, mixti'x tz'oka' teju' ninb'il tzultq'o'n Dyos qe.¹⁹Kkyaqilju' xjal te twitz tx'otx' inxi'x che ayon teju' kmuj tu'n kka'yinte alkyeqeju' tk'wal Dyos.²⁰Qu'n aju' tch'isb'en Dyos ok mixti'tl tajb'en, ex mya' tu'nxwit tib', qu'n axte Dyos ojetoq kub' nk'unte; ex aye'ju' tch'isb'en Dyos q'uqlix kk'u'j ti'j²¹tu'n kklet tu'n tjaq' tkawb'il il ex te kamik, ex tu'n tten kyuk'ilju' tk'wal Dyos toj tzaqpib'lkye.²²Qu'n b'i'n qu'n qa toju' tq'ijlalil ja'lo aju' tch'isb'en Dyos inxi'x ẍch'in ex nyajt nakuj jun qya xi'toq titz'ji tal.²³Ex mya o'qekxju' tch'isb'en Dyos nche yajt, ex ikxqe inqo' yajt tu'nju' matxi' qk'amju' Xewb'aj Xjan toj qanmi te tnejel ti'xti' kxolju' txqantl tzultq'o'n Dyos qe. Ex nqo' yajti b'a'nxi'x tu'nju' nqo' ayon tu'n qok te tk'wal Dyos, tu'ntzun tkletju' qxmilal te k'ixk'oj ex kamik.²⁴Qu'n naqx tu'nju' q'uqli qk'u'j matxi' qoklet. Qatzun aju' nqo' ayon ti'j inok qka'yintl, mya'tzun q'uqb'ab'l k'u'jb'ajtlte', qu'n ¿alkye jun nayon ti'ju' ojetoq tz'ok tka'yi'n?²⁵Qatzun aju' nqo' ayon te na'mxtoq tok qka'yi'n, inkub' qayo'nxi'tl maskye nqo' yajt tu'n tpaj.

²⁶Ex ikxte Xewb'aj Xjan inqo' toni'n qa xi'toq qkub'numj. Qu'n mixti' b'i'n qu'n se'n tu'n qna'na' Dyos, atzunte' Xewb'aj Xjan inkub'san qi'j twitz Dyos ex ntjyo'n tu'me'l se'n tu'n tyolina' qi'j.²⁷Ate Dyos nb'aj ka'yinte toj qanmi, ojtzqi'n tu'n titi' ntma'nju' Xewb'aj Xjan, qu'n ina' kub'sanju' Xewb'aj twitz kyi'ju' ttanam se'nxju' tajb'il Dyos. Inkub' ti'j tkyaqil qu'n naq tu'n Krist

²⁸B'i'nqe' qu'n qa ntb'incha'n Dyosju' b'a'n kye kkyaqilju' xjal nche k'u'jlante, aj oje e'txokli tu'n Dyos se'nxju' tb'is tk'u'j.²⁹Aye'ju' xjal ok che okslal te Dyos ojtzqi'nqe'tl tej ttzajlen qen twitz tx'otx' qa che okyel te tk'wal Dyos, tu'ntzun tokju' tk'wal te tzikb'aj kyeju' txqantl xjal.³⁰Aye'tzunju' e'jaw sk'o'n tu'n Dyos ojtxi', e'tzaj txko'n; ex aye'tzunju' e'ttxok mache oktq'o'n te tnik'alti'j; ex aye'tzunju' eb'jo'k q'o'n tnik'alkyi'j matxi' q'o'n kyoklen tu'n Dyos tu'n kten junx tuk'i'l toj tajwalil.

³¹¿Titi'tzuntl qma' ti'j tkyaqil ja'lu? ¡Qa ati Dyos quk'i'l, alxi'xkye kb'entil tkub' qi'j tu'n!³²Qu'n ate Dyos minti' kub' t-xk'a'yinju' tk'wal, matzaj tq'o'n tu'n tkyim te chojb'il kyil kkyaqil xjal, ¿Se'n taq'witzun qa lay tzaj tq'o'n tkyaqilju' ti'xti' qe junx tuk'ilju' tk'wal?³³¿Alxi'xkye jun k'okyelten poqolkyeju' oje che jaw sk'o'n tu'n Dyos? Ate Dyos nok q'onkye te tnik'alkyi'j.³⁴¿Alxi'xkye jun kb'el tz'e'ysante qwitz? Mix-a'lo' qu'n aku'te Qajaw Jesukrist kyim; expe' jaw anq'in kxol kyimni ex ati ja'lo toj tb'a'nq'ob' Dyos, ex aku'te nkub'san twitz Dyos qi'j.³⁵¿Alxixkye k'elil pa'nqe ti'ju' tk'u'jlalil Jesukrist? ¿Ma aloju' yab'il, aju' yajte'n, aju' b'is, aju' we'yaj, aju' qa mixti' kxb'alun, aju' xob'ajil mujqa aju' xob'ajil tu'n tpaj qa xqo kub' b'yo'n?³⁶Se'nju' ntma'n toj Tu'jil kjalu: Naqx tu'n tpaja neljiya qi'je' tu'n qkyime' tkyaqil q'ij; ik nqo' ok q'o'na'ye' se'nqeju' rit nche'x iq'i'n toj b'yob'lkye.

³⁷Ex maskye ikju' naq tu'nel Qajaw Jesukrist nqo kanb'ana' toj tkyaqil.³⁸Qu'mtzun q'uqlixi'x nk'u'je' qa mixti'x jun ti'xti' k'elil pa'nqe' ti'ju' tk'u'jlalil Dyos: Lay b'ent tu'n kamik, tu'nju' chwinqlal, kyu'nju' anjl, kyu'nju' tajaw taq'wixilju' ati kyipumal ex min q'ancha'lqe', ex lay b'ent kyu'nju' ate' ja'lo, exqe'ju' che ul yajxi'tl,³⁹ex lay b'ent kyu'nju' ti'xti' tqe' tzmax jawni, ex tzmax kub'nix ex lay b'ent tu'n jun ti'xti' tb'inchb'aj Dyos. ¡Mix-a'lox jun ti'xti' k'elil pa'nqe' ti'j tk'u'jlalil matxi' tzaj tyek'u'n Dyos qe naqx tu'nel Qajaw Jesukrist! Ejaw sk'o'n Israel tu'n Dyos

¹Aju' in nma'ne' axte' qu'n okslalqine' te Qajaw Jesukrist, mixti' njaw nchane'. Qu'n aju' Xewb'aj Xjan inq'mante toj wanmiye' qa axju' nma'ne':²q'achq'al nch'yon wanmiye' ex nim nb'ise' intzaj,³expe' jaku' waq'we' wib' tu'n tkub' tz'e'ysa'n nwitz ex tu'n wel pa'n tij Jesukrist, naqwit jaku' b'ent kykletju' nwnaqile' jun xnyajile' kyuk'i'l.⁴Qu'n aj Israelqe' ex mache jaw sk'o'n tu'n kyok te tk'wal Dyos. Aku' Dyos ten kxol tuk'i'l t-spik'umal, b'aj kyej b'entti'j tyol Dyos kyuk'i'l, xitq'o'nju' tkawb'il Moyses kye, xiq'ma'n kye se'n tu'n kb'ichante toj k'u'lb'il ex b'ajx tziya'n txqan ti'xti' kye.⁵K'walb'ajqe' kyeju' ojtxi' qyajilb'en; ex kyi'j tzaja' tyajajil Jesukrist tej tok te xjal, aju' Dyos tib'aj tkyaqil, nimanxwitju' tb'i kukxju'. Ikxwitju'.

⁶Ex mixti' nxi' nma'ne' qa mixti'wt xjapunju' tzajni ttziya'n Dyos kye aj Israel; ate' tu'n tpaj mya kkyaqilju' kyajilb'en ẍe'ok te aj Israel.⁷Ex mya kkyaqilju' tyajilb'en Ab'raam ẍe'ok te tk'wal, qu'n ate Dyos q'mante te Ab'raam kjalu: O'qekxju' tk'wal Isaak che okyel te tyajila.⁸A ntma'nju' qa lay qo ok te tk'wal Dyos naqx tu'n qa tzajni qyajil ti'j Ab'raam; o'kxqekye' che okyelju' te tk'wal Dyos ayeju' njapun tzajni ttziya'n Dyos kyu'n.⁹Qu'n aja'lu tzaj ttziya'n Dyos te Ab'raam: Chin ule' toj jun ab'q'itl ex ajtzun wule' ma'toq tz'itz'ji tal Sara chi Dyos te Ab'raam.

¹⁰Expe' mya o'kx ja'lu. Qu'n aye'ju' kab'e' tal Reb'eka yuẍqe' tk'walju' qyajilb'en Isaak,¹¹tej na'mxtoq kyitz'ji, expe' na'mxtoq t-xikyb'incha'n b'a'n mujqa taq'wix tzajtma'n Dyos te Reb'eka: Aju' tzikb'aj k'okyel te tmajen itz'inb'aj, chij. Ex ikx intma'nju' Tu'jil kjalu: Nk'u'jlaye' Jakob' ex el wik'u'ne' Esawu, chij. Tu'ntzun ja'lu ntyek'u'na' Dyos qa ate njaw sk'onkye'ju' xjal se'nxju' tajb'il, myate' tu'nju' kb'inchb'en.

¹⁴¿Ma oktzun kxe'l qma'n qa mya tnik'alti'j Dyos tu'n ja'lu? ¡Mikxa'te'!¹⁵Qu'n tmate Dyos te Moyses: Qa wajb'ile' tu'n ttzaj q'aq'an nk'u'je' ti'j jun xjal ok ktzajel q'aq'an, exqa wajb'ile' tu'n ttzaj laqj nk'u'je' ti'j jun xjal ok kxe'l nb'incha'ne'.¹⁶Qu'mtzun minti' njaw sk'o'nte xjal tu'n Dyos tu'nju' tajb'il mujqa tu'nju' in tipumali'n tib', naq o'kx tu'nju' ntzaj q'aq'an tk'u'j Dyos ti'j.¹⁷Qu'n xitma'n Dyos teju' nimaqkawil toj Ejipt toju' Tu'jil kjalu: Matz'ok nq'o'na te nimaqkawil naqx tu'n txi' nyek'une' wipumale' teya tu'nju' knb'incha'ye' tuk'ila ex tu'n wok ojtzqi'ne' kyu'n xjal te tkyaqil twitz tx'otx'.¹⁸Qu'mtzun ate Dyos ntzaj q'aq'an tk'u'j ti'j alkyexku' xjal, ex ikx inkub' tch'uẍsa'n tanmiju' alkyexku' xjal.

¹⁹Ex ktzajel tma'na weye': Qanatzun ikju' se'n ntma'na, ¿titiquntzun intma'na Dyos qa aju' ichan ti'j tpaj extzunqa mix-a'lo' kmyolteju' tajb'il?²⁰Yajtzunta ichan ¿titi'ta toklen tu'n toktena xjelul te Dyos? ¿Ma jaku'tzulo txi' tma'nju' tx'otx' k'wil teju' xkub' b'inchante: Titiqu'n ẍin kub'a' tb'incha'na kjalu chiwt?²¹Qu'mtzun aju' b'inchal k'wil ati toklen tu'n tb'inchante xoq'l se'nxku' tajb'il, ex tu'nxju' xoq'l jaku' b'enta jun k'wil tu'n xa'wanku' mujqa jun k'wil se'nxju' txqantl.

²²Tajb'ilte Dyos tu'n tq'o'nte techlal ti'ju' tipumal ex tu'n tyek'u'nte tz'e'ysb'il witzb'aj, extzun minti' tb'incha, qu'n atixi'x tpasensi kyi'ju' xjal atitoq tu'n kxi' toj tz'e'ysb'il witzb'aj.²³Ik'x kyilju' xjal tu'n Dyos naqx tu'n tyek'u'nte tajwalil tb'anilxi'x qe, qu'n matzaj q'aq'an tk'u'j qi'j ex matxi' qo jaw t-sk'o'n tu'n qten junx tuk'i'l.²⁴Qu'mtzun matxi' qo txokl tu'n Dyos, ate' junjun kxol aj Juda ex junjuntl mya aj Judaqe'.²⁵Iku' se'n ntma'n toju' u'j kyej ttz'ib'a'n Osey kjalu: Aye'ju' xjal myataq ntanamqe'ye', ok che okyel nq'o'ne' te ntaname'; ex aye'ju' myataq k'u'jlanqe' wu'ne', kche ntxka'ye' ex che nk'u'jlaye'.²⁶Ex axtzu' toju' najb'il ja xa'ya' qma'n kye: Ayekye' mya ntanamqe'ye' atzun ja'lo ok che okyel q'o'n te tk'wal Dyos aj itz', chiju' u'j te Osey.

²⁷Atzunte Isayiy yolin kyi'ju' aj Israel kjalu: Maskye txqan kb'etju' aj Israel ikse'n tz'awun ttzi ninnjab', naq jte'te' che kletel,²⁸qu'n ate Qman Dyos kjapumelte' tyol toj tkyaqil twitz tx'otx'.²⁹Ik se'nxtlju' tma Isayiy nejku': Naqwit mixti' kyej klo'nju' qyajajil tu'n Dyos nimtipumal, matxiwtlo qob'aj se'nkye te Sodom ex komor.

³⁰¿Titi'tzun kqma' tu'n ja'lu? Qa aye'ju' xjal mixti' nche ximan tu'n kyok te tnik'alti'j, matxi' che ok te tnik'alti'j tu'n Dyos naqx tu'nju' kyokslab'l.³¹Aye'tzunju' aj Israel lepchqe'ktaq ti'ju' jun kawb'il tu'n kyok te tnik'alkyi'j, layx b'ent kklet tu'n Dyos.³²¿Tiquntzun? Qu'n aju' toj knab'l qa atzu' che kletela' tu'n Dyos tu'nju' kb'inchb'aj, mya tu'nju' kyokslab'l. Qu'mtzun ẍe' jawa' tz'aq tiju' ab'j te trakpuje'n³³aju' intma'n toj Tu'jil kjalu: Kb'el nq'o'ne' jun ab'j toju' tnam Syon, jun ab'j tu'n kjaw trakpuj xjal ti'j; alkyetzunte matz'ok qe tk'u'j ti'j laytzun kub' ch'ixwitzu'. Aju' b'a'n tpakb'al exqe'ju' aj Israel

¹Ayeqeye' witz'in ex ntzik, axxi'x wajb'ilju'ye' toj wanmiye' ex nxi' nqanine' toj nna'j Dyose' tu'n kkletju' aj Israel.²Qu'n matxi' tz'el nnik'e' kye qa kyajb'il tu'n kyajb'en te Dyos; naq aju' mixti' nkane' toj kwitz.³Qu'n minti' nelkynik' se'n tu'n qoka' tnik'alqi'j tu'n Dyos, noqx noktilil kyu'n kyib'xkyib' tu'n kyok te tnik'alti'j; ex mixti' nkyaq' kyib' tu'n kb'inchante tajb'il Dyos.⁴Qu'n aju' tkawb'il Moyses atzu' njapun b'aja' tej tul Krist, ex o'kx che k'metela' xjal tu'n Dyos qa nche okslan te Krist.

⁵Qu'n kyej ttz'ib'a'n Moyses toju' Tu'jil se'n tu'n kk'amliya xjal tu'n Dyos kjalu: Aju' xjal qama japunju' kawb'il tu'n ok k'anq'il tu'nxju' kawb'il.⁶Atzun ti'ju' tu'me'l tu'n qk'met tu'n Dyos naq tu'n kyokslab'l intma'n kjalu: Lalun kub' t-ximana: ¿Alkye jun kjawix toj kya'j? —tu'ntzun tku'tz Qajaw Jesukrist—;⁷mujqa ¿Alkye jun kb'elix toju' knajb'il kyimni?— tu'n tjatz anq'inju' Jesukrist tu'n kxol kyimni.⁸¿Titi'tzunju' ntma'n?: Aju' tyol Dyos nqaku' ta' tk'etza, toj ttziya ex toj tanmiya. Atzunju' yol lu aj nxi' qpakb'a'n nyolin ti'j okslab'l.⁹Qama tchik'b'aya tu'nku' ttziya qa a Jesukrist Qajaw, exqa ma tokslaya toj tanmiya qa tu'n Dyos jatza' anq'in kxol kyimni, kkleteltzuntziya.¹⁰Qu'n qama qoksla tu'n tkyaqil qanmi qo k'amleltzuntz tu'n Dyos exqa ma qchik'b'a tu'n qtzi qa a Jesus Qajaw qo kleteltzuntz.

¹¹Qu'n intma'n toj Tu'jil tyol Dyos kjalu: Lay che kub' ch'ixwiju' matz'ok qe kk'u'j ti'j.¹²Junelniqe' xjal toj twitz Dyos, b'a'ntzun qa aj Juda mujqa mya; qu'n axte Dyosju' kye kykyaqil xjal ex intzaj tq'o'n k'i'wb'il nimxi'x kyeju' nche kub'san twitz.¹³Qu'n aja'lu aj in ntma'n: Kkyaqilju' nche kub'san te Dyos, kb'elti'ju' kolb'il kyu'n.¹⁴¿Se'n taq'witzun tu'n kkub'san twitz extzunqa na'mx kyokslan te? ¿Ex se'n che okslala' te extzunqa na'm kb'inteju' tyol? ¿Ex se'n taq'wi tu'n kb'inte tyol Dyos qa mix-a'lox jun nxi' pakb'ante kye?¹⁵¿Ex se'n taq'wi tu'n txi' kpakb'a'n tyol Dyos kye qa mya chq'o'nqe'? Iku' se'n intma'nju' Tu'jil: ¡Majx tb'alnilxi'x kyulenju' xjal nche tzaj q'inte b'a'n tpakb'al!

¹⁶Naqtzun aju' mya kkyaqil nxi' kb'i'nju' tpakb'al b'a'n. Ikse'n intma'n Isayiy kjalu: Taye, ¿alxi'xkye sokslan tu'nju' qpakb'ab'le'?¹⁷Iktzu'n, tu'nju' pakb'ab'l in qb'i'n nqo okslana', ex atzunju' pakb'ab'l in qb'i'n aju' tyol Krist.

¹⁸Atzun nchiwe': ¿Ma na'mxtzunlo kb'inteju' pakb'ab'l lu? ¡Matxina' kb'ikye'! Qu'n ina' tma'nju' Tu'jil kjalu: Aju' tq'ojq'ojel kwi'ju' pakb'al matxi' b'injtz toj tkyaqil twitz tx'otx', ex matxi' che ponju' kyol tzmax ttxa'nxi' tx'otx'.

¹⁹Ex nxi' nma'n jumajtle': ¿Ma na'mxtzunlo telkynik'ju' aj Israel ti'j? Matxi' kanete' toj kwitz, qu'n tnejelxi'x intma'nju' kyejni ttz'ib'a'n Moyses toj Tu'jil kjalu: Knb'incha'ye' kyi'j aj Israel tu'n kjaw xky'aqlan ti'j jun tnam nakuj mya tnam toj kwitz; knb'incha'ye' tu'n ttzaj ktx'u'jil ti'j jun tnam mixti'x nkyaj tu'n tkane toj kwitz.

²⁰Yajxitzuntel tmate Isayiy kjalu: Aye'ju' mixti'toq nche' jyon wi'je', matxi' chin elyale' kyu'n; ex matxi' nyek'un wib'e' kyeju' mixti'toq nche' qanlaqj wi'je'.

²¹Atzunju' tz'ib'a'n tu'n Isayiy toj Tu'jil kyi'j aj Israel intma'n kjalu: Tkyaqil q'ij nchin txokone' te jun tnam min nokslan ex pi's, chiju' tz'ib'a'n tu'n Isayiy. Alkyeqeju' che kletel kxol aj Israel

¹Ja'lo inchin xjelune' ti'j ja'lu: ¿Ma matxitzunlo tz'el tik'un Dyosju' ttanam? ¡Mixti' sel tik'unte'! Qu'n aj Israel qinawe', tyajajil Ab'raam kxolju' tnej tyajajil B'enjamin.²Atxi'x tnejel kjawlen sk'o'n aj Israel tu'n Dyos te ttanam; ex na'mx kyel ik'u'n tu'n ja'lo. ¿Ma mixti'tzun b'i'n kyu'ne' ntma'n toj Tu'jil, nyolin ti'j Eliy t-sanjelal Dyos qa okten poqolkye aj Israel toj tna'j Dyos? Ex tma:³Taye aye'ju' aj Israel matxi' che kub' kb'yo'nju' t-sanjelala ex matxi' che kub' kxitinju' q'olb'eb'l; naqx o'qinkxtle' matxi' chin kyejten, ex ikx kyajb'il tu'n nkub' kb'yo'ne'.⁴Atzunte Dyos tzaj ttzaq'we'n te ex tma: Ate' wuqlajk'al lajnaq ichan matxi' tz'el npa'ne' na'm kkub' meje twitzju' witzleb' B'aal.⁵Ikxtzun nb'aju' ja'lo, matxi' che jaw t-sk'o'n Dyos jte'tl aj Israel naqx tu'n t-xtalb'il.⁶Qatzun tu'n t-xtalb'il Dyos ẍe jaw sk'o'na' myate' tu'n ma'wit kb'incha jun ti'xti'; naqwit ikju', aju' t-xtalb'il Dyos mya'xwitlo b'a'n.

⁷¿Se'ntzun tten ja'lu? Ma minti' knetju' in kjyo'n aj Israel, aye'tzunju' e'jaw sk'o'n tu'n Dyos knet kyu'n. Ex aye'tzunju' txqantl kub' kych'uẍsa'nju' kyanmi,⁸iku' se'n ntma'nju' Tu'jil kjalu: Axte Dyos kub' jpunte knab'l tu'n lalun tz'ok toj kwi', tu'n lalun kyil tu'n kwitz ex tu'n lalun kb'i tu'n kẍkyin ex ikxtzun ktenju' ja'lo.⁹Ex ikx ntma'n Dab'i kjalu: Che jawxwit miltz'uju' nimaqwan nche kub' kq'o'n te jun xpatxab' kye ex te tzyub'lkye, tu'ntzun kjaw trakpuj ti'j, ex tu'n tkub' tz'e'ysa'n kwitz tu'n tpaj.¹⁰Che kyajxwit moẍix tu'n lalun che ka'yin; kyejxwit pukyeju' ttze'lkyi'j kukxju'. Aju' kolb'il kyeju' mya aj Judaqe'

¹¹Atzunwe' nxjelu'n: ¿Ma majxtzulo e'kub' tz'aqju' aj Israel jumajx tej kjaw trakpuj? ¡Mikxa'te'! Ape'te' tu'nju' e'kub' tz'aqju' aj Juda, matzaj q'o'nju' kolb'ilkye txqantl xjal mya aj Judaqe' tu'ntzun kjaw xky'aqlanju' aj Israel tu'n tpaj.¹²Atzun ja'lo, qa tu'nju' ẍe kub' tz'aqju' aj Juda matz'ajb'en tu'n ttzaj q'o'nju' xtalb'il kye mya aj Juda, mitzunloyate' qama tz'anjtzti'j kyanmi kkyaqilju' aj Juda, nimxi'xloju' xtalb'il tzul q'o'n kye kkyaqil xjal.

¹³Ex ati jun nyole' wajb'ile' tu'n txi' nma'n kyeye' aye'ye' mya aj Judaqeye'. Ate Dyos saj chq'onweye' ex saj q'onte woklene' tu'n ntene' kxol txqantl xjal mya aj Judaqe', ex inxi'x chin laqje' ti'ju' woklene' lu saj q'o'n tu'n Dyos.¹⁴Wajb'ile' tu'n kjaw xky'aqlanju' nxjalile' kyi'je', tu'ntzun kklet junjun kxol.¹⁵Qu'n qa ate Dyos tej kyeltik'unju' aj Juda etk'amju' txqantl xjal mya aj Judaqe' tu'n kmujb'ante kyib' tuk'i'l, ¿Titi'tzunlo tzultq'o'n Dyos qama tz'anjtzti'j kyanmi jumajtl aj Juda? ¡Junlo anq'ib'l kyeju' kyimnqe' ja'lo!¹⁶Qu'n qa xjansa'n tnejel wab'j nxi' q'et te Dyos, ex ikx tkyaqilju' tq'otjil xjansa'nte', exqa xjansa'nju' tlok' tze ex ikxju' tq'ob' xjansa'n.

¹⁷Aye'tzun junjun aj Juda mache el tx'emu'n kse'n tq'ob' tze olib'o, ex mache okptxo'ne' tekyxelju' tq'ob' lu ti'ju' t-xmilal tze, aye'ye' ikqejuye' kse'n Olib'o toj k'ul. Iktzu'n saja' q'o'n toklena tib'aju' tlok' tze ex ti'ju' t-xmilal.¹⁸Ex lalun kmaye' qa aye'qeye' nimxi'x kyoklene' kyekwitzju' tq'ob' olib'o elni tx'e'mu'n, extzunlo qama kb'inchaye', kyna'ku'ye' qa aju' tlok' tze nk'a'chankyeye' ex myayeqeye' nche k'a'chanteju' tlok' tze.

¹⁹Qajpelo jaku' kmaye': Iknatzunlo', extzun mache el tx'e'munju' tq'ob' juntl tze tu'n tok ptxo'n ti'ju' olib'o.²⁰Axte' se'nju' nkma'ne', ma'natzun che el tx'emu'n tu'n tpaj mixti'ju' kyokslab'l, atzunta matz'ok ptxo'na tu'nju' ati tokslab'la. Qu'mtzun lalun jawtnima'ntib'a naq o'kx xob'a twitz Qman Dyos.²¹Qu'n qa mixti' xkub'najsa'n kyilju' tq'ob'ku' olib'o tu'n Dyos, ex ikxta lay kub'najsa'nta til tu'n.²²Tz'elx tnik'a ti'j qa b'a'nxi'xte' Dyos exqa kuwte' ikx. Matzaj ttx'u'jil kyi'ju' ẍekub' tz'aq ex nyolin tuk'i'l tk'u'jlalil kyeye'. Qu'mtzun ati tu'n tanq'ina se'nxju' tajb'il Qman Dyos; qatzun minti' ax junta k'elil tx'emu'n tu'n.²³Exqa matz'anjtzti'j kyanmi jumajtlu' aj Juda, che okyel ptxo'n jumajtl tu'n Dyos, qu'n ate Dyos ati tipumal tu'n tb'inchante.²⁴Qu'n aye'penakye' toj k'ul olib'oqeye' nejku', mache el tx'emune' ex mache ok ptxo'ne' ti'ju' jun olib'o tb'anilxi'x, ¡mitzunlo yakye' aj Juda, xi' ẍe' ela' ti'ju' b'a'n olib'o, che okyel ptxo'n jumajtl ti'jxju' olib'o ja e'eltx'emuna'! Che kletel jumajtl aj Israel tu'n Dyos

²⁵Wajb'ile' tu'n telkynik'e' ti'ju' tb'is tk'u'j Dyos b'entniti'j tu'n ojtxi' e'ntzik ex witz'in, tu'ntzun lalun kmaye' qa atixi'x knab'le': ayekye' aj Israel makub' kych'uẍsa'nju' kyanmi, ex naq o'kx aj kyokslan txqantl xjal mya aj Israelqe'.²⁶Ajtzun tb'aj tkyaqil ja'lu, kkyaqilju' aj Israel che kletel, iku' se'n tz'ib'a'n toju' Tu'jil kjalu: Xi' tzula'ju' kolil toj Syon ex ate k'elel q'inte myab'a'n kxolju' tyajajil Jakob'.²⁷Ex atzun yol ja'lu kjel b'entti'j wu'ne' kyuk'i'l naqa sel wi'ne' kyil.

²⁸Mache okju' aj Israel ajq'oj ti'j Dyos tu'ntpaj min xikyoksla'n tpakb'al b'a'n ex tu'ntzunju' saja' q'o'n anb'il kyeye'; atzunte Dyos inx che tk'u'jla'n aj Israel, e'jaw t-sk'o'n ojtxi' kyajilb'en.²⁹Qu'n lay tz'el tiq'i'nte Dyos xtalb'il oje tzaj tq'o'n kye ex lay tch'exb'eju' tyol Dyos te txokb'il.³⁰Iku' se'nkye' ojtxi' mixtoqti' nche okslane' te Dyos, tu'ntzun ja'lo mixti' ẍeniman aj Israel te Dyos, qu'mtzun saja' q'aq'an tk'u'j Dyos kyi'je'.³¹Ex ikxtzunkye aj Israel ja'lo mixti' nche niman te Dyos, naqx tu'n ttzaj q'aq'an tk'u'j Dyos kyi'je' ex ikxtzun tjax chix tzul q'aq'an tk'u'j jumajtl Dyos kyi'j.³²Qu'n axte xitzaqpinkye kkyaqilju' aj Israel toju' kpi'sal, naqxwit tu'n ttzaj laqj tk'u'j kyi'j xjal kkyaqil.

³³¡Nimxi'xte Dyos tq'inumal, tnab'l ex tojtzqib'l! Mix-a'lox jun kb'entil tchik'b'anteju' t-xim, ex mix-a'lox jun kkaneb'ilju' tb'e toj twitz.³⁴Qu'n ¿alxi'xkye jun ojtzqilte tnab'l Qman Dyos? ¿Alkye jun kb'antel tq'onte tnab'l Dyos?³⁵¿Alkye jun xiq'onte jun ti'xti' tnejelxi'x te Dyos tu'ntzun tzaj anjsa'ntlti'j te?³⁶Mix-a'lox jun qu'n tete' Dyos tkyaqilju' ti'xti', tu'nte Dyos b'enta' ex ate tajaw tkyaqilju' ti'xti'. ¡Nimanxwitju' tb'i Dyos kukxju'! Ikxwitju'. Ak'a'j chwinqlal tuk'i'l Dyos

¹Nchin kub'sane' kyeye' witz'in ex ntzik tu'n txi' kq'o'ne' kxmilale' te Dyos iku' se'n jun oyaj itz', xjan ex b'a'n toj twitz Dyos. Atzunte k'u'lb'ilju' lu axxi'x tu'n txi' kq'o'ne' te Dyos qama kb'inchajuye' tajb'il Qman Dyos.²Lalun che anq'intle' se'n nche anq'ina xjal toju' tq'ijlalil ja'lo; ape' kb'inchamjuye' kych'exb'eme' che ximane' tu'ntzun tchukjiju' tu'me'l kychwinqlale' ex tu'n telkynik'e' ti'ju' tajb'il Dyos, tz'elx knik'e' ti'ju' b'a'n, ti'ju' ntzalaj Dyos ti'j ex ti'ju' tz'aqlixi'x.

³Noq tu'nju' woklene' saj q'o'n tu'n t-xtalb'il Dyos, qu'mtzun kxe'l nma'n kyeye' kkyaqile' tu'n lalun kub' kximane' qa nimxi'x kyoklene'. Naq o'kx che ximanaye' ti'ju' kb'entil kyu'ne' se'nxju' oklenj matxi' tzaj q'o'n kyeye' tu'n Dyos tuk'ilju' okslab'l tzajni tq'o'n Dyos.⁴Qu'n iku' se'nju' qxmilal myanaq junx tten, b'a'npunju' tmuj iqa'ntib', ex mya kkyaqilju' tmuj iqankyib' junx kyajb'en.⁵Ikxtzun qtenju', maskye txqan qb'aj naqjunx qxmilal tuk'i'l Jesukrist ex mujlqo'k junjun te juntl se'nju' qxmilal kyuk'ilju' tmuj iqa'ntib'.

⁶Ate Dyos matxi' tzaj tq'o'n b'a'npun qoklen teyile junjun se'nxju' tajb'il. Qu'mtzun qa matxi' tzaj tq'o'n Dyos qoklen te pakb'al, ati tu'n qpakb'ante tyol se'nxju' qokslab'l ti'j;⁷qatzun matzaj tq'o'nju' qoklen tu'n qajb'en kye txqantl, qb'inchanx b'a'nxi'x. Ex alkyete matzaj q'o'n toklen tu'n t-xnaq'tzan, ati tu'n tq'onteju' xnaq'tzb'il kye xjal;⁸alkyete matzaj q'o'n toklen tu'n tokten q'uqb'alte kk'u'j txqantl xjal, ati tu'n tb'inchante. Alkyete tzaj q'o'n toklen tu'n toyin kye xjal, q'onx tu'n tkyaqil tk'u'j; alkyetzunte matzaj q'o'n toklen te nejenel, b'inchamju' taq'un tojxi'x tu'me'l; ex alkye matzaj q'o'n toklen tu'n tonin kyi'ju' xjal ati nojqelan toj kychwinqlal, b'incham tuk'i'l tkyaqil tzalajb'il. Aju' ati tu'n kb'inchante okslal

⁹Kk'u'jlam kyib'e' axxi'x junjun tuk'i'l juntl. Kyik'imilju'ye' myab'a'n ex che lpekye' ti'ju' b'a'n.¹⁰Kk'u'jlam kyib'e' kxolilexe' qu'n kyitz'ina kyib'e' ex kyokslam kyib'e' ex kyonim kyib'e' kxolilexe'.

¹¹Kq'onk tilile', lalun che k'ejb'iye' ex che ajb'ene' te Qajaw tu'n tkyaqil kk'u'je'.

¹²Che tzalajxe' tu'n q'uqli kk'u'je' ti'j Qajaw; tzik'xju' yajb'il kyu'ne'; ex lalun che qene' tu'n kna'n Dyose'.

¹³Che onine' kyi'ju' okslal ati nojqelan kye; ex che kk'mome' xjal nche pon xb'et-salkyeye'.

¹⁴Kqaninxe' k'i'wb'il te Dyos kyib'aju' ljo'n toj kq'ije' kyu'n. Kqaninxe' k'i'wb'il kyib'aj ex lalun che txkon ile' kyib'aj.

¹⁵Che tzalajxe' kyuk'ilju' nche tzalaj ex che oq'e' kyuk'ilju' nche oq'.

¹⁶Che tenkuye' toj mujb'ab'ltib'il kxolilexe'. Lalun jaw knima'n kyib'e', kq'onk kyib'e' junx kyuk'ilju' xjal me'sqe'. Lalun nok kq'o'n kyib'e' qa tixi'x knab'le'.

¹⁷Qama tz'ok b'incha'n myab'a'n kyeye' lalun tz'ok kq'o'ne' t-xel ikxju'. Kq'onk tilile' tu'n kb'inchanteye' b'a'n kwitz kkyaqil xjal.¹⁸Tz'okx tilil kyu'ne' tu'n kyanq'ine' toj nak'b'il kyuk'i'l kkyaqil xjal.¹⁹Lalun tz'ok kq'o'ne' t-xel myab'a'n te juntl ayeye' witz'in ex ntzik, kq'onkjkye' toj tq'ob' Dyos qu'n ate ati toklen tu'n tkub' tz'e'ysante kwitzju' xjal; qu'n iku' ntma'n toju' Tu'jil: Ayinwe' ati woklen tu'n ntz'e'ysante kwitz xjal; ex ayinwe' chin okyel q'onte tu'me'l t-xel kye.²⁰Ex ikx: Qa in we'yajtiju' ajq'oj ti'ja, q'onxa twa; exqa nk'wajti, q'onxa tk'wa'; extzun qama tb'inchaya ikju' majx kb'el kyeqaxju' tajq'oja tu'n tch'ixaw.²¹Qu'mtzun lalun taja tu'n tkub' ti'ja tu'nju' taq'wixil. Ape' b'inchamjuya b'a'n tu'ntzun tkub'ti'ju' taq'wix tu'na.

¹Ilti'j tu'n knimane' kyeju' ati kyoklen toj tkawb'ilju' nimaqkawil. Qu'n mixti'xte' jun kawb'il myawit tu'n Dyos, ex ate Dyos xkyej q'onkyeju' kawb'il ate'qe'tl.²Qu'mtzun qa ati jun xjal min nche'x tnima'n tzyul kawb'il, min nche'x tnima'n kawb'il b'ajkyej tnk'u'n Dyos. Ex alkyeqeju' mixti' nxi' tnima'n ok kb'el tz'e'ysa'n twitz;³qu'n aye'ju' nche kawin mya kyaq'inju' tu'n kyokten xob'salkyeju' nche b'inchante b'a'n, naq o'kx nche xob'sana' kyeju' nche b'inchan taq'wixil. ¿Ma tajb'ila tu'n lalun tzaj xob'sa'na kyu'nju' kawil? Qanatzun ikju' b'inchanxa b'a'n ex aye'tzunju' kawil che yolil kyi'je' qa b'a'nqeye',⁴qu'n ayekye' kawil nche ajb'en te Dyos ex tu'n kyajb'en kyeye'. Qatzun makb'inchaye' taq'wixil, atitzulo tu'n kxob'tziye' kwitz; qu'n mya noqkx gan kyoklenju' kawil xini q'o'n tu'n ttz'e'yset kwitz xjal, qu'n ajb'elqe' te Dyos.⁵Qu'mtzun ilxi'xti'j tu'n qniman kyeju' kawil, myanaq o'kx tu'n lalun kub' tz'e'ysa'n qwitz, qu'n ana' ilti'j tu'n qb'inchanteju' b'a'n.⁶Ex ilxi'xti'j tu'n qchjonte chojb'il teju' kawil; qu'n ina' che ajb'enju' kawil te Dyos ex inkyb'incha'nju' nk'u'n ti'j tu'n Dyos.

⁷Qu'mtzun kychjonxe' teyile junjun aju' ati tu'n kychjonteye'. Qa ati jun unb'ab'l tu'n kq'onteye' kychjonxe', mujqa aju' chojb'il kye kawil ex kychjonxe', ex tenx kychiylalju' nche kawin kyeye' ex che nimanqeye' kye.⁸Lalun ten kk'ase' te juntel. O'kxte' kk'asjuye' tu'n tten aju' tu'n kk'u'jlante kyib'e'; qu'n alkye jun xjal intk'u'jla'n twnaqil matxi' japun kawb'il tu'n.⁹Aye'kye' chaq'b'il nkyma'n kjalu: Lalun tb'inchaya ajpajil, lalun b'yon wnaqa, lalun tz'alq'ana, lalun pon tk'u'ja ti'j juntl ti'xti'; kkyaqilju' chaq'b'il lu nche ok toju' yol lu: K'u'jlama twnaqila iku' se'nx ntk'u'jla'n tib'a tib'xtib'a.¹⁰Qa nche kk'u'jlane' kwnaqile' mixti'tzun nok kb'incha'ntze' taq'wix kye; qu'mtzun toju' tk'u'jlalil njapunaju' kawb'il.

¹¹Tz'elx knik'e' ti'j se'n tu'n qnajana' toju' tq'ijlalil ja'lo, ex kanex toj knab'le' qa matxi' pon kanun kmuj tu'n telju' qwatl. Qu'n matxi' tzul lq'eju' kolb'il qk'etz se'n tnejel tej qb'inte tyol Dyos.¹²Ch'inxtl qsqix ex ch'inxtl tjawil q'ij; qu'mtzun lalun che'x qb'incha'n txqantl ti'xti' toj qxopin ex qoksankju' spik'un qi'j te kolb'il se'nte jun xjal te q'oj najb'en tkolb'il.¹³Qob'et toj tu'me'lxi'x, kse'n nqo b'et q'ijtl. Lalun qo'qe' b'etl kyoj nimaqwan ex tx'ujte'n, lalun qob'et toj ajpaji'n, lalun qoq'man xlab'yol ex lalun tx'a'lti'j qk'u'j ti'j juntel.¹⁴Ape' kyb'inchamjuye': Kyoksankye' Jesukrist kyi'je' te kolb'ilkyeye' ex lalun txi' kq'o'ne' anb'il teju' kychib'jile' tu'n tb'inchante taq'wixil. Lalun yolina' ti'j titz'ina mujqa ttzika

¹Lalun che jaw wulje' ti'j jun kyitz'ine' mo ktzikye' qa in numj toj tokslab'l.²Iku' se'n, ati junjun xjal inkub' t-xima'n qa b'a'n tu'n twante tkyaqil ti'xti', atzun junjuntl mya'xix kuwqe' toj kyokslab'l naq itzaj nxi' kyitzji'n.³Qu'mtzun alkye xjal nxi' twan ti'xti' tkyaqil mixti' tu'n tel tik'unju' mixti' nxi' twan; ex alkyetzunju' mixti' nxi' twan tkyaqil ti'xti' ex mixti' tu'n t-xmayin ti'ju' nxi' wante tkyaqil, qu'n kykab'il oje che mk'et tu'n Dyos.⁴¿Yajtzunta titi' toklena tu'nju' in yolina myab'a'n ti'j tmajen juntl? Q'ancha'lx txi' tka'yinte tajaw aq'untl qa b'a'n mujqa myab'a'n taq'unju' majen. Extzun b'a'n k'elela' taq'unju' majen lu, qu'n ate Qajaw atite' tipumal tu'n tb'inchante aq'untl b'a'n.

⁵Ex ate' junjuntl okslal nkxima'n qa ate' junjun q'ij nimaqxi'x kyoklen kyekwitz junjuntl q'ij; ex ate' junjuntl okslal nkxima'n qa junelniqe'ju' q'ij. Teyiletzun junjun okslal ati tu'n tkub' t-xima'n b'a'nxi'x alkyeju' b'a'n tu'n tb'inchante.⁶Qa ati jun okslal ati jun q'ij nimaq toklen toj twitz, b'a'nte qu'n ina' najb'en tu'n te ninb'ilte Dyos. Ex alkye nxi' twan tkyaqil ti'xti' tu'n tnimit tb'i Qajaw exqa nq'on chjonte te Dyos ex b'a'n; ex b'a'nte' teju' mixti' nxi' twan tkyaqil ti'xti', tu'nju' in nima'n te Qajaw ex ikx qa nq'on chjonte te Dyos.

⁷Qu'n mix-a'lox junqe nanq'in tu'n tajb'en tib'xtib' ex mix-alo' junqe' nkyim tex tib'xtib'.⁸Qa nqo anq'in tete' Qajaw nqo anq'ina; exqa maqo kyim tex Qajaw qo kyimela'. Qu'mtzun te Dyosqo' qa itz'qo' exqa kyimniqo'.⁹Qumpe'natzun kyimte' Krist, ex jaw anq'in tu'n tok te kyajaw kyimni exqe'ju' itz'.

¹⁰¿Yajtzunta titiqu'n nyolina'ya ti'ju' titz'ina mujqa ttzika? ¿Mujqa titiqu'n nela' tik'unaya? Qu'n qkyaqil qotenb'il twitz Dyos tu'n qok toj xjel tib'aj tkyaqilju' xqb'incha.¹¹Qu'n iku' tz'ib'a'n toju' Tu'jil kjalu: Aju' kxe'l nma'n kyeye' axte' chi Qajaw, qa kkyaqil xjal kb'el ktz'umi'n kych'ek nwitze' ex kkyaqil che k'ulul te Dyos.

¹²Qu'mtzun teyile junjun kxe'l tchik'b'a'n te Dyos ti'j tkyaqilju' tb'inchb'aj. Lalun kub' tq'o'na jun ti'xti' toj tb'e titz'ina mo ttzika

¹³Qu'mtzun, mixti' tu'n qyolin junjun ti'j juntl. Naq o'kx qo ximan ti'j tu'n lalun kub' qq'o'n jun ti'xti' tu'n tjaw trakpuj jun qitz'in mo qtzik ti'j, mujqa tu'n tkub' tz'aq toj il.¹⁴Tu'nju' okslalqine' ti'j Qajaw Jesukrist b'i'n wu'ne' b'a'nxi'x qa mixti'x jun chib'j myawit b'a'n tch'yonjtz. Qatzun ati junjun nkub' t-xima'n qa myab'a'n tch'yonjtzju' chib'j, ex lalun txi' tch'yo'n qa myab'a'n toj twitz.¹⁵Qatzun tu'nju' ntch'yo'na ntzaja' b'is toj tanmi ttzika mo titz'ina, mixti'tzun k'u'jlalitz kxole'. ¡Lalun taja tu'n ttzpetju' titz'ina mo ttzika aj kyim Krist tu'n tpaj naqx tu'nju' in tch'yo'na!¹⁶Lalun kyaje' tu'n tyolinjtz myab'a'n ti'ju' b'a'n toj kwitze'.¹⁷Qu'n aju' tu'n qanq'in toj tkawb'il Dyos myate' tu'nju' chib'j nxi' qwan mujqa tu'nju' k'wab'j nxi' qk'wa'n, ate' tu'n qnajan tojxi'x tnik'alilti'j ex toj tzalajb'il tu'nelju' Xewb'aj Xjan.¹⁸Alkyete ikynajb'ena'ju' te Krist, intzalaj Dyos ti'j, ex kykyaqil xjal nche q'mante qa b'a'n.

¹⁹Qu'mtzun qoqe' lpek ti'ju' ti'xti' ntzaj q'onte nak'b'il qe ex qonim qib' qxolilex tu'ntzun qch'iy toj qokslab'l.²⁰Lalun taja tu'n tkub' yajtiju' taq'unb'en Dyos naq tu'n tpaju' chib'j nxi' tch'yo'na. Qu'n axxi'x kkyaqilxkye' chib'j b'a'n tu'n qch'yonte; ate myab'a'nju' qa nxi' qwan jun chib'j naq tu'n tkub' tz'aq juntel toj tokslab'l qu'n.²¹B'a'nxi'x qa mixti' xiqch'yo'nju' chib'j, ex mixti' xiqk'wa'n b'in mujqa mixti' xiqb'incha'n jun ti'xti' tu'n tkub' tz'aq jun qitz'in mujqa qtzik.²²Aju' tokslab'la ati ti'j Dyos, tenx tu'na twitz Dyos. ¡K'i'wlanxi'xte xjal aj nxi' tb'incha'n jun ti'xti' extzun mya taq'wix nb'aj tna'n!²³Atzunte xjal qa njawje tk'u'j aj txi' tch'yo'n jun chib'j alchaqxkyeku', atzunte xjalju' ati til, qu'n minti' nxi' tch'yo'n tu'n tkyaqil tk'u'j ex tokslab'l; ex tkyaqiltzunju' mixti' nxi' qb'incha'n tu'n tkyaqil qk'u'j ex qokslab'l, atzunte ilju'. Qb'inchanxju' b'a'n teju' qwnaqil mya o'kx qe

¹Qu'mtzun ayoqo' kuwqo' toj qokslab'l ati tu'n kyik'xju' myaxi'x kuwqe' toj kyokslab'l qu'n, ex lalun qjyonju' ti'xti' b'a'n o'kx qe.²Qkyaqil ati tu'n qonin kyi'ju' qwnaqil ex ati tu'n qb'inchante b'a'n kye tu'ntzun qch'iy toj qokslab'l.³Qu'n ate Krist minti' tb'incha aju' tajb'il tu'n ttzalaj ti'j; ape' tb'inchaju' ik'xtu'n ex japun tu'n se'n ntma'nju' Tu'jil kjalu: Aju' yasb'il kyu'n xjal ti'ja atzu' nkub' tz'aqa' wib'aje', chiju' tz'ib'a'n.⁴Qu'n tkyaqilju' kyej tz'ib'a'n toj Tu'jil tyol Dyos, tz'ib'anjtz tu'n qtzaj t-xnaq'tza'n, tu'ntzun tten qnab'l ex qpasensi, ex tu'n tqexi'x qk'u'j ti'j Dyos.⁵Awttzu'n Dyos nq'onte qpasens ex nq'uqb'ante qk'u'j tz'oninkyeye' tu'n tmuje kynab'le' junx toj b'anil, kse'nxju' tajb'il Jesukrist,⁶tu'ntzun tjaw kyajwaline' tb'i Dyos tman Qajaw Jesukrist kkyaqile' tuk'i'l tq'ojq'ojel kwiye' junx. Pakb'anjtzu' tpakb'al b'a'n kye xjal mya aj Judaqe'

⁷Qu'mtzun kk'mom kyib'e' kxolilexe' tu'n tjaw knimane' tb'i Dyos iku' se'nte Krist mache k'amliye' tu'n.⁸Ate Qajaw Jesukrist matzul ajb'el kyeju' aj Juda tu'n tjapunju' tzajni ttziya'n kyeju' qyajilb'en ojtxi' ex tu'n tyek'u'nte qa axxi'x in japunju' tyol tu'n.⁹Ex ikx ul te Jesukrist kxolju' xjal mya aj Juda tu'n kyajwalin tb'i Dyos, tu'nju' matzaj laqj tk'u'j Dyos kyi'j, iku' se'n ntma'n toj Tu'jil tyol Dyos: Qu'mtzun ok chin ajwalil tb'iya kyoju' txqantl nimaqtnam ex ok chin b'itzal b'itze' tu'n tjaw nimset tb'iya.

¹⁰Ex ikx ati jun tnejtl tz'ib'a'n toj Tu'jil ntma'n kjalu: ¡Che tzalajxe' nimaqtnam tuk'ilju' ttanam Dyos!

¹¹Ex ikx ati jun tnejtlu' tyol Dyos tz'ib'a'n toj Tu'jil kjalu: Aye'ye' nimaqtnam ex tnam, ¡Kyajwalinktze' tb'i Qajaw!

¹²Ex kyej ttz'ib'a'n Isayiy kjalu: Ktzajel jun tyajajil Jese, kjawil we' tu'n tkawin kyib'aj nimaqtnam, ex k'okyel qe kyk'u'ju' nimaqtnam ti'j.

¹³Aju' Dyos ntzaj q'uqb'ante qk'u'j, awttzun tzaj q'onte tzalajb'il ex nak'b'il kyeju' ati kyokslab'l ti'j, ex tzajwit tq'o'n q'uqb'ab'l kk'u'je' tu'nju' tipumal Xewb'aj Xjan.

¹⁴Aye'ye' ntzik ex witz'in, q'uqlixi'x nk'u'je' kyi'je' tu'n b'a'nqeye' ex tu'nju' kyojtzqib'le', ex tu'n b'a'n che q'on nab'le' kxolilexe';¹⁵atzun toju' u'j lu matxi' ntz'ib'a'ne' chik'lixi'x tib'aj chukchaq ti'xti', tu'ntzun lalun tzik'tna'l kyu'ne'. Inxi' nchik'b'a'ne' kyeye' naq tu'nju' ati woklene' tu'n Dyos,¹⁶te ajb'el te Krist ex kxol xjal mya aj Judaqe'. Aju' waq'une' tzaj tq'o'n Dyos aj tu'n txi' npakb'a'ne' tpakb'al b'a'n kye xjal, tu'ntzun kxi' nq'o'ne' mya aj Judaqe' twitz Dyos nakuj oyaj tb'anilxi'x ex xjansa'n tu'n Xewb'aj Xjan.

¹⁷Tu'nju' matxi' tb'incha Jesukrist weye', inxi'x chin tzalaje' tu'n nchin ajb'ene' te,¹⁸qu'n minti' wajb'ilwe' tu'n nyolin ti'j jun ti'xti', naq o'kx nchin yolinawe' kyi'ju' ti'xti' xtb'incha Krist weye', qu'n naq tu'nju' nyole' ex waq'unb'ene' ẍepon kanuna'ju' xjal mya aj Juda tk'etz Qman Dyos,¹⁹ex naq tu'nju' kyipumal techlal ex b'a'nq'ob'aj ex Xewb'aj Xjan te Dyos. Tu'ntzun tkyaqilju' waq'unb'ene' lu, matxi' tz'elpun b'aj npakb'a'ne' ti'ju' tpakb'al b'a'n, tzajnix toj tnam Jerusalen ex tzmax pona b'aja' toju' tx'otx' Iyirya.²⁰Ex matxi' tz'ok tilil wu'ne' tu'n tpakb'etju' tpakb'al b'a'n kyoju' tnam ja na'mxtoq kb'inteya xjal tqanil ti'j Jesukrist, tu'ntzun lalun txi' nljo'njuye' waq'une' tib'aju' taq'unb'en juntl xjal,²¹iku' se'n ntma'nju' Tu'jil kjalu: K'okyel ka'yi'n kyu'nju' b'ajxtoq kb'iya' tqanil ti'j; kkaneb'il toj kwitzju' b'ajxtoq tz'ok kb'ina' tqanil ti'j, chiju' tz'ib'a'n. Kub' t-xima'n Pawl tu'n txi' Rom

²²B'a'npunxi' maj kub' nximane' tu'n nxiye' ka'yilkyeye', naqtzun aju' waq'une' mixti'x nb'ent.²³Atzun ja'lo tu'n matxi' b'aju' waq'une' toju' tnej tx'otx' tzalu, ex tu'n matxi' b'et q'ij wajb'ile' tu'n npone' xb'et-salkyeye',²⁴atzun tb'is nk'u'jju'ye' tu'n wik'e' xb'et-salkyeye' ajnxiye' Spany. Layx b'ent nkyej ten b'a'npun q'ije' kxole', naq o'kx wajb'ile' tu'n nten ch'i'ne' kyuk'ile' ex tu'n ntzaj kyonine' toju' nb'eye' ljo'n ex tu'n npon kanune' tzmax Spanya.²⁵Atzun ja'lo machinxe' Jerusalen onilkyeju' qitz'in ex qtzik na'tz.²⁶Qu'n ayeju' te tnam Masedonya ex toj tx'otx' Akaya makub' kxima'n tu'n tjaw kb'u'yi'n jun unb'ab'l, tu'ntzun txi' q'et kyeju' qitz'in mo qtzik prowqe' toj Jerusalen.²⁷Makub' kxima'n tu'n tkyaqil kyanmi, expe' ilti'j tu'n kb'inchante, qu'n iku' se'nkye aj Juda matxi' kq'o'nju' tpakb'al b'a'n kye extzun mya aj Judaqe', qu'mtzun ikxkye ati tu'n kyonin kyi'ju' aj Juda.²⁸Iktzunju' naqa xb'aj b'enti ja'lu wu'ne', ex ajtb'ajx ntxoli'ne' oyaj kyeju' aj Jerusalen, chin xeltzuntze' Spanya, ex majx chinik'ile' xb'et-salkyeye'.²⁹B'i'nxi'x wu'ne' qa naqa ẍinpone' kk'etze', ktzajel q'o'n txqan xtalb'il qe tu'n Qajaw Jesukrist.

³⁰Nchin kub'sane' kyeye' witz'in ex ntzik tu'n kyonine' wi'je' toj na'j Dyos ex tu'n kna'n Dyose' wi'je', naqx tu'nju' okslalqo te Jesukrist ex atiju' k'u'jlalil qxol aju' ntzaj tq'o'n Xewb'aj Xjan qe.³¹Che kub'sanqe'ye' te Dyos wi'je' tu'n nkolchiye' toj kq'ob'ju' mya okslalqe' ate' Judey, ex tu'n tmk'onjtzu' o'nb'il kxe'l wi'ne' kyeju' qitz'in ex qtzik toj Jerusalen,³²tu'ntzun npone' xb'et-salkye toj tzalajb'il ex tu'n wojlan ch'i'ne' kk'etze' qa ax tajb'il Dyosju'.³³Awittzun Dyos q'olte nak'b'il ten kyuk'ile' te kkyaqile'. Ikxwitju'. Xitq'o'n Pawl q'olb'eb'l teyile junjun okslal

¹Nchin kub'san kyeye' tu'n txi' kka'yine' qanab' Peb'e tb'i, qu'n ate' qanab' lu naq'unan kxolju' okslal toj Senkreas.²Kk'mome' toj tb'i Qajaw, se'nxju' nkb'incha'n okslal, ex che oninqeye' ti'j toj tkyaqilju' nojqelan toj tchwinqlal, qu'n matxi' tz'onin kyi'j txqan xjal expe' matz'onin wi'jku'ye'.

³Kq'olb'enxe' Priska ex Akila, aye' wuk'i'le' toju' aq'untl te Jesukrist.⁴Qu'n naqpe' ch'inxtlmi ekub'a b'yo'n naq tu'n nkolchiye', mya o'kxqine' nchinx q'onte chjonte kye, ex ikx kykyaqil qitz'in ex qtzik kyxolju' okslal mya aj Judaqe'.⁵Ex ikx kq'onxe' jun q'olb'eb'l kyeju' okslal nkb'uyi'n kyib' tja Priska ex Akila. Ex kq'olb'enxe' wamiwe' Epeneto, aj tnejel okslal toju' tx'otx' te Asya.⁶Kq'olb'enxe' Mariy aju' oje tz'aq'unan b'a'nxi'x kxole'.⁷Kq'onxe' nq'olb'eb'le' kyeju' nwitze'le' Androniko ex Junyas, qu'n ayekye' lu junx e'ten wuk'i'le' toj kars; ex xiq'o'n kyoklen tu'n Dyos, ex nej kyokslan kye nwitze'.

⁸Kq'onxe' nq'olb'eb'le' te Amplyato, aju' wamiwe' toj tb'i Qajaw.⁹Kq'onxe' nq'olb'eb'le' te Urb'ano, quk'i'le' toju' aq'untl te Krist ex kq'olb'enxe' Estakis aj inxi'x nk'u'jla'ne'.¹⁰Kq'onxe' nq'olb'eb'le' te Apeles, qu'n wa'lxi'x toj tokslab'l; ex kyeju' toj tja Aristob'l.¹¹Kq'onxe' nq'olb'eb'le' teju' nwitze'le' Erodyon, ex kyeju' toj tja Narsis qu'n okslalqe' ti'j Qajaw.¹²Kq'onxe' nq'olb'eb'le' te Tripen ex Triposa, qu'n nche' aq'unan toju' taq'un Qajaw; ex teju' qanab' Perside, aju' oje tz'aq'unan toju' taq'un Qajaw.¹³Kq'onxe' nq'olb'eb'le' te Rupo, qu'n tb'anilxi'x okslal ti'j Qajaw, ex teju' ttxu, ju' oje tz'ok nakuj ntxuye'.¹⁴Kq'onxe' nq'olb'eb'le' te Asinkrit, te Plekonte, te Ermes, te Patrob'as, te Ermas ex kye kkyaqil okslal ate' kyuk'i'l.¹⁵Ex ikx kq'olb'enxe' Piloloko ex Julya, ikx Nareo eju' tanab', ex ikx Olimpa ex kkyaqilju' okslal atqe' kyuk'i'l.

¹⁶Kq'olb'em kyib'e' kxolilexe', ex kychlem kyib'e' tuk'i'l tkyaqil tk'u'jlalil. Ex kkyaqilju' okslal te Qajaw Jesukrist nche' tzaj q'olb'ene' kyu'n.

¹⁷Tz'elx knik'e' witz'in ex ntzik kyi'ju' nche tzaj q'inte pa'jtib'il ex trakpuje'n kxole', aye'ju' tqe'k xitulte xnaq'tzb'il oje kk'ame'. Kpa'mel kyib'e' kyi'j.¹⁸Qu'n minti' nche ajb'en te Qajaw Jesukrist, axtzu' nche ajb'ena' kyex kyib'xkyib', ex naq tqe'k sb'ulte kyanmi xjal tu'nju' kyol b'unin ex tb'anil najb'en kyu'n.¹⁹Kkyaqil b'i'n kyu'n qa nche okslane' te Dyos. Qu'mtzun inxi'x chin tzalaje' kyi'je', ex wajb'ile' tu'n kyokye' atixi'x knab'le' tu'n kb'inchanteye' b'a'n ex myaju' taq'wix;²⁰Atzunte Dyos q'olteju' nak'b'il kb'el puch'inteju' Tajaw il tjaq' kqane'. Awttzu'n Qajaw Jesukrist tzaj q'onte txqan xtalb'il kyeye'.

²¹Nche'x q'olb'e'ne' tu'nju' Timotey aj wuk'i'le' toj taq'un Qajaw Jesukrist; ex ikx Lusyo, Jason ex Sosipatro aye'j nwitze'le'.

²²Ayine' Tersio t-ajtz'ib'al Pawl ẍin kub' tz'ib'ante u'j lu nxi' nq'o'ne' jun qolb'eb'l kyeye' toj tb'i Qajaw.

²³Inche'x q'olb'e'ne' tu'n Kayo, aju' machin tk'ame' tja, ex intq'o'n anb'il kye okslal tu'n kb'uyinte kyib' toj tja. Ex ikx nche' q'olb'ene' tu'n Erasto aju' k'u'l pwaq toj nintnam ex ikx tu'nju' titz'in Kuarto tb'i.²⁴Awittzun Qajaw Jesukrist k'iwlankyeye' kkyaqile'. Ikxwitju'. Jaw tajwali'n Pawl tb'i Dyos

²⁵Qoqe' ajwalin tb'i Dyos aj ati tipumal tu'n kwe'xixe' tu'n toj kyokslab'le'; iku' se'nju' ntma'n tpakb'al b'a'n nxi' npakb'a'ne' kyeye' exju' xnaq'tzb'il ti'j Jesukrist. Aju' yol lu matxi' tzaj tyek'u'n Dyos, aju' k'u'ntoq tu'n toj ewaj atxi'x na'mxtoq tkub' b'incha'n twitz tx'otx'.²⁶Atzun ja'lo matxi' tzaj tchik'b'a'n Dyos qe naqx tu'nelju' kyejni ktz'ib'a'n t-sanjelal Dyos ojtxi', ex matzaj q'o'n jun chaq'b'il tu'n Dyos aj Dyos tejumajx tu'n txi' pakb'et kye kkyaqil nimaqtnam tu'ntzun kyokslan xjal ex tu'n kniman te Dyos.²⁷¡O'kxte Dyos ati tnab'l ex naq junku' ati tu'n tjaw nimat kukxju' naqx tu'nel Qajaw Jesukrist! Ikxwitju'.

Bible Society in Guatemala

https://app.library.bible/content/aea9d9099feb3a24