Read Ezequiel 1

Ezequiel1

Yek'unjtz tq'uqb'il Dyos

¹Ayine' pale Esekyel, tk'wal B'usi, jun q'ij atintoqe' ttziju' nin a' Kyeb'ar, toj B'ab'ilon kyxolju' eb'ajxq'i'n. Minab'enx jqetu' kya'j, ex wile' Dyos toj jun naku'j witzik'. Toj tjwe'yi'n q'ij tajlal tkyaji'n xjaw teju' junaq lajoj ab'q'i (30), jwe' ab'q'i t-xilen iq'i'n nimaqkawil Joakyin toj juntl tnam. Kub' tq'o'n Qman Dyos tq'ob' toj nwi'ye'.⁴Ex wile' xi'toq ttzaj jun kyq'iq' jb'al toj tb'a'nq'ob'kya'j; inetz q'aq' toj jun nin muj, kse'n xloq'lokya'j, ex ati jun spik'un nxi'x txaqun ti'jile. Ex ntz'iljne jun toj tnky'ajchaqil q'aq' kse'n k'uxb'il nqoptz'aj,⁵ex ate' kyaje' naku'j wnaqqe' toj tnky'ajchaq'il.⁶Teyile junjun ati kyaje' che ka'yin ex kyaje' kyxik';⁷tzinun kyi'ju' kyqan, iky kyxky'equ' kse'n kyxky'eq wakx, ex nche qoptz'aj kse'n q'ank'uxb'il tz'umin.⁸Expe' ti'jxi'tlu' kyaje' che ka'yin ex kyajkyaj kyxik', aye' kyaje' naku'j wnaq lu ate' kyq'ob' naku'j kyq'ob' xjal kyoj kyaje' kyplajil kyjaq'ju' kyxik'. Intoq che moje kytxa'nju' kyxik'. Ajkyxib'et min nanjtzkyi'j, nche'x b'et kywitzxi'.¹⁰A che ka'yin kyaje' ja'lu: aju' kywitzxi' kse'n ka'yin jun ichan; atzu'n toj kyb'anq'ob' kse'n ka'yin jun b'alun; atzu'n toj kynayaj kse'n ka'yin jun tman wakx; atzunju' kytze'lkyi'j kse'n ka'yin jun t'iw.¹¹Jawni kyq'o'n kyxik' jawtl. Kab'e' kyxik' nkymujb'ankyib', aye'tzu'n kab'e'tl najb'en te kutxb'ilte kyxmilal.¹²Kykyaqilx intoq che b'et kywitzxi' ex min nanjtzkyi'j. Intoq che'x toju' tu'me'l ja nche'xa' iq'i'n tu'n tipumal Dyos.¹³Ikytoq kyka'yinkju' kse'n ttxalq'aq' nche k'ant, mujqa kse'n tzaj ntilky'aj, nche'x ex nche tzaj kyxol; inxi'xtoq qoptz'aju' q'aq' ex intoq che el xloq'lokya'j ti'j.¹⁴Intoq che'xju' naku'j wnaqqe' ex ntoq che ultel ojqel, naku'j xloq'lokya'jqe'.

¹⁵E'xinka'yi'ne' naku'j xjalqe' lu ex wile' ati jun tul twitz tx'otx' ttxlaj junjun.¹⁶Junelniqe'ju' kyaje' tul ex tu'nju' b'inchb'enkye, intoq che qoptz'aj kse'n tb'anil ab'j. Naku'j ati juntl tul toj junjun tul.¹⁷Intoq b'ent kyxi' b'et toj alkyexku' kykyajel plaj, ex min nxikytz'u'n kywitz tojun plajtl.¹⁸Wile' ate'toq tzuyb'ilkyeju' tul kykyajel ex ate'toq witzb'aj kyi'jile.¹⁹Ajkyxib'etju' naku'j wnaq, ex nche'xb'etju' tul kyuk'i'l, ex ajkyjawju' naku'j wnaq twitz tx'otx', ex nche jawju' tul.²⁰Intoq che'x b'etju' naku'j wnaq janche'x lmu'na' tu'n tipumal Dyos, ex intoq che jawju' tul junx kyuk'i'l, qu'n majxtoq iqi'n kyib'ju' naku'j wnaqqe' kyuk'i'lju' tul.²¹Ajkyjaw yukchiju' naku'j wnaqqe', ex nche jaw yukchiju' tul, ajtzun kywe', ex nche we'ju' tul; ex ajkyjawju' naku'j wnaq twitz tx'otx', ex ntoq che jawju' tul kyuk'i'l, qu'n majxtoq iqi'n kyib'ju' naku'j wnaq kyuk'i'lju' tul.²²Tib'ajtzunju' kywi' atitoq naku'j kya'j, nqoptz'aj naku'j kristal.²³Tjaq'tzunju' naku'j kya'j nxikyslik'u'n kyxik'ju' naku'j wnaq lu tzinun, nkymujb'a'n kyib'. Ktxu'n kyxmilal kyu'n kab'e' kyxik'.²⁴Ex nb'iye' tq'ojq'ojel kyxik' kse'n nche b'et: kse'n tq'ojq'ojel jun nin a' matxitoq ch'iy, kse'n tq'ojq'ojel twi'ju' Nimtipumal, kse'n tq'ojq'ojel jun tnej xjal te q'oj. Ajkywe', nche kub' kyq'o'n kyxik'.²⁵Ex tzaj jun tq'ojq'ojel tib'ajxi' naku'j kyej tib'aj kywi'.²⁶Nka'yiye' jun q'uqb'il kse'n tb'anil ab'j sapiro tb'i tib'ajxi' naku'j kya'j, ex atitoq jun naku'j ichan tib'aju' naku'j q'uq'b'il.²⁷Atzunju' toj tk'alb'il jawtl, wile' nqoptz'aj naku'j k'uxb'il txoli'nkti'j tu'n q'aq', atzu'n k'ub'l wile' jun naku'j q'aq'. Intoq tilky'aj ti'jile²⁸naku'j kse'n qe'nkan ajtyek'u'ntetib' toj muj kse'n ati jb'al. Iktzu'n tyek'u'ya'tib' tajwalil Qman Dyos weye'. Atzunj nka'yinteye', nkub' mejeye' majx nkub' joqeye', nb'itzuntze' jun tq'ojq'ojel wi'yj. Ttxkonjtz Esekyel tu'n Qman Dyos
Nb'iye' jun tzaj yolin:¹intoq tma'n:
Esekyel, we'ku'ya, chin yolile' teya, chij.²Tetzunj ttzaj yolin weye' toju' tq'ojq'ojel wi'yj, ulju' tipumal Dyos wuk'i'le' ex nkub' we'ye' b'a'nxi'x. Nb'itzuntze' tq'ojq'ojel wi'yj nyolintz weye'³intoq tzaj tma'n weye': aya, ichan, kxe'l nchq'o'ne' kyuk'i'l aj Israel, jun tnam pi's matxi' jaw tiq'intib' wi'je'. Matxi' jawkyiq'i'nkyib' wi'je' kyuk'i'lju' ojtxi' kychman tzmax toju' q'ij ja'lo.⁴Ikyqe'x kyk'walju' pi'sqe' mixjun nok toj kywi'. Kxel nchq'o'na kyxol tu'n txitma'na kye kjalu: Lu ntma'n Qman Dyos, chiku'ya.⁵B'a'ntzun qama txib'i'na kyu'n mujqa min, qu'n pi'sqe' xjal lu, loq'tzun k'elelkynik' qa ati jun nsanjele' kyxol.⁶Lalun xob'a kye, ichan, ex tu'nju' ktzajel kyma'n teya, b'a'nqa matna'ya qa atiya kyxol txqan ch'ix mujqa najliya kyxol txqan lakran. Lan xob'a teju' kyol ktzajel kyma'n teya ex lalun xob'a' teju' kywitz ktzajel kyek'u'n teya, maskye majx pi'sqe'.⁷Q'manxteju'ya nyole' kye, qama txi' kyb'i'n mujqa min, qu'n majx pi'sqe'.⁸B'inku'ya nxinma'ne' teya b'a'nxi'x, ex lalun tz'oka pi's kse'nkye. Jqonx ttziya ex wanxju'ya kxe'l nq'o'ne' teya, chij.

⁹Wiltzune' jun q'ob'aj tzajni wu'mele', tzyu'ntoq jun u'j tu'n tz'ib'a'n twitz tolq'i'n.¹⁰Atzu'n q'ob'aj xipoqinte nwitze'. Tz'ib'a'n kykab'il plaj: oq'e'n, ex jiq'cha'n te k'ixk'oj tku'x toj.¹Ex tzaj tma'n weye':
Ichan, wanxju'ya u'j tz'ib'a'n lu, ex kuxtxi'ya yolil tuk'i'lju' nintnam aj Israel, chij.

²Xink'ab'u'ne' ntziye' ex tb'incha tu'n t-xinwanju'ye' u'j tz'ib'a'n twitz.³Tzaj tma'ntzuntz weye': B'ilq'unxju'ya u'j tz'ib'a'n twitz lu kxe'l nq'o'ne' teya ex nojx tk'u'ja tu'n, chij.
Xi'nwane' ex b'ajchi'yix toj ntziye' tu'n naku'j ta'lkab'.⁴Tzaj tma'ntzuntz weye': Kuxtxi'ya ex q'manxa kye ntaname' aj Israel aju' kxe'l nma'ne'.⁵Min nxinchq'o'na toj jun tnam inwt yolin toj jun yol junxi'tl mujqa min tojtzqi'na, inxinchq'o'na kyxolju' aj Israel.⁶Min nxinchq'o'na kyoj nimaqtnam nim txqan kyajlal ex nche yolin yol ch'uẍ, aju' lay tz'el tnik'a ti'j. Expena' qama txi' nchq'o'na kyoju' tnam lu, jaku' txib'i'na kyu'n.⁷Atzunte' tnam Israel lay taj tu'n txib'i'na tu'n, qu'n minxjun tajb'il tu'n nxitb'i'ne'. Kykyaqil aj Israel pi'sqe'xi'x ex xk'ub' kywi'.⁸Ex k'okyela kuw ex pi's wu'ne' kse'nkye.⁹K'okyela kuw wu'ne' kse'n ab'j dyamant, kuwxi'x kywitz txqantl ab'j. Lalun xob'a kye ex lalun sak'puja teju' kywitz kkyek'u', maskye pi'sqe'xi'x, chi Dyos weye'.

¹⁰Ex tzaj tma'n weye': B'inku'ya b'a'nxi'x tkyaqilju' kxe'l nma'ne' teya, ex q'onkja toj twi'ya.¹¹Kutxi'ya ka'yilkyeju' twnaqila ate'qe' toj juntl tnam, b'a'nqa matxib'i'na kyu'n mujqa min, q'manxa kye: A xtma Qman Dyos ja'lu, chiku'ya, chij.

¹²Njaw q'i'ntzuntze' tu'n tipumal Qman Dyos, ex xinb'i'ne' jun tq'ojq'ojel kuw wi'jxi'ye', kse'n jun kyajnajnab', tej tik'ju' tajwalil Qman Dyos ja ta'toq.¹³Aju' tq'ojq'ojel tzaj tu'n kyxik'ju' naku'j wnaqqe' ajtik' tiqli t-xik' jun ti'j juntl, exqe' tul ate'k kyi'j; ikytq'ojq'ojel kse'n jun nin kyajnajnab'.¹⁴Injaw tiq'i'ne' tipumal Dyos atzu', intoq chin b'isune' toj jun tk'ayil tej nxi'ye', tzyu'nqintoq' kuw tu'n tq'ob' Qman Dyos.¹⁵Npontzuntze' Tel-Ab'ib', ttzi nin a' Kyeb'ar, janajla'qe'toq aj Israel b'ajxni q'i'nqe' toj juntl tnam, ex wuq q'ij nkyajtene' kyuk'i'l, mixti'xtoq nkane toj nwitze' titi' kxel nb'incha'ne' ex titi' kxe'l nma'ne'. Oktq'o'n Dyos Esekyel kse'n jun xq'uqil (Ez 33.1-9)

¹⁶Tetzunj tb'aju' wuq q'ij, tzaj yolin Qman Dyos weye', ex tma:¹⁷Aya, ichan, xkub' nq'o'na te xq'uqilteju' tnam Israel. Aj txinma'ne' jun tqanil teya, ati tu'n txitma'na qa ayine' nchin q'mante, tu'ntzun kyb'inte.¹⁸Qama txinma'ne' jun tqanil tu'n ttz'e'yset twitz jun b'inchal myab'a'n tu'n kamik; qa min xxityolb'e'na b'inchal myab'a'n exqa min xxitma'na te tu'n tkyaj tq'o'nju' tchwinqlal myab'a'n tu'ntzun tanq'intl, kkyimel tu'n tpaju' til, ayintzunwe' kxe'l nqanine' teya tu'nju' tkamik.¹⁹Qatzun matxitma'na teju' b'inchal myab'a'n, ex min nkyaj tq'o'nju' tchwinqlal myab'a'n, kkyimel tu'n tpajju' til, atzunta kkletela.²⁰Ex qati jun xjal b'a'n tchwinqlal extzunqa makyej ttzaqpi'nju' tchwinqlal ttxolilti'j ex matxi' b'inchalte myab'a'n, ex makub' nq'o'ne' toj xob'ajil; qatzun min xxitma'na te, kkyimel. Lay tz'okju' b'a'n matxi' tb'incha toj tajlal wu'ne', kkyimel toj til, tib'ajtzunta kjela' nq'o'ne' tkamik.²¹Qatzun matxitma'na teju' xjal lu tu'n lalun b'inchan il, ex min xxi' b'inchal il, kb'el anq'in, qu'n mana' txitb'i'nju' xxitma'na te, ex ktkla' tib'a, chij. Kyej menix Esekyel

²²Axtzuntzu' kub'a' tq'o'n Qman Dyos tq'ob' toj nwi'ye', ex tzaj tma'n weye': We'ktza, kutexa toj plan tx'otx', atzuntzu' chin yolila'ye' tuk'i'la, chij.²³Njawe'ye' ex netze' toj plan tx'otx', atzuntzu' wila'ye' tajwalil Qman Dyos, kse'nxju' ojetoq wile' ttzi nin a' kyeb'er. Inkub' mejeye' kupon nplaje' twitz tx'otx',²⁴nk'amtzune' tipumal Qman Dyos ex nkub' twab'a'ne' b'a'nxi'x. Tzajtzun yolin Qman Dyos weye' kjalu: kuxtxi'ya ex jpunkxtib'a toj tjaya.²⁵Ka'ntzpe'ya, kb'el k'lo'na toj aqwil, lay b'ent tetza tu'n ttena tuk'i'lju' tnam.²⁶Expe' knb'incha'ye' tu'n tokx lak'eju' taq'a tojxi' ttziya ex kjeltena me. Lay b'ent kytzak'et tu'na, maskye jun tnam pi's.²⁷Qatzun ati nyole' tu'n txinma'ne' teya, kyolil jumajtla wu'ne', kxel tma'ntzuntza kye: Lu ntma'n Qman Dyos, chiku'ya. Aju' tajb'il tu'n tb'inte, kb'eltb'i, atzu'n min tajb'il, lay kub' tb'i'n. Qu'n jun tnam pi's. Tma Esekyel tqanil q'oj ti'j Jerusalen

¹Atzunta, ichan, q'intza jun loq', q'onku'ya twitza ex b'inchanku'ya tilb'ilal nintnam Jerusalen twitz.²Ex txolinqe'ka xjal te q'oj ex aq'unb'il tu'n kyxlik'pun ti'jile, b'incha'nktza jun nintapi ti'jile, ex tx'otx' te xwe'lb'il, tu'ntzun tka'yin kse'n jun nintnam txoli'n ti'j kyu'n ajq'oj.³Q'intztzuna jun plaj k'uxb'il ex q'onku'ya kyxole' tuk'i'lju' nintnam, nakuxwitloj jun nintapi, ex tenku'ya twitzu' nintnam, naku'xwitloj nq'ojinka ti'j. K'ajb'el ja'lu te jun techlal kye aj Israel.

⁴Atzunta kb'el kẍeya toju' plaj te nayaj, ex kjawil tiqa'na tilju' tnam Israel. Ati tu'n tkub' kẍeya tib'aju' plaj lu, kxel tiq'i'na til tib'aja⁵b'eljlajojnaq lajoj (390) q'ij, mujqa jun q'ij tu'n jun ab'q'i til Israel.⁶Ajtzun tjapun tq'ijlalil lu tu'na, kb'el kẍeya tib'aju' plaj te tb'anq'ob' ex kjawix tq'o'na tilju' tkawb'il Juda tib'aja, toj kab'naq (40) q'ij. Jun q'ij tu'n jun ab'q'i il.⁷K'anjeltzun ti'jtza Jerusalen, txoli'n ti'j kyu'n ajq'oj; kb'el t-ẍb'iqb'a'na tq'ob'a ex kyolila toj nb'iye' ti'j.⁸Ka'ntzpe'ya, kb'el nk'lo'na tu'n aqwil, tu'ntzun lalun tximeltz'uja toj jun plaj ex toj jun plajtl tzmax ajtjapunju' tq'ijlalil tu'n tyajtiya.

⁹Q'intza ch'i'n triy, seb'ad, mijo naku'j kalb'ans, moẍ, chinaq' ex naku'j xma'k; smo'n twitz toj jun k'wil ex b'inchama twaya tu'n. Atzun twaju'ya toju' b'eljlajnaq lajoj (390) q'ij kuẍliya toju' plaj te tnayaj.¹⁰Kwala ti'ju' twaya axchaq kmoju', masch'i'n nik'jan lib'r chaq junjun q'ij,¹¹ex kxel tk'wa'na a' axchaq kmoju', nik'janchaq litr junjun q'ij.¹²Jun muqinju' twaya seb'ad, tzq'ajsa'n tu'n tq'aq'al ttxa xjal, ex kywitz xjal kb'ela' tb'incha'na, chij.

¹³Ex tmatl Qman Dyos: Ikytzu'n tz'il wab'j lu kkywaju' aj Israel kyoju' tnam ja che pomela' nq'o'ne', chij.

¹⁴Xintzaq'we'ne' te: Taye, b'ajxna' txa'ntzyu'nwe' jun ti'xti' tz'il toju' nchwinqlale'; b'ajx txa' nch'yo'nwe' tchib'jil jun txkup njawkyim tu'nxtib', mujqa b'ajni tzaqu'n kyu'n txkup, ex b'ajx txa' nch'o'nwe' chib'j tz'il, nchije'.

¹⁵Tzajtzun tma'n weye': B'a'natzun, ana' tz'ajb'enju' ttxa wakx tu'na tet-xel ttxa xjal, tzq'ajsb'ilte twaya, chij.

¹⁶Yajxi'tzuntl tzaj tma'n weye': Knb'incha'ye' tu'n tkub' naju' wab'j toj Jerusalen. Kmletelju' wab'j, ex toj b'is kxela' kywanju' xjal; kmletelju' a' ex nche xob'je ajt-xikyk'wa'n.¹⁷Lay kanun a' kye ex kywa, naq che ka'yil toj kywitz tekyib' xob'jniqe'. Ex che b'ajel q'ayj itz'qe'x tu'n kyil, chij.

¹Tzaj tma'n Qman Dyos weye': Ja'lo, ichan, q'intza jun kuchil jqu'n b'a'nxi'x kse'n job'l wi'yj, jomila twi'ya ex t-xmatziya. Q'intza jun tqan peẍ, ex aq'punku'ya t-xya'mal twi'ya toj oxe' pa'n.²Ajtzun tq'jenju' q'oj ti'ju' nintnam, tz'e'ysa'nku'ya jun pa'n t-xya'mal twi'ya toj nky'ajchaq nintnam; ex q'intza jun kuchil, jontza jun pa'n t-xya'mal wi'yj ti'jileju' nintnam, atzu'n jun pa'nl b'ajsb'il chtonxa toj kyq'iq'. Chin xe'l lpeye' kyi'ju' xjal najlqe' toj nintnam tuk'i'l jun k'uẍtx'e'nb'il toj nq'ob'e'.³Q'intza jni'ju' t-xya'mal wi'yj lu, ex xmonqe'ka ttxa'n t-xb'aluna.⁴Q'intza jni'tl t-xya'mal wi'yj, ex q'onqe'kxa toj q'aq' tu'n ktz'e'y. Atzuntzu' k'eletza' q'aq' ti'j tkyaqilju' tnam Israel.

⁵Ayine' Dyos Manb'aj nchin q'mante: Lu Jerusalen ati. Ayine' inkub' q'onte kyxol tnam ex nimaqtnam.⁶Atzunte matz'el tpa'ntib' kyi'ju' nkawb'ile' ex nchaq'b'ile', taq'wixi'xtl soka' kyekywitzju' txqantl tnam ex nimaqtnam ti'jile, qu'n min nche'x tb'i'n nkawb'ile' ex min lepchi kyi'ju' nchaq'b'ile'.

⁷Qu'mtzun ayine', Dyos Manb'aj, nchin q'mante: Pi's qexi'xe' kyekywitzju' tnam ate' kyi'jileye', ex min nche'x lpeye' kyi'ju' nchaq'b'ile'; tk'i'xpe'wt nche japun kykawb'ilju' tnam kyi'jileye' kyu'ne'.⁸Qu'mtzun, ayine' Dyos Manb'aj, nchin q'mante: Ikxwe' chin jawil miltz'uje' ti'ja, Jerusalen; knb'incha'we' tz'e'ysb'il twitza kywitzju' txqantl nimaqtnam,⁹b'ajxa' nb'inchaye' ikju' ex lay nb'incha junmajtle'. Taq'wix qexi'xju' kyb'inchb'aje'.¹⁰Ate' manb'aj kyxole' che xe'lkych'yo'n kyk'wal, ex ate' k'walb'aj che xe'lkych'yo'n kyman. Knb'incha'ye' tz'e'ysb'il kywitze', exqetzu'n che kjel anq'in che xe'lnsputi'ne' toj kyq'iq'.¹¹Ayine' Dyos Manb'aj, kntziya'ye' axxi'x: mana' kub' kytxa'ju'ne' njaye' xjan tu'n kyb'inchb'ene' myab'a'n ex taq'wiqe'xi'x, ex ikxwe' che kb'el nb'yo'ne', mixti' xkyilwi'ye' wu'ne' aj ktzyete'; ex lay tzaj laqj nk'u'je' kyi'je'.¹²Toj oxe' tnej che elela' xjal najliqe' toja: jun tnej che kyimel tu'n yab'il ex we'yaj toja, atzu'n jun tnejtl che kb'el b'yo'n kyu'n ajq'oj kyi'jile, atzu'n b'ajsb'il tnej che b'ajex nsputi'ne' toj tkyaqil twitz tx'otx'. Chin xe'l lpeye' kyi'j tuk'i'l jun k'uẍtx'e'nb'il toj nq'ob'e'.¹³Kjawiltzun nb'ajsa'ne' ntx'u'jile' kyi'j; tzmax ajtqe nk'u'je', ex chin qjenb'ile'. Ajtzun telb'aju' ntx'u'jile' kyi'j, k'elelkynik' qa ayine' Dyos Manb'aj, inq'mante tu'n nxky'aqli'ne'.¹⁴Kjeltena wu'ne' naq jun ch'uq ttx'anqa'n ja, Jerusalen; kb'el nme'ssa'na kyxolju' tnam najliqe' ti'jileya, tu'ntzun kyka'yinteju' che b'ji'k'el.¹⁵Ajttzaj ntx'u'jile' ti'ja aj ntz'e'ysante twitza, ex kuwxi'x tz'e'ysb'il kb'el nq'o'ne', kykyaqil k'okyel kyma'n kyol taq'wix teya ex k'okyel q'o'n ttx'u'jila kyu'n, ex k'okyela te kytzeb'l kuwxi'x kywitzju' tnam najliqe' ti'jileya. Ayine' Dyos Manb'aj matxi' chin q'mante.¹⁶Knb'incha'ye' tu'n ttzaj we'yaj kyib'aje', kse'nqe' talsmaj te b'iyb'il. Knb'incha'ye' tu'n ttzaj xitb'il ex we'yaj kyib'aje', ex kb'elb'aju' wab'j.¹⁷Ikju', tzul we'yaj, yab'il ex kamik wu'ne' kyib'aje', e'txkup mya'lqe' che b'ajel kyk'wale' kyu'n; ex nimkye' che kyimel toj q'oj. Ayine' Dyos Manb'aj matxi' chin q'mante, chij Dyos. Xitma'n Esekyel qa myab'a'n qe' witzleb'

¹Tzaj yolin Qman Dyos weye' ex tma:²Ka'yinxa kywi' witz toj Israel, ex q'manxa kye toj nb'iye'³kjalu: Kyb'inku'ye', witz toj Israel, aju' ntma'n Qman Dyos kyeju' witz, e'ttxa'nwitz, exqe' nin a' ex b'ya': ktzajel q'oj wu'ne' kyib'aje', ex che b'ajel xitju' janche k'uluna'ye' kye witzleb'.⁴Che b'ajel nb'uchi'ne' q'olb'eb'l janche kub'a' kyq'o'ne' chojb'il ex jankub'a' kytz'e'ysa'ne' sturak, ex knb'incha'ye' tu'n kykub' tz'aqju' ichan kyimniqe'tl kywitzju' witzleb'.⁵Che b'jo'kyex nxone' aj Israel kyimniqe'tl kywitzju' kywitzleb', ex kb'ajxel nsputi'ne' kyb'aqil ti'jile q'olb'eb'l kye.⁶Che b'ajel xitetju' nimaqtnam kyoj kykyaqilju' najb'il ja najla'qe'ye', exqe' q'olb'eb'l te witzleb'i'n che kjel xitet. Majx che kjel xitetju' kyq'olb'eb'l exqe' kywitzleb' che b'ajel txijet; exqe' kyq'olb'eb'l tz'e'ysb'il sturak che b'jawil ch'ojpet; tkyaqilju' oje b'jaw kyb'incha'ne' che b'elnajset.⁷Ajtzun kyka'yinteye' ajkyb'aj kyim txqan xjal kyxole', k'eleltzun kynik'tze' qa ayine' Dyos Manb'aj.⁸Oktzun che nkla'we' junjunkye' te kamik ex che kjel anq'in, che b'ajex sputet kyxol nimaqtnam.⁹Chin tzajel kyna'nju'ye' che kjel anq'in kyoju' nimaqtnam; ktzajel kyna'n se'n ẍeyajtiya' wu'ne' tu'n tpaj min ẍeajb'en b'a'n we'ye' ex matz'elkypa'n kyib' wi'je' tu'n kyk'ulun kye witzleb'. Che tzajel molmon kyex tu'n tpaj tkyaqilju' il xb'aj kyb'incha'n, ex tu'n tpaju' kb'inchb'aj taq'wixqe'xi'x.¹⁰K'eleltzun kynik'tz qa ayine' Dyos Manb'aj, ex tej txinma'ne' kye qa tzultoqju' taq'wixil lu kyi'j, mya naqxwit wak'a'ne' exi' nxob'sa'ne', chiku'ya, chij.

¹¹Tzaj tma'n Qman Dyos weye': Ẍch'ina, jumanqeku'ya tq'ob'a ex tqana; ẍch'ina tu'n k'ixk'oj tu'n kypaj kyil tnam Israel taq'wiqe'xi'x, kkyimel toj q'oj, tu'n we'yaj ex tu'n yab'il.¹²Che kyimelju' ate'qe' najchaq tu'n yab'il, aye'tzu'n ate' nqaku' che kyimel toju' q'oj, aye'tzu'n che kjel kolchi che kyimel tu'n we'yaj. Ikytzu'n ktzajel nb'ajsa'ne' ntx'u'jile' kyi'j.¹³Ajtzun kyka'yinte woqo'jqe' kywitze'l kyimniqe'tl kyxolju' kywitzleb' ex kyi'jile q'olb'eb'l kye, kywi' kykyaqil ttxa'nwitz nimaq kywe', kywi'witz, kyxe tze cha'xqe', kyxe kykyaqil b'ansi pujin, ex jachaq xa'kyq'o'n tb'anil k'ok'sb'il kyeju' kywitzleb', k'eleltzun kynik'tz qa ayine' Dyos Manb'aj.¹⁴K'okyel nq'ob'e' kyi'j tu'n ttz'e'yset kywitz, jata' chq'ajlaj toj tnayajkya'j ponx Rib'la toj tb'a'nq'ob'kya'j, kjawil b'entju' kytanam ex tkyaqilu' jachaq najla'qe' wu'ne' te chq'ajlaj xob'ajilx. K'eleltzun kynik'tz qa ayine' Dyos Manb'aj, chi Dyos. Matxi' tzaj lq'eju' b'ajsb'il

¹Tzaj yolin Qman Dyos weye' ex tma:²Ayine' Dyos Manb'aj, nxinma'ne' teju' tnam Israel kjalu: Matxi' tzulju' b'ajsb'il q'ij, matxi' tzulju' b'ajsb'il te tkyaqilju' tx'otx'.³Matxi' q'naxa Israel. Ktzajel ntzaqpi'ne' ntx'u'jile' ti'ja; chin xjelule' teya ti'ju' tchwinqlala ex kb'el ntz'e'ysa'n twitza tu'n kypaj tkyaqilju' tb'inchb'aja mixyab'a'n.⁴Lay tzaj laqj nk'u'je' ti'ja; kb'el ntz'e'ysa'n twitza tu'n tpaju' tchwinqlal myab'a'n ex kb'ajel tchjo'na tu'n kypaju' tb'inchb'aja taq'wixqe'xi'x. K'eleltzun kynik'tze' qa ayine' Dyos Manb'aj.

⁵Ayine' Dyos Manb'aj nchin q'mante: Ka'yinxa matxi' tzul lq'e b'ajsb'il q'ij, lepchitzx yajte'n ti'j juntl yajte'n; matxi' pon b'ajsb'il q'ij teya.⁷Tzulju' xitb'il kyeye' aye' najliqe' toju' tx'otx'. Matxi' che q'anaxe'; matxi' tzul q'ij naq che b'elchukjiye'. Kb'ajelju' tzalajb'il kywi' witz.⁸Ktzajel ntzaqpi'ne' ntx'u'jile' kyi'je' ja'loxi'x tzmax ajtqe nk'u'je', chin xjelule' kyeye' ti'ju' kychwinqlale' ex kb'el ntz'e'ysa'n kywitze' tu'n tpaju' kyb'inchb'aje' taq'wixi'x.⁹Lay tzaj laqjtl nk'u'je' kyi'je'; kb'el ntz'e'ysa'n kywitze' tu'n tpaj kychwinqlale' myab'a'n ex kb'el kychjo'ne' kyb'inchb'aje' taq'wixi'x. K'eleltzun kynik'tze' qa ayine' Dyos Manb'aj nchin tz'e'ysante kywitze'.

¹⁰¡Luju' q'ij! ¡matxi' tzulkanun! ¡Matzulju' xitb'il! In kanb'anju' il toj tkyaqil plaj ex matxi' kub'chmet-xi'xtl pi'sil.¹¹Njaw q'oj ex naqx b'inchaj il nb'aj. Aye'tzunkye' xjal mixti'xte kykanb'a' tu'n kyq'inumal ex tu'n nche ẍch'in. Mixti'x che oka'.¹²Matxi' q'nax, matxi' pon q'ij te, mixti' jatu'n ttzalaja' ka'yil ex mixti' jatu'n tb'isuna' loq'ol. Kb'el ntz'e'ysa'ne' twitzju' nimaltib' toj Israel tuk'i'l ntx'u'jile'.¹³Alkye matk'ayi jun ti'xti' lay kotpetl tu'n toj tkyaqilu' tchwinqlal, ex lay b'ent tkub't-xitu'n matxi'toq t-xitk'a'yi'n. Lay b'ent kyk'u'nte' b'inchal myab'a'n kychwinqlal.

¹⁴In q'ajti chun te txokb'il toj q'oj; kykyaqil nkyb'incha'nkyib', extzun mix-a'lo' netz q'ojil. Kntz'e'ysa'ye' twitzju' tninb'iltib' Israel tuk'i'l ntx'u'jile'.¹⁵Ati q'oj ti'jxi', atzu'n tojxi' ati yab'il ex we'yaj. Aye' ate'qe' toj kojb'il che b'ajelkyim toj q'oj, aye'tzu'n ate'qe' toju' nintnam che b'ajelkyim tu'n we'yaj ex yab'il.¹⁶Maskye mache oq junjun kywi' witz, che b'ajelxob' kse'n paloms ex kykyaqil che kyimel tu'n tpaju' kyil.¹⁷Kykyaqil che b'elnuqtz'aj kyq'ob', ex che lu'lul kych'ek tu'n xob'el.¹⁸K'okyel kyq'o'n kyxb'alun te b'is te techlal k'ixk'oj; tkyaqil kyxmilal che jawil lu'lun, ex che b'elkyeqax kywitz tu'n kych'ixaw ex sk'o'ji'n kywi'.¹⁹Kb'je'lex kychto'n kysaqpwaq toj b'e; kb'je'lex kychto'n kyq'anpwaq naku'j tz'is. Lay b'ent kyklet tu'n kyq'anpwaq ex kysaqpwaq toju' q'ij ajttzaj ntx'u'jile' ayine' Dyos Manb'aj. Lay b'ent tqjen we'yaj kyi'j ex lay che noj kyu'n, qu'n tu'n tpaju' q'anpwaq ẍekub'a' tz'aq toj il.²⁰Tu'ntpaju' tb'anil che ka'yin kyu'n u'wj majaw kynima'n kyib', ex b'ajkub' kyb'incha'n kyilb'ilal kywitzleb' taq'wixqexi'x. Qu'mtzun che okyelju' u'wj lu wu'ne' te tz'is.²¹Knb'incha'ye' tu'n kyul najchaq xjal ex tu'n kyb'ajx kyelq'a'n, tu'n kyulju' xjal majx ik'u'nqe' twitz tx'otx' ex tu'n kyb'je'l kyiq'i'n kye, ex tu'n tkub'kyaju'n naku'j ti'xti' tz'il.²²K'elel npa'nwib'e' ti'ju' nintnam lu ex kjel ntzaqpi'ne' tu'n tb'aj txa'ju'n njaye' te k'u'lb'il, nk'uwen toqe'. Che b'ju'l taq'wix xjal ex kb'ajel kytz'ilsa'n.

²³B'inchanku'ya jun xpatx'i'n k'uxb'il, qu'n nim ktz'e'ysetel kywitz toju' tx'otx' tu'n tpaj b'yojwnaqi'n, ex nim xjal nche b'iyon toju' nintnam.²⁴Knb'incha'ye' tu'n kyul xjal b'inchal ilqe' ex che b'elkytzyu'n ja toju' nintnam. Kb'el nnajsa'ne' ninb'ilkyib'ju' nimaq kyoklen toj kywitz; knb'incha'ye' tu'n kyb'aj tz'ilixju' kynajb'il xjanqe'.²⁵Tzulxi'xju' xob'ajil kyi'j; kkyjya' nak'b'il, ex lay knet kyu'n.²⁶Lepchitzx yajb'il ti'j juntl yajb'il; e'tqanil taq'wix ti'j juntl. Layx knet jun t-sanjelal Dyos kyu'n tu'n tq'onte jun yek'b'il kye; mixti'x qekye' pale xnaq'tzalkye ex mixti'qe' tijwnaq q'olte jun kynab'l.²⁷Ktenb'elju' nimaqkawil toj b'is, kb'el tz'aqju' kawil toj b'is ex kjawil lu'lunju' tnam. Kche nse'ye' kse'nxju' kyb'inchb'aj ex che okyel toj xjel wu'ne' kse'nxju' e'oka' kyq'o'n txqantl. K'eleltzun kynik'tz qa ayine' Dyos Manb'aj. Yek'b'ilkye ti'xti' taq'wixi'x ntoq che b'inchanjtz toj Jerusalen

¹Toj tjwe'yi'n q'ij te tqaqi'n xjaw teju' tqaqi'n ab'q'i, q'uqli qintoqe' toj njaye' kyuk'i'lju' tijwnaq aj Juda. Naq minab'enx kub' tq'o'n Qman Dyos tq'ob' toj nwi'ye',²ex wile' jun naku'j jun ichan. Wile' naku'j q'aq'ju' tzajx jata' tk'elb'il ku'ponx kub'l, ex atlju' tzajx tk'etz tk'alb'il tojawl nqoptz'aj naku'j k'uxb'il.³Tzaj tnuqpi'n ichanju' naku'j jun q'ob'aj ex kuttzyu'n t-xya'mal nwi'ye'. Njawtzun q'i'ntze' tu'n tipumal Qman Dyos toj kyq'iq', nxi'tzun tiq'i'ntze' Jerusalen naku'j toj witzik' b'incha'n tu'n Dyos ex nkub' tq'o'ne' toju' qokyex tojxi' nintnam, tu'me'l tb'a'nq'ob'kya'j, jata' witzleb' nokq'onte ttx'u'jil Qman Dyos.⁴Atzuntzu' ta' tajwalil Qman Dyos janche ajb'ena' aj Israel, kse'nxu' ojetoq wile' toj witzik' toj plan tx'otx'.⁵Ex tzaj tma'n weye': ka'yinxa toj tb'a'nq'ob'kya'j, chij.
Nxi'tzun ka'yine' toj tb'a'nq'ob'kya'j ex wile' witzleb' nq'onte ttx'u'jil Qman Dyos atitoq toju' qokyex janqo okxa' tk'etz q'olb'eb'l.

⁶Tzaj tma'ntzuntz weye': ¿Matila taq'wixqe'xi'x nche kyb'incha'n aj Israel, tu'ntzun tpaj ja'lu nchin ex kyxla'ja'ne' toju' njaye' xjan? kpena' ktka'yi'ya txqantl ti'xti' taq'wixqe'xi'x, chij.

⁷Inxi'tzun tiq'i'ntze' toju' qokyex twi' pe'n. Q'ancha'l jun xopa'j toju' nintapi.⁸Tzaj tma'ntzuntz weye': Nimsanxa xopa'j toju' tapi, chij.
Xi'nnimsa'ne' xopa'j ex knet jun qokyex wu'ne'.⁹Tzaj tma'ntzuntz weye'. Kutokxa ex che ktka'yi'ya ti'xti' taq'wixi'x nche kyb'incha'n atzu', chij.¹⁰In okxe' ex wile' toj tkyaqilju' tnuqub' nintapi, b'incha'nk chukchaq kyilb'ilal txkup nche qitinje' ex txqantl txkup tz'ilqe' ti'j, ex tkyaqil chukchaq kywitzleb' aj Israel.¹¹Oxnaq lajoj (70) tijwnaq aj Israel, atitoq Jaasaniy tk'wal Sapan kyxol, intoq che k'ulun kye witzleb' lu. Teyile junjun q'i'n jun txq'aq'b'il, intoq jawtz b'uqchaj t-sb'el sturak naku'j muj toj.

¹²Tzajtzun tma'n weye': ¿Ma ntka'yi'na nkyb'incha'n tijwnaq aj Israel toj ewaj, teyile junjun ate'kx toju' tja twitzileb'? Toj kynab'l qa min nchin ka'yine' kye, exqa matxi' kyajntzaqpi'ne' kytanam, chij.¹³Ex tzaj tma'ntl: Kpena' che tka'yi'ya nkyb'incha'n txqantl ti'xti' taq'wixi'xtl, chij.

¹⁴Inxitiq'intzuntze' ttzi tja Qman Dyos, ju' ati toj tb'a'nq'ob'kya'j. Ate'toq junjun qya q'uqliqe', nche oq' twitzju' dyos Tamus.¹⁵Tzaj tma'ntzuntz weye': ¿Ma tilju'ya lu? Kpena' tka'ya txqantl ti'xti' taq'wixxi'x, chij.

¹⁶Inxitiq'i'ntzuntze' toj tpen tja Dyos ex wile' toju' qokyex toju' ja xjan, t-xolju' ttzija tuk'u'lju' q'olb'eb'l, ate'toqlo junaqjo' (25) ichan xinikyq'o'n kytze'lkyi'j tu'me'l ja xjan mejliqe'x tu'me'l tjawetzq'ij kupomni kyplaj twitz tx'otx', nche k'ulun te q'ij.¹⁷Tzajtzun tma'n Qman Dyos weye':
¿Ka'nxtzuna la? ¡Ma min nqe tk'u'ju' tnam Juda tu'nju' ntb'incha'n ti'xti' lu taq'wixqexi'x tzalu, expe' matxi' chmet b'yojxjali'n kyu'n toju' tx'otx' lu! Kukx tok kyq'o'n ntx'u'jilju'ye', ex matxi' japun kyab'il toj ntxa'ne' kyu'n.¹⁸Chin ultzunwe' tuk'i'l ntx'u'jile' kyi'j. Layx tzaj laqj nk'u'je' kyi'j. B'a'nqa mache ẍch'in tu'n kytxokon wi'je', layx che tzaj nb'i'ne', chi Dyos. Witzik' ti'ju' tz'e'ysb'il twitz Jerusalen

¹Yajxi'tzuntl nb'iye' jun tq'ojq'ojel wi'yj kuwxi'x, okx ẍch'in toj nẍkyine' kjalu: ¡Luqe' tz'e'ysalte twitz nintnam che ul, q'i'nile kyq'ojb'il te xitb'il! chij.

²Wiltzuntze' qaq ichan ntoq che okx toju' qokyex jawl toj qb'anq'ob' kya'j, teyile junjun q'i'n jun tb'ujb'il toj tq'ob'. Atitoq jun ichan kyxol tok t-xb'alun sed, q'i'nqe' ttz'ib'b'il ti'j tk'alb'il tk'u'j. Eb'jo'kx ex eb'ajkub' we' tk'etzu' q'olb'eb'l q'ank'uxb'il.³Jawtzu'n tajwalil Qman Dyos jawtl kyib'aju' naku'j xjalqe' ati kyxik', ja ojetoq tena', xi'tzuntz tu'me'l qokyex toj tja Dyos. Tzaj ttxko'n Qman Dyosju' ichan tok t-xb'alun sed, q'i'nqe' taq'unb'il te tz'ib'b'il ti'j tk'alb'il,⁴ex xitma'n te: Kuxtxi'ya tojile nintnam Jerusalen, ex q'onka jun kyechlal kplaju' nche b'isun ex nul toj kyk'u'j tu'n kypaj tkyaqilju' ti'xti' myab'a'n nche b'inchet toju' tnam, chij.

⁵Ex nb'iye' nxitma'n kyeju' txqantl ichan kjalu: Che lpexe' ti'j tojileju' nintnam, ex ktzyetelx kyu'ne' toju' njaye' te k'u'lb'il, che kyb'yonku'ye' tijwnaq, e'ku'xun, e'txin, e'k'wal ex e'qya, lalun tzaj laqj kyk'u'je' kyi'j. Aye'tzu'n ati kyechel lalun che kub' kyb'yo'ne', chij kye. Tzyettzuntz kyu'n tu'n kyb'yetju' tijwnaq ate'toq twitz tja Dyos.

⁷Ex xitma'ntl kye: Kukyxi'ye' toju' njaye' ex kytz'ilsame'; ex che kyb'yonqeku'ye' kywi'pe'n, chij kye. Eb'je'tztzuntz ex tzyet kyb'yet xjal kyu'n toju' nintnam.⁸Akxtoqtzun nche kyb'yo'n, inkyajtene' njunale'. Inkub' mejetzuntze' majx ku'pun nplaje' twitz tx'otx', ex njaw ẍch'ine' tu'n k'ixk'oj: Nman Dyos, ¿maktzajel tb'ajsa'na ttx'u'jila tib'aj Jerusalen tzmax ajkykub'aju' jte'tl itz'qe'x toj Israel?, nchije'.

⁹Tzajtzun ttzaq'we'n Qman Dyos weye:
Nimxi'xte' kyilju' tnam Israel ex Juda. Nim txqan b'yoj wnaq'i'n toju' tx'otx'; ex mixya tnik'alilti'ju' nb'inchanjtz toju' nintnam. Chechilo qa matxi' kyej ntzaqpi'ne' tx'otx' exqa min nka'yi'ne' titi' nkyb'incha'n.¹⁰Layx tzaj laqjwe' nk'u'j kyi'j, che okyel toj xjel wu'ne' ti'ju' kyb'inchb'aj, chij.

¹¹Anjtzun ti'ju' ichan tok t-xb'alun sed iq'i'n taq'unb'il te tz'ib'b'il tk'etz tk'alb'il tk'u'j, ex tma: Matxi' nb'inchaju'ye' tchaq'a weye', chij. Min tentl tajwalil Dyos toju' ja te k'u'lb'il

¹Ex wile', q'ancha'lix jun naku'j q'uqb'il ex naku'j sapiro tib'ajxi' kya'j, tib'aj kywi' kyerb'in,²ex xitma'n Qman Dyos teju' ichan tok t-xb'alun Sed kjalu: Kutokxa kyxolju' ttulil karwaj, kyjaq'ju' kyerb'in, ex q'intza jun txab' ttxalq'aq' nk'ant ti'ju' ati kyxolju' kyerb'in, ex chtonxa tib'aju' nintnam, chij.
Ex wile' tej tokxju' ichan.³Atoqtzu' ta'qe' kyerb'in toj tnayajkya'j teju' tja Dyos toju' kmuj lu, ex noj toju' pe'n tu'n jun muj.⁴Jawxtzu'n tajwalil Qman Dyos kyib'aju' kyerb'in, xi'tzuntz tu'me'lju' qokyex toj tja Dyos; ex noju' tja Dyos tu'n muj, atzu'n twi' tpen kub' spik'e' tu'n t-spik'umal tajwalil Qman Dyos.⁵Q'ojq'oj kyxik'ju' kyerb'in tzmaxtzu' twi' pe'n ti'jxi'. Naku'j a Dyos nimtipumal nyolin.⁶Tchaq'tzun Qman Dyos teju' ichan tok t-xb'alun Sed tu'n tetztiq'i'n q'aq' kyxolju' ttulil karwaj, kyxolju' kyerb'in. Xi'ju' ichan ex okten tk'etz junju' tul.⁷Q'ancha'lix jun naku'j tq'ob' jun xjal kyjaq' kyxik'ju' kyerb'in. Xitnuqpi'n jun kyerb'in tq'ob' ti'ju' q'aq' atitoq kyxol, jawtiq'in ch'i'n ex kub' tq'o'n toj tq'ob'ju' ichan tok t-xb'alun sed, tzajtzun ttzyu'n ex xi'tzuntz.⁹Wile' kyaje' tul kyk'etzju' kyerb'in, junjun tk'etz junjunkye. Inche qoptz'aju' tul kse'nqe' ab'j topasyo.¹⁰Junelniqe' kyaje' tul ex naku'j tokxu' jun tojxi' juntl.¹¹Ajkyxib'etju' kyerb'in toj junju' kyaje' tu'me'l, mixti' tu'n tanjtzkyi'j, ljo'nx kyb'e jaxu' ljona' tb'eju' nejli.¹²In qoptz'ajile kyi'j toj tkyaqil plaj, e'kyxmilal, kytze'lkyi'j, e'kyq'ob' exqe' kyxik', ex ikxqe' kyaje' kytulil.¹³Ex nb'iye' axtoq kyb'i tulju' nok q'o'n karwaj.¹⁴Teyile junjun kyerb'in ati kyaje' kyilb'ilal: aju' tnejel kyilb'il kse'n ka'yin jun tman wakx; atzu'n tkab' kse'n ka'yin jun ichan; atzu'n toxi'n kse'n ka'yin jun b'alun; atzu'n tkyaji'n kse'n ka'yin jun t'iw.¹⁵Aye'xkye kyerb'in ju'lu ojetoq che nka'yiye' ttzi nin a' Kyeb'ar. Ejaw lq'eju' kyerb'in lu,¹⁶ex tej kxi'lq'e, ikyqe'xju' kytulil e'xi' kyuk'i'l; ex tej njaw kyiq'in kyxik' tu'n kyjaw lipan twitz tx'otx', ikyqe'xju' kytulil min kyaj kypa'n kyib' kyi'j;¹⁷Ajkywe', ex ikx nche we'ju' tul; ex ajkyjaw lipan ex ikx nche jawju' tul, qu'n majxtoq iqa'mile kyib'ju' tul kyi'j.

¹⁸Jawtzu'n tajwalil Qman Dyos tib'aju' tja Dyos ex xi'kub'aten kyib'aju' kyerb'in.¹⁹Jawkyiq'i'n kyxik' ex eb'jaw lipan tib'aju' tx'otx'. E'wile' se'ntaq'wi kyjaw, kyuk'i'lxi' tul ktxlaj, ex se'ntaq'wi kywe' tib'aju' ttzi tja Dyos toj tjawetzq'ij. Atitoqju' tajwalilju' Qman Dyos kyib'aj.²⁰Aye'xju'lu ojetoq che wile' naku'j xjalqe' ati kyxik' ate'qe'kx tjaq'ju' Qman Dyos, ttzi nin a' Kyeb'ar. E'wiltzuntze' se'n kyten.²¹Teyile junjun ati kyaje' che ka'yin ex ati kyaje' kyxik', ex nche q'ancha'lin naku'j tq'ob' xjal kyjaq'ju' kyxik'.²²Ikx che ka'yinju' se'nqe' naku'j xjalqe' ati kyxik' ojetoq che wile' ttzi nin a' Kyeb'ar. Teyile junjun xinb'eta' twitzxi'. Tz'e'ysb'il twitz Jerusalen

¹Injaw tiq'i'ne' tipumal Dyos ex nxitiq'i'ne' toju' plaj tjawetzq'ij te tja Qman Dyos. Ate'toq junaqjo' (25) ichan ttzija. Elnnik'e' te Jaasaniy tk'wal Asur, ex Pelatiy tk'wal B'enayiy, nejenelqe' te tnam, ate'toq kyxol.²Ex tzaj tma'n Qman Dyos weye':
Aye'tzun b'inchaltten b'yojxjali'n ja'lu ex nkynk'u'nti'j tu'n kyb'inchante myab'a'n toju' nintnam lu.³Inkyma'n: Tzqeku' kyb'jaw qb'incha'ntle' ja. Qokletelqe' tzalu, kse'n chib'j toj k'wil, chechij.⁴Qu'mtzun q'manxa kye toj nb'iye', chi Dyos.

⁵Ulju' t-xew Qman Dyos wib'aje', ex tchaq' tu'n txinma'ne' kjalu:
A ntma'n Qman Dyos ja'lu: ma atzun nkyxima'nju'ye' lu, aj Israel. Wojtzqi'nweye' kyxime'.⁶Nimxi'x b'yoj wnaqil matxi' b'aj kyb'incha'ne' toju' nintnam lu, matxi'xi'x b'aj noj kyoju' xky'ichb'e kyu'n kyimni kyu'ne'.⁷Qu'mtzun kxe'l nma'ne' kyeye' axxi'x, ayine' Dyos Manb'aj: ikyk'okyela' Jerusalen kse'n jun k'wil, mitzun yaqe'kye' chib'j toj, aye'kye' kyimni oje che b'aj kub' kyb'yo'ne', che jawetz wiq'i'nkye' toju' k'wil.⁸¿Ma nche xob'e' te q'oj? Tzulwiq'i'n q'oje' kyib'aje', ayine' Dyos Manb'aj nchin yolin.⁹Ktzajel nq'o'ne' tz'e'ysb'il kywitze': che elexwiq'ine' tzalu ex che kxe'lnq'o'ne' toj kyq'ob' xjal min ojtzqi'nqe' kyu'ne'.¹⁰Che b'ajkyimele' tu'n k'uẍtx'e'nb'il. Che okyele' toj xjel wu'ne' kyoj tnqachil Israel, k'eleltzun kynik'tze' qa ayine' Dyos Manb'aj.¹¹Lay tz'ajb'enju' nintnam te k'wil kyeye', ex myaye'kye' che okyel te chib'j. Che okyelkye' toj xjel wu'ne' kyoj tnaqachal Israel,¹²k'eleltzun kynik'tze' qa ayine' Dyos Manb'aj. Na'mx kyanq'inkye' kse'nxju' nmaye' kyeye' ex na'mx kyanq'ine' kyoju' nkawb'ile', xi'matxi' che'xa' lpeye' ti'ju' nkyb'incha'n nimaqtnam kyi'jileye', chiku'ya, chi Dyos.

¹³Akxtoqtzun nchin yoline' kye toj tb'i Qman Dyos, kub' tz'aq Pelatiy, tk'wal B'enayiy, majx kyim. Inkub' mejeye' majx ku'pun nplaje' twitz tx'otx', injaw ẍch'ine' kuw ex nmaye': ¡Taye! ¿Makb'el tb'ajsa'na jte'tl aj Israel itz'qe'x? nchije'. Tzaj tma'n Qman Dyos tqanil jun ak'a'j yol

¹⁴Tzaj yolin Qman Dyos weye', ex tma:

¹⁵Inche yolinju' xjal najlqe' toj Jerusalen kyi'ju' aj Israel, ju' twnaqila, inkyma'n: ¡Najchaq ta'qe'kye'lu ti'j Qman Dyos! Ayo'tzunqe', matzaj tq'o'n tx'otx' qe tu'n qok te tajaw, chechij.¹⁶Qu'mtzun q'manxa kye: Lu ntma'n Dyos kjalu: Ayine' ẍinetz q'inkye toj kytx'otx', ex mache'x nsputi'ne' kyxol nimaqtnam, kyoj tx'otx' min ojtzqi'n kyu'n, ex naq te jte'x tq'ijlalil. Ayinxe' chin okyel te jun ja xjan kye kyoju' tnam jachaq ẍe'xa'.¹⁷Q'manxa kye: A ntma'n Dyos ja'lu: K'anjetz kyi'j wu'ne' kyoju' tx'otx' ex nimaqtnam lu ja matxi' che'xa' nsputi'ne', che tzajel nb'u'yi'ntle' ex kxe'l nq'o'ntle' tx'otx' Israel kye.¹⁸Che pomil junmajtl toju' kytanam ex kb'el kynajsa'n tkyaqilju' ntoq kyb'incha'n ik'b'ajilx ex taq'wixqe'xi'x.¹⁹K'elel wiq'i'ne' kyanmi kuwxi'x kse'n ab'j, kxe'l nq'o'ne' jun kyanmi ak'a'j ex jun kyxew ak'a'j.²⁰Che anq'iltzuntz kse'nqe'x nkawb'ile' ex nnuk'b'ile', ex che kxe'l kyb'incha'n. Che okyel te ntaname' ex che ajb'el weye'.²¹Aye'tzunkye' nche anq'in toju' myab'a'n ex ik'b'ajil taq'wixi'x lu, che okyel toj xjel wu'ne' ti'ju' kyb'inchb'aj. Ayine' Dyos Manb'aj nchin yolin, chi Dyos. El lq'e tajwalil Qman Dyos ti'j Jerusalen

²²E'jaw lipanju' kyerb'in, kyuk'i'lxi' kytulil. Jawtzu'n tajwalil Dyos janche ajb'ena' aj Israel, ju' atitoq kyib'aj ex el lq'e ti'ju' nintnam, xi'pona'ten tib'aju' witz ati toj tjawetzq'ij te nintnam.²⁴Njawtzun tiq'i'ne' tipumal Dyos ex anjtlwi'je' tu'n toj B'ab'ilon, ja ta'qe' txqantl b'je'xniq'i'nqe' toju' tx'otx'. B'aj ju'lu toj jun naku'j witzik' tzaj tyek'u'n t-xew Dyos weye'. Tb'ajlenxi'tzun ja'lu kub' naju' naku'j witzik',²⁵Ex xinma'ne' kyeju' b'je'xniqe' toj kytx'otx', tkyaqilju' matxitoq tzaj tyek'u'n Qman Dyos weye'. Tma Esekyel tqanil kyelex iq'i'n toj kytx'otx'

¹Tzaj yolin Qman Dyos weye' ex tma:

²Ichan, najliya kyxol jun tnam xjal pi'sqe'. Ate' kywitz tu'nkyka'yi'n, ex min nche ka'yin; ate' kyẍkyin tu'n kyb'in, ex min nche b'i'n, qu'n jun tnamqe' ma jawkyi'nkyib' wi'je'.³Qu'mtzun b'uyima nojqelan teya tu'n texa toju' ttx'otx'a, ex kutexa toju' tjaya te q'ijtl kywitzku' kykyaqil, ex kutxi'ya toj juntl najb'il; qaj k'elelkynik' qa jun tnam pi'sqe'.⁴Iq'inqe'mitza ti'xti' teya te q'ijtl kywitzku' kykyaqil, naku'xwitloj matxi'ya toj juntl tx'otx'; ex kutetza te qale kywitz kykyaqil, naku'xwitloj matxi'ya toj juntl tx'otx'.⁵Yajxi'tzuntl b'inchamixa jun xopa'j toju' nintapi kywitz kykyaqil, kutextzuntza toj kyuk'i'lju' ti'xti' teya.⁶Ex ajqok yupj, q'onqe'kxa ti'xti' teya ti'j tqula ex kutexa kyuk'i'l kywitz kykyaqil. Jpunku' twitza, tu'n lalun tilju'ya tx'otx'. Wajb'ile' tu'n toka te jun techlal te lab'te'n teju' tnam Israel, chi Dyos weye'.

⁷B'ajkub' nk'u'ne' ti'xti' weye' kse'nx tchaq' Qman Dyos weye', ex q'ijtl inetze' kyuk'i'l, naku'xwitloj machin exe' toj juntl tnam. Tetzun qale okxnlku'ne' jun xopa'j kyu'n nq'ob'e' toj tapi, ex tej qok yupj kywitzku' kykyaqil jaxnq'o'ne' ti'xti' ti'j nqule' ex inetze' kyuk'i'l.

⁸Tzaj yolin Qman Dyos weye' te juntl prim, ex tzaj tma'n:

⁹Axxi'x matxilo tzaj kyxjelu'n aj Israel pi's tnam teya titi' ntb'incha'na'.¹⁰Q'manxa kye qa jun tqanil ju'lu wu'ne' teju' nimaqkawil toj Jerusalen ex kye aj Israel najliqe' atzu'.¹¹Q'manxa kye qa aya jun techlal te lab'te'n kye, exqa ikxkyb'incha'ju' se'n yek'b'il xtb'inchaya, qu'n che kxe'lq'i'n toj junxi'tl tx'otx'.¹²Che jawixtq'o'n kynejel ti'xti' te ti'j tqul, ajtzun qok yupj k'elex kyuk'i'lju' tiq'in toj jun xopoj k'elex b'incha'n toju' nintapi. Jpu'n twitz ajtex tu'ntzun mix-a'lo' k'okyel ka'yinte ex tu'n lalun txitka'yi'n tnam.¹³Kxe'l nxone' pa tzuyb'il kyiẍ tib'aj ex ktzyetel wu'ne'. Kxe'l wiq'i'ne' B'ab'ilon, toj kytx'otx' kaldey, layxtzu til, ex atzu' kkyimela'.¹⁴Che b'ajxe'l nsputi'ne' xq'uqilkye kyi'jile toj kyq'iq' toju' kyaje' plaj, exqe' txqantl kyxjal te q'oj, chin xel lpeye' kyi'j tuk'i'l nk'uẍtx'e'nb'ile'.¹⁵Ajtzun kyb'ajx nsputi'ne' kyoj txqantl tx'otx' ex nimaqtnam, k'eleltzun kynik'tz qa ayine' Dyos Manb'aj.¹⁶Oktzun nb'incha'ye' tu'n kyklet junjun teju' q'oj, te we'yaj ex te yab'il, tu'ntzun txi' kyoli'n tkyaqilju' ti'xti' taq'wixi'x b'aj kyb'incha'n ajkypon kyoj nimaqtnam jamache pona' ex tu'n telkynik' weye' ayine' Dyos Manb'aj, chi Dyos. Juntl tqanil tz'e'ysb'il witzb'aj

¹⁷Tzaj yolin jumajtl Qman Dyos weye', ex tma:

¹⁸Ichan, lu'luna tu'n xob'el ajtwana ex toj k'ixk'oj aj tk'wante tk'wa'ya.¹⁹Ex q'manxa kyeju' najliqe' toju' tx'otx' ex toj Jerusalen, ex kye kykyaqil aj Israel: Intma'n Qman Dyos kjalu: Toj b'is che wala' kywa, ex toj xob'el kxe'la' kyk'wa'n kyk'wa'; kjel xitu'n kytx'otx' ex mixti'tl kjel najal toj tu'n tpajju' xjal najliqe' toj naqx nche q'ojin.²⁰Tkyaqil nimaqtnam naja'n kyu'n xjal kjel xitj; naq chq'ajlajtl kjeltena'ju' tx'otx'. K'eleltzun kynik'tze' qa ayine' Dyos Manb'aj, chi Dyos.

²¹Tzaj yolin Qman Dyos weye', ex tma:

²²¿Titi' tz'elpuna' nkyma'n aj Israel qa nche b'jik'ju' q'ij, extzun min njapunju' ntma'n t-sanjelal Dyos?.²³Ja'lo q'manxa kye: a ntma'n Dyos ja'lu: knb'incha'ye' tu'n lalun q'manjtztlju' yol lu toj Israel. Ex q'manxa kye qa nqaku' ta'tlju' tq'ijlalil tu'n kyjapunju' q'ma'ntl tu'n nsanjelale'.²⁴Lay che ultl tpak'b'al mya ax kyxol aj Israel ex tpakb'al chajyolilqe',²⁵Qu'n ayine', Dyos Manb'aj, chin yolile', ex aju' knma'ye' kjapumel lwiy. Kyka'yi'kuye', aye'ye' pi's tnam; chin yolile' ex knb'incha'ye' tu'n tjapunju' knma'ye'. Ayine' Dyos Manb'aj, nchin yolin, chi Dyos.²⁶Tzaj yolin Qman Dyos weye' ex tma:²⁷Inkyma'n aj Israel qa yaj che japumelju' tqanil nche tpakb'a'na.²⁸Qu'mtzun q'manxa kye: Intma'n Dyos kjalu: Naqch'inxtl kyjapunwe' nyol, che japumelwe' nyol oje nma. Ayine' Dyos Manb'aj nchin q'mante, chi Dyos, chiku'ya kye. Kb'el ttz'e'ysa'n Qman Dyos kywitzju' sanjelal chalyolqe'

¹Tzaj yolin Qman Dyos weye', ex tma:

²Yolin toj nb'iye' kyi'ju' sanjelal kyxol aj Israel, aye' sanjelal lu kyolxkye nkyma'n, q'manxa kye: Kyb'ime' tyol Qman Dyos:³¡Layqe'xwitju' sanjelal mixti' kynab'l, lepchiqe'x ti'jxju' kynab'l ex mixti'xi' matxi' tzaj yek'u'n kye axwit!⁴Ikyqe' t-sanjela, Israel, kse'nqe' chuẍ najliqe' toj ttx'anqa'n ja.⁵Mixti'xi'te kyb'incha tu'n kyktelju' aj Israel, tu'nwtlo miche yajta' toj q'oj ajtulju' tq'ijlalil tu'n Qman Dyos.⁶Mya ax qe' nche tzaj yek'u'n kye exu' tqanil nkyma'n noq chajyolilqe'. Inkyma'n qa ayine' chq'olkye, extzun b'ajx che'xa' ncheq'o'nawe', ¡intzun che ayon tu'n tjapunju' kyol!⁷¡Chajyolil qekye' naku'j kywitzik'! ¡mya ax qe'ju' tqanil nkyma'n! Inkyma'n qa ayine' ẍintzaj chq'onkye, mixtzunti'we' nxinma'n kye.⁸Qu'mtzun nxinma'ne' kyeye', ayine' Dyos. Ina' kyma'ne' ti'xti' mya ax ex chajyoilil qe' kywitzik'e', ajq'oj qine' kyi'je'. Ayine' Dyos Manb'aj nchin q'mante.⁹K'aq'pomel nq'ob'e' tu'n ttz'e'yset kywitzju' sanjelal ati kywitzik' mya ax qe' ex chajyolilju' tpakb'alil kyu'n. Lay che ten toju' b'uyjtib'il teju' ntaname' Israel; lay ku'x kyb'i toju' tu'jil kyb'i aj Israel, ex lay che okx toju' kytx'otx' aj Israel. K'eleltzun kynik'tze' qa ayine' Dyos Manb'aj.

¹⁰Iku', mache kub' kysb'u'n ntaname', inkyma'n qa tkyaqil b'a'nile tel, extzun axxi'x mikxa'ju'. Ikyqe'ju' kse'n jun xjal njaw tb'incha'n jun tapi myab'a'n b'inchb'ente ex nok txuma'n ti'j.¹¹Q'manxa kyeju' nche txuman ti'j tapi, qa tzul tz'aqju' tapi. Tzul nin jb'al, ex tzul saqb'aqun naku'j ab'j, ex tzul kyq'iq'jb'al njub'in,¹²ex kb'el tz'aqju' tapi. Kxel qani'ntzuntz kye: ¿Ti'tzu'n xb'aj ti'ju' txun sok kyq'o'ne' ti'ju' tapi? chiku'¹³Qu'mtzun nxinma'ne', ayine', Dyos Manb'aj: Tzul nq'o'ne' jun kyq'iq' jb'al toj ntx'u'jile', tzul nq'o'ne' txqan jb'al tuk'i'l saqb'aqun naku'j ab'jqe', tu'n tb'aj xitj tkyaqil tu'n nq'oje.¹⁴Ex kb'el nxi'tu'ne' tapi sok kytxuma'ne' ti'j; kb'el nxone' twitz tx'otx', ex kjel q'ancha'lixju' tq'uqb'il. Iku', kb'el tz'aqju' tapi twitz tx'otx', ex che kyimele' kyu'n ttx'anqa'n loq' ajtkub' tilj. K'eleltzun kynik'tze' qa ayine' Dyos Manb'aj.¹⁵Tzulnb'ajsa'ne' ntx'u'jile' ti'ju' tapi lu, ex kyi'ju' ẍe oktxumanteti'j, aye'tzu'n xjal kkyma': Majx xkub'ajte' tapi ex majx ẍeb'aju' e'oktxumanteti'j,¹⁶mya axte' kywitzik'ju' kysanjel aj Israel, ax qe' tqanil kyu'n te Jerusalen qa b'a'nile tel tkyaqil, extzun axxi'x mikxa'ju', chechiku'. Ayine' Dyos Manb'aj nchin q'mante. Kttz'e'ysa' Qman Dyos kywitzju' qya sanjelalqe'

¹⁷Ichan, q'manxa ja'lo kyeju' qya toj ttanama nche yolin toj nb'iye' tu'nx kynab'l,¹⁸q'manxa kye kjalu:
A ntma'n Dyos ja'lu: ¡Layqe'xwite' nche b'ete' tzyulkye xjal; ex nkub' kytz'so'ne patzb'il naku'j ati toklen tu'ntzun kykyaqil xjal che okq'onte ti'j kyq'ob' kse'n echb'il q'ij, ex nche kyb'incha'ne' xb'alun toj wi'yj tu'ntzun kykyaqil xjal che jax q'onte toj kywi'! ¿Ma toj kyq'ob'e' ta' kychwinqlal ntaname' ex kamik kyi'j, kse'nx kyajb'ile'?¹⁹Inel kyiq'i'ne' nch'ixawe' kywitzju' ntaname' naq tu'n junjun txab' Seb'ad ex tu'n junjun piẍ wab'j; nche kub' kyb'yo'ne' xjal mixti' tu'n kykyim; ex min nche kub' kyb'yo'ne' xjal ati tu'n tkyim, ikytzu'n nche kub'kysb'u'ne' ntaname', inxikyb'i'nju' chajyolil.²⁰Qu'mtzun inma'ne', ayine' Dyos Manb'aj, kjalu: Machin oke' ajq'oj kyi'ju' patzb'il naku'j ati kyoklen nkyb'incha'ne', nche ajb'en kyu'ne' tzuyb'il xjal kse'n pich' toj xpatxab'. Kche ntzaqpi'weye' xjal lu toj kyq'ob'e', ex che kjel nq'o'ne' tu'n kylipan tzaqpi'nqe';²¹kntzaqpi'ye' ntaname' toj kyq'ob'e' ex teju' xb'alun njax kyq'o'ne' toj kywi', ex lay che tzyetl kyu'ne'. K'eleltzun kynik'tze' qa ayine' Dyos Manb'aj.²²Mache jaw b'isunju' b'a'n kyel tu'n kychajyolile', aju' myatoq wajb'ile' tu'n tb'inchet, xi'pe' ẍe'xa kyoni'ntle' b'inchal myab'a'n tu'n txi' kyljo'n kychwinqlal myab'a'n, tu'n lalun txinq'o'ntl anb'ile' tu'n kyanq'in.²³Qu'mtzun lay che witzk'antle' te sb'ub'l ex lay che pakb'antle' ti'ju' tqanil naq chajyolil. Knkla'we' ntanam toj kyq'ob'e', k'eleltzun kynik'tze' qa ayine' Dyos Manb'aj, chiku'ya, chi Dyos. El ik'o'n k'u'lb'il kye witzleb'

¹B'a'npun tijwnaq aj Israel eb'ju'l wuk'i'le' tu'n kyxjelun te Qman Dyos.²Tzajtzun yolin Qman Dyos weye', ex tma:

³Majx q'o'nkyib'ju' ichan lu tu'n kyk'ulun kye witzleb' ex majx tokkywitz tu'n kyb'inchan il. ¿Ma oktzun kxe'l nq'o'ne' anb'il kye tu'n kyxjelun weye'?⁴Q'manxa kye: A ntma'n Dyos ja'lu: tkyaqilu' aj Israel majx q'o'ntib' k'ulul kye witzleb' ex majx toktwitz ti'ju' b'inchaj il, extzun tzultl xjelul teju' nsanjelale', kxe'l nq'o'ne' tzaq'web'l axju' nojqelan kye tu'n tpaj nim kywitzileb', chiku'ya.

⁵K'okyel ntzyu'ne' kyanmi kykyaqil aj Israel elkypa'n kyib' wi'je' tu'n tpaj kywitzleb'.⁶Qu'mtzun q'manxa kye aj Israel: A ntma'n Qman Dyos ja'lu: kutanjtz kyi'je' wuk'i'le', kypa'mil kyib'e' kyi'j kywitzleb'e' ex kyxonkje' tkyaqilju' ti'xti' taq'wiqe'xi'x.⁷Qa jun aj Israel mujqa jun najchaq xjal najli toj Israel matz'el tpa'ntib' wi'je' ex mataq'tib' k'ulul kye witzleb', ex matz'ok tq'o'n twitz b'inchal il ex mapon tuk'i'l jun nsanjelale' tu'n tyolin wuk'i'le', ayinku'ye' chin xel q'onte tzaq'web'l te:⁸Chin okyel tzaqpaje' ti'ju' ichan lu ex kb'el ntz'e'ysa'ne' twitz te jun yek'b'il, tu'n tkub' kyoli'n kykyaqil, ex kb'el nnajsa'ne' toju' ntaname'. K'eleltzun kynik'tze' qa ayine' Dyos Manb'aj.

⁹Qatzun mataq' jun sanjelal jun tpakb'al mya ax, ayintzuntze', ayine' Dyos Manb'aj, ẍin kub' sb'unte sanjelal lu; kjawil wiq'i'n nq'ob'e' tu'n ttz'e'yset twitz ex kb'el nnajsa'ne' toju' ntaname' Israel.¹⁰Kb'el tz'e'yset twitzju' ichan nxjelun tuk'i'lxi' sanjelal tu'n tpaju' kyil,¹¹tu'n lalun tz'el tpa'n jumajtltib'ju' tnam Israel wi'je' ex tu'n lalun ttz'ilsatltib' tu'nju' il lu. Che okyel te ntaname' ex che ajb'el weye', ayine' Dyos Manb'aj nchin q'mante, chi Dyos. Ilti'j tu'n ttz'e'yset twitz Jerusalen

¹²Tzaj yolin Qman Dyos weye', tma:¹³Qama b'inchan il jun tnam wi'je' ex min ntb'incha'n wajb'ile', kjawil wiq'i'n nq'ob'e' tu'n ttz'e'yset twitz ex k'elel wiq'i'ne' twa; tzul nq'o'ne' we'yaj ti'j ex che kyimel xjal exqe' alu'mj.¹⁴Naqwit ate' Noe, Danyel ex Job' toju' tnam lu, oqe'kxwitlo kyoxil tu'n kyklet tu'nju' tnik'alkyi'j. Ayine' Dyos Manb'aj nchin q'mante.

¹⁵Ex naqwit che tzaj nsma'ne' tojk'ul txkup xob'ajilqe'x ti'j jun tnam, tu'n kykub' tb'yo'n xjal najliqe' toj ex tu'n tkyaj chq'ajlajtl jamix-a'lo'tl ktja' tu'n tik' tu'n xob'el kye tojk'ul txkup mya'lqe',¹⁶noqwit che najanju' oxe' ichan toj, laywitlo che kletju' kyk'wal ex kymyal; o'qe'kxwitlo kyoxil tu'n kyklet, exwitlo kjelju' tx'otx' naq jun chq'ajlajtl. Ayine' Dyos Manb'aj inchin qmante.

¹⁷Mujqa ma'wt tzul nq'o'ne' q'oj ti'ju' tnam lu exwit nchaq'e' tu'n kykyim xjal ex alu'mj,¹⁸ex najliqe'wtju' oxe' ichan lu atzu', laype'wtlo b'ant kykletju' kyk'wal ex kymyal; oqe'kxwitlokye tu'n kyklet. Axxi'x ayine' Dyos Manb'aj nchin q'mante.

¹⁹Mujqa tzajwit nq'o'ne' yab'il ti'ju' tnam lu, ex toj ntx'u'jile' kb'el wawa'ne' kamik exwit che kub' nb'yo'ne' xjal ex alu'mj,²⁰najliqe'wt Noe, Danyel ex Job' atzu', laype' che kletju' kyk'wal ex kymyal; oqe'kxwitlokye che klet tu'nju' tnik'alkyi'j. Axxi'x ayine' Dyos Manb'aj nchin q'mante.

²¹Ayine' Dyos Manb'aj nchin q'mante: Masxi'xpete' ajttzalaj nq'o'ne' kyaje' tz'e'ysb'il witzb'aj kuwqe'xi'x ti'j Jerusalen: aju' q'oj, ex we'yaj, e'tojk'ul txkup mya'lqe' exju' yab'il, tu'n kykub' kyb'yo'n xjal ex alu'mj.²²Naqjte'x che kjel anq'in ex kb'antel kyetz kyuk'i'l kyk'wal ex kymyal. Ajtzun kypon kyuk'i'le', kkyla'ye' se'n ẍe anq'ina' exqe' ti'xti' eb'aj kyb'incha'n, ex kqeb'el kyk'u'j tu'n tz'e'ysb'il witzb'aj a tzaj nq'o'ne' tib'aj Jerusalen.²³Kqeb'iltzun kyk'u'jtz ajkyka'yinte se'n matxi' che anq'ina' exqe' ti'xti' matxi' che kyb'incha. K'eleltzun kynik'tze' qa ati saja' nq'o'ne' tkyaqilju' xnb'inchaye' ti'j Jerusalen. Ayine' Dyos Manb'aj nchin q'mante, chi Dyos. Ikyqe' aj Israel kse'n junwi' ub'a mixti'x tajb'en

¹Tzaj yolin Qman Dyos weye' ex tma:

²¿Ti'tzu'n tb'anilju' tqan lob'j ub'a kyetwitzju' tze nb'je'l kyi'j nimaq tze?³Mixti'xte' tajb'enju' tqan, ¡tk'ixpe'wt te jun tqan sab'l tx'ajinj!⁴Naqxte si tu'n tajb'ena'. Ex ajtb'aj tz'e'yju' tq'ob' tu'n q'aq' ex ajttxalq'aq'ixju' toj nky'ajchaq, mixti'tl k'ajb'ela'.⁵Mixtoqpena' tiẍ tajb'en kse'nxtoqu' tten nejtl, ¡mixyate' ja'lo tz'e'ynaqtl mixti'x tajb'en!

⁶Qu'mtzun inma'ne', ayine' Dyos Manb'aj: Ikytzu'n kse'n tqan lob'j ub'a nnokxq'et toj q'aq' tu'n tk'ant, ikyxtzu'n che okyex nq'o'ne' xjal najlqe' toj Jerusalen toj q'aq'.⁷Chin okyele' ajq'oj kyi'j. Kb'entel kyklonte kyib' te jun q'aq', tu'ntzun juntl q'aq' che b'ajela'. Ajtzun wokye' te kyajq'oj, k'eleltzun kynik'tze' qa ayine' Dyos Manb'aj.⁸Kjeltenju' kytx'otx' naq jun chq'ajlajtl wu'ne', tu'n tpaju' min xkyb'inchaju' wajb'ile'. Ayine' Dyos Manb'aj nchin q'mante, chi Dyos. Elkypa'n kyib' aj Jerusalen ti'j Dyos

¹Tzaj yolin Qman Dyos weye', ex tma:

²ichan, chik'b'anxa kye aj Jerusalen taq'wixqe'xi'xju' ti'xti' matxi' kyb'incha.³Q'manxa kye: a ntma'n Dyos ja'lu: Aj Kanaanta ttzajlena, Jerusalen, titz'jlenxa; amorey tmana atzu'n ttxuya itit.⁴Min elk'pu'n taq'e'l tmuxa tej titz'jiya, ex min ku'x ichi'na, ex min okqcho'n atz'an ti'ja, ex min pasinjtza.⁵Mix-a'lo' tzaj laqj tk'u'j ti'ja ex mix-a'lo' b'inchankye ti'xti' lu teya. Kyej xona toj kojb'il toju' q'ij tej ti'tz'jiya, qu'n intoq tzaj molmon kyk'u'j teya.⁶Inik'e' tk'etza, ex tej nka'yinteye' ntxakajlaya toj chik', kub' nximane' tu'n tanq'ina.⁷Nch'iysaya naku'j jun awal toj kojb'il. Ch'iytzuntza, matxitoq qyayixa. Eb'aj ch'iyju' timiẍa, ex b'aj ch'iy t-xya'mal. Extzun ẍb'iqlitoqa b'a'nxi'x.

⁸Inik' jumajtle' tk'etza, ex wila matxi'toq ch'iyxi'xa; matxi'toq pon tab'q'iya tu'n tok xmoxita. Xinlik'u'ne' ntxo'we' tib'aja, ex b'aj nktxu'na ẍb'iqliya, ex b'ant nyole' tuk'i'la; kyej b'antti'j qyol tuk'i'la, ex oka te weye'. Ayine' Dyos Manb'aj nchin q'mante.⁹Ex b'aj wichi'na, b'aje'l nẍtilsa'ne' tik'len chik' ti'ja ex oknq'o'ne' k'ok'sb'il ti'ja;¹⁰oknq'o'ne' t-xb'aluna tb'anil tilb'ilal ex oknq'o'ne' t-xajab'a tb'aniltz'u'n; xinq'o'ne' jun tpasa sed ex t-xb'aluna tz'umin chmob'ente;¹¹b'aj nb'incha'na kyoj tachb'ila, oknq'o'ne' xb'alun tqul tq'ob'a ex jun tuya tqula;¹²oknq'o'ne' jun xmilq'ob'aj ttzi ttxa'na, e'toj t-ẍkyina ex jaxnq'o'ne' jun tb'anil koron toj twi'ya.¹³B'aj ktxet ti'ja tu'n q'anpwaq ex saqpwaq; Sedqe' t-xb'aluna, tz'umin chmob'enkye ex xb'alun tb'anil tilb'ilal. Tb'anil wab'j toq twaya, tuk'i'l myel ex aseyt ti'j Olib'o. Tb'anilxi'x ka'yina tb'enta: oka te jun t-xu'jil nimaqkawil.¹⁴B'injtz tpakb'alila kyoj nimaqtnam tu'nju' tb'anilxi'xa, tz'aqlixi'xa tu'nju' b'inchb'enkye tachb'ila. Ayine' Dyos Manb'aj nchin q'mante.

¹⁵Oktzun qe tk'u'ja ti'ju' tka'yinka tb'anilxi'x ex tu'nju' mab'injtz tpakb'alila, matz'oka te jun qya ajpajil, nxitq'o'n tib'a kye tkyaqil ichan nche ik' tk'etza.¹⁶Jawtb'incha'na ja te k'u'lb'il kye witzleb' kywi'witz kyu'n t-xb'aluna ex tb'inchaya ajpajil kyoj.¹⁷E'kub' tb'incha'na kyilb'ilal ichan kyu'n tachb'ila q'anpwaq ex saqpwaq xiwoyi'ne' teya, tu'n tb'inchanteya ajpajil kyuk'i'l;¹⁸e'oktq'o'na t-xb'aluna tb'anil che ka'yin kyi'j ex b'ajkub' tq'o'na waseyte' ex nk'ok'sb'ile' kywitz.¹⁹Aju' wab'j xinq'o'ne' te twaya, ti'j tb'anil arin nb'anta', exu' aseyt ex ta'lkab' xinq'o'ne' teya, kub'tq'o'na kywitz te oyaj tb'anil tk'ok'jal. Ayine' Dyos Manb'aj nchin q'mante.

²⁰Exqetzu'n tala q'a ex txin e'nk'walaye' tuk'i'la, e'xitq'o'na te chojb'il kye witzleb' naku'j kywa. ¿Manaq ch'i'nju' xb'inchaya soka te jun qya ajpajil,²¹expe' mache'x tq'o'na nk'wale' tu'n kykyim tz'e'ysa'nqe' te ninb'ilkye witzleb'?²²Tu'nju' tchwinqlala taq'wixi'x toj ajpaji'n min na'ntl tu'na tej ne'ẍtoqa ẍb'iqliya, akxtoq in patajlaya toju' tchk'ela.

²³A nma'nju'ye' lu, ayine' Dyos Manb'aj: ¡Layxwita! tib'ajxi'tlju' taq'wix matxi' b'ajtb'incha'n,²⁴mab'jaw tb'incha'na jatu'n tq'onteya k'u'lb'il kye witzleb' toj tkyaqil najb'il tb'anilqe ex tu'n txitq'o'n tib'a toj ajpajil.²⁵E'b'aj tb'incha'na najb'il lu toj tkyaqil kyajb'e, matz'okju' tilb'ilala tb'anilxi'xte taq'wixil, nxitq'o'n tib'a kye kykyaqilju' nche b'jik' tk'etza toj tajpaji'na kukxu'.²⁶Matb'inchaya ajpaji'n kyuk'i'l tb'esina, aye' aj Ejipt nim kyipumal toj ajpaji'n, matz'ok tq'o'na ntx'u'jile' tu'nju' ljo'n tb'inchanteya tajpaji'na.

²⁷Jawtzun wiq'i'n nq'ob'e' tu'n ttz'e'yset twitza: Matz'el wiq'i'ne' twaya, matxi nq'o'na toj kyq'ob' nimaqtnam pilistey, nche ik'onteya tu'n tpaju' tchwinqlal ch'ixb'ilx.²⁸Extzun min xqe tk'u'ja ti'ju' lu, mataq'tib'a tu'n tb'inchanteya ajpaji'n kyuk'i'l aj Sirya; ex mixjun xqe tk'u'ja.²⁹Ex matxi tljo'ntla ajpaji'n toj B'ab'ilon, kytx'otx' xk'aẍlel; ex mixjun kyej qe tk'u'ja tu'nju' lu.³⁰Ayine' Dyos Manb'aj, nchin q'mante: ¡Yo'loktoqxi'xju' yab'il toj tanmiya tu'n tb'inchanteya tkyaqilju' ajpajil lu ex mixti'x nch'ixwiya toj!³¹Jawtb'incha'na jun q'olb'eb'l tojile janche pona' b'aju' b'e ja ta'qe' najb'il q'ancha'lxi'x, jatu'n tk'uluna'ya kye witzleb' ex tu'n tq'ontetib'a toj ajpaji'n. Mitzun juntb'incha'na kse'nkye ajpajil: ¡Min ntqani'na chojb'ilte!

³²Aju' qya nin niman te tchmil, nche tk'mo'n txqantl ichan.³³Inxiq'o'n jun medi kye kykyaqil qya ajpajilqe'; atzunta inpe' xitq'o'na oyaj kye kykyaqilju' tajpaja ex nxitchjo'na kye tu'n kyb'ajtzaj toj tkyaqil plaj b'inchal il tuk'ila.³⁴Junxi'tl ntb'incha'na toju' tajpaji'na kyetwitzju' nkyb'incha'n txqantl qya: mix-a'lo' njyonteya tu'n tb'inchan il tuk'i'la ex min ntzaj kychjo'n ichan teya, ape'ta nxichjonkye. ¡O'kxtzunte' tu'n lu junxi'tla!

³⁵Qu'mtzun, qya ajpajil, b'intza nyole':³⁶Ayine' Dyos Manb'aj nchin q'mante: Matxi' tz'el tilsa'n tch'ixawa b'a'nxi'x, matxi' kub'tyek'u'ntib'a toju' ajpaji'n kyuk'i'lju' tajpaja ex kyuk'i'l kykyaqil twitzleb'i'n taq'wixqe'xi'x ex matxi' tz'el qojli kychk'elju' tala tu'na ẍekub' tq'o'na te chojb'il.³⁷Qu'mtzun che b'ajel nb'u'yi'ne' kykyaqilju' ichan matxi' che b'aj tzalaj tu'na, kykyaqilju' ẍe tk'ujlaya ex kykyaqilju' ẍe el tik'una; che b'ajel nb'uyi'ne' ti'jileya, ex kywitzku' kb'el nẍb'iqb'a'na tu'ntzun tka'yinjtza kyu'n ẍb'iqliya b'a'nxi'x.³⁸K'okyela toj xjel wu'ne' tu'n tpaj pa'jmjeb'le'n ex b'yojwnaqi'n, ex kb'el nb'yo'na tuk'i'l tx'u'jilj ex xk'yaqli'n.³⁹Kjel nq'o'na toj kyq'ob', tu'n tb'aj kyxitu'n janajpajina'ya ex ja noka' tk'u'lb'ila kye witzleb'. Che b'je'lel kyiq'i'n t-xb'aluna exqe' tachb'ila tb'anilqe', ex majx kjel ẍb'iqb'a'na kyu'n.⁴⁰Che jawil ti'ju' tnam ti'ja kyu'n, kb'ajel xona toj ab'j, ex kb'el b'yo'na tu'n k'uẍtx'e'nb'il.⁴¹K'okyel kyq'o'n kyq'aq'alju' tjaya ex kb'el tz'e'ysa'n twitza kywitz txqan qya. Kmankulju' tajpaji'na wu'ne', ex lay txitq'ontl mediya kye tichana.⁴²K'elel b'ajtzun ntx'u'jiltze' ti'ja ex lay chin xky'aqlintle', kqeb'el nk'u'je' ex lay chin tx'u'jintle'.⁴³Matzik' tna'l tu'na tej q'poj toqa, ex machin tk'ixb'saya kyu'nju' tb'inchb'aja mixyab'a'n ex taq'wixqe'xi'x; qu'mtzun, kb'el ntz'e'ysa'n twitza tu'n tpaju' tchwinqlala lu. Ayine' Dyos Manb'aj nchin q'mante. Ikyqe'x talju' kse'n txub'aj

⁴⁴Kykyaqilju' amiw tu'n kymanteju' nq'umli, kkyma' ti'ja: Ikyx txub'aju' kse'n tal.⁴⁵Alb'aja te jun txub'aj neltik'u'n tchmil exqe' tal, ikyqe'xju' titz'ina mo ttzika nelkyik'u'n kychmil exqe' kyal. Itit te' kytxuye' kykyaqilxe', atzu'n kymane' amorey.⁴⁶Toj tb'a'nq'ob'kya'j ta'ju' ttzika ju' nintnam Samarya, kyuk'i'lu' tkojb'il; atzun toj tnayajkya'j ta' titz'ina ju' nintnam Sodom, kyuk'i'lju' tkojb'il.⁴⁷Ex ikx xitb'incha'nju'ya kse'nkye, ax xitb'incha'nju'ya kse'n nkyb'incha'n taq'wixi'x. Ex min xqe tk'u'j tu'nju' lu, taq'wixi'xtl pe'ta tb'inchb'aj kyetwitzju' kyb'inchb'aj.⁴⁸Axxi'x kxe'l nma'ne' wu'nxe', ayine' Dyos Manb'aj: min xkyb'inchakye' titz'ina Sodom kyuk'i'l tkojb'il kse'n xtb'inchaya kyuk'i'l tkojb'ila.⁴⁹A ilju' tb'incha titz'ina Sodom kyuk'i'lju' tkojb'il, jaw kynima'n kyib' tu'nju' nim kywa ati ex tkyaqil atiyile kye, ex mixti'x e'onin ti'ju' prow ex ti'ju' ati nojqelan te.⁵⁰E'b'jo'k txkupqe' ex kyb'incha ti'xti' ik'o'nqe' wu'ne'; qu'mtzun e'kub' nxitu'ne', kse'n matxi' tila.⁵¹Atzunte Samarya, mixpeti' xtb'incha nik'jan kse'n tila xtb'inchaya. Matxi' che tb'inchaya ti'xti' taq'wixi'x kyekywitz; qama che oknmujb'ane' kyuk'i'l, naku'j mixti'kye kyil.⁵²Ati tu'n tkub' me'seta tu'n tpaj taq'wixqe'xtlju' il ẍe tb'inchaya twitzju' kye titz'ina ex ttzika, naku'j mixti'kye kyil. Ati tu'n tel tch'ixawa ex tu'n tkub' me'seta, mana' tz'el naku'j mixti' kyilju' titz'ina ex ttzika kyekywitzju' tila.

⁵³K'anjel wanjsa'n ti'ju'ye' b'a'n te Sodom ex Samarya, ex kyeju' kykojb'il; ex ikxta k'anjel wanjsa'n ti'ju'ye' b'a'n teya,⁵⁴naq aju' ati tu'n tkub' me'seta ex tu'n ch'ixwiya teju' xb'aj tb'incha'na, tu'ntzun toka te q'uqb'al k'u'jb'aj kye.⁵⁵Ajtzun tanjtz junmajtl ti'ju' b'a'n kye Sodom ex Samarya ex kyeju' kykojb'il kse'nxju' tnejel, ex ikxta kyuk'i'lju' tkojb'ila tzul jumajtlju' ati teya.⁵⁶Intoq xmayina ti'ju' tz'e'ysb'il twitzju' titz'ina Sodom, tej tjaw tnima'n tib'a,⁵⁷na'mxtoqtzun kyelpun chik'puju' tila; atzu'n ja'lo niljiya kyu'n nimaqtnam Edom ex Pilistya, ex kykyaqilx tb'esina, ¡Kykyaqilju' xjal twitz tx'otx' nche el ik'unteya!⁵⁸Ja'lo ati tu'n tik'xju' tz'e'ysb'il twitza tu'na tu'n kypaju' tb'inchb'aja taq'wixqe'xi'x. Ayine' Dyos Manb'aj nchin q'mante.

⁵⁹Nxinma'ne' ayine' Dyos Manb'aj: kb'el ntz'e'ysa'n twitza, min xjapunju' tyola tmaya nwitze' tu'na, min xjapunju' tyola kyajni b'antti'j wuk'i'le.⁶⁰Ayintzunwe' ktzajel nna'ne' nyole' kyejni b'entti'j tuk'i'la tej txintoqa, ex kjel b'ent jun nyole' tuk'i'la tejumajx.⁶¹Ajkyxi nq'o'ne' ttzika ex titz'ina te tala, maskye mya nyolju'ye' kyajni b'ent tuk'i'la, ktzajel tna'na tb'inchb'aja nejtl ex kb'el ch'ixwiya tu'n tpaj.⁶²Ktzajex jumajtlju' nyole' tuk'i'la, k'eleltzun tnik'tza qa ayine' Dyos Manb'aj.⁶³Ktzajel tna'na, kb'el ch'ixwiya b'a'nxi'x ex kb'el tme'ssa'ntib'a, laype' yolintla ajtkub' nnajsa'ne' tkyaqilju' matxi' tb'inchaya. Ayine' Dyos Manb'aj nchin q'mante, chi Dyos. Techlal ti'j tqan ub'a ex t'iw

¹Tzaj yolin Qman Dyos weye', tma:

²Ichan, q'manxa jun techlal teju' tnam Israel.³Q'maxa kye:
A ntma'n Dyos ja'lu:
Ponju' t'iw nintzku' twi' witz Lib'ano nimaqqe' t-xik' ex nim nktxet kyu'n, chukchaq che ka'yinju' t-smal. Tzyetju' tunin jun k'ute tu'n,⁴tzaj ttoqi'n tq'ob' nimxi'x twe' xi'tzuntz awalte toj jun kytx'otx' xk'aẍlel, toj jun nintnam nim k'aẍjel ati toj.⁵Jatztzun tiq'in jun ij toj tx'otx' ex ku'x tawa'n toj jun tx'otx' tex awb'il, ttzi jun a', nim a' ati toj.⁶Jawu'l twi'ju' ij ex ok te jun tqan ub'a pujin; maskyepe' min ch'iyxi'x twe', b'jaw ch'iy tq'ob' tu'me'lju' t'iw, ex nche'xxi' lq'e tlok' toj tx'otx'. Ex ok te jun tqan ub'a; eb'aj tzaj tch'xu'l ex eb'je'l tq'ob'.⁷Atitoqtzun juntl t'iw niminxi'x, nimaqqe'xi'x t-xik' ex nim txqan t-smal ati. Atzu'n tqan ub'a eb'ajx lq'exi'xtl tlok' ex eb'ajx ch'iyu' tq'ob' tu'me'lju' t'iw, tu'n txitq'o'n txqantl a' te, najchaq tk'etzu' ja awa'na'.⁸Expe' awa'ntoq toj tb'anil tx'otx', jata' txqan a', jatu'n tb'aj ch'iy tq'ob' ex tu'n twitzan ex tu'n tok te jun tqan ub'a tb'anilxi'x.⁹Q'manxtzuna kye: Chi Dyos kjalu: Lay tz'anq'inte' tqan ub'a lu. Kjawitz xb'oqi'n tlok' tu'n tnejel t'iw, ex che b'je'lel tz'aqju' twitz tu'n; naq tu'n ch'i'n ipumalj ex mya nim xjal kjawitz xb'oqliya' tuk'i'l tlok', ex che tzqijel tkyaqilu' t-xul ẍe'tzaj.¹⁰Maskye ma ku'x awa'ntl, lay tzaj t-xul; ktzqijel ajttzaj kyq'iq' toj tjawetzq'ij tib'aj; ktzqijel jatu'n ttzaja' t-xu, chiku'ya, chi Dyos.

¹¹Tzaj yolin Qman Dyos weye', tman:

¹²Qaninxa teju' pi's tnam lu qa b'i'n kyu'n titi' tz'elpuna' techlal lu. Q'manxa kye: Ulju' nimaqkawil aj B'ab'ilon toj Jerusalen ex eb'jo'kx tjpu'n nimaqkawil aj Juda kyuk'i'lju' nche kawin tuk'i'l, ex eb'ajx tiq'i'n tuk'i'l B'ab'ilon.¹³Jawtzun t-sk'o'n jun tk'wal nimaqkawil ex kyej b'antti'j jun tyol tuk'i'l, oktchq'o'n tu'n tmante qa ilti'j kjapumelju' tu'n, ex eb'ajx tiq'i'n xjal nimaq kyoklen toju' tx'otx'.¹⁴Tu'ntzun tkyaju' tkawb'il Juda numjni, lay b'ent tjaw tiq'i'ntib', maskyepe' mataq'tib' tu'n tjapunju' yol kyej b'entti'j tu'n ex tu'n tten kukxju'.¹⁵Atzu'n tk'wal nimaqkawil lu jawtiq'i'ntib' ti'ju' nimaqkawil aj B'ab'ilon ex eb'ajx t-sma'n t-sanjelal toj Ejipt qanil txqan chej ex txqan ichan nim kyajlal. ¿Ma b'a'ntzun kxe'la' yajxi'tl exqa kkletel te kamik toj kywitze'? ¿Ma ktzulo tzaqpajel jun xjal qa min xjapun tyol tu'n?¹⁶Axxi'x, ayine' Dyos Manb'aj nchin q'mante, kkyimelte' xjal toj B'ab'ilon, ju' naqxjaw tze'n ti'ju' tyol ttziya ex min xtb'inchaju' yol kyej b'entti'j kyu'n tuk'i'l nimaqkawil okq'onte toju' q'uqb'il.¹⁷Ajtzun ttzaju' nimaqkawil aj B'ab'ilon q'ojil ti'j, kjawil tch'uqi'n tx'otx' ex nintapi ti'jile nintnam, ajkykub' tb'yo'n txqan xjal, lay tzaj tchq'o'nte paraon jun tnej xjal te q'oj kuw onilte ex lay che tzaj tchq'o'n txqan xjal,¹⁸naqna' xjaw tze'n ti'ju' yol ttziya ex min xjapunju' yol kyej b'entti'j tu'n; ojetoq ttziya tu'n tjapun tu'n, extzun matb'incha tkyaqil ja'lu. Qu'mtzun layx klet.

¹⁹Axxi'x nxinma'ne', ayine' Dyos Manb'aj: naqxjaw ttze'nju' ttziya weye' tu'n tjapun tu'n, ex min xtb'inchaju' tyol kyejni b'entti'j tu'n wuk'i'le', qu'mtzun k'okyel toj xjel wu'ne' ti'ju' lu.²⁰Kb'el nxone' pa tzuyb'il kyiẍ tib'aj, kntzyu'tzuntze' toj, kxel wiq'i'ne' B'ab'ilon, atzuntzu' k'okyela' nq'o'ne' toj xjel tu'n tpaju' min xjapun tyol weye'.²¹Che kyimelju' t-xjal kuw che q'ojin toj q'oj, aye'tzu'n che kjel anq'in che b'ajex sputj toj kyq'iq' twitz tx'otx'. K'eleltzun kynik'tze' qa ayine' Dyos Manb'aj matxi' chin yoline'.

²²Nxinma'ne' ayine' Dyos Manb'aj: Ex ikx ktzajel ntzyu'ne' tunun k'ute nimxi'x twe'; ktzajel ntoqi'ne' jun t-xul a'la'j ti'ju' tq'ob' nimxi'x twe', ex ayinku'ye' chin b'elix awante twi' jun witz nimxi'x twe',²³twi'ju' witz nimxi'x twe' toj Israel. Che ch'iyel tq'ob', kwitzal ex k'okyel te jun k'ute tb'anilxi'x. Che najal tkyaqil ch'ix txkup tjaq', ex tkyaqil kyyajajil pich' ktenb'el kyja toj kyxlekumanju' tq'ob'.²⁴K'eleltzun kynik' kykyaqilju' tze toj kojb'il qa ayine' Dyos Manb'aj. Kjawil ntx'e'mu'ne' tze njaw tnima'ntib' ex in nch'isa'ne' tze b'o's twe'. Wu'ne' nkub'a' tzqiju' tze cha'x ex wu'ne' ncha'xi'xa'jtlju' tze tzqij. Ayine' Dyos Manb'aj, nchin q'mante ex in japun wu'ne', chiku'ya, chi Dyos. Til yilex junjun

¹Tzaj yolin Qman Dyos weye', ex tma:

²¿Tiqu'n kukx tq'manjtz yolju' nq'umli toj Israel kjalu: Aye' manb'aj nche'x lo'nteju' ub'a tx'am, aye'tzu'n kyk'wal nche tzaj ch'yon kywitzte tu'n?³Axxi'x kxe'l nma'ne', ayine' Dyos Manb'aj, lay kyma junmajtle' yol nq'umli lu toj Israel.⁴Weqe'we' tkyaqil xjal twitz tx'otx', e'manb'aj ex k'walb'aj. Kkyimelte' nb'inchan il.

⁵Ate b'a'n xjalju' ntb'incha'n tnik'alilti'j ex toj ttzinunal:⁶min nxi' toju' nimaqwan kywi' witz ninb'ilkye witzleb', ex min nokqe tk'u'j kyi'ju' mya dyosqe' toj Israel; min neltiq'i'n t-xu'jil twnaqil, ex min nkub' kẍe tuk'i'lku' t-xu'jil kse'n akxtoq nkb'u'l ttx'ajin;⁷min nokten yajlalte juntl, inpe' anj tanjsa'n ti'ju' ntk'mo'n tprentil k'as teju' k'asb'enal te; min nalq'an ti'j juntl; inxitq'o'n twaju' nb'aj tu'n we'yaj ti'ju' twa ex nxitq'o'n t-xb'alunju' mixti' ti'j;⁸min nxitq'o'n medi ch'ex tk'i' tub'chil; min nb'inchan taq'wix ti'j juntl; toj tnik'alti'j nkub'a' tnk'u'n jun q'oj kyxol kab'e' xjal;⁹ntb'incha'n kse'nx ntma'n nkawb'ile' ex nche japunile nchaq'b'ile' tu'n. Axxi'x toj tzinun ta'ju' xjal lu, qu'mtzun k'anq'il. Ayine' Dyos Manb'aj nchin q'mante.

¹⁰Qatzun ati jun tk'walju' ichan lu tx'u'j ex b'yolxjal, ntb'incha'n alkyexku' ti'xti' lu¹¹ju' min nche tb'incha'ntoqju' tman, nxi' wal kyoju' nimaqwan kywi' witz ninb'ilkye witzleb', ex neltiq'i'n t-xu'jil juntl xjal,¹²qa tok yajlalkye prow exqe' ati nojqelan kye, qa in alq'an kyi'j txqantl, qa min nanjtanjsa'n ti'ju' ntk'mo'n tprentil k'as teju' k'asb'enal, qa q'uqlok tk'u'j kyi'ju' mya dyosqe' ex nche tb'incha'n ti'xti' ik'o'nqe' wu'ne',¹³qa nq'on medi ch'ex tk'i' tub'chil; lay tz'anq'inju' ichan lu. Kyb'ajlenxi' tb'incha'n tkyaqilju' ti'xti' lu myab'a'n toj nwitze', kkyimel ex mixti'tl q'a'nb'ilte, kkyimel tu'nx tpaj til.

¹⁴Qajpe' ati jun tk'walju' ichan lu, matz'ok tka'yi'n tkyaqilju' il xb'aj tb'incha'n tman, ex min xxilpe toju' tqanb'en tman;¹⁵qa min xxi' toju' ninwan nok kywi' witz te ninb'il kye witzleb', ex min nokqe tk'u'j kyi'ju' mya dyosqe' toj Israel; qa min neltiq'i'n t-xu'jil juntl xjal,¹⁶qa min nokten yajulte juntl xjal; qa min neltiq'i'n prenil jun k'as maqaninjtz te; qa min nalq'an ti'j juntl, inpe' xitq'o'n twaju' naj tu'n we'yaj ti'ju' twa, ex nxitq'o'n t-xb'alunju' mixti' ti'j;¹⁷qa min nb'inchan taq'wix ti'j juntl, qa min nq'on medi che'x tuk'i'l tub'chil; qa nche japun nkawb'ile' tu'n ex ntb'incha'n kse'nx nkyma'n chaq'b'ile': lay kyimte' ichan lu tu'n tpaj til tman. Axxi'x k'anq'il.

¹⁸Atzunte' tman qama yajun ex matz'elq'an, ex matb'incha taq'wix toju' ttanam, kkyimel te tz'e'ysb'il twitz tu'n tpaj til.¹⁹Qajpe'lo kyxjelu'ye': ¿Tiqu'ntzun lay tchoj k'walb'aj til tman? Qu'n ttzinunal nate' k'walb'aj xtb'incha ex tnik'alilti'j, ex mache tb'incha tkyaqilju' nkawb'ile': qu'mtzun axxi'x k'anq'il.²⁰O'kxte' xb'inchan il kkyimel. Lay tchojte' k'walb'aj til tman, ex lay tchojte manb'aj til tk'wal. Ktk'ma'te' tnik'alti'j chojb'ilteju' tnik'alilti'j xtb'incha; atzu'n b'inchal il ktz'e'ysetel twitz tu'n kypaju' til. Tnik'alilti'jte Qman Dyos ntb'incha'n (Ez 33.3-20)

²¹Qatzun makyej tq'o'n b'inchal myab'a'n tkyaqilju' il matxi' b'aj tb'incha'n, ex ma japun tkyaqilju' nkawb'ile' tu'n ex matb'inchaju' ttzinunal ex tnik'alilti'j, axxi'x k'anq'il ex lay kyim.²²Lay tzaj nnantle' tkyaqilu' taq'wix xtb'incha, ex k'anq'il tu'nju' matb'incha ttzinunal.²³Mya wajb'ile' tu'n tkyimju' b'inchal taq'wix, a wajb'ile' tu'n tanjtzti'j tanmi ex tu'n tanq'in. Ayine' Dyos Manb'aj nchin q'mante.

²⁴Qatzun makyej tq'o'n tnik'alti'ju' tchwinqlal b'a'n, ex matxi tb'incha'ntlju' taq'wix ex ik'b'ilqe'xi'x kse'nx tb'inchb'aju' b'inchal il, ¿Ma oktzun k'anq'il toj kywitze'? Lay tzajnna'ntlwe' tkyaqilju' b'a'n tb'incha: kkyimel tu'n tpajju' min xjapun tu'n nwitze' ex tu'n kpaju' til.²⁵Oklo kyma'ye' qa mya tnik'alilti'ju' nb'incha'ne'; b'inkupe'ya, tnam Israel, ¿ma myab'a'nju' nb'incha'ne' toj kywitze'? ¿Ma myatzunlo aye'ye' taq'wix nkyb'incha'ne'?²⁶Qa min xitb'incha'ntl tnik'alti'ju' b'a'n ex matxi tb'incha'ntlju' taq'wix, kkyimel tu'n kypaju' tb'inchb'aj taq'wix.²⁷Qatzun aju' b'inchal myab'a'n makyej tq'o'n b'inchaj taq'wix ex matb'inchaju' b'a'n ex tnik'alilti'j, kkletel.²⁸Qama tz'el tnik' ex makyej tq'o'n tkyaqilju' il matxitoq b'aj tb'incha'n, axxi'x k'anq'il ex lay kyim.

²⁹Oktzun tma'te' tnam Israel qa mya tnik'alilti'ju' nb'incha'ne'. ¿Myatzun tnik'alti'ju' nb'incha'ne'? ¿Myatzun aju' tnam Israel min ntb'incha'n tnik'alilti'j?³⁰Teyile junjunkye' che okyele' toj xjel wu'ne', aj Israel, kse'nxju' kyb'inchb'aje'. Ayine' Dyos Manb'aj nchin q'mante. Kytzaqpinkje' tkyaqilju' kyb'inchb'aje' myab'a'n tejumajx, tu'ntzun lan che kyime' tu'n kypaj kyb'inchb'aje' myab'a'n.³¹Kypa'milkyib'e' ti'j tkyaqilju' myab'a'n matxi' kyb'inchaye' nwitze', ex kukyoke' junx kyanmiye' ex jun kyxewe' ak'a'j. ¿Tiqu'n kkyimela'ya, tnam Isarel,³²myana' wajb'ilwe' tu'n tkyim junkye'? Kytzaqpinkje' myab'a'n, che anq'iltzuntze'. Ayine' Dyos Manb'aj nchin q'mante. Oq'e'n kyi'ju' nimaqkawil aj Israel

¹Ichan, b'itzanxju'ya b'itz te kyimni lu kyeju' nimaqkawil toj Israel:

²Jun b'alun toqju' ttxuya najlitoq kyxol b'alun. Kub' tb'incha'n tpaqb'il kyxol, atzuntzu' ẍetch'isaya' tal.³Juntzunju' kub' tch'isa'nxi'x mach'iy b'a'nxi'x. Mab'ent tu'n tkub' t-ẍilu'n tchi', ex nche'x tch'yo'n xjal.⁴Kyb'iju' nimaqtnam nyolinjtz ti'j; tzyet kyu'n xjal toj jun xpatxab', ex xijowowon kyu'n tu'n jun ch'ok tzmaxtzu' toju' tnam Ejipt.⁵Atzunj tka'yinteju' ttxu b'alun mixti'tlju' jaq'uqla'toq tk'u'j tzaj tiq'inju' juntl tal ex onin ti'j tu'n tch'iy b'a'nxi'x.⁶Tej ttch'iy b'a'nxi'x te jun nin b'alun, inxi' ex nanjtzti'j kyxol b'alun. Ex b'ant tu'n tkub' t-ẍilu'n tchi', ex intoq che'x tch'yo'n xjal.⁷Intoq che Kub' tb'yo'n xjal kyoj tja nimaqkawb'il ex ntoq che kub' t-xitu'n nimaqtnam; intoq che jawlu'lun kykyaqil xjal twitz tx'otx' te ajtjaw ẍch'in ex ntzanun.⁸Jawtzun kyiq'i'n kyib'ju' tnam kyoju' tnej tx'otx' tb'esin ti'j; kub' kyq'o'n pa xpatxab' te kub' tz'aqtzuntz kyu'n toj.⁹Okx kyjpu'n toj jun tja tu'n jun ch'ok ex xikyiq'i'n te nimaqkawil aj B'ab'ilon; atzuntzu' okxa' japu'n, tu'ntzun mix-a'lo'tl b'inteju' toj twi' ntzanun kyoj nimaq k'ul toj Israel.

¹⁰Naku'j junwi' ub'aju' ttxuya awa'nku'x ttzi a', Inel twitz ex pujin b'a'nxi'x ntzaj b'a'nxi'x tu'n txqan a'.¹¹Eb'aj kuwixju' tq'ob' b'a'nxi'x ex eb'jo'k te kytze nimaqkawil, ch'iy b'a'nxi'x japun tzmax toj muj. Q'ancha'lix b'a'nxi'x tu'nju' twe' ex kyu'n tq'ob' eb'ajch'iy b'a'nxi'x.¹²Jatztzun xb'oqi'n kyu'n xjal tuk'i'l kytx'u'jil ex kub' xon twitz tx'otx'. Kub' tzqij tu'n kyq'iq' ntzaj tjawetzq'ij ex eb'je'l tz'aqju' ub'a ti'j; eb'aj tzqiju' tq'ob' kuwqe'xi'x ex eb'jo'kx q'o'n toj q'aq'.¹³Ja'lo xi' awa'na' toj tchq'ajlaj toj tzqij tx'otx' ex nk'wajti.¹⁴Inetz jun q'aq' kyoju' tq'ob' nche b'aj twanju' t-xul ex twitz. Mixti'qe'tl tq'ob' kuwqe' tu'nwt kyok te kytze nimaqkawil, chiju' b'itz.
(Aju' lu jun b'itz te kyimni ex k'ajb'el te b'itz te kyimni.) Njapunte Dyos tyol aye'tzu'n aj Israel pi'sqe'

¹E'pon junjun tijwnaq aj Israel xjelul te Qman Dyos toj lajoj tajlal tjweyi'n xjaw te twuqi'n ab'q'i, ex e'kub' qe nwitze'.²Tzajtzun yolin Qman Dyos weye', ex tma:

³Ichan, yolina kyeju' tijwnaq aj Israel ex q'manxa kye: A ntma'n Dyos ja'lu: ¿Ma'tzun che ulkye' xjelul weye'? Ayinku'we' Dyos Manb'aj chin q'malte axxi'x, lay waje' tu'n kyxjelune' weye'.⁴Q'onqe'kta toj xjel aya ichan; q'onqe'ka toj xjel, ex na'nxa kye jni'xju' ti'xti' taq'wiqe'x kyb'inchaju' kyman.⁵Q'manxa kye: A ntma'n Dyos ja'lu: Tej tjaw nsk'o'ne' Israel, kyej ntziya'ne' jun kyelu' tyajajil ex kub' nyek'u'n wib'e' kye toj Ejipt. Xinma'ne' kye toj junkmuj nim toklen: Ayine' Dyos Manb'aj kyib'aj.⁶Waq'wib'e' tu'n kyetzwiq'i'ne' toj Ejipt toju' q'ij lu, ex tu'n kyxi' wiq'i'ne' toju' tx'otx' ojetoq njoye' kye, jun tb'anil tx'otx', ¡aju' tx'otx' tb'anilxi'x kyxol kykyaqil!⁷Ex nchaq'e' kye kykyaqilx tu'n tel kyik'o'n kywitzleb' taq'wixqexi'x ex tu'n lalun kytz'ilsa kyib' kyu'n kywitzleb' aj Ejipt, qu'n ayine' Dyos Manb'aj Kydyos.

⁸Aye'tzunkye jawkyiq'i'nkyib' wi'je', ex min kyaj tu'n nxikyb'i'ne'; min kyaj tu'n kykyaj kyxonju' kydyos taq'wixqe'xi'x ex min e'kyaj kyik'o'n kywitzleb' aj Ejipt. Kub' nxima'ne' toj ntx'u'jile' kyi'j tu'n ntz'e'ysanteye' kywitz toj Ejipt tzmaxi'j ajtelb'aj ntx'u'jile' kyi'j.⁹Atzunju' nb'inchaye' tu'n tnimanjtz nb'iye', tu'ntzun lalun chin kyaje' taq'wix kywitzju' nimaqtnam janajla'qe', qu'n kywitzju' nimaqtnam lu nyek'uya' wib'e' kye ex ojetoq txinma'ne' kye tu'n kyetzwiq'i'ne' toj Ejipt.¹⁰Eb'je'tz wiq'i'ne' toj Ejipt ex exi' wiq'i'ne' toj chq'ajlaj;¹¹atzuntzu' e'xa' nyek'u'ne' nkawb'ile' ex nchaq'b'ile' kye, aju' nq'onte chwinqlal kyeju' nche b'inchante.¹²Ex b'ajx nyek'u'ne' q'ij te ojlab'l kye, ju' atitoq tu'n tok te jun techlal qxole' kyuk'i'l, ex jun nab'ab'lte qa ayine' Dyos Manb'aj, ojetoq che nxjansa'ye' te weye'.¹³Aye'tzunkye jawkyiq'i'kyib' wi'je' toj chq'ajlaj, ex min e'xikyb'i'n nkawb'ile'; b'je'l kyik'o'nju' chaq'b'il xinq'o'ne' kye, tu'ntoq kyb'inchante, ex tu'ntoq tten kychwinqlal, majxkub' kyyaju'n q'ij te ojlab'l. Kub' nxima'ntzuntze' tu'n ttzaj ntzaqpi'ne' ntx'u'jile' kyi'j ex tu'n kykub' nnajsa'ne' atzu', toj chq'ajlaj,¹⁴naqtzun tu'nju' ninb'ilte nb'iye' min nb'inchaye', tu'n lalun chin kyaje' taq'wix kywitzju' txqantl nimaqtnam ojetoq kyil se'ntaq'wi kyetz wiq'ine' toj Ejipt.

¹⁵Ex xinma'ne' kye toj chq'ajlaj qa laytoq che okxwiq'i'ne' toju' tx'otx' ojetoq txinq'o'ne' kye, aju' tb'anilxi'x kyetwitz tkyaqil, tb'anilxi'x tawal ntzaj,¹⁶qu'n eb'je'l kyik'o'n nchaq'b'ile', min exikyb'incha'n nkawb'ile' ex kub' kytxa'ju'n q'ij te ojlab'l, qu'n xi' oka'ten kyk'u'j kyi'ju' kywitzleb'.¹⁷Tzajtzun laqj nk'u'je' kyi'j ex min e'kub' nnajsa'ne' toj chq'ajlaj.¹⁸Xinma'ntzuntze' kyeju' kyk'wal tu'n lalun txikyb'incha'nju' ntoq xiq'ma'n kye kyu'n kyman, tu'n lalun txikyb'incha'n nchaq'unjtz kye, tu'n lalun kytz'ilsa kyib' kyu'n witzleb'.¹⁹Xinma'ne' kye: Ayine' Dyos Manb'aj janche ajb'ena'ye'. Che japunxju' nkawb'ile' ex nchaq'b'ile' kyu'ne' kse'nxju' tz'ib'a'n,²⁰ex kynimanku'ye' q'ij te ojlab'l, xjanx toklen kyu'ne', tu'n tok te jun techal qxol kyuk'i'le'; k'eleltzun kynik'tze' qa ayine' Dyos Manb'aj janche ajb'ena'ye', nchije'.

²¹Ex ikyqe'xju' kyk'wal jawkyiq'i'kyib' wi'je'. Mixti'x exikynima'n nkawb'ile', mixti'x ejapun kyu'n ex min exikyb'incha'n nchaq'b'ile', ju' intq'o'n chwinqlal kyeju' nche'x b'inchante, ex kub' kytxa'ju'n q'ij te ojlab'l. Kub' nxima'ne' tu'n ttzaj nq'o'ne' ntx'u'jile' kyib'aj ex tu'n kykub' nnajsa'ne' atzu', toj chq'ajlaj, tu'n tiky' ntx'u'jile' kyi'j,²²nwe'tzune' naq tu'n ninb'ilte nb'iye', tu'n lalun chin kyaje' taq'wix kywitzju' nimaqtnam ojetoq kyil se'n e'etza' wiq'i'ne' toj Ejipt,²³xinma'ne' kye toj chq'ajlaj qa oktoq che kxe'l nsputi'ne' kyxolju' nimaqtnam twitz tx'otx',²⁴qu'n min ejapunju' nchaq'b'ile' kyu'n, eb'je'l kyik'o'n nkawb'ile', kub' kyyaju'n q'ij te ojlab'l ex o'kxtzu' oka' ten kywitz kyi'ju' kywitzleb' kyman.²⁵Expe' e'kub' nq'o'ne' myab'a'n kawb'il kyib'aj ex e'chaq'b'il mixti' chwinqlal kyu'n.²⁶E'kyaj ntzaqpi'ne' tu'n kytz'ilsante kyib' tu'n t-xikyiq'i'n oyaj kye witzleb', ex tu'n kyxi' kyq'o'n kyk'wal nimaqqe'tl te chojb'il. Nb'inchaye' lu tu'n ttzaj xob'el kyi'j ex tu'n telkynik' qa ayine' Dyos Manb'aj.

²⁷Extzunta ichan, q'manxa kye aj Israel: a ntma'n Dyos ja'lu: ikyqe'xju' kymane' okkyq'o'n ntx'u'jile'; mixti'x xikyb'incha'n wajb'ile'.²⁸Tej kyokx wiq'i'ne' toju' tx'otx' ojetoq nmaye' tu'n txinq'o'ne' kye, naqnxi kyka'yi'n jun b'us nimin twe' mujqa jun tze pujin, b'ajkub' kyq'o'n chojb'il ex kyoyaj atzu', tu'ntzu'n oka' kyq'o'n ntx'u'jile', intoq kub' kyq'o'n ti'xti' k'ok'jsa'n ex intoq kub'kyqo'n kyoyaj b'in.²⁹Xinqani'ne' kye: ¿Ma atzun ja xjanju' kye witzleb' janche'xa'ye'? nchije'. Ex majx kyej tenju' tb'i te Ja Xjan kye Witzleb'.

³⁰Q'manxa teju' tnam Israel: A ntma'n Dyos ja'lu: ¿Tiqu'n kyajb'ila'ye' tu'n kyktz'ilsante kyib'e' kse'nxkye ojtxi' kychmane'? ¿Tiqu'ntzun min nche k'ulune' weye', xi' nche k'ulunaye' kye witzleb' taq'wixqe'xi'x?³¹Ajtkub' kyq'o'ne' kyoyaje' ex ajkykub' kytz'e'ysa'ne' kyk'wale' te chojb'il, ljo'nx kytz'ilsante kyib'e' tu'n kywitzleb'e'. ¿Extzun kyajb'iltle' tu'n kyule' xjelul weye' aj Israel? Axxi'x ayine' Dyos Manb'aj, lay waje' tu'n kyxjelune' weye'.³²Matxi' tz'okxten toj kynab'le' tu'n kyoke' se'nqe' txqantl nimaqtnam twitz tx'otx', nche k'ulun te tze ex te ab'j, kxa'tzunte' ikyju'.³³Axxi'x kxe'l nma'ne', ayine' Dyos Manb'aj, kb'el ntz'e'ysa'n kywitze' tu'n tipumal nq'ob'e' tu'n ntx'u'jile', ex chin kawile' kyib'aje'.³⁴Che tzajel nb'uyi'ne' kyxolju' tnam ex nimaqtnam jaslamuna' kyib'e', kb'el ntz'e'ysa'n kywitze' tu'n wipumale' tuk'i'l ntx'u'jile'.³⁵Che xe'l wiq'i'ne' toju' chq'ajlaj kye nimaqtnam ex k'okyel moje kywitz tu'n kyok toj xjel wu'ne', kse'n kyoknq'o'ne' ojtxi' kychmane' toj xjel toj chq'ajlaj te Ejipt. Ayine' Dyos Manb'aj nchin q'mante.³⁷K'ik'elnwitze' kyi'je' kse'n jun k'ik'lel nche b'ajtajla'n trit, ex che okyele' wu'ne' toju' yol kyejni b'entti'j.³⁸Che elel npa'ne' pi'sqe' kyxole' exqe' njaw kyiq'i'nkyib' wi'je', che elex wiq'i'ne' toju' junxi'tl tx'otx' janajla'qe' ja'lo; ex lay che okx toj tx'otx' Israel. K'eleltzun kynik'tze' qa ayine' Dyos Manb'aj, chi Dyos.

³⁹Tnam aj Israel, a ntma'n Qman Dyos ja'lu:
¡kukyxi'ye' k'ulul kye kywitzleb'e...! Oktzun che b'ilkye' yajxi'tl weye', ex lay kub' kytxa'ju'ntle' nb'iye' xjan, tu'nwt tkub' kyq'o'ntle' kyoyaje' lu ex tu'nwt kyk'uluntle' kye kywitzleb'e.⁴⁰Kykyaqil aj Israel che k'ulul weye' twi' witz xjan, twi' witz nimxi'x twe' toj Israel, ju' ati toju' ntx'otx'e'. Ayine' Dyos Manb'aj, nchin q'mante. Atzuntzu' che nk'ma'ye' tu'n tkyaqil nk'u'je'; atzuntzu' kxela' nma'ne' kyeye' tu'n tul kyiq'ine' kyoyaje' ex tu'n ttzaj kyiq'i'ne' tnejel twitz kyawale' ex tkyaqilju' ati tu'n kyxjansanteye' weye'.⁴¹Ajkyb'ajtzaj nb'uyi'ne' kyxolju' tx'otx' ex nimaqtnam jasputi'na' kyib'e' ja'lo, ex ajt-xinyek'u'ne' nxjanb'ile' kyxole' kywitz kykyaqilu' tnam, oktzun nk'ma'tze' kyoyaje' tk'ok'jalxi'x.

⁴²Ex aj kyokx nq'o'ne' toj Israel, toju' tx'otx' oje nmaye' tu'n txinq'o'ne' kye ojtxi' kychmane', k'eleltzun kynik'tze' qa ayine' Dyos Manb'aj.⁴³Atzuntzu' ktzajela' kyna'ne' tkyaqilju' kyb'inchb'ene' myab'a'n matxi' b'aj kytz'ilsa'na' kyib'e', ktzajel molmon kyk'u'je' kyexe' ex tu'n txqan il xb'aj kyb'incha'ne'.⁴⁴Tnam aj Israel, kxa' weye' nb'incha'n kyeye' kse'nkye' nkyb'incha'n, awe' nb'incha'n tu'n tnimanjtzju' nb'iye', k'eleltzun kynik'tze' qa ayine' Dyos Manb'aj. Ayine' nchin q'mante, chi Dyos. Tz'e'ysb'il witzb'aj toju' tx'otx' te tnayajkya'j

⁴⁵Tzaj yolin Qman Dyos weye' ex tma:

⁴⁶Ichan, kutanj ti'ja toj tnayajkya'j, ex yolinxa na'tz; q'manxa toj nb'iye' ti'ju' nimaq k'ul toju' tnej tx'otx' toj tnayajkya'j,⁴⁷ex q'manxa: intma'n Dyos kjalu: k'okyel ntxqo'ne' jun q'aq' ti'ja, kb'ajel twan tkyaqilju' tze cha'x tze ex tzqij toja; kk'antel q'aq' na'tz ex lay yupj, kttz'e'ysa' kywitz kykyaqilju' xjal ate' toja, toj tb'a'nq'ob'kya'j ex toj tnayajkya'j.⁴⁸Ex kykyaqil xjal che ka'yilte qa ayine' Dyos Manb'aj, ẍin oktxqonte. Ex lay yupju' q'aq', chi Dyos.

⁴⁹Xi'tzun ntzaq'we'ne' te: ¡Taye, a nkyoli'n xjalju' qa naqnchin yoline' kyi'j ti'xti' mix-a'lo'x nkane' toj twitz! nchije'. Tk'uẍtx'e'nb'il Qman Dyos

¹Tzajtzun tma'n Qman Dyos weye' kjalu:²Ichan, kutanj ti'ja toj Jerusalen ex q'manxa ti'ju' ja te k'u'lb'il. Yolina toj nb'iye' ti'ju' tx'otx' Israel,³ex q'manxa:
A ntma'n Dyos ja'lu: chin okyele' te tajq'oja. K'ajb'el nk'uẍtx'e'nb'ile', che kb'el nb'yo'ne' tnik'alkyi'j kse'nxqe' aj il.⁴Iku', kjawil wiq'i'n nk'uẍtx'e'nb'ile' tu'n kykub' nb'yo'ne' kykyaqil junx, e'tnik'alkyi'j ex aj il, tzajx toj tb'a'nq'ob'kya'j ponx toj tnayajkya'j.⁵Ex kkyb'i' kykyaqil xjal qa ayine' Dyos Manb'aj, matxi' jatzwiq'i'ne' nk'uẍtx'e'nb'ile' ex lay txink'u'ne'.

⁶Atzunta ichan, tz'oq'a b'a'nxi'x tuk'i'lju' tanmiya mixti'tl tb'anil; tz'oq'a kywitzju' tnam.⁷Qatzun matxi' qani'n teya tiqu'n noq'a'ya, q'manxa qa tu'n tqanil jun ati tu'n tb'aji, exqa kykyaqil xjal twitz tx'otx' che b'elnumj ex che b'elwoqtz'aj kyq'ob'; mix-a'lo'tl ktenb'el tipumal, kykyaqil klu'lul kych'ek tu'n xob'ajil. Matxi' tzulkanun, noqx tu'n tb'ajtl. Ayine' Dyos Manb'aj nchin q'mante, chi Dyos.

⁸Tzaj yolin Qman Dyos weye', tzaj tma'n:⁹Ichan, yolina toj nb'iye' ex q'manxa, qa ayine' Dyos Manb'aj, nchinx q'mante teya tu'n tmanteya:
¡Matxi' b'ajqet twitzju' k'uẍtx'e'nb'il! ex q'ib'untl.¹⁰Jqu'ntl twitzte tu'n tajb'en te b'iyb'il, ex q'ib'untl tu'n tqoptz'aj;¹¹Mab'aj b'incha'n q'ib'un tu'n tb'ant ttzyet, Jqu'ntl twitzju' k'uẍtx'e'nb'il ex q'ib'untl, tu'n tten toj tq'ob'ju' b'yolxjal.¹²Ichan, ¡ẍch'ina, ex tz'oq'a, qu'n b'antnitl tten tu'n tkub' tb'yo'n ntaname', ex kykyaqilju' kawil toj Israel! B'antnitl tten tu'n kykyim kyuk'i'l ntaname', qu'mtzun juminktib'a tu'n k'ixk'oj.¹³Ayine' Dyos Manb'aj nchin q'mante.

¹⁴Ichan, yolin toj nb'iye'; lab'tixa tu'n tk'ixb'sa'n k'uẍtx'e'nb'il tuk'i'l kamaj mo oxmaj ttx'u'jila. Jun k'uẍtx'e'nb'ilte' te b'iyb'il xjal, aju' k'uẍtx'e'nb'il te b'iyul nxob'san ti'ju' tnam toj tkyaqil plaj.¹⁵Nim xob'ajil tzultiq'i'n k'uẍtx'e'nb'il kyi'j, nim che b'ajelkyim tu'n. Matxi' kub' nq'o'ne' k'uẍtx'e'nb'il b'yolxjal kyoj tkyaqilju' kyja. A k'uẍtx'e'nb'ilju' q'ib'un tu'n tqoptz'aj, jqu'n tu'n tb'iyun.¹⁶¡Wajb'ile' jqu'na, toj tb'a'nq'ob', ex toj tnayaj, tu'n tkub' tpẍu'n toj kab'e' plaj!¹⁷Ikxwe' knchq'a'ye' tzmax ajtik'ju' ntx'u'jile', Ayine' Dyos Manb'aj ẍin q'mante.

¹⁸Tzaj yolin Qman Dyos weye', tma:

¹⁹B'inchanku'ya tilb'ilal kab'e' b'e, tu'n tb'ent tik'ju' nimaqkawil aj B'ab'ilon tuk'i'l tk'uẍtx'e'nb'il. Axtzu' che eletza' kab'e' b'e tojxju' tx'otx', kb'el ttz'ib'a'na jun techel ja ktzajela' qe junjun b'e alkye nintnam kpomela.²⁰Ati tu'n tkub' ttz'ib'a'na jun b'e jak'ik'ela' nimaqkawil tuk'i'l tk'uẍtx'e'nb'il. Aye' nimaqtnamju' Rab'a kytanam aj Amon ex Jerusalen, ju' nintnam kuwsa'n ti'jile toj Juda.²¹Matxi' kub'ten nimaqkawil aj B'ab'ilon janche tzaja qe'ju' kab'e' b'e, nxtulinti'j ex nxjelun kye tdyos, nche t-txiju'n talsmaj ex nb'aj tka'yi'n kychinaq' txkup.²²Matz'etzju' talsmaj toj tb'a'nq'ob' nxitye'ku'n Jerusalen, a ntma'nju' qa ati tu'n tq'ojin ti'j tuk'i'l q'ojb'il te xlik'pu'n ex tu'n tq'o'n chaq'b'il tu'n kyb'yet xjal, tu'n kyẍch'in te q'oji'n, tu'n tok q'oj kyi'ju' tjpel nintnam, tu'n tjaw kyb'incha'n kyxwe'lil ex tu'n tb'aj txoli'n ti'jile.²³Naqtzun jun tpakb'al te chajyolil k'elela' toj kywitzju' aj Jerusalen, mana' kyejb'ent jun kyol tu'n kyb'inchante. Poqb'iltzun kyil te'lu, ex jun tqanil qa che tzyetel.²⁴Qu'mtzun inma'ne' ayine' Dyos Manb'aj: Q'ancha'l qe'ju' taq'wix ex b'yojxjali'n nche kyb'incha'ne'; mab'je'l q'ancha'lixju' il kyoju' kyb'inchb'aje'. Qu'mtzun che tzyetele'.²⁵Ex aya, nimaqkawil toj Israel, b'yolxjal b'inchal taq'wix, xi' tul lq'eju' kmuj tu'n tk'monteya b'ajsb'il tz'e'ysb'il twitza.²⁶Ayine' Dyos Manb'aj, kxe'l nma'ne': k'elel q'i'n jitz'b'il twi'ya ex tkorona, ex tkyaqil kch'exb'etel; aju' ati kub'l kjawix jawtl, atzu'n ati jawtl kb'el kub'l.²⁷Tkyaqil kjel xitjnitl wu'ne', majx kjel xitj. Atzu'n lu kjapumel ajxi' tulju' q'o'n toklen wu'ne' tu'n tb'inchante tnik'alilti'j. Tz'e'ysb'il kywitz aj Amon

²⁸Yolina toj nb'iye' ichan, q'manxa kye aj Amon nche ilin kye aj Israel, qa matxi' jatzju' k'uẍtx'e'nb'il toj tja: Naq tkub'tl tu'n tb'iyun ex q'ib'unti'j tu'n tqoptz'aj ex tu'n t-xitun.²⁹Mya ax qe' kywitzik', ex chajyolilqe' kypakb'ab'l. Tzulju' k'uẍtx'e'nb'il ti'j kyqulju' b'inchal myab'a'n ex b'yolxjal lu. Matxi' tzul lq'eju' kmuj tu'n ttz'e'yset kywitz te b'ajsb'il.

³⁰¡K'uẍtx'e'nb'il, kutanjtl ti'ja toj tjaya! K'okyela toj xjel wu'ne' jata'ya tnejel, toju' tx'otx' jai'tzjaya,³¹ex tzul nq'o'ne' ntx'u'jile' tib'aja kse'n jun q'aq' kuwxi'x; kxel nq'o'na toj kyq'ob' xjal kuwqe' ex xitulqe'.³²Kb'el tz'e'ysa'na, kjel xitja; kb'el qojli tchk'ela toj tkyaqilju' tx'otx' ex mix-a'lo'tl ktzajel na'nteya. Ayine' Dyos Manb'aj, ẍin q'mante. B'yojxjali'n toj Jerusalen

¹Tzaj yolin Qman Dyos weye', tma:

²Ichan, aya kchik'b'alte tilju' nintnam b'yolxjal. Kxe'l tma'na tkyaqilju' ti'xti' taq'wixi'x oje tb'incha,³ex kxe'l tma'na te: A ntma'n Dyos ja'lu: Aya nintnam, nche kub' tb'yo'na najliqe' toja ex nche kub' tb'incha'na witzleb' te tz'ilsab'l tib'a, ¡noqx tu'n tpontl kmuj teya!⁴Matxi' b'aj ttz'ilsa'n tib'a tu'nju' b'yojwnaqi'n ẍe b'aj tb'incha'na ex kyu'n witzleb' matxi' che kub' tb'incha'na; matb'inchaya tu'n tq'naxa ex matzul lq'eju' kmuj te b'ajsb'il q'ij teya. Ikytzu'n, knb'incha'ye' tu'n tok i'li'na kyu'n tnam, tu'n kyxmayin kykyaqil nimaqtnam ti'ja.⁵Che xmayilju' ate' nqaku' exqe' ate' najchaq ti'ja, aya nintnam, nim tyolinjtza tu'nju' twitzleb'i'n ex ttx'uyb'ila.⁶Atzu' ta'qe' kawil kye aj Israel, najliqe' toj toja ex nxi'x che b'yon xjal, tkyaqilju' kyajb'il.⁷Min nche nimanju' xjal najliqe' toja te kyman ex te kytxu, nche okten yajlalkyeju' najchaq xjal, nb'je'l kyiq'i'n ti'xti' kye meb'a ex kye qya kyimni kychmil.⁸Min nche kynima'n najb'il xjanqe' weye' exqe' q'ij te ojlab'l.⁹Tu'n tpaju' kychajyolil, ati kypaj junjun xjal najliqe' toja tu'n kykyim junjuntl; nche ten kyoju' nimaqwan nche kub' q'o'n ninb'ilkye witzleb', ex nche kyb'incha'n ti'xti' taq'wixi'x.¹⁰Ate' junjun nche kub'kẍe tuk'i'l t-xu'jil kyman, mujqa tuk'i'lju' qya toju' tq'ijlalil akxtoq nkb'u'l ttx'ajin.¹¹Ate' junjun nche kub'kẍe tuk'i'l t-xu'jil kywnaqil, mujqa nche kub'kẍe ch'ixb'ilxi'x tuk'i'l kylib', mujqa nche oktzaqpaj jwolte jun tmyal kyman.¹²Ate' junjuntlju' najliqe' toja nkyq'o'n k'ayi'kyib' tu'n kykub' kyb'yo'n junjuntl. Nkyq'o'n medi ch'ex tuk'i'l tub'chil, nb'je'l kyiq'i'n ti'xti' te kywnaqil ex nche b'jo'k tzaqpaj kyi'j, ex nchin nik'tna'le' kyu'n. Ayine' Dyos Manb'aj, nchin q'mante.¹³Nchin q'ojine' tu'n tpaju' nelq'ana ex nb'yon xjala.¹⁴Lalun t-ximaya qa kb'antel nmqete' tu'na ajnb'inchante jun ti'xti'ye' ti'ja. Ayine' Dyos Manb'aj, matxi' nmaye', ex kjapumel wu'ne':¹⁵che kxe'l nsputi'ne' kyoj kykyaqil nimaqtnam, che xe'l nchto'ne' kyoj tkyaqil tx'otx', ex knẍtilsa'ya te tkyaqil ttz'ilila,¹⁶taq'wix chin elela'ye' kywitzju' txqantl nimaqtnam tu'na, oktzun k'elel tnik'a qa ayine' Dyos Manb'aj, chi Dyos.

¹⁷Tzaj yolin Qman Dyos weye', tma:

¹⁸Iky nela' tnam Israel weye' kse'n txkyejleb'en mixti'tl tajb'en nkyaj ajtokx q'et q'ank'uxb'il, stayn, k'uxb'il, plom mujqa saqpwaq toj tq'aq'al chuj.¹⁹Qu'mtzun, ayine' Dyos Manb'aj, nchin q'mante: Kykyaqilnaye' matxi' che okye' se'n jun ti'xti' mixti'tl tajb'en, che b'ajel nb'uyi'ne' toj Jerusalen.²⁰Kse'n saqpwaq, k'uxb'il q'anka'yin, k'uxb'il, plom ex stayn nche okxq'o'n junx toj chuj, ex nokx pichk'et q'aq' tjaq tu'n tkub' niwj, ikytzunwe', toj ntx'u'jile' kuw, che tzajel nb'u'yine' ex che tzajel niwje' wu'ne'.²¹K'okyex nb'ichk'ane' tq'aq'al ntx'u'jile', che nb'uyi'tzuntze' tu'n kykub' niwje' toj tnky'ajchaqilju' nintnam.²²Ikytzu'n se'n nkub' niwju' saqpwaq toj chuj, ikxtzunkyeju'ye' toj nky'ajchaq nintnam. Ikytzu'n k'elela' kynik'e' weye', qa ayine' Dyos Manb'aj, matxi' nb'ajsa'ne' ntx'u'jile' kyi'je', chi Dyos.

²³Tzaj yolin Qman Dyos weye', tma:²⁴Ichan, q'manxa kye aj Israel: Jun tnamqe'ye' tz'e'ysa'n kywitze' tu'n q'ijal ex mixti' a' toj,²⁵ate'qe'ye' toj jun tx'otx' naku'j b'alunqe' kawil toj, nche tzanun ex nkub' kytzaqu'n kychi'; nche'x kych'yo'n xjal toju' kytx'otx', nb'je'l kyelq'a'n kyk'uwen ex kyq'inumal ex nim qya nche kyej kyimnitl kychmil kyu'n.²⁶Nkytxalpu'n pale toju' tx'otx' lu tnab'lju' nxnaq'tzb'ile' ex nche kukytxa'ju'n ti'xti' xjanqe' toj nwitze'; mixti' ch'exb'eb'l kyu'n kyxolju' xjan tuk'i'lu' txa'ju'n, ex min nxikyxnaq'tza'n kye junjuntl tu'n telkynik' teju' ẍtilun exju' tz'il. Min nche nkynima'n q'ij te ojlab'l wu'ne', ex min nchin kynima'ne'.²⁷Ikyqe' nejenel teju' tnam lu kse'nqe' xo'j nkub' kytzaqu'n kychi', b'incha'ntl kyten tu'n tqojli chik' ex tu'n kyb'yon xjal naq tu'n kyjaw q'inumax.²⁸Nkub' kyewa'n sanjelalju' ax, kse'n jun xjal nokttxuma'n ti'j jun tapi; inkyma'n qa nchin yoline' kye toj witzik', ex nche kyma'n ti'xti' mya ax. Inkyma'n qa nche yolin toj nb'iye' extzun b'ajxa' chin yolinna'we' kye.²⁹Naq nche q'ojinju' xjal toj tnam ex nche b'aj elq'an; nche kub' kyyaju'n prow exqe' ati in ojqelan kye; nche oktzaqpaj ex mya tnik'alilti'j nkyb'incha'n kyeju' najchaq xjal.³⁰Matxi' njoye' jun kyxolju' xjal lu, inwt tb'incha'n jun b'a'n teju' tnam ex inwt tkub'san nwitze' tu'n lalun kub' nxitu'ne', ex mixti'x nknet wu'ne'.³¹Qu'mtzun makub' ntz'e'ysa'ne' kywitz b'a'nxi'x ex mache kub' nxitu'ne' tu'n tq'aq'il ntx'u'jile', tu'n kychjonteju' kyb'inchb'en. Ayine' Dyos Manb'aj nchin q'mante. Kyitz'inkyib' Samarya ex Jerusalen aj ilqe'

¹Tzaj yolin Qman Dyos weye', tma:

²Jumaj ate'toq kab'e' qya junx kytxu.³Xikyq'o'nkyib' toj ajpaji'n atxi'x tzmatoq txinqe'; xikyq'a' tzyu' kyimi'ẍ toj Ejipt ex kub' naju' kyqpojil.⁴Oola tb'iju' tzikb'aj (a ntyek'u'nju' Samarya), atzu'n titz'in Oolib'a tb'i (a ntyek'u'nju' Jerusalen). E'tzaj wiq'i'ne' te nxu'jile', e'ul nk'wale' ex nmyale' kyuk'i'l.⁵Myab'a'n sela' Oola weye' ex matz'ok laqj kyi'ju' tichan, aye' q'ojil aj Sirya,⁶tb'anil kyxb'alun morad ka'yin, kykyaqil nejenelqe' ex kawilqe', tb'anil ku'xunqe', chejilqe' ate'kx kyi'j chej,⁷¡Sk'o'nqe'xi'x kyxol aj Sirya! xitq'o'ntib' Oola toj ajpaji'n kyuk'i'l, majxpe' oklaqj kyi'j kykyaqilju' kywitzleb' ex ku'tz toju' toklen tu'n tk'ulun kye.⁸Ok te jun ajpajil atxi'x tej tten Ejipt, ex mixti'x kyej tu'n. Nim eb'ajkub' kẍe tuk'i'l atxi'x txinxtoq ex elkyiq'i'n tqpojil, soktzuntz te qya ajpajil.⁹Qu'mtzun xinq'o'ne' toj kyq'ob' aj Sirya ju' tyaẍ, jamatxi'toq tz'oklaqja',¹⁰ex e'kub' kẍe tuk'i'l; eb'je'ltzun xk'ayu'n tal, ichan ex qya, atzunte kub' kyb'yo'n tu'n k'uẍtx'e'nb'il, ikytzu'n tz'e'yseta' twitz. Ex mab'aj yoli'n ja'lu kyxol qya.

¹¹Tka'yi Oolib'a ju' titz'in ja'lu, extzun xi'pe' t-xonxi'xtltib' kyetwitzju' ttzik toju' ajpaji'n.¹²Ex ikxte oklaqj kyi'ju' aj Sirya, kykyaqilx nejenelqe' ex kawilqe', aj q'ojilqe', tb'anilqe' toj kyxb'alun, chejilqe', iqa'nqe' kyu'n chej, tb'anilxi'x ku'xunqe'.¹³Elnnik'e' qa ikxte matxi'toq ttz'ilsatib', ex matxitoq txitb'incha'n kse'nte' ttzik.¹⁴Xipe' tq'o'nxi'xtltetib' toj tajpaji'n: e'tilju' kyilb'ilal aj B'ab'ilon b'incha'nqe'k twitz tapi ex u'ksa'nqe' tu'n kyeq; kykyaqil tajb'el tnam che ka'yin, tu'n kyok xjal toj xjel kyu'n tu'n jitz'b'il kyk'u'j ex tu'n jitz'b'il kywi'.¹⁶Tej kyoktka'yi'n aj B'ab'ilon lu, oklaqj kyi'j ex exi' tchq'o'n t-sanjelal B'ab'ilon.¹⁷Eb'ju'ltzu'n aj B'ab'ilon ex eb'ajkub' kẍe tuk'i'l ex kub' kyyaju'n, kytz'ilsa toj ajpaji'n. B'aj kytz'ilsa'n b'a'nxi'x ex tzaj molmon tk'u'j kye.¹⁸Xitq'o'ntzun tib'tz toj ajpaji'n tojxi'x q'ancha'l, xityek'u'ntib' ẍb'iqli, majx ntzaj molmone' te kse'n ntzaj molmone' te ttzik.¹⁹Extzun txitq'o'nxi'xtltib' toj ajpaji'n, ntzaj tna'nju' tq'ijlalil tej txintoq, tej tajpaji'n toj Ejipt²⁰ex okb'aj kyi'j aj Ejipt ju' tyaẍ, ikyqe'toqju' kse'nqe' b'anchej ex b'ur toju' kyajpaji'n.

²¹Oolib'a, tzaj tna'nju'ya tej txintoqa, intoq che xb'iyunjtz timi'ẍa kyu'n aj Ejipt.²²Qu'mtzun inma'e' ayine' Dyos Manb'aj: Knb'incha'ye' tu'n kyok miltz'uju' tyaẍa te tajq'oja, aye' ntzaj molmon tk'u'j kye ja'lo. Che tzajel nq'o'ne' toj tkyaqil plaj ti'ja,²³e'aj B'ab'ilon ex kaldey, e'aj Pekod, aj Soa ex aj Koa, ex kykyaqilju' aj Asirya; kykyaqil ja'lu ku'xunqe' ex tb'anilqe', nejenel ex kawilqe', ajb'el ex q'ojilqe', kykyaqil chejilqe'.²⁴Che b'ju'l ti'ja, kyuk'i'l txqan karwaj ex txqan xjal te q'oj; kb'ajex kytxoli'n kyib' ti'ja toj tkyaqil plaj iq'i'mile kyq'ojb'il, tojx toj kywi' ex q'i'n kykolb'il, kxe'l nq'o'ne' anb'il kye tu'n toka toj xjel kyu'n kse'nxju' kykawb'il.²⁵Ktzajel nb'ajsa'ne' ntx'u'jile' tib'aja, ex che q'ojil ti'ja tuk'i'l kytx'u'jil; k'elel kyjonju' ttxa'na exqe' t-ẍkyina, aye'tzu'n che kjel anq'in che kb'el kyb'yo'n tu'n k'uẍtx'e'nb'il. Che b'ajex kyiq'i'n tala ichan ex qya, kb'ajel tz'e'ysa'na tu'n q'aq'.²⁶Che b'je'lel kyiq'i'n t-xb'aluna ex che b'ajex kyiq'i'n tachb'ila.²⁷Iktzu'n kb'ajela' ttxa'n tzaqpib'ltib'a exju' tajpaji'na jaxa' tq'o'na'tib'a toj Ejipt, lay che tiljumajtla aj Ejipt ex lay che tzaj tna'ntla.

²⁸Atzunwe' nxinma'n, ayine' Dyos Manb'aj: Kxel nq'o'na toj kyq'ob'ju' nimaqtnam nche eltik'o'na, ex kyeju' ntzaj molmona kye.²⁹K'elel ik'o'na kyu'n, kb'elkyetza'nju' matxi' tkanb'aya tu'n taq'unb'ena ex majx kjel ẍb'iqb'a'na kyu'n; kjel q'ancha'lixju' t-xmilala xitq'o'na toj ajpaji'n. Tu'ntpaju' tzaqpi'n tib'a exju' tajpaji'na³⁰nnik'a'ya toj ja'lo, qu'n xitq'o'ntib'a toj ajpaji'n kyuk'i'l nimaqtnam lu ex ku'tza toju' toklena tu'n tpaj k'uluna kye kywitzleb'.³¹Xi' xa' lpeya toj tqanb'en ttzika; qu'mtzun ax k'wab'ju' kxe'l nq'o'ne' teya axju' xinq'o'ne' te ttzika.

³²Awe' inma'n, ayine' Dyos Manb'aj: Axtzu' kk'wala'ya tiju' tk'wab'l ttzika, jun k'wab'l nimin, nimtoj ex nim t-xe, nojni tu'n xmayi'n ex ik'b'il,³³nojni tu'n tx'uyb'il ex xitb'il Ktx'ojtela ex kch'yol toj twinqila tu'n tk'wab'l Samarya ju' ttzika.³⁴Kxel tk'wa'na tzmaxi'j ajtb'aj, kb'el tb'uchi'ntzuntza ex che b'ajel txluch'i'na timi'ẍa. Ayine' Dyos Manb'aj matxi' chin yolin; matxi' txinma'ne'.

³⁵Qu'mtzun inma'ne', ayine' Dyos Manb'aj; Matxina' tzik'nna'le' tu'na ex matzaj tmiltz'u'n ttze'lti'ja weye', ktz'e'ysetel twitza tu'n tpaj tzaqpi'ntib'a toj tajpaji'na, chi Dyos.

³⁶Tzaj tma'n Qman Dyos weye':
Tzunta ichan, ¿Ma kxe'l tma'na tz'e'ysb'il kywitz Oola ex Oolib'a? Majxna' pejunxa kyb'inchb'aj taq'wixi'x kyplajku'.³⁷Min xkub' kyk'u'nkyib' nwitze' ex b'ajni txa'j kyq'ob' toj chik'. Myab'a'n xkyb'incha weye', nche k'ulun kye kywitzleb' ex mache kub'kytz'eysa'n kyal te chojb'il kywitz, aye' nk'wale' e'itz'ji kyuk'i'l.³⁸Ma'xi'xpe' kyb'inchatlju'lu weye': toj jun q'ijx kub' kytxa'ju'n njaye' xjan ex min ẍekynimaju' q'ij te ojlab'l weye'.³⁹Ex ax q'iju' tej kykub' kyq'o'n kyal te chojb'il ninb'ilkye kywitzleb', e'ul toju' njaye' xjan ex kub' kytxa'ju'n ¡Atzun matxi' kyb'inchaju' tojku' njaye'!

⁴⁰Exi' kychq'o'n kysanjel txkolkye ichan te najchaq, ex e'ul. Kykab'ilx eb'aj ichin, b'aj kyuk'tza'n kywitz ex eb'jo'k kyq'o'n kyachb'il tu'n kyex k'molkye;⁴¹E'kub' qe tib'aj jun tb'anil kuẍb'il, ex jun mes tkub'iletl wab'j tib'aj, tib'ajtzu'n mes lu kub'a' kyq'o'n sturak exju' aseyt elni pa'n tu'n tajb'en weye'.⁴²Intoq che b'injtz txqan xjal ntoq che ẍch'in intoq che ik'san q'ij; ichanqe' eb'ajtzaj toj chq'ajlaj, intoq che okkyq'o'n kyachb'ilju' qya, nche okkyq'o'n xb'alun kyi'j kyq'ob' ex e'tb'anil koron toj kywi'.⁴³Intoqtzun kub' nxima'ne': oktzun che ajb'elkye' qya ajpajilqe' lu ja'lo kyu'n. ¡Aye'na' ate'ju' kyuk'i'l!⁴⁴Che ul kyk'etz Oola ex Oolib'a, aye' qya tzaqpi'nkyib', kse'n nxi' jun ichan kyxol qya ajpajilqe', nchije'.⁴⁵Aye'tzu'n ichan tnik'alkyi'j che kb'el q'onte tz'e'ysb'il kywitzju' qya ajpajil ex b'yol xjalqe' lu. Qu'n ajpajilqe', ex b'ajni txa'j kyq'ob' toj chik', chi Dyos.

⁴⁶A ntma'n Qman Dyos ja'lu:
Kyb'u'yiku'kyib' tnamj kyi'j, tu'n kyb'aj xob' ex tu'n kykub' elq'a'n;⁴⁷tu'n kykub'yo'n tu'n tkyaqilju' tnam toj ab'j ex tu'n kyb'aj xyu'n tu'n k'uẍtx'e'nb'il; tu'n kykub' kyb'yo'n kyal ichan ex qya, ex tu'n kykub' tz'e'ysa'n kyja.⁴⁸Kb'el nnajsa'ne' che anq'in xjal ch'ixb'ilx lu toju' tx'otx'. Kykyaqiltzu'n qya k'elel junkynab'l ti'ju' xnaq'tzb'il lu ex lay che'x lpe ti'ju' kyb'inchb'en myab'a'n.⁴⁹Kb'el tz'e'ysa'n kywitzju' kab'e' qya lu tu'n tpaju' nkyb'incha'n myab'a'n exju' kyil tu'n witzleb'i'n. K'eleltzun kynik'tze' qa ayine' Dyos Manb'aj, chi Dyos. Ntechla'n k'wil

¹Tzaj yolin Qman Dyos weye' toj lajoj tajlal tlajoji'n xjaw te tb'eljoji'n ab'q'i, tma:

²Tz'ib'anku'ya tajlal xjaw lu, aju' tajlal xjaw ja'lo, qu'n matxi' tzyet tq'ojin nimaqkawil aj B'ab'ilon ja'lo ti'j Jerusalen.³Ex q'manxa jun b'itz teju' pi's tnam lu tu'n tok te jun yek'b'il te. Q'manxa qa ayine' nchin q'mante kjalu:
Q'onkxa jun k'wil tib'aj q'aq' ex q'onku'xa a' toj,⁴q'onqeku'xa tx'naj chib'j toj, nimaq tx'naj ti'j tkux ex ti'j tqul, ex tb'anil tb'aqil.⁵Q'intztzun junju'ya tb'anil ttxu rit, q'onkx txqan si tjaq' tu'n tloqlon b'a'nxi'x, tzmax ajkytzq'aju' b'aq.

⁶Qu'n inma'ne' ayine' Dyos Manb'aj kjalu: ¡Qab'anx twitzju' nintnam b'yolxjal! Ikyju' kse'n jun k'wil b'ajni sib'ix, ex mixti'x inelju' sib' ti'j. Q'inqe'jtza tx'naj chib'j junjunali'n, tzmax ajtjatz b'aj toju' k'wil.⁷Nim txqan chik' b'je'lni qojl toju' nintnam lu; ex mya twitz tx'otx' b'jelna' qojli, tu'nwtlo tb'aj muqli tu'n quq, tib'aj pik spajli kub'na' qojli.⁸Axtzu' kjela nq'o'nwe' chik' na'tz, tib'aju' pik spajli, layx b'ent tkub' mqu'n tib'aj, tu'n ttzaj txqan ntx'u'jile' ex tu'n tb'inchet tnik'alilti'j.⁹Qu'n intma'n Qman Dyos: ¡Layxwitju' nintnam b'yolxjal! Ayinku'we' chin b'inchalte jun q'aq' ti'j.¹⁰Q'intz txqanta si, q'onka tq'aq'al ex tzq'ajsama chib'j b'a'nxi'x, tzmax ajtku'x b'aju' ta'l ex ajkytz'e'yju' b'aq;¹¹Lwiyxtzun q'onkxa k'wil mixti' toj tib'aj q'aq', tzmax ajtb'antju' k'uxb'il kyeqka'yin nk'ant ex ajtkyaj ẍtilun ajtelb'aju' plut ti'j; ¡Tzmaxi'j ajtb'je'l b'aju' t-sb'akyil!¹²Majxtzun sb'ak b'a'nxi'x mixjun nb'ent t-ẍtilset tu'n q'aq'.

¹³Jerusalen, matxi' tz'ok tilil wu'ne' tu'n t-ẍtilseta teju' ttz'ilila tu'n majx tzaqpi'ntib'a, extzun mixjun nẍtilseta. Tzmaxi' kẍtilsetelju'ya ajttzaju' ntx'u'jile' tib'aja.¹⁴Ayine' Dyos Manb'aj matxi' chin q'mante, ex ikykb'ajelju'. Ayinku'ye' chin b'inchalte, ex kjapumel wu'ne'; lay tzaj laqj nk'u'je' ex lay tz'anjtzti'j wanmiye'. Kntz'e'ysa' twitza tu'n kpaju' tb'inchb'aja myab'a'n. Ayine' Dyos Manb'aj inchin q'mante, chi Dyos. Tkyim t-xu'jil Esekyel

¹⁵Tzaj yolin Qman Dyos weye', tma:

¹⁶Jun kmujx k'elela' wiq'i'ne' wnaq teya majx ntk'u'jla'nxi'xa. Lantzun lab'tiya ex lan tz'oq'a; lalun tz'el ta'l twitza.¹⁷Lalun tyek'uya ajtkyaja toj b'is kse'n nb'inchanjtz kyi'j kyimni. Lalun tz'el tiq'i'na ẍipb'il twi'ya ex lalun tz'el tiq'i'n t-xajab'a; lalun tz'ok tktxu'n twitza yek'b'il k'ixk'oj ex lalun txitwana wab'j nwanjtz toju' nb'aj kjalu, chi Dyos.

¹⁸Nyoline' kyuk'i'l xjal te prim, tetzun qale tkyimju' nxu'jile'; tetzun juntl q'ij te prim xinb'incha'ne' ojetoq tchaq' Qman Dyos weye'.¹⁹Aye'tzu'n xjal toju' tnam tzaj kyma'n weye': Chik'b'antza qeye' titi' ntma'nju' ntb'incha'na lu, chechij.

²⁰Xi'tzunma'ne' kye: Tzaj yolin Qman Dyos weye', ex tma:

²¹Q'manxa kye aj Israel: a ntma'n Dyos ja'lu: kb'el ntxa'ju'ne' njaye' te k'u'lb'il, ju' kyajb'ilxi'xe' tu'n tok kyka'yine' ex nche laqje' ti'j, ex tok te kyninb'ile' ex kyipumale'; che kb'el b'yo'n kyk'wale' ex kymyale' e'kyaj kyq'o'ne' toj Jerusalen.²²Ex q'manxa kye: Ikykb'ajelju' kyi'je' kse'n matxi' nb'inchaye': lay b'ent kyjpunte kywitze' te techlal k'ixk'oj, ex lay b'ent kywanteye' wab'j nkywan xjal ajtkyim jun kyuk'i'l.²³Lay b'ent telkyiq'i'ne' ẍipb'il kywi'ye' ex lay b'ent kyb'ete' mixti' kyxajab'e'. Lay b'ent kyẍch'ine' ex lay b'ent kyoq'e'. Che kjel numje' tu'n tpaj kyile', che ẍch'iltzuntze' jun te juntl toj kyoq'ele'.²⁴A Esekyel k'okyel te jun yek'b'il kyeye', tkyaqilju' xtb'incha kxel kyb'incha'ye'. Ajtjapun ja'lu, k'elel kynik'e' qa ayine' Dyos Manb'aj.

²⁵K'elel wiq'i'ne' kyipumal aj Israel ja'lo, aju' ja te k'u'lb'il, nxi'x che tzalaj ti'j tu'nju' tb'anilxi'x b'inchb'ente, kyajb'ilxi'x tu'n kyka'yinte ex nche laq ti'j. Ex che elelwiq'i'ne' kyk'wal ex kymyal.²⁶Ex aju' mab'ent ttzaqpaj toju' q'ij lu, tzul q'ol tqanil teya.²⁷Tojtzu'n q'ij lu kyolila ex kb'entel tyolina tuk'i'lju' matzaqpaj. K'ajb'eltzuntza te yek'b'ilteju' tnam, k'eleltzun kynik'tz qa ayine' Dyos Manb'aj, chi Dyos, chi Esekyel. Aju' tu'n tul kyi'j aj Amon

¹Tzaj yolin Qman Dyos weye', ex tma:

²Kutxi'tla, ichan, kyuk'i'l aj Amon ex yolina kyi'j toj nb'iye' kye.³Q'manxa kye tu'n tkub' kyb'i'n nyole' nxinma'ne' kye kjalu: Ojexi'x che ẍch'inkye' tu'n kytzalajb'ile' tej kyka'yinteye' tkub'txa'ju' njaye', xitjnitlju' tx'otx' Israel ex eb'ajxq'i'nju' xjal najlqe' toj Juda toj juntl tx'otx'.⁴Tu'ntzun tpaju' lu che kxe'lnq'o'ne' toj kyq'ob'ju' tnam te tjawetzq'ij, tu'n tkub' kytzyu'n kytx'otx'e', tu'n kyjaw kyb'incha'n kyxmuj ex tu'n kyjaw kyb'incha'n kyja atzu'. Aye' che walteju' kyawale' ex che k'walte kyleche'.⁵K'okyel Rab'a wu'ne' te kywab'l kamey, exju' Amon te kywab'l rit. K'eleltzun kynik'tze' qa ayine' Dyos Manb'aj.

⁶Ayine' Dyos Manb'aj nchin q'mante: Oje che poq'chan toj kyq'ob'e' aj Amon ex exlik'pune' tu'n kytzalajb'ile', ex matxi' tz'el kyik'o'ne' Israel.⁷Qu'mtzun kjawil wiq'i'n nq'ob'e' tu'n ttz'e'yset kywitze' ex tu'n kyxi' nq'o'ne' toj kyq'ob' nimaqtnam, tu'n tb'je'l kyiq'i'n tkyaqilju' ati kyeye'. Che jawitz nxb'onqi'ne' kyxol tnam, che b'elnnajsa'ne' kyxol nimaqtnam, majx che b'elnxitu'ne'. K'eleltzun kynik'tze' qa ayine' Dyos Manb'aj. Tqanilju' tzul ti'j Moab'

⁸Kxe'l nma'ne' ayine' Dyos Manb'aj: Inkyma'n aj Moab' ex aj Seyir qa junx Juda kyuk'i'l kykyaqilju' nimaqtnam.⁹Qu'mtzun knjqa'ye' jun b'e ttx'u'k Moab', ex che b'elnnajsa'ne' nimaqtnam ttxa'npun toj jun plaj ex toj jun plajtl, aye' tb'anil nimaqtnam: B'et-jesimot, B'aal-meon ex Kyiryataym.¹⁰Knb'incha'ye' tu'n tkub' kytzyu'n tnam te tjawetzq'ij kytx'otx' tib'ajxi'tlju' kye aj Amon, mix-a'lo'tlte ktzajel na'nkye aj Amon kyxolju' nimaqtnam.¹¹Kb'el ntz'e'ysa'ne' kywitz aj Moab', k'eleltzun kynik'tz qa ayine' Dyos Manb'aj, chi Dyos. Tqanil ti'j Edom

¹²In nma'ne' ayine' Dyos Manb'aj: Matxi' tz'ok t-xel te Juda tu'n Edom, tu'ntzun tpaju' ati til.¹³Qu'mtzun inma'ne' ayine' Dyos Manb'aj: K'okyel nq'ob'e' ti'j Edom tu'n ttz'e'yset twitz ex tu'n kykub'yetju' xjal toj exqe' alu'mj. Kjel nxitu'ne' tzajx Teman ponx Dedan, che kyimelju' xjal tu'n k'uẍtx'e'nb'il.¹⁴Knq'a'ye' tu'me'l t-xel te Edom tu'nel ntaname' Isarel; ktb'incha' te Edom kse'nxju' ntx'u'jile' ex nq'oje. K'eleltzun kynik'tz se'nju' tu'me'l t-xel wu'ne'. Ayine' Dyos Manb'aj nchin q'mante, chi Dyos. Tqanilju' tzul kyi'j pilistey

¹⁵Ayine' Dyos Manb'aj nchin q'mante: Matxi' kyaq'xi' pilistey tu'me'l t-xel, matxi' kyaq'xi' t-xel tuk'i'l ik'b'il toj kyanmi; matxi' che ok ajq'oj ti'j Israel ttzajlenx ojtxi', matxi' che xitunxi'.¹⁶Qu'mtzun inma'ne', ayine' Dyos manb'aj: k'okyil nq'ob'e' kyi'j pilistey tu'n ttz'e'yset kywitz, che b'elnnajsa'ne' kyeretey ex che kb'el nb'yo'ne' ate'x mlaj.¹⁷Knq'a'ye' tu'me'l t-xel kuwxi'x kye; kb'el ntz'e'ysa'ne' kywitz tuk'i'l ntx'u'jile'. Ajtzun nb'inchanteye' lu, k'elelkynik' qa ayine' Dyos Manb'aj, chi Dyos. Tpakb'alilju' tzul ti'j nintnam Tiro

¹Tzaj yolin Qman Dyos weye' toj jun tajlal xjaw toj junlajoj (11) ab'q'i, ex tma:²Matxi' yolin Tiro ti'j Jerusalen kjalu:
¡Matxi' b'ajkub' piẍju' tjpel k'aẍjel kyxol nimaqtnam! ¡Matxi' pon kmoj weye'! Chin q'inumaxelwe' Atzunte kjel xitj, chij.

³Qu'mtzun inma'ne', ayine' Dyos Manb'aj, kjalu: Tiro, chin okyele' te tajq'oja. Knb'incha'ye' tu'n kyq'ojin txqan nimaqtnam ti'ja, kse'n njaw ttolob' ninnjab',⁴ex tu'n kyb'aj kyxitu'n nintapi ti'jileya tu'n kykub' kytx'u'yi'n ja nimaq kywe' toja. Okpe' kb'je'lel wiq'i'ne' quq jata', naq jun pik sqitli kjel nq'o'ne'.⁵Kjelten kse'n jatu'n kytzqijseta' pa toj nky'ajchaq ninnjab'. Ayine' Dyos Manb'aj nchin q'mante. Kb'je'lex kyalq'a'n nimaqtnam toj Tiro,⁶ex che b'ajelju' tnej ja toj kuw tx'otx' tu'n k'uẍtx'e'nb'il. K'eleltzun kynik'tze' qa ayine' Dyos Manb'aj.

⁷Ayine' Dyos Manb'aj nchin yolin: Ktzajel wiq'i'ne' Nab'ukodonosor nimaqkawil aj B'ab'ilon toj tb'a'nq'ob'kya'j aju' nimaqkawil nimxi'x tipumal, tu'n tq'ojin ti'j Tiro. Tzul kyuk'i'l chej ex karwaj, ex chejil, kyuk'i'l txqan xjal te q'oj b'u'yi'nkyib'.⁸Che kb'el tb'yo'n najlqe' kyoj tzb'oj tjaya toj kuw tx'otx' tu'n k'uẍtx'e'nb'il; kjawil tb'incha'n jun maqb'il ti'jileya, kjawil tch'uqi'n tx'otx' tu'n tq'ojin ti'ja ex che ultchq'o'n xjal te q'oj ti'ja q'i'nile kykolb'il.⁹Kb'ajel t-xitu'n nintapi ti'ja tu'n pab'l ex che b'jawil tqotx'pi'n tjaya nimaq kywe' tu'n k'uxb'il.¹⁰ajtokx nimaqkawil aj B'ab'ilon kyoju' tjpela kse'n aj kyokx lipan eleq' toj jun nintnam, nim txqan chej che okyex, kb'el jupliya tu'n quq kjawil kyu'n; che lu'lulju' ninttapiya tu'n kyq'ojq'ojel tkarwaj ex tchej;¹¹Che b'etelju' kychej tuk'i'l kyxajab' kyoj kykyaqil t-xk'ichb'eya. Che kb'el tb'yo'n ttanama tu'n k'uẍtx'e'nb'il, che b'elt-xonju' tqan tjaya kuwqe' twitz tx'otx'.¹²Kxe'l kyiq'i'n tkyaqilju' tq'inumala, kb'ajxe'l kyelq'a'n tk'aẍjela, che b'ajel kyxitu'n nintapi ti'jileya che kb'el kyxitu'n tja ninkawb'il toja; che b'ajex kyxonju' kab'jil toj ninnjab', e'tptzo'nil ex tkyaqilu' ttx'anqa'ntl.¹³Ikytzu'n kmankul kytxa'n tb'itza wu'ne', ex lay b'injtztl kyq'ojq'ojel tchinab'a arpa.¹⁴Kjel sle'jixa wu'ne' kse'n jun sk'o'j pik, jatu'n kysa'yeta' pa. ex layx jaw b'incha'n jumajtla. Ayine' Dyos Manb'aj matxi' chin yolin; nchin q'mante.

¹⁵Ayine' Dyos Manb'aj, nxinma'ne' te Tiro: Che lu'lulju' tnam ttzi ninnjab' ajkyb'inte tq'ojq'ojel ajtkub'ti'ja, nxi'x t'i'njeya toj k'ixb'len ex nche b'yonjtzju' xjal najlqe' toja.¹⁶Kykyaqilju' nimaqkawil ttzi ninnjab' che eletz toju' kyq'uqb'il, kb'je'lel kyiq'i'n kypinpa't ex kyxb'alun tz'so'n tilb'ilal toj; xob'jniqe'xi'x, che kb'el qe twitz tx'otx', nche ch'ikch'on tkyaqil kmuj ex k'okyil tchi kyi'j ajtka'yinjtza kyu'n.¹⁷Oktzun xelkyb'itza'n b'itz te kyimni ti'ja kjalu:
¡Se'n taq'wi xkub'xitja, se'ntaq'wi xkub'naja ttzi ninnjab', nintnam nxi'x jaw nima'na! ¡Nimxi'xtoq tipumala kyuk'i'l xjal najlqe' toja, toj ninnjab' kub' tq'o'na xob'el toj tkyaqilju' tnej tx'otx'!¹⁸Atzu'n ja'lo matxi' kub'ti'ja, nche ch'ikch'onju' nimaqtnam ttzi ninnjab' tu'n kyxob'el. Tu'ntzu'n matxi' kub'naja, matxi' tz'ok tchi kyi'ju' piẍ tx'otx' toj ninnjab', chechi.

¹⁹Qu'n a inma'nju'ye', ayine' Dyos Manb'aj: Xitjnitla kjel nq'o'ne', kse'nqe' nimaqtnam mix-a'lo' najli kyoj. Knb'incha'ye' tu'n tkyaj mulq'aja toj a' t-xe ninnjab',²⁰ex tu'n t-ximulq'aja tzmax ja ta'qe' kyimni, aye' xjal e'najan ojtxi'. Kb'elex nx'ona tzmax t-xexi' tx'otx', toju' tx'otx' noq tik'lentl tejumajx, ex ktenb'ela kyxolju' oje che kyim. Lay che najantl xjal toja, ex lay jaw b'incha'ntla twitzju' tx'otx' kyxolu' nche anq'in.²¹K'okyela wu'ne' te xob'sb'il, ex lay najantla. Kjyonjtzela, ex lay knetla. Ayine' Dyos Manb'aj nchin q'mante, chi Dyos. B'itz te kyimni ti'j Tiro

¹Tzaj yolin Qman Dyos weye', ex tma:

²Ichan, b'itzanxa b'itz lu te kyimni³ti'j Tiro, ju' nintnam ati ttzi ninnjab' nxk'aẍlen kyuk'i'lju' nimaqtnam, kyuk'i'l txqan tx'otx' ttzi ninnjab'. Q'manxa te qa a nma'nju'ye' ayine' Dyos Manb'aj:
Tiro, nok tq'o'ntib'a kse'n jun b'ark xa'wanku'xi'x ex b'a'n ttzinunal;⁴npon kanunju' tkawb'ila tzmax toj tk'u'j ninnjab', xa'wanku'xi'xa jawb'incha'na kyu'n b'inchalteya.⁵B'ajb'incha'n tkyaqilju' ttz'lanila kyi'j tzaj e'tzaj q'i'n twi' witz Senir; xi'tzaja' ttzeyila ti'ju' k'ute twi' Lib'ano;⁶ti'j k'ol toj B'asan eb'inchanjtza' linb'ilteya toj a'; aye'tzu'n jupb'ilteya b'incha'n ti'j tzis b'ajtzajq'i'n mlaj Chipre b'incha'n tilb'ilal marpil.⁷Intoq ajb'en t-xb'aluna sed, tz'so'n tilb'ilal toj tzajni Ejipt, te lmulteya; xb'alun toqju' jupb'il ti'ja morad ka'yin ex kyeq tzajni q'i'nqe' mlaj Elisa.⁸Aj Sidon ex aj Arb'ad qe'toqu' lmulteya, b'a'nxi'x kyu'n ichan xyotx'ilteya.⁹Kyexi'xtoq kyximante ichan tijwnaq aj Kyeb'al tu'n kyb'inchetju' xitjni teya. Kykyaqilju' b'arkyil toj ninnjab' intoq che xk'aẍlen ti'ju' tk'a'ẍa.¹⁰Intoq che ajb'en ichan aj Persya, aj Lidya ex aj Lib'ya te q'ojil kyxolju' t-xjala te q'oj; intoq wiqonjtza tu'n kykolb'il ex k'o'ẍ toj kywi', inxi'xtoq qoptz'aja kyu'n.

¹¹Ate'toq xjal aj Arb'ad, junx kyuk'i'l t-xjala te q'oj, kyib'aju' nintapi ti'jileya, ex ate'toq ichan aj Kamad kyoju' tjaya nimaq kywe'. Intoq che jaw kyyob'a'nile kykolb'il ti'jele tnuqub' ninttapiya, xa'wankuxi'x nela'ya kyu'n.¹²Nimtoq txqan tq'inumala, intoq t-xk'aẍle'n Tarsis tuk'i'la, ex intoq tzajq'o'n saqpwaq, k'uxb'il stayn ex plom teya ti'ju' tk'a'ẍa.¹³Ex intoq che xk'aẍlin Kresya, Tub'al ex Mesek tuk'i'la, nche tzaj tq'o'n xjal lq'o'n majin e'ti'xti' q'ank'uxb'il teya chojb'ilte twi' tk'a'ẍa.¹⁴Aye'tzu'n aj B'et-tokarma ntoq kychjo'n teya kyu'n chej te aq'untl ex iqal xjal, ex kyu'n chej mul.¹⁵Intoq che xk'aẍlin xjal aj Rodas tuk'i'la. Intoq xk'aẍlina kyuk'i'l txqan tx'otx' toj ninnjab', ntoq kychjo'n twi' tk'a'ẍa kyu'n ab'j marpil ex eb'ano.¹⁶Intoq xk'aẍlen Edom tuk'i'la, ex tu'nju' nim tk'a'ẍa: intoq tzaj kyiq'i'n ab'j kranate, e'xb'alun uk'tza'n tu'n kyeq, tz'so'n tilb'ilal kyoj, sed xb'alun, ex ab'j koral ex rub'ye.¹⁷Ex intoq che xk'aẍlin aj Juda ex aj Israel tuk'i'la, intoq kychjo'n teya tu'n triy njaw Minit, ex tu'n pastel, ta'lkab', aseyt ex k'ok'sb'il.¹⁸Intoq kylq'o'n aj Damask nim ti'xti' ex q'inumal teya; intoq kychjo'n tu'n b'in njaw Elb'on ex lalun ntzaj Saar.¹⁹Tzmax Usal ntzaj kyiq'i'na' b'in teya, e'k'uxb'il tx'no'n, kanel ex ptz'an k'o'k'jxi'x, te t-xelju' tk'a'ẍa.²⁰Intoq xk'aẍlen kyiqb'il chej Dedan tuk'i'la.²¹Intoq che loq'on aj Arab'ya ex kykyaqil nejenel toj tnam Kyedar teya; intoq kychjo'n kyu'n qpoj tman rit, rit ex chib'.²²Intoq che loq'on ẍk'uẍta'l aj Sab'a ex aj Raama teya, intoq kychjo'n kyu'n k'ok'sb'il tb'anilxi'x, e'tb'anil ab'j ex q'anpwaq.²³Intoq che xk'aẍlen Aran, Kane, Eden tuk'i'la, exqe' ẍk'uẍta'l aj Sab'a, aj Asirya ex kykyaqil aj Medya;²⁴Intoq che kyk'ayi'n xb'alun tz'umin, e'xb'alun kyeq smo'n tk'i' cha'x, tz'so'n tilb'ilal kyoj, e'xb'alun toj plaji'n chukchaq che ka'yin e'kuw ky'jaj xpa'tx'i'n.²⁵Intoq che ul b'ark tzajniqe' Tarsis lepchitz juntl ti'j juntl, nche tzaj kyiq'i'n k'aẍjel teya.
Ikyju'ya kse'n jun b'ark ajtokx toj tk'u'j ninnjab', nim q'inumal iqa'n tu'n.²⁶Xi'ya tib'aj a' nim t-xe kyu'n lmulteya kyajtzun toqi'na toj tk'u'j ninnjab' tu'n kyq'iq' ntzaj tjawetzq'ij.²⁷Che b'elex tz'aqju' tq'inumala, tk'a'ẍa, e'lmulteya exqe' lmulpalet ti'ja, e'aq'unal ti'j ttzeyila, e't-xk'aẍlela, e'tq'ojila, ex kykyaqilju' taq'unala, tzmajx t-xe ninnjab', toju' q'ij ajt-ximulq'aja toj ninnjab'.²⁸Che lu'lulju' ttolob' ninnjab' ajkyjaw ẍch'in nche b'et toja toj ninnjab'.²⁹Che b'eletzju' lmul b'ark toj kyb'ark; kykyaqilju' xyotx'il b'ark exqe' nche b'et kyoj b'ark che eletz xlik'pun twitz tx'otx'.³⁰Che jawil ẍch'in ex che oq'el b'a'nxi'x ti'ja. Kjawix kyq'o'n quq toj kywi' ex kb'el kyxtoli'nkyib' toj tza'j.³¹K'elel kyjon kywi' naq tu'nela, k'okyel kyq'o'n kyxb'alun te b'is ex okxi'x che oq'el ti'ja.³²kyb'itza' jun b'itz te kyimni ti'ja, nche b'isun ajkymante toju' kyb'itz: ¿Alkye b'a'n qmante qa ikju' kse'n Tiro, ju' nintnam atitoq ttzi ninnjab'?³³Nimtoq nimaqtnam nqe kyk'u'j tu'na, aj kyb'ju'lju' tk'a'ẍa tib'aj ninnjab'. Intoq che q'inumax nimaqkawil twitz tx'otx' tu'na tu'nju' nim tq'inumala ex tk'a'ẍa.³⁴Tb'uchub'tla ja'lo toj ninnjab', xini mulq'aja t-xe a'. Mache b'ajx mulq'aj tkyaqilju' tk'a'ẍa exqe' aq'unal teya tuk'i'la t-xe ninnjab'.³⁵Mqu'nkyib' kykyaqilju' xjal najlqe' kyoj tnam ttzi ninnjab' tu'n tpaja; b'jo'knitl tchi kyi'ju' kynimaqkawil, q'ancha'l kywitz xob'jni.³⁶Nche kyej xob'ju' xk'aẍlel kye txqantl tx'otx' ajtka'yinjtza kyu'n. Matxi' tz'oka xob'ajilx; majx makyej najsa'na. Tpakb'alju' tzul ti'j nimaqkawil aj Tiro

¹Tzaj yolin Qman Dyos weye', ex tma:²Ichan, q'manxa te nimaqkawil aj Tiro:
Chi Qman Dyos kjalu: Majaw tnima'ntib'a toj tanmiya, ex makub' t-xima'na qa jun dyosa q'uqliya toj kyq'uqb'il dyos npiq'chaj ninnjab' ti'jileya. Myana' dyosta, ichan na'ta toj tnab'la qa nkane toj twitza se'n jun dyos.³¿Ma atixi'xtzunta tnab'l kyetwitz Danyel? ¿Matojtzqi'na tkyaqilju' ti'xti' e'wa'n?⁴Machmet txqan tq'inumala Tu'n tnab'la ex k'atza, macheb'aj noj tkajona tu'n q'anpwaq ex saqpwaq.⁵Matxi' chmet txqan tq'inumala tu'nju' b'a'n xk'aẍlina, ex majaw tnima'n tib'a tu'n q'inumal.⁶Qu'mtzun chi Qman Dyos kjalu: ina' kub't-xima'na qa nkaneya ti'j kse'n jun dyos,⁷che ulel wiq'i'ne' najchaq xjal ti'ja; aye' maj txkup xjalqe', che q'ojil ti'ja tuk'i'l kyk'uẍtx'e'nb'il, aya xa'wanku'xi'xa ex atixi'x tnab'la. ex kb'el xonju' toklena twitz tx'otx'.⁸Kxel mulq'i'na tzmax t-xexi' jul, b'yonkamik kkyimela'ya totk'u'j ninnjab'.⁹¿Ma kukx t-ximanteju'ya qa jun dyosa, ajtpon takpuja kywitzu' tajq'oja? ¡Naqna' jun tal xjalta toj kyq'ob'ju' che b'el b'yonteya!¹⁰Toj kyq'ob' najchaq xjal kkyimela'ya, kse'n nche kyima' k'lul junxi'tl dyos. Ayine' Dyos Manb'aj matxi' chin yolin; matxi' txinma'ne' nyole', chi Dyos. B'itz te kyimni ti'ju' nimaqkawil aj Tiro

¹¹Tzaj yolin Qman Dyos weye', tma:¹²Ichan, b'itzanxa jun b'itz te kyimni ti'ju' nimaqkawil aj Tiro, kjalu:
A ntma'n Qman Dyos ja'lu:
Atoqa yek'b'ilteju' ttzinunal; nimtoq tnab'la ex xa'wanku'xi'xa.¹³tojtoq Eden tawal Dyos ta'ya, ate'k tkyaqil ch'ix tb'anil ab'j ti'ja: aye' rub'i, krisolit, jade, topasyo, kornalina, jaspe, sapiro, kranate ex esmeralda; q'anpwaq qe'toq tachb'ila ex tot-ẍkyina, b'incha'nqe' atxi'x tb'inchanjtza.¹⁴Kyej nq'o'ne' jun kyerb'in ka'yilteya, atitoqa twi' witz xjan weye' ex intoq b'eta kyxolju' che'w.¹⁵ttzinunal toqju' tchwinqlala tzajx toju' q'ij tkub'incha'na tzmax tej tb'inchan ila.¹⁶q'ojina ex chmet tila tej xchmet t-xk'a'ẍle'na. Ex nq'o'ntzuntza nwitze'; el nxla'ja'na twi' witz weye', ex etzq'i'na kyxolju' che'w tu'n kyerb'in intoq klolteya.¹⁷Jaw tnima'n tib'a tu'n xa'wanku'xi'xa; kub'tzpet tnab'la tu'n t-xa'wanku'yila. Makub' nxona twitz tx'otx', matz'el tch'ixawa wu'ne' kywitzku' nimaqkawil.¹⁸Nim txqan il xb'aj tb'incha'na, majxkub' tzu'wixa toju' txk'aẍle'na, majx soktena tz'ilsalkye tjaya te k'u'lb'il. Matzun jawb'ent jun q'aq' wu'ne' toja tu'n tb'aja tu'n. Kykyaqil che ka'yilteya ja'lo, naq tza'jtla twitz tx'otx'.¹⁹Kykyaqilju' nimaqtnam ojtzqilteya nche jawsak'puj ajtka'yinjtza kyu'n. Xob'ajilx soka'ya; ¡majx matxi' kub'najsa'na! chi Dyos. Tpakb'alju' tzul ti'j Sidon

²⁰Tzaj yolin Qman Dyos weye', tma:²¹Ichan, kutxi'tla Sidon ex q'manxa toj nb'iye' titi' tzul kyi'j.²²Q'manxa kye:
Intma'n Qman Dyos kjalu:
Chin okyele' te kyajq'oje' aj Sidon, chin jawil nima'ne' kyxole'. Knyek'u'ye' qa xjan qine' ajtkub' ntz'e'ysa'ne' kywitze', k'eleltzun tnik'tziltz qa ayine' Dyos Manb'aj.

²³Ktzajel nq'o'ne' yab'il kyi'je', ex kqojlel chik' kyoju' kyxk'ichb'eye'; che kyimele' najlqe'ye' toj kytaname', che b'yonjtzele' tu'n k'uẍtx'e'nb'il toj tkyaqil plaj. K'eleltzun tnik'tziltz qa ayine' Dyos Manb'aj.

²⁴Lay che yajtitlkye' aj Israel kyu'n kych'i'xal ex kyk'ixk'ojal ik'b'ilkye kyu'n tnam ate' kyi'jile. K'eleltzun kynik'tz qa ayine' Dyos Manb'aj.

²⁵Nxinma'ne' ayine' Dyos Manb'aj: ktzajel nb'u'yine' tnam Israel kyxolju' nimaqtnam jasputi'na'kyib', ex kxel nyek'une' kywitzku' nimaqtnam qa xjan qine'. Che kb'el najan aj Israel tojku' kytx'otx', ju' xinq'o'ne' te nmajine' Jakob'.²⁶Atzuntzu' che najala' b'a'n ex mix-a'lo' yekulkye, kb'jawil kyb'incha'n kyja ex k'okyel kyawal. Ayine' chin tz'e'ysalte kywitz kykyaqilju' najlqe' nqaku' kyk'etz, aye' nche el ik'onkye aj Israel. Oktzun k'elel tnik'tziltz qa ayine' Dyos Manb'aj, janche ajb'ena' aj Israel, chi Dyos. Tqanilju' tzul ti'j Ejipt

¹Tzaj yolin Qman Dyos weye' toj kab'lajoj (12) tajlal tlajoji'n xjaw te tlajoji'n ab'q'i, ex tma'n:²Ichan, kutxi' twitz Paraon, nimaqkawil toj Ejipt, q'manxa toj nb'iye' te kjalu:
A ntma'n Qman Dyos ja'lu: Chin okyele' te tajq'oja, paraon, nimaqkawil toj Ejipt, jun nintxkupa paqliya toju' nin a' ex intma'na: weye' nin a' Nilo, ayine' nb'inchante.⁴K'okyel nq'o'ne' xokb'il ti'j ttxa'na, knb'incha'ye' tu'n kyb'jo'k ye' kyiẍ ateqe' toju' nin a' ti'ju' txk'owila. ¡Kjawitz wiq'i'na toju' tnin a'ya kyuk'i'lxi' kyiẍ yo'lqe'k ti'ju' txk'owila!⁵K'elex nxona toj tchq'ajlaj, kyuk'i'lxi' kyiẍ toju' tnin a'ya; kb'el tz'aqa twitz tx'otx' toj q'ancha'l, mix-a'lo'x kjawil q'inteya tu'n tkux mqu'na. Knb'incha'ye' tu'n tb'aj ch'yo'na kyu'n tojk'ul txkup ex kyu'n k'utz.⁶Kykyaqilju' najlqe' Ejipt k'elelkynik' qa ayine' Dyos Manb'aj. Kyjoyju' aj Israel o'nb'il tuk'i'la, atzunta oka kse'n jun ajlaj kye:⁷Tej kyok ye' ti'ja kub'toqja ex e'k'ixb'i tu'na; tej kyajb'iltoq tu'n kyok ye' ti'ja, kub'potz'ja ex e'kub' tz'aq tu'na.

⁸Qu'mtzun inma'ne', ayine' Dyos Manb'aj: Knb'incha'ye' tu'n kyul q'ojil ti'ja Ejipt, tuk'i'l k'uẍtx'e'nb'il, tu'n kyb'aj kub' b'yo'n t-xjala ex talu'na.⁹Kjela naq chq'ajlajtl, ex k'elel kynik'ju' xjal qa ayine' Dyos Manb'aj. Tmaya qa teya a' Nilo exqa aya b'inchante.¹⁰Ja'lo chin okyele' ajq'oj ti'ja ex ti'ju' taya. Kjela wu'ne' se'n chq'ajlaj xob'ajilx ex b'ajni xitj, tzajx Mikdol ponx Asuwan, ponx toj nqach tuk'i'l Etyopiy.¹¹Lay che ik'tl xjal ex txkup toja. Mix-a'lo'xte knajal toj kab'naq ab'q'i na'tz.¹²K'okyela wu'ne' Ejipt te jun tx'otx' xitjnixi'x; che kjelten kab'naq ab'q'i nimaqttanama xitjniqe', xitjniqe'xi'x kyekywitz txqantl nimaqtnam xitjniqe', che b'je'lex wiq'i'ne' najlqe' toja ex che kxe'l nsputi'ne' kyoj txqantl tx'otx' ex nimaqtnam.

¹³Nxinma'ne', ayine' Dyos Manb'aj: tb'ajlenxi'tzu'n kab'naq (40) ab'q'i, che tzajel nb'uyi'ne' aj Ejipt kyoju' tx'otx' jamatxitoq che'xa' nsputi'ne'.¹⁴Knb'incha'ye' tu'n tanjtzkyi'ju' aj Ejipt xini q'i'nqe' toj jitz'jtib'il ex tu'nkykub'najan toj tnayajkya'j te Ejipt, tojxu' kynajb'il tnejel, atzuntzu' ktenb'ela' jun kykawb'il mixti'x toklen.¹⁵K'okyel te jun kawb'il naqch'i'n toklen kyxol kykyaqil, ex lay tentl tipumal kyib'aju' txqantl nimaqtnam. K'okyel tal b'o'sxi'x wu'ne', lay kawintl kyib'aj txqantl tx'otx';¹⁶ex lay tz'okqetl kyk'u'j aj Israel ti'j Ejipt, qu'n tu'nju' lu k'elelkynik' myab'a'nju' kyxim tej kyxi' jyol o'nb'il atzu'. K'eleltzun kynik'tz qa ayine' Dyos Manb'aj, chi Dyos.

¹⁷Tzaj yolin Qman Dyos weye' toj jun tajlal tnejel xjaw teju' ab'q'i junaq wuq (27), tma:¹⁸Matxi' che tzaj t-sma'n Nab'ukodonosor, nimaqkawil aj B'ab'ilon, t-xjal te q'oj ti'j Tiro; matxi'pe' kyej ẍle'jix toj kywi' kykyaqil ex matxi' b'jaw tx'a'kyix ti'j kyqul; extzun mixti'xte matxi' b'ent kyu'n kyuk'i'lju' t-xjal ti'j Tiro.¹⁹Qu'mtzun inma'ne', ayine' Dyos Manb'aj, knb'incha'ye' tu'n tkub'ti'j Ejipt tu'n Nab'ukodonosor, ex tu'n kyb'je'l tiq'i'n tq'inumal ex tkyaqilju' atite; tu'ntzun tajb'en kb'je'lel talq'a'n te chojb'ilkye t-xjal te q'oj.²⁰Knb'incha'ye' tu'n tkub'ti'j Ejipt tu'n Nab'ukodonosor, chojb'ilteju' q'oj tb'incha ti'j Tiro, qu'n weye' saq'unana'. Ayine' Dyos Manb'aj nchin q'mante.

²¹Knb'incha'ye' tu'n tten tipumalju' tnam Israel toju' tq'ijlalil lu, ex tu'n tyolina Esekyel chik'lixi'x kye. K'eleltzun kynik'tz qa ayine' Dyos Manb'aj. Tz'e'ysb'il twitz Ejipt

¹Tzaj yolin Qman Dyos weye' ex tma:²Yolina ichan toj nb'iye' ex q'manxa:
A ntma'n Dyos ja'lu:
Che' ẍch'ine' tu'nju' tq'ijlalil³matxi' tzulkanun; ¡Xi' tul lq'e tq'ij Qman Dyos! ¡jun tq'ijlalil b'isb'ajilx kyeju' nimaqtnam!⁴Tzulju' q'oj ti'j Ejipt. Ajtzun kyb'ajkub' b'yo'n txqan xjal, ajkyb'ajx elq'a'n kyq'inumal, ex ajtkub' xitu'n Ejipt tuk'i'lxi' tq'uqlil, kjawil lu'lun Etyopiy.⁵Ex kb'elkyi'ju' aj Etyopiya te q'oj toju' q'oj exqe' aj Lib'ya, aj Lidya, ex kykyaqil aj Arab'ya, aj Kub' ex kye txqantl tnam, exqe' kye txqantl tnam mujb'a'nkyib' tuk'i'l.⁶A ntma'n Qman Dyos ja'lu: Che kyimelkye' nche b'aj onin tuk'i'l Ejipt toj q'oj, tzajx Mikdol ponx Asuwan. Kjel me'setju' tnimjtib'il Ejipt tu'n toklen. Ayine' Dyos Manb'aj nchin q'mante.

⁷A Ejiptju' kjel b'o'ljxi'x kyxol kykyaqil nimaqtnam, ex che kjel xitjxi'xju' tnam toj.⁸Ajtjaw nk'ant-sa'ne' tx'otx' lu tu'n q'aq' ex ajkykyaj xitj kykyaqilju' nche' onin tuk'i'l, k'eleltzun kynik'tz qa ayine' Dyos Manb'aj.

⁹Ajtpon tq'ijlalil tz'e'ysb'il twitz Ejipt, che xe'lnchq'o'ne' sanjelal toj ninnjab' tu'n kyjaw lab'ti xjal aj Etyopiya tzalajb'il ta'qe', k'okyeltzun tchitz kyi'j. Naqx tu'n tulkanuntlju' tq'ijlalil lu.

¹⁰Nxinma'ne', ayine' Dyos manb'aj: K'ajb'el Nab'ukodonosor, nimaqkawil aj B'ab'ilon, wu'ne', tu'n t-xitet tq'inumal Ejipt.¹¹Kxe'l kyuk'i'l t-xjal te q'oj, ju' txkup xjalqe'xi'x, xitulteju' tx'otx'. Che q'ojil ti'j Ejipt tuk'i'l k'uẍtx'e'nb'il, ex kjel noj toju' tx'otx' kyu'n kyimni.¹²Kb'el ntzqijsa'ne' nin a' Nilo, ex kxe'l nq'o'ne' tnam toj kyq'ob' xjal b'inchal taq'wix; kjel xitju' tnam lu ex tkyaqilju' ati toj wu'ne', toj kyq'ob' najchaq xjal. Ayine' Dyos Manb'aj matxi' chin yolin.

¹³Nxinma'ne', ayine' Dyos Manb'aj: che kb'el nxitu'ne' witzleb' ex che b'el nb'ajsa'ne' mya dyosqe' toj Menpis. Lay ten juntl kawil toj Ejipt, ktenb'il xob'ajil toju' ttx'otx' wu'ne'.¹⁴Kjel nxitu'ne' toj tnayaj Ejipt, k'okyel nq'o'ne' tq'aq'al Soan ex kb'el ntz'e'ysa'ne' twitz Teb'as.

¹⁵Ktzajel b'aj ntx'u'jile' tib'aj Sin, tkuwal Ejipt, ex kb'el nxitu'ne' tq'inumal Teb'as.¹⁶K'okyel nq'o'ne' tq'aq'al Ejipt ex kjawil t-xb'aq'u'ntib' Sin toj k'ixk'oj; che okyex lku'n xopa'j toj nintapi ti'j Teb'as, ex q'ijtl ku'xi'x che pomel q'ojil ti'j Menpis.¹⁷Che kyimelju' ku'xun aj On ex aj B'ub'astis toj q'oj, aye'tzu'n txqantl xjal najlqe' atzu' che kxe'lq'i'n toj kars.¹⁸Ajtkub' nxitu'ne' tipumal Ejipt ex ajkyb'aju' tkuwal majx ntnima'ntib' kyu'n, kyupjel q'ij toj Tapnes, kb'el jupli jun muj ti'j Ejipt, ex che b'ajxe'l q'i'n xjal najlqe' kyoju' nimaqtnam toj kars.¹⁹Kb'el ntz'e'ysa'ne' twitz Ejipt, oktzun k'elel kynik'tz qa ayine' Dyos Manb'aj, chi Dyos.

²⁰Tzaj yolin Qman Dyos weye' toj wuq tajlal tnejel xjaw te tjunlajoji'n (11) ab'q'i, tma:

²¹Matxi' tz'el ntoqi'ne' tq'ob' Paraon, nimaqkawil aj Ejipt, ex mix-a'lo' matxi' tz'ok q'anante mo ptzonte tu'n, tu'n ttentl tipumal ex tu'nwt ttzyetlju' k'uẍtx'e'nb'il tu'n.²²Qu'mtzun inma'ne', ayine' Dyos Manb'aj: chin okyele' ajq'oj ti'j Paron, nimaqkawil toj Ejipt. Che elel ntoqi'ne' kab'e' tq'ob', aju' b'a'n exju' toqnitl, knb'incha'ye' tu'n tel tz'aqju' k'uẍtx'e'nb'il toj tq'ob'.²³Che b'ajex nsputi'ne' aj Ejipt kyoj txqantl nimaqtnam, ex che b'ajex nsputi'ne' kyoj chukchaq tx'otx'.²⁴Ex kxe'l nq'o'ne' tipumal tq'ob'ju' nimaqkawil aj B'ab'ilon, ex kb'el nq'o'ne' nk'uẍtx'e'nb'ile' toj tq'ob'. Kche ntoqi'ye' tq'ob' paraon, kjel tentzuntz twitzju' tajq'oj ajtna'nte k'ixb'nitl.²⁵Kxe'l nq'o'ne' kyipumal tq'ob'ju' nimaqkawil aj B'ab'ilon ex che elelwiq'i'ne' tq'ob' paraon. Ajt-xinq'o'ne' nk'uẍtx'e'nb'ile' toj tq'ob' nimaqkawil aj B'ab'ilon ex ajtjaw ti'n ti'j Ejipt, oktzun k'elel kynik'tz qa ayine' Dyos Manb'aj.²⁶Che b'ajex nsputi'ne' aj Ejipt kyoju' txqantl tnam ex nimaqtnam, oktzun k'elel kynik'tz qa Dyos Manb'aj, chi Dyos. Naku'j jun k'ute paraon

¹Tzaj yolin Qman Dyos weye' toj jun tajlal toxi'n xjaw te junlajoj (11) ab'q'i, ex tma:²Q'manxa te Paraon nimaqkawil toj Ejipt, ex kye kykyaqilju' t-xjal:
¿Alquk'i'l b'a'n tmujb'eta' toklena nimxi'x?³Ikju'ya kse'n jun tzis mujqa jun k'ute toj Lib'ano, ate' tq'ob' tb'anilqe' tuk'i'l kyxlekumal tib'aju' k'ul, nimxi'x twe' njapun tunun toj muj.⁴Eb'aj ch'iy tu'n jb'al ex a' twitz tx'otx'; mache b'jawb'ent nin a' ti'jele ja awa'na'toq; e'ak'set kykyaqil tze toju' tx'otx' kyu'n a'.⁵Ch'iyxi'x kyekywitz txqantl tze toju' k'ul qu'n nim a' ati te, mache chmetju' tq'ob' ex eb'ajch'iy.⁶B'aj kyb'incha'n tkyaqil ch'ix pich' kypaqb'il kyxolju' tq'ob'; ex tkyaqil ch'ix tojk'ul txkup nche b'aj alan kyjaq'ju' tq'ob'. Kb'antel kyanq'in txqan nimaqtnam tjaq'ju' t-xlekumal.⁷Juntoq nin tze tb'anilxi'x, e' tq'ob' nimaq kywe', ate'toq tlok' tk'etz nim a'.⁸Mixti'x jun k'ute toju' tawal Dyos ikwitju' kse'nte; mixti' jun tzaj atitoqwit tq'ob' kse'nte, mixti' jun tze kastany atiwt txqan t-xaq, mixti' jun tze toju' tawal Dyos xa'wanku'xi'xwit kse'nte.⁹Tb'anilxi'x kyuk'i'l txqan tq'ob' e'kub' nb'incha'ne'; nche tx'u'jin txqantl tze toj tawal Dyos ti'j.

¹⁰Chite Qman Dyos kjalu:
Ch'iyxi'xte' tze nimin twe', japun tunun toj muj; ch'iyxi'x ex jaw tnima'ntib'.¹¹Qu'mtzun matxi' tz'el wik'u'ne'; kjel nq'o'ne' tu'n tkub'ti'j tu'n jun nejenel najchaq xjal, kb'inchanjtzel te se'nxju' til xtb'incha.¹²Kb'el tx'emu'n kyu'n najchaq xjal txkupqe'xi'x ex kjel koli'n; che kb'el tz'aqju' tq'ob' toqjniqe'tl kywi' kykyaqil witz, kyoj b'ya' ex kyoj a' toju' tx'otx', ex che xe'l oq kykyaqilju' tnam najlqe'toq tjaq' t-xlekumal ex kjel kykolb'e'n.¹³Tkyaqil ch'ix pich' che b'ju'l najal kyxol tq'ob'ju' tze kub'ni tz'aq, ex tkyaqil ch'ix tojk'ul txkup te chukchaq kyyajajil che b'ju'l paqeb'il kyxolju' tq'ob'.¹⁴Ex lay ch'iy juntl tze nimxi'x, b'a'nqa ati tk'etz a', ex maskyepe' a'li'n, okwit japumetl tunun jata' muj ex lay ch'iy twe' nim. Kykyaqil che kxe'lq'o'n tu'n kykyim, tu'n kyku'x toju' juntl anq'ib'l tjaq' tx'otx' tu'n kypon kyuk'i'lju' ate'tl toj muqb'il.

¹⁵Ayine' Dyos Manb'aj nchin yolin: ajtku'xju' tze toj tkawil kamik, knb'incha'ye' tu'n ttzqi'ju' ninnjab' nim t-xe tu'n b'is; che web'elju' nimaq a' exqe' a' nche b'et; tu'nte knb'incha'ye' tu'n tkyaju' witz Lib'ano toj b'is ex che b'eltzqij kykyaqilju' tze toj k'ul.¹⁶Ajtku'x wu'ne' toj tkawb'il kamik tu'n tten kyuk'ilju' oje che kyim, che lu'lulju' nimaqtnam ajkyb'inte tq'ojq'ojel ajtkub' tz'aq. Ex atzu' kqeb'ela' kyk'u'ju' tze toj Eden toju' anq'ib'l tjaq' tx'otx', ju' xa'wanqeku'xi'x ex a'li'nxi'x kyxe twi' witz Lib'ano.¹⁷Ex ikxkye che b'elix kse'nte, toj tkawb'il kamik, tu'n kypon kyk'etzju' eb'aj kyim toj q'oj. Aye'tzu'n ntoq che anq'in tjaq' t-xlekumal, che b'ajex sputj kyoju' nimaqtnam.¹⁸Mixti' jun tze toj Eden ikywitju' kse'nte tu'nju' xa'wanku'xi'x ex nimin twe'; tu'npetzunju', kb'elex kyuk'ilju' txqantl tze toj Eden, toju' anq'ib'l tjaq' tx'otx', tu'n tnajan kyxol xjal min nche niman te Dyos, kyxolju' xjal e'kyim toj q'oj.
Ate' tze a paraon kyuk'i'l kykyaqilju' t-xjal, ayine' Dyos Manb'aj, nchin yolin, chi Dyos. Iky paraon kse'n jun nin txkup

¹Tzaj yolin Qman Dyos weye' toj jun tajlal tkab'lajoji'n (12) xjaw teju' kab'lajoj (12) ab'q'i, ex tma:²Q'onkju'ya b'itz te kyimni lu ti'j paraon, nimaqkawil aj Ejipt:
Naku'j jun b'aluna kye nimaqtnam; ikju'ya kse'n jun nin txkup toj ninnjab': nẍpuq'ina toj taya nb'aj t-xoq'li'nju'ya a' kyu'n tqana ex nb'aj chukliju' a' tu'na.

³Chi Qman Dyos kjalu: b'a'nqa atiya kyxol txqan tnam, kxel nxone' pa tib'aja ex ktzyetela wu'ne' toj.⁴Ktzajel jowowona wu'ne' ex kb'el nnuqb'a'na twitz tx'otx'. Knb'incha'ye' tu'n kykub' we' kykyaqilju' pich' twitz kya'j tib'aja, ex tu'n kyb'ajnoj kykyaqil tojk'ul txkup ti'ju' tchib'jila.⁵Kb'ajel noj kywi'witz ex kyoj b'ya' tu'n tchib'jila q'anaqtl.⁶Kb'ajel wak'sa'ne' twitz tx'otx' tu'n tchk'ela, kpomil tzmax kywi' witz, ex kb'ajel noj toj tb'e nimaq a' tu'n.⁷Ajtkub' nxitu'na, knb'incha'ye' tu'n tkub' qloljix twitz kya'j ex tu'n kykub' yupju' che'w; kb'el njuptz'a'ne' muj twitzu' q'ij ex lay k'anttlju' xjaw.⁸Che b'elnyupi'ne' spik'b'il nche k'ant twitz kya'j tu'n tpaja, ex kjel ntakb'a'ne' ttx'otx'a toj qxopin. Ayine' Dyos Manb'aj nchin q'mante.

⁹Ajtpon tqanil kyoj tx'otx' min tojtzqi'nqe'ya qa matxi'toq kub' xitja, knb'incha'ye' tu'n kyb'aj lab'ti nim tnam.¹⁰Kb'elex nq'o'ne' xob'el kyoj b'a'npun tnam tu'n tpaja; majx k'okyeltchi kye kynimaqkawil ajtqoptz'aj nk'uẍtx'e'nb'ile' kywitz. Che lu'lul tu'n xob'el ti'ju' kychwinqlal ajtkub'ti'ja.

¹¹Ntma'n Qman Dyos kjalu:
Kb'elti'ja tu'n tk'uẍtx'e'nb'il nimaqkawil aj B'ab'ilon.¹²Knb'incha'ye' tu'n kyk'ixb'i ttanama nim kyb'aj tu'n kyk'uẍtx'e'nb'il nimaq q'ojil. Kb'ajel ttxa'n tninb'iltib' Ejipt kyu'n ex che mankulju' txqan ttanam kyu'n.¹³Che kb'el nb'yo'ne' kykyaqilju' alu'mj nche k'wan ti'ju' taya, ex lay ku'x xoq'le'ntl kyu'n xjal ex tu'n kyqan alu'mj.¹⁴Kẍtileb'eltzun a'tz wu'ne' ex tu'n kyb'etju' nimaq a' toj nak'b'il kse'n aseyt. Ayine' Dyos Manb'aj nchin q'mante.¹⁵Ajtzun tkyaj chq'ajlajix Ejipt wu'ne', ex ajtkyaj spik'chaju' tnam, mixti'tl najalte, k'elelkynik' qa ayine' Dyos Manb'aj.

¹⁶Jun b'itzte' lu te muqb'il, ikytzu'n kxela' kyb'itza'n qya te chukchaq nimaqtnam ajkyoq' ti'j Ejipt ex kyi'ju' t-xjal nim kyb'aj. Ayine' Dyos Manb'aj nchin q'mante, chi Dyos. Toj tkawb'il kamik ta' Ejipt

¹⁷Tzaj yolin Qman Dyos weye' toj o'lajoj (15) tajlal tkab'lajoji'n xjaw te tkab'lajoji'n (12) ab'q'i, chij kjalu:¹⁸Ichan, b'itzanxa jun b'itz te kyimni kyuk'i'lu' txqan qya te chukchaq nimaqtnam kyi'ju' txqan tnam toj Ejipt ex kyi'ju' kynejel, kjalu:
Nche'x tz'aqju' nim kyipumal toj juntl anq'ib'l tjaq' tx'otx', kyxolju' oje che ku'x toj muqb'il.¹⁹¿Ma majxtzun xa'wanku'xi'xta kyekywitzju' txqantel? Kutku'xa ex nuqeku'ya kyuk'i'lju' k'lul witzleb'.

²⁰Knab'elte'kyi'j kyuk'i'lju' nche kyim toj q'oj. Naq atitlju' k'uẍtx'e'nb'il. Che kyimelju' txqan kyxjal kyuk'i'l.²¹Aye' nejenel kuwqe'xi'x che k'molkye aj Ejipt kyuk'i'lxi' mujlikytzi tuk'i'l toju' tkawb'il kamik, okkyma': ¡Matxi' che kb'u'l! ¡Mache kyej snuk'e mib'a'n che niman te Dyos lu toj q'oj!

²²Lu Asirya ati, kyuk'i'lju' t-xjal te q'oj txoli'nkyib' ti'ju' muqb'il. Kykyaqilx eb'aj kyim toj q'oj.²³Mqu'nqe' toju' jul nimxi'x t-xe. Ku'x kyq'o'n t-xjal te q'oj xob'ajil kyxolju' i'tzqe'xtoq, ex mache b'ajkyim toj q'oj, ja'lo txoli'nkyib' ti'ju' muqb'il te Asirya.

²⁴Lu Elam ati kyuk'i'l kykyaqilju' t-xjal te q'oj txoli'nkyib' ti'ju' muqb'il. Kykyaqilx eb'aj kyim toj q'oj, mache ku'x tz'aqju' mib'a'n che niman te Dyos toju' najb'il tjaq' tx'otx'. Kub' kyq'o'n xob'ajil kyxolju' i'tzqe', atzu'n ja'lo mixti'tl kyoklen kyxolju' eb'ajku'x toj muqb'il.²⁵Woqlitl Elam kyxolju' t-xjal te q'oj kyimniqe'tl, kykyaqil k'lul junxi'tl dyos eb'aj kyim toj q'oj, txoli'nkyib' ja'lo ti'ju' muqb'il. Kub' kyq'o'n xob'el kyxolju' i'tzqe', atzu'n ja'lo mixti'tl kyoklen kyxolju' eb'ajku'x toj muqb'il. Mache kyej kyxolju' xjal kub'ni b'yo'nqe'.

²⁶Lu Mesek ex Tub'al ate', kyuk'i'l kykyaqilju' kyxjal te q'oj txoli'n ti'ju' muqb'il kyu'n, kykyaqil k'lul junxi'tl dyos eb'aj kyim toj q'oj, kub' kyq'o'n xob'el kyxolju' itz'qe'.²⁷Mya mqu'nqe' kyuk'i'lju' kuwqe' ojtxi', eb'ajku'x kyuk'i'l kq'ojb'il toj tkawb'il kamik, tku'x kyk'uẍtx'e'nb'il tjaq' kywi' ex tku'x kykolb'il kyib'aj, tkub'lenxi' kyq'o'n xob'el kyxolju' i'tz'qe'.

²⁸Atzuntzu' ktenb'ela'ya Ejipt, kyxolju' k'lul junxi'tl dyos, kub'ni xitja ex ku'xni mqu'na kyuk'i'lju' kyimniqe' toj q'oj.

²⁹Lu Edom ati, kyuk'i'l tnimaqkawil ex tkawil. Tu'npetzu'n kuwqe'xi'x, ate'qe' kyxolju' eb'aj kyim toj q'oj, mqu'nqe' kyxolu' k'lul junxi'tl dyos, kyxolju' ku'xniqe' toj muqb'il.

³⁰Luqe' nejenel te tnayajkya'j kykyaqilx ate', ikxse'nqe' kykyaqil aj Sidon. Nim kyipumal ten ex kub' kyq'o'n xob'el, atzu'n ja'lo matxi' che ku'x kyuk'i'lju' eb'aj kyim toj q'oj, mab'je'l kych'ixaw. K'ululqe' kye junxi'tl dyos, ex mqu'nqe'tl mixti'tl kyoklen kyxolju' eb'aj kyim toj q'oj, kyxolju' eb'ajku'x toj muqb'il.

³¹Ajkyka'yijntz tu'n paraon, kqeb'el tk'u'j tu'n kykyimlen kykyaqilju' t-xjal, qu'n e'kyim kyuk'i'lxi' kykyaqilu' t-xjal te q'oj. Ayine' Dyos Manb'aj nchin q'mante.³²Kub' tq'o'n paraon xob'el kyxolju' i'tz'qe'; qu'mtzun mqu'n kyxolju' k'lul witzleb', kyxolju' e'kyim toj q'oj, kse'nqe'xju' txqan t-xjal te q'oj. Ayine' Dyos Manb'aj nchin q'mante, chi Dyos. Taq'unju' xq'uqil (Ez 3.16-21)

¹Tzaj yolin Qman Dyos weye', ex tma:

²Ichan, yolina kyeju' twanaqila, q'manxa kye: Aj txinsma'ne' q'oj toj jun tx'otx', aye' xjal toju' tx'otx' lu njaw kysk'o'n jun kyxol tu'n tok te xq'uqil.³Ajtzun tka'yinte xq'uqil qa xi'kytzaj lq'eju' ajq'oj tk'etzju' tnam, inxitq'ajtza'n chun ex ntma'n tpakb'al kye xjal tu'n t-xikyka'yi'n kyib'.⁴Qatzun ati jun matb'iju' tq'ojq'ojel chun ex min nxi' toj twinqil, aye'tzu'n ajq'oj che pomil ex kb'el kyb'yo'n, axte ati tpaj tu'nju' tkamik,⁵qu'n matb'iju' tq'ojq'ojel chun extzun min xxitb'i'n; axte ati tpaj ti'ju' tkamik, qu'n naqwit matxi tb'i'n ma'wtlo klet.⁶Qatzun aju' xq'uqil matil xi'toq kyponju' xjal ajq'oj extzun min xxitq'ajtza'n chun tu'n kb'inteju' xjal, aye'tzu'n ajq'oj che pomel ex kb'el kyb'yo'n jun xjal, kkyimelte' xjal lu tu'n tpaj til, oktzun chin xjelulwe' teju' xq'uqil tu'n tpaj tkamikju' xjal lu.

⁷Matxi' kub' nq'o'na, ichan, kse'n jun xq'uqil ti'ju' tnam Israel. Aya kk'molteju' tqanil wu'ne' ex tu'n txitma'na wab'ib'le' kye tu'n kyb'inte.⁸Qaj ntzajku' nma'ne' tqanil tz'e'ysb'il twitz jun b'inchal il tu'n tkyim; qatzun min xxitma'na te tu'n tch'exb'ente tchwinqlal, ex min xtb'incha, kkyimelju' aj il lu tu'n tpaju' til, oktzun chin xjelulwe' teya tib'aju' tkamik.⁹Qatzun matxitma'nta teju' b'inchal il tu'n tanjtzti'j tanmi, ex min xtb'incha, kkyimel tu'n tpaj til, atzunta oktkla' tib'a. Tb'inchb'ajilex junjun qa b'a'n mujqa mya (Ez 18.21-32)

¹⁰Ichan, q'manxa kye aj Israel: Aye'kye' inkyma'ne': Nim txqan qpaj ex qil. Qu'mtzun nqo q'ayj b'a'nxi'x. ¿Se'n taq'witzun ajqanq'in? chechije'.¹¹Ayintzunwe', Dyos Manb'aj, axxi'x ayinku'ye' chin xel q'mante, min wajb'ile' tu'n tkyimiju' b'inchal il, naq o'kx tu'n tanjtzti'j tanmi ex tu'n tanq'in. Israel, q'o'nkju'ya tchwinqlala taq'wix ljo'n tu'na. ¿Titiqu'n kkyimela'ya?

¹²Ichan, q'manxa kyeju' twnaqila: qama b'inchan il jun xjal b'a'n tchwinqlal, lay klet tu'nju' tchwinqlal b'a'n tnejel, qatzun makyej t-xon jun aj ilju' taq'wixil, lay kyim tu'nju' til xtb'incha nejl. Qatzun b'a'n xjal mab'inchan il, lay tz'ajb'enju' tchwinqlal b'a'n tnejel tu'n tanq'intl.¹³Qama nmaye' tu'n tanq'in jun xjal b'a'n tchwinqlal, extzun matz'ok qe tk'u'j ti'ju' b'a'n matxi' tb'incha, ex matxi tb'incha'ntlju' taq'wix, lay tz'ok nq'o'ne' tb'inchb'aj b'a'n toj tajlal, kkyimel tu'nju' taq'wix xtb'incha.¹⁴Qatzun manmaye' tu'n tkyim jun b'inchal il, qatzun makyej ttzaqpi'nju' il ex matb'inchaju' b'a'n ex tnik'alilti'j,¹⁵ex matxi tanjsa'n ti'ju' ojetoq kyajttzyu'n te prent mujqa matxitoq tz'el telq'a'n, ex mache tb'inchaju' kawb'il ntq'o'n chwinqlal ex makyej ttzaqpi'n b'inchaj taq'wix, axxi'x lay kyim, k'anq'il.¹⁶Ina' anq'in b'a'n ex toj tnik'alilti'j, k'anqil, ex lay tzaj nna'ntle' til ojetoq b'aj tb'incha'n.¹⁷Chechiloju' twnaqila qa mya tnik'alilti'ju' nb'incha'ne'; axxi'x aye'na'kye min nkyb'incha'n tnik'alilti'j.¹⁸Qama kyej tq'o'n b'a'nxjal tu'n tb'inchanteju' b'a'n ex matxi tb'incha'n taq'wix, kkyimel tu'nju' il xitb'incha'n.¹⁹Qatzun atlju' b'inchal myab'a'n makyej t-xonju' b'inchaj myab'a'n ex matb'incha'ju' b'a'n ex tnik'alilti'j, tu'nju' lu k'anq'ila'.²⁰Inxi'x kyma'nchaqtle': Mya tnik'alti'ju' ntb'incha'n Qman Dyos, chechije'. Oktzun che okelkye' toj xjel teyile junjun wu'ne' aj Israel, se'nxchaqju' kyb'inchb'aje'. Tej tkub'ti'j Jerusalen

²¹Ul jun xjal toj jwe' tajlal tlajoji'n (10) xjaw te tkab'lajoji'n (12) ab'q'i qetzlen q'i'ne' toj qtanam, ojetoq tz'etz oq toj Jerusalen ex tzaj tma'n weye' qa ojetoq kub'ti'ju' nintnam kyu'n ajq'oj.²²Ojetoq kub' tq'o'n Qman Dyos tq'ob' wib'aje' toju' qonik'an na'mxtoq tulju' xjal tzaqpaj lu; tetzun prim, tej tulju' ichan, tzaj tq'o'ntl Qman Dyos tu'n nyolintle' ex elju' meyil wi'je'. Aye' kyilju' tnam

²³Tzaj yolin Qman Dyos weye', ex tma:

²⁴Inkyma'n xjal najlqe' kyoju' nimaqtnam toj Israel xitjniqe'tl, kjalu: Tjunaltoq Ab'raam, extzun ok te tajawju' tx'otx'; yajwittzunloqe, b'a'npun txqan qb'aj, qo okyel te tajawju' tx'otx', chechi.²⁵Qu'mtzun, q'manxa kye: lu xtma Qman Dyos: Inche ch'yonkye' chib'j tuk'i'l tchk'el, nche k'ulune' kye witzleb', nche b'yo'n xjale', ¿ma oktzun che okyele' te tajawju' tx'otx' toj kywitze'?²⁶Majx kyajb'ile' q'oj tuk'i'l kyq'ojb'ile', nkyb'incha'ne' ti'xti' ik'o'nqe' wu'ne', kykyaqilxe' nche b'inchan ajpajil, ¿oktzun che okyele' te tajawju' tx'otx' toj kywitze'?

²⁷Ex q'manxa kye: chi Qman Dyos kjalu: Axxi'x ayinku'ye' chin xel q'mante, ex ikx che b'elb'yo'nju' najliqe' kyoju' nimaqtnam xitjniqe', aye'tzu'n najlqe' toj kojb'il knb'incha'ye' tu'n kyxi' ch'yo'n kyu'n tojk'ul txkup, aye'tzu'n najlqe' kyoj pik ex kyoj jyom che kyimel tu'n yab'il.²⁸Kjel nq'o'ne' tx'otx' chq'ajlajtl ex xitjnitl, ex kb'el nxitu'ne' tipumal njaw tnima'ntib' tu'n. Che kjel chq'ajlajixju' witz toj Israel; mix-a'lo'tl k'iky'ex kyoj.²⁹Ajtzun tkyaj chq'ajlajixju' tx'otx' ex xitjnitl wu'ne' tu'n kpaju' il taq'wixqexi'x b'aj kyb'incha'n, k'eleltzun kynik'tz qa ayine' Dyos Manb'aj.

³⁰Nche yolinju' twnaqila ti'ja kyk'etzju' nimaqtapi ex kytzi ja, ex nkyma'n kyxolx: kukytzaje', qo'qe' b'ilteju' tpakb'al saj tma'n Qman Dyos, chechij.³¹Ikytzu'n che ulju' ntaname' ex che kb'el qe twitza, kse'nxu' nkyb'incha'n, tu'n kyb'inteju' tyola. Layxtzun txikyb'incha'n. Inxi' kyma'nchaqtl naku'j b'itz te xmoxb'il qya, atzu'n kyanmi yo'lok ti'j pwaq.³²Nokq'o'na kyu'n te jun xjal nb'itzan ti'j b'itz te xmoxb'il qya, tb'anil b'itzana ex b'a'n chinb'ana ti'j arpa. Nkub' kyb'i'n tyola, extzun min nxikyb'incha'n.³³Tkyaqiltzunte' yol lu kjapumel; ex ajtjapun, k'elelkynik' qa ati jun t-sanjelal Dyos kyxol. Tqanilju' tzul kyi'j k'ik'lel kyxol aj Israel

¹Tzaj yolin Qman Dyos weye', tma:

²Ichan, yolina toj nb'iye' kyi'ju' k'ik'lel kye aj Israel, q'manxa kye: Lu ntma'n Qman Dyos: ¡Layqe'xwitju' k'ik'lel kye aj Israel, aye'x nkyxq'uqi'nkyib'! Aye'kye' rit tu'n kyxi' kyka'yi'n k'ik'lel.³Inxi'x che k'wane' ti'ju' lech, nkyb'incha'n kyxb'alune' tu'n kysmal ex nche kub' kyb'yo'ne' rit q'u'sqe'xi'x, extzun min nche'x kyk'ayi'ne' rit.⁴Min nche onine' kyi'ju' rit numjniqe', ex min nche kyq'ana'ne' yab'qe', ex min nok kyptzo'ne' toqjni tqan, ex min najtz kyanjsa'n ti'ju'ye' nche kyajtzpet, ex nche kyjyo'ne' nche'x tz'aq, kuwqepe'ye' kye.⁵Matxi' che kyaju' nrite' mixti' k'ik'lel kyi'j ex matxi' che b'ajx sputj, ex matxi' che b'aj ch'yo'n kyu'n tojk'ul txkup.⁶Mache b'ajx sputj kyojile k'ul ex kywi'yile nimaq witz, mache b'ajx tzpet toj tkyaqilju' tx'otx', ex mix-a'lo' nxitk'u'j kyi'j tu'n txi' jyolkye.

⁷Kyb'inkutzune' nyole' b'a'nxi'x, k'ik'lel.⁸Axxi'x ayine' Dyos Manb'aj, ayinku'ye' chin q'malte: Kykyaqil chukchaq tojk'ul txkup ẍeb'ajx elq'ankye nrite' ex mache'x kych'yo'n, qu'n mixti' k'ik'lel kyi'j. Min nche'xju' nk'ik'lele' jyolkye rit. Inxi'x xikyka'yi'n kyib'ju' k'ik'lel, aye'tzu'n rit min nche'x kyka'yi'n.⁹Qu'mtzun k'ik'lel, kyb'inku'ye' yol¹⁰kxe'l nma'ne' kyeye', ayine' Dyos Manb'aj: Chin okyele' te kyajq'oje' k'ik'lel, ex chin xjelule' kyeye' kyi'ju' nrite'; k'elel wiq'i'ne' kyoklene' xq'uqilkye, tu'ntzun lalun tz'ok kyka'yi'ntl kyib'e' kyib'kyib'e'; che elel wiq'ine' nrite' kyeye', tu'ntzun lalun che b'aj kych'yo'ntle'. Aju' b'a'n k'ik'lel

¹¹Nxinma'ne', ayine' Dyos Manb'aj: Ayinxwe' chin xe'l ka'yinkyeju' nrite'.¹²Kse'n k'ik'lel nb'ajx tk'u'j kyi'ju' trit ajkyxi sputj, ikxtzun weju'ye' kyi'ju' nrite'; che tzajel wiq'i'ne' jachaq sputi'nakyib' toj jun q'ij qxopin ex q'eqjab'.¹³Che eletz wiq'ine' kyoju' najchaq tx'otx', che tzajel nb'u'yi'ne' ex xe'l wiq'ine' tojxju' kytx'otx'. Che xe'l wiq'i'ne' tu'n kywan kywi' witz toj Israel, ex ja ta'qe' a', ex kyoj kykyaqil najb'il toju' tx'otx'.¹⁴Che kxe'l wiq'i'ne' jata' kywa tb'anil, toju' kywab'l tb'anil kywi' nimaq witz toj Israel. Atzuntzu' b'a'n kyojlana' ex tu'n kywan ti'j kywa tb'anilxi'x.¹⁵Ayinku'we' chin k'ik'lel kye nrite', ayinxe' chin xe'l q'inkye ojlal. Ayine' Dyos Manb'aj nchin q'mante.¹⁶Chin xe'le' jyolkyeju' rit ttzpetniqe', che tzajel wiq'i'ne' kyajniqe' tz'aq, che okyel nq'ana'ne' toqjni kyqan, che xe'lwoni'ne' numjniqe', che xe'lnka'yi'ne' q'u'sqe' ex kuwqe', che okyel nka'yi'ne' se'nxju' nojqelan.

¹⁷Ayine', Dyos Manb'aj, nchin yolin: kyb'inku'ye' nrit: Knb'incha'we' tnik'alilti'j kyxol qpoj tman rit ex qpoj tman chib'.¹⁸¿Myatzun o'kx tu'n kywan tb'anil kywaye', ex ikx tu'n tb'aj kywab'e'ne' xkyajten? Inche k'wane' ti'ju' a' ẍtilun, atzu'n txqantl nb'aj kyxoq'le'ne' tu'n kyqane'.¹⁹Aye'tzu'n nrite' nxikywanju' kywa matxi'toq b'aj kywab'e'ne' ex nkyk'wa'nju' a' matxitoq b'aj kyxoq'le'ne'.²⁰Qu'mtzun, nxinma'ne' kyeye', ayine' Dyos Manb'aj: Knb'incha'ye' tnik'alilti'j kyxolju' rit q'u's kyuk'i'lju' oknikyi'j.²¹Matxi' che b'je'x kylmu'ne' numjniqe', matxi' che oktene' tokolkye ex matxi' che b'ajx oq kyu'ne'.²²Ayintzunwe' chin klol kye nrite'. Lay wajtle' tu'n kyxi' elq'a'n. Knb'incha'ye' tnik'alilti'j kyxolju' rit.²³Tzul jumajtlju' nmajine' Dab'i wu'ne', ex k'okyel nq'o'ne' o'kxte jun k'ik'lel, ex ate kxel ka'yinkye. Ate kk'ik'lelkye.²⁴Ayine' Dyos Manb'aj, che ajb'el weye', atzu'n nmajine' Dab'i nejenel kye. Ayine' Dyos Manb'aj nchin yolin.²⁵Kjel b'entti'j jun nyole' kyuk'i'l, tu'n kyanq'in toj nak'b'il. Che b'elnnajsa'ne' tojk'ul txkup toju' tx'otx', tu'ntzun kyanq'inju' nrite' toj nak'b'il kyoj kojb'il ex tu'n kykyaj wtan toj k'ul.

²⁶Che kb'el nq'o'ne' nrite' ti'jileju' witz xjan weye', ex che nk'i'wla'ye'; nim jb'al tzul nq'o'ne' tojx tq'ijlalil.²⁷Che witzalju' tze toj kojb'il, kjawil tawalju' tx'otx', ex che anq'il b'a'n tojku' kytx'otx'. Ajntzaqpinteye' ntaname' kyeju' matxi' che kub'yajunkye, k'eleltzun kynik'tz qa ayine' Dyos Manb'aj.²⁸Lay che ultlkye' najchaq tnam iq'ilkye, ex lay che oktentl tojk'ul txkup ch'yolkye. Che anq'il toj nak'b'il, mix-a'lo' sak'pulkye.²⁹Kxe'l nq'o'ne' kyawb'il tb'anil tx'otx', ex lay che yajtitl tu'n we'yaj ex lay che xmayintl txqantl nimaqtnam kyi'j.³⁰K'eleltzun kynik'tz qa ayine' Dyos Manb'aj, atinqine' kyuk'i'l, ex a Israel ntaname'. Ayine' Dyos Manb'aj, nchin q'mante.³¹Aye'ye' nrite', ate'ye' toj nch'laje'. Ayine' Dyos Manb'aj nchin q'mante, chi Dyos. Tpakb'alju' tzul ti'ju' witz Seyir

¹Tzaj yolin Qman Dyos weye', ex tma:²Kutxi'tla tk'etzju' witz Seyir ex yolin ti'j toj nb'iye'.³Q'manxa te:
A ntma'n Qman Dyos ja'lu;
chin okyele' te tajq'oja, witz Seyir, ex kb'el ntz'e'ysa'n twitza kjel nq'o'na ch'q'ajlaj ex xitjnitl.⁴Che kjel nxitu'ne' nimaqtnam toja, ex naq jun chq'ajlajtla kjel. K'eleltzun tnik'tza qa ayine' Dyos Manb'aj.

⁵Oje tz'oka ajq'oj tejumajx kyi'j aj Israel, q'ojina kyi'j tej ttz'e'yset kywitz b'a'nxi'x tu'n tpaj kyil.⁶Oktzun xel nma'nwe' axxi'x, ayine' Dyos Manb'aj, kxel nq'o'na toj kamik, ex k'okyel lpeju' kamik ti'ja. Ati tila tu'n tkyima, ex kjyonjtzela tu'n kamik.⁷Naq chq'ajlajtla kjel nq'o'ne' ex xitjnitl, witz Seyir, ex lay waje' tu'n tik' jun xjal tk'etza.⁸Knb'incha'ye' tu'n kyb'aj noju' witz teya ex ttxa'n b'us, e' tb'ya'ya ex nimaq a', kyu'n kyimni che b'ajelkyim toj q'oj.⁹Kjel nq'o'na chq'ajlajtl tejumajx, ex mix-a'lo' knajal kyoju' nimaqttanama. K'eleltzun kynik'tze' qa ayine' Dyos Manb'aj.

¹⁰Tmaya: K'okyelte' tnam Israel kyuk'i'lju' kab'e' tkawb'il weye'; chin okyele' te tajaw, b'a'nqa najli Dyos atzu', chija.¹¹Ayintzunwe', Dyos Manb'aj, kxe'l nma'ne' ayinku'ye', knb'incha'ye' ti'ja kse'nxju' ttx'u'jila, ex tq'oja ex ik'b'ilkye aj Israel tu'na. Oktzun k'elel kynik'tz ajtkub' ntz'e'ysa'ne' twitza.¹²Ktla'tzuntza qa b'i'ntl wu'ne' ayine' Dyos Manb'aj, tkyaqilju' tyasb'ila tmaya kyi'ju' witz toj Israel. Tmaya: ¡Jun chq'ajlajqe', ja'lo che mankul qu'n! chija.¹³Xitjqo'n ttziya tyolina wi'je', ex el ttzaqpi'n taq'a wi'je'. Nb'iku'we'.

¹⁴A kxe'l nma'ne' lu, ayine' Dyos Manb'aj: Kykyaqil twitz tx'otx' che tzalajel ajtkub' nxitu'na.¹⁵Ojexi'x tzalaja tej tkub' xitetju' tx'otx' tk'am Israel te tetzb'il, ikxtzun kb'ajelju' ti'ja: kjela te jun chq'ajlaj, witz Seyir, tx'otx' Edom. Oktzun k'elel kynik'tze' qa ayine' Dyos Manb'aj, chi Dyos. B'a'n che kxe'la' aj Israel yajxi'tl

¹Ichan, yolina toj nb'iye' kye witz toj Israel, ex q'manxa kye tu'n kyb'inteju' nyole'.²Nxinma'ne', ayine' Dyos Manb'aj: Nkyxima'n tajq'oj Isarel qa aye' kyajawju' witz tejumajx.³Q'manxtzuna kye toj nb'iye' kjalu: Chi Dyos ntma'n: In okq'oj kyi'je' toj tkyaqil plaj ex nche xitunjtze'; matxi' kub' kyq'o'n kyib'ju' te najchaq tnam kyi'je', nche xmayinju' xjal kyi'je' ex nche el ik'une' kyu'n.⁴Qu'mtzun, e'witz toj Israel, kyb'intze' tyol Qman Dyos kye nimaq k'ul, ttxa'nwitz, nimaq a' ex b'ya'; kyeju' xitjnitl mixti'tl najalte ex kye nimaqtnam chq'ajlajqe'tl toj Israel, matxi' cheb'aj elq'a'n kyu'n tnam nqaku' kyk'etz ex matxi' che b'aj xmayi'n kyu'n.⁵A ntma'n Dyos ja'lu: Kuwqe' nyole' tu'n ntx'u'jile' kyi'ju' txqantl tnam, axi'xpe' ti'j Edom, qu'n ojexi'x che tzalaj tej tkub' kytzyu'n ntx'otx'e' ex tuk'i'lxi'x ik'b'il eb'aj kyelq'anju' tawal tx'otx'.

⁶Yolina toj nb'iye' ti'ju' ttx'otx' Israel, ex q'manxa: A ntma'n Dyos ja'lu kyeju' witz, ttxa'nwitz, nimaq a' ex b'ya': Ati nyole' tuk'i'l ntx'u'jile', tu'n kypaju' yasb'il kyeye' kyu'n nimaqtnam te najchaq.⁷Qu'mtzun kxe'l nma'ne', ayine' Dyos Manb'aj, che b'el ch'ixwikye' tnam ate' nqaku' kyk'etze'.⁸Aye'tzunkye', witz toj Israel, che b'eljupe'kye' kyu'n nimaq tze ex kkyq'a' txqan kywitz teju' ntaname' Israel, naq ch'inxtl tanjtzti'j.⁹Kche nkla'ye', ex knb'incha'ye' tu'n kyaq'unet ex tu'n kyok te awb'il.¹⁰Knb'incha'ye' tu'n tchmetju' tnam Israel najli atzu'. Che chmetel xjal najal kyoju' nimaqtnam, aye'tzu'n kub'niqe' xitj che jawil b'inchetl.¹¹Knb'incha'ye' tu'n kychmet xjal ex alu'mj nimxi'x kyxole'. Nim xjal che najal kyeye' kse'nx tnejel, b'a'nxi'xtl che tenb'ela'ye' kyetwitz tnejel. Oktzun k'elel kynik'tze' qa ayine' Dyos Manb'aj.¹²Knb'incha'ye' tu'n kyb'etju' ntaname' kyib'aje', e'witz toj Israel, ex tu'n tkub' kytzyu'n kytx'otx' kyi'je' tu'n kyok te tajaw, ex lay che kyajkyq'o'ntle' mixti' kyk'wal.

¹³In nma'ne', ayine' Dyos Manb'aj: nche okq'o'ne' witz te ch'yol xjal exqa nche kyej kyq'o'ne' kytaname' mixti'tl kyk'wal.¹⁴Ja'lo lay che ch'yontlke' xjal ex lay che kyej kyq'o'ntle' tnam mixti'tl kyk'wal. Ayine' Dyos Manb'aj nchin q'mante.¹⁵Lay waje' tu'n kyb'intetle' i'lb'il kyu'n najchaq nimaqtnam; lay che yasunjtztle' kyu'n tnam lu, qu'n lay che kyajtle' mixti' kyk'wale' toj tnam. Ayine' Dyos Manb'aj, nchin q'mante, chi Dyos.

¹⁶Tzaj yolin Qman Dyos weye', ex tma:

¹⁷Tej najlqe'toq aj Israel toj kytx'otx', kub' kytxa'ju'n tu'n kyb'inchb'aj myab'a'n. Tz'il toqju' nche anq'ina' toj nwitze' ex ntzaj molmone' kye.¹⁸Ktzajeltzun nb'ajsa'n ntx'u'jiltze' kyib'aj tu'n tpaju' b'yoj wnaqil kyb'incha toju' tx'otx' ex tu'nju' tu'me'l b'aja' kytz'ilsa'n, ek'ulun kye witzleb',¹⁹tu'ntzun ttz'e'yset kywitz tu'nju' kyb'inchb'en mache b'ajx nsputi'ne' kyoj txqantl tx'otx' ex nimaqtnam,²⁰Intoqtzun kub' kyili'n xjal nb'iye' xjan tu'n kpaj kyoj kykyaqilju' tnam janche pona', qu'n intoq kyma'n: Aye'tzun ttanam Dyos ja'lu, mache etz toju' kytx'otx'.²¹Exch'yon weye', tej nka'yinteye' kub' txa'ju'n nb'iye' xjan tu'n kypaj aj Israel kyojile nimaqtnam jatoq nche pona.

²²Qu'mtzun, q'manxa kye aj Israel: A ntma'n Dyos ja'lu: Aju' knb'incha'ye' mya tu'n kypaje' aj Israel, tu'ntpajwe' nb'iy xjan, matxi' kub' ili'n tu'n kypaje' kyoju' nimaqtnam ja matxi' che pona'ye'.²³Kxel nyek'u'ne' t-xjanilju' nb'iye' nim toklen kyxolju' nimaqtnam, ju' matxi' kub' i'li'n kyxol tu'n kypaje'; ajnb'inchanteye', k'elelkynik' qa ayine' Dyos Manb'aj. Ayine' nchin q'mante.²⁴Che eletz wiq'i'ne' kyoj kykyaqilju' tx'otx' ex nimaqtnam lu; che tzaje' nb'uyi'ne' ex che anjetz wiq'i'ne' toj kytx'otx'.²⁵Che b'ajel ntx'jo'ne' tu'n ẍtilun a', che b'ajel nẍtilsa'ne' te tkyaqil tz'il, che nẍtilsa'ye' tu'n ẍe ajb'ene' kye witzleb';²⁶kb'el nq'o'ne' jun kyanmiye' ak'a'j ex kyxewe' ak'a'j. K'elel wiq'i'ne' kyanmiye' kuw naku'j ab'j ex k'okyel nq'o'ne' jun kyanmiye' b'unin.²⁷Kb'el nq'o'ne' nxewe' kyoje', ex knb'incha'ye' tu'n kyjapun nkawb'ile' ex nchaq'b'ile' kyu'ne';²⁸che najale' toju' tx'otx' xinq'o'ne' kye kymane', che okyele' te ntaname' ex che ajb'ele' weye'.²⁹Che nkla'ye' te tkyaqilju' matz'ilsantlkyeye', kchmetel triy wu'ne', ex lay tzajtl we'yaj kyi'je' wu'ne'.³⁰Ex che witzalxi'xtlju' tze toj kojb'il wu'ne', tu'ntzun lantz'etl kych'ixawe' kywitz txqantl nimaqtnam tu'n we'yaj.³¹Ajtzun ttzaj kyna'ne' kychwinqlale' taq'wix ex kyb'inchb'aje' myab'a'n, che b'elch'ixwiye' kyib'xkyib'e' tu'n tpaju' kyile' ex kyb'inchb'aje' myab'a'n.³²Ayine' Dyos Manb'aj nchin q'mante: Kyb'inku'ye' aj Israel, lay nb'inchawe' lu tu'n b'a'nqe'wte'; kych'ixwlenku'ye' ex che chukjixe' tu'nju' kychwinqlale' myab'a'n.

³³Ayine' Dyos Manb'aj, nxinma'ne': Ajkẍtilsete' wu'ne' te tkyaqilju' kyile', che najale' wu'ne' kyoj nimaqkytaname' ex tu'n kyjaw kyb'incha'ntle' kub'ni xitj.³⁴Aju' tx'otx' ojetoq kyej chq'ajlajix, mya chq'ajlajtl, k'okyel te awb'il tu'n kyka'yinte kykyaqilju' che b'jik'el atzu'.³⁵Ex kq'manjtzel ti'j: Luju' tx'otx' ojetoq kyej chq'ajlajix, ja'lo naku'j awal toj Eden; luqe' nimaqtnam ojetoq che kyajxitj, eb'aj kyajtilu'n ex ttx'anqa'nqe'tl, ja'lo ja qe'tl kuwsa'nqe' ex naja'nqe'tl.³⁶K'eleltzun kynik' tnamtz ate' nqaku' kyk'etzju' itz'qe'x qa ayine' Dyos Manb'aj, nchin jawb'inchanteju' kub'ni xitj ex nchin awantetlju' ojetoq kyej b'o'lj. Ayine' Dyos Manb'aj, matxi' chin q'mante, ex knb'incha'ye'.

³⁷In nma'ne', ayine' Dyos Manb'aj: Okpe' knb'incha'ye' juntl ti'xti'. Knb'incha'ye' kye aj Israel titi' makyqani tu'n nb'inchanteye' kye; che chmetel kyb'aj wu'ne' kse'n jun ch'laj rit.³⁸Knojel kyoju' nimaqtnam xitjniqe' kyu'n txqan xjal, naku'j kse'nqe' rit ajkyb'ajx q'i'n Jerusalen toj ninq'ij tu'n kyxi' q'et te chojb'il. K'eleltzun kynik'tz qa ayine' Dyos Manb'aj, chi Dyos. Aye' b'aq tzqij

¹Kub' tq'o'n Qman Dyos tq'ob' wib'aje', ex inetze' nojniqine' tu'n tipumal, ex nkub' tq'o'ne' toj jun b'ya' jaslamuna' txqan b'aq,²Tb'incha Qman Dyos tu'n tb'aj nb'ete'ne' tkyaqil plaj; nojni toju' b'ya' tu'n txqan b'aq, nim ex tzqijqe'tl b'a'nxi'x.³Tzaj tma'ntzuntz weye': ¿Ma jaku' tz'anjtxkyi'ju' b'aq lu tu'n kyanq'intl toj twitza? Xi'tzun ntzaq'we'ne' te: O'kxta ojtzqilte taye, nchije'.

⁴Atzunte Qman Dyos tzaj tma'n weye': Yolina toj nb'iye' kyeju' b'aq lu. Q'manxa kye: Tzqij b'aq, kyb'inku'ye' tyol Dyos lu.⁵Intma'n Dyos kyeye': kxe'l nq'o'ne' kyxewe' tu'n kyjaw anq'ine'.⁶K'okyel nq'o'ne' kyb'atx'ile', k'okyel nnojsa'ne' kychib'jile', k'okyel nq'o'ne' kytz'umale' ex kxe'l nq'o'ne' kyxewe' tu'n kyjaw anq'intle'. K'eleltzun kynik'tze' qa ayine' Dyos Manb'aj.⁷Xinma'ne' kye kse'nx ojetoq tchaq' Qman Dyos weye'. Ex tej intoq chin yoline' kye, nb'iye' jun tq'ojq'ojel: jun kyajnajnab', aye'tzu'n b'aq e'aq'wi mujb'alkyib' jun tuk'i'l juntl.⁸Ex wile' eb'aj tzajb'ent kyb'atx'il ex kychib'jil kyi'jile, ex b'aj ktxet kyi'j tu'n kytz'umal. Mixtoqtzunti'x kyxew.

⁹Tzajtzun tma'n Qman Dyos weye:
Yolina toj nb'iye' teju' xewb'aj te chwinqlal, q'manxa te: Axtma Dyos ja'lu: xewb'aj te chwinqlal, kuttzaj kyoju' kyaje' ttx'u'k kya'j ex q'onka kychwinqlalju' kyimniqe' lu, chiku'ya, chi Dyos.¹⁰Nyoline' toj tb'i Qman Dyos, kse'nxju' tchaq' weye', ex ulju' xewb'aj te chwinqlal ex okx kyoj, e'jaw anq'intzuntz ex e'kub'we'. Nim txqan kyb'aj b'a'nxi'x.

¹¹Tzajtzun tma'n Qman Dyos weye': Ikyqe'tzun aj Israel kse'nqe' b'aq lu, inkyma'n: Mache oktzqiju' qb'aqile'; mixti'tl oyb'il qeye', matxi' qonaje', chechij.¹²Q'manxtzuna kye toj nb'iye' kjalu:
Axtma'n Dyos ja'lu: e' ntanam, kche njqa'we' muqb'il kyeye'; che eletz wiq'i'ne' kyoj ex k'anjelkyi'je' wu'ne' toj kytx'otx' aj Israel.¹³Ajtzun kyjqetju' muqb'il kyeye' wu'ne' ex ajkyetz wiq'ine' kyoj, k'elel kynik'e' weye' ntanam qa ayine' Dyos Manb'aj.¹⁴Kb'el nq'o'ne' nxewe' te chwinqlal kyoje', che anq'iltzuntze'. K'eleltzun kynik'tze' qa ayine' Dyos Manb'aj, inq'mante ex ma nb'inchaye'. Ayine' nchin qmante, chi Dyos. Kymujb'atlkyib' aj Juda kyuk'i'l aj Israel

¹⁵Tzaj yolin Qman Dyos weye' ex tma:

¹⁶Q'intz jun tzeya, ex tz'ib'anku'ya twitz: Aju' tnam Juda kyuk'i'l aj Israel mujlqe'k tuk'i'l. Ex q'intza juntl tze, ex tz'ib'anka twitz: Aju' tnam Eprayin tyajajil Jse, kyuk'i'l kykyaqil txqantl aj Israel mujlqe'k tuk'i'l.¹⁷Mujb'anqe'ktzuntza toj tq'ob'a, tu'nwtzunlo noq junqe'.¹⁸Ajtzun kymante twanaqila teya: chik'b'antza qeye' titi' ntma'n ja'lu, qa chechi,¹⁹q'manxa kye: Axtma Dyos ja'lu: Ktzajel wiq'i'ne' ttze Jse tzyu'n tu'n Eprayin ex kyu'n txqantl tnej tyajajil mujlqe'k tuk'i'l Israel, ex knmujb'a'ye' tuk'i'lju' ttze Juda tu'n tok naqjunx tze toj nq'ob'e', chi Dyos, chiku'ya.²⁰Tzyunqeku'ya kab'e' tze kywitz, ju' tz'ib'a'n kywitz tu'na.²¹Q'manxtzuntza kye: chi Dyos kjalu: che anjetz wiq'ine' aj Israel kyoju' nimaqtnam ja matxi' che b'ajpona'; che tzajel nb'u'yi'ne' toj tkyaqil plaj ex che anjetz wiq'i'ntle' toju' kytx'otx'.²²Naq junx nintnam che okyela' wu'ne' toju' tx'otx' lu, kywi' witz toj Israel, ex noq junx kynimaqkawil. Lay kub'kypa'ntlkyib' te kab'e' nimaqtnam, ex lay kypa'ntlkyib' toj kab'e' kawb'il.²³Ex lay kytz'ilsatlkyib' tu'n kyk'ulun kye witzleb' ik'jb'ajilqe' ex lay kyb'inchatl chukchaq il. Che nkla'ye' te tkyaqil myab'a'n matxi' b'aj kyb'incha'n, ex che nẍtilsa'ye' teju' kyil. Che okyel te ntaname' ex che ajb'el weye'.²⁴K'okyel nmajine' Dab'i te nimaqkawil kye ex tjunal kk'ik'lel kyi'j kykyaqil, kche b'il weye' ex che japumel nkawb'ile' ex nnuk'b'ile' kyu'n.²⁵Che najal toju' tx'otx' xinq'o'ne' te nmajine' Jakob', jae'najana' ojtxi' kychman. Atzu' che najala' exqe' kyk'wal ex kykyaqil kyyajajil tejumajx, ex aju' nmajine' Dab'i k'okyel te kynejel kukxju'.²⁶Kjel b'entti'j jun nyole' kyuk'i'l tu'n tten kyanq'in toj nak'b'il. Jun yol kjel b'ent tejumajx. Knb'incha'ye' tu'n tchmet kyb'aj, ex kb'el nq'o'ne' njaye' xjan kyxol tejumajx.²⁷Chin najale' kyxol, che ajb'el weye' ex che okyel te ntaname'.²⁸Ajttenju' njaye' xjan kukxju' kyxol, k'elel kynik'ju' txqantl nimaqtnam qa oje jawnsk'o'ne' tnam Israel te we'ku'xi'xe', chi Dyos. Aju' Kok ajb'el te Dyos

¹Tzaj yolin Qman Dyos weye', tma:

²Ichan, ka'yinxa tu'me'l tx'otx' Makok, ex yolin toj nb'iye' ti'ju' Kok, nejenel nim toklen toj Mesek ex Tub'al.³Q'manxa te: Axtma Dyos ja'lu: Kok, nejenel nim toklena toj Mesek ex Tub'al, chin okyele' ajq'oj ti'ja.⁴K'anjelti'ja wu'ne', k'okyel nq'o'ne' xokb'il toj ttziya, k'eletza wu'ne' kyuk'i'l kykyaqilju' tcheja, exqe' tchejila tb'anil kyxb'alun, aju' nin tnej xjal te q'oj q'i'nile chukchaq kyk'uẍtx'e'nb'il ex kykolb'il.⁵Che k'le'nilekyib' kyuk'i'l xjal aj Persya, aj Etyopiya ex aj Lib'ya, kykyaqilx atiyile kykolb'il ex k'o'ẍ k'uxb'il toj kywi',⁶ex kykyaqilju' xjal te q'oj aj Komer ex aj B'et-tokarma te najchaqxi'x toj tb'a'nq'ob'kya'j, aye' txqan tnam mujlikyten tuk'i'la.⁷B'inchan tib'a ex q'inqe'tza tq'ojb'ila, kyuk'i'l kykyaqil t-xjala te q'oj ate' tuk'i'la; q'inqe'xa tjaq' tchaq'b'ila.⁸Tb'ajlenxi' b'a'npun ab'q'i ktk'ma'ya chaq'b'il tu'n tokxa toj jun tx'otx' ten toj q'oj, ex matxi' tzul dyos tuk'i'l; jun tnam b'ajx sputj kyoj txqan nimaqtnam ex ojetoq kub'naj tejumajx, ex matxi'toq tb'uyitltib' kywi' witz toj Israel. Matxitoq tz'anjtz kyi'j kyoj txqan tx'otx', ex nche najantl kykyaqil toj nak'b'il.⁹Kpomela, naku'j muj jupli, tu'n tkub' noj toju' tx'otx' tu'na ex kb'el ttzyu'na naku'j kyq'iq' jb'ala kyuk'i'l kykyaqil t-xjala te q'oj exju' ttanama nim txqan kyb'aj.

¹⁰Kxe'l nma'ne', ayine' Dyos Manb'aj: Che b'eltnk'u'n t-xima myab'a'n toju' tq'ijlalil lu.¹¹Oktma'ya: kb'el ntzyu'ne' jun tx'otx' mixti' klolte, janajla'qe' xjal toj nak'b'il ex min nxikyk'u'j, kykyaqil kyoj nimaqtnam mixti' nintapi kyi'j, mixti' kyjpel ex mixti' xtanb'ilkye.¹²Kb'je'letz welq'a'ne' toj; chin okyel tzaqpaje' kyi'j nimaqtnam jawniqe' b'incha'ntl kyu'n xjal kub'ni kyb'u'yi'ntlkyib' tzajniqe' kyoj chukchaq nimaqtnam, ate' kywakyix ex txqantl ti'xti' kye ex najliqe' toj nky'ajchaq twitz tx'otx'.¹³Kxel qani'n teya kyu'n xjal aj Sab'a, aj Dedan, exqe' xk'aẍlil aj Tarsis ex kye txqantl nimaqtnam, kjalu: ¿Ma matzula elq'al? ¿Mache tzaj tb'u'yi'na t-xjala te q'oj tu'n taq'pon tq'ob'a ex tu'n kyb'je'tz telq'a'na saqpwaq ex q'anpwaq, e'wakx ex txqantl ti'xti' qeye', tu'ntzun t-xitiq'i'na txqan q'inumal nimxi'x? chechi.

¹⁴Yolintzuna toj nb'iye' te Kok, q'manxa te: Chi Dyos kjalu: Ajtanq'in ntaname' Israel toj nak'b'il, kxe'la ti'j¹⁵Tzajx toj ttx'otx'a najchaqxi'x toj tb'a'nq'ob'kya'j, kyuk'i'l txqan t-xjala te q'oj kuwqe', kyuk'i'l txqan t-xjala kyi'j chej,¹⁶kq'ojiltzuntza ti'ju' ntaname' Israel. Kb'el noj twitz tx'otx' tu'na Kok, naku'j q'eqmuj. Tojtzun mankb'il q'ij lu ktzajel wiq'i'na ti'ju' ntx'otx'e', tu'ntzun tel kynik' txqantl nimaqtnam weye' ajnyek'unteye' woklene' xjan ti'ja.

¹⁷Ayine' Dyos Manb'aj nchin q'mante: Ti'j toqa nchin yolina'ye' ojtxi', tej intoq chin yoline' kyu'nel nmajine', aye' nsanjelale' toj Israel; kyma tpakb'al ojtxi' qa oktoq nchq'a'ya tu'n tula q'ojil ti'j Israel. Tz'e'ysb'il twitz Kok

¹⁸Ayine' Dyos Manb'aj nchin q'mante: Ajtok Kok toj Israel, tzul ntx'u'jile' b'a'nxi'x.¹⁹Kxe'l nma'ne' toj ntx'u'jile', tzun jun kyajnajnab' kuwxi'x toj Israel toju' tq'ijlalil lu.²⁰Che lu'lulju' kyiẍ toj ninnjab' nwitze', e'pich' twitz kya'j, e'tojk'ul txkup exqe' nche qititinje, ex kykyaqil xjal twitz tx'otx'. Che b'elniq'ju' witz, che b'eltz'aqu' pik ex kykyaqil nimaqtapi che kb'eltz'aq.²¹Tzul nq'o'ne' tkyaqil k'ixk'oj tib'aj Kok, kxob'elxi'x kyu'n. Kntz'e'ysa'ye' twitz tu'n yab'il ex b'yonkamik. Ktzajel nq'o'ne' kyq'iq' jb'al, saqb'aqun, q'aq' ex ttxtajil q'ol tib'aj, kyib'aj t-xjal te q'oj ex kyib'aj txqan xjal k'le'nqe' tu'n, ex che q'ojilju' t-xjal kyxolx tu'n k'uẍtx'e'nb'il. Ayine' Dyos Manb'aj nchin q'mante.²³Ikytzu'n knyek'u'ye' wipumale' ex xjan qine', kye txqan tnam. Kxel nyek'u'n wib'e' kye, k'eleltzun kynik'tz qa ayine' Dyos Manb'aj, chi Dyos. Kb'elti'j Kok

¹Ichan, q'manxa te Kok toj nb'iye' titi' tzul ti'j, kjalu: A ntma'n Qman Dyos ja'lu: Kok, nejenel nim toklena toj Mesek ex Tub'al, chin okyele' ajq'oj ti'ja.²K'anjelti'ja wu'ne'; chab'a k'eletz wiq'i'na tzajx najchaq toj tb'a'nq'ob'kya'j ex tzul wiq'i'na kywi' witz toj Israel.³Kb'el nxitu'ne' t-smaja tzyu'n tu'n tnayaja ex che elelnxone' talsmaj tzyu'nqe' tu'n tb'anq'ob'a.⁴Atzunta, kkyimela kywi' witz toj Israel, kyuk'i'lxi' t-xjala te q'oj exqe' tnam k'le'nqe' tu'na. Atzuntzu' che kxe'la' nq'o'ne' te kychi' chukchaq k'utz ex tojk'ul txkup.⁵Che b'ajkjel woqeye' toj kojb'il. Ayine' Dyos Manb'aj nchin q'mante. Matxi' chin yoline'.⁶Kxel nsma'ne' q'aq' tib'aj Makok ex kyib'aju' nche najan nak'liqe' kyoju' tx'otx' ttzi ninnjab'. K'eleltzun kynik'tz qa ayine' Dyos Manb'aj.⁷Knb'incha'ye' tu'n tojtzqinte ntaname' Israel nb'iye', ex lay wajtle' tu'n tkub' txa'ju'ntl. Ex k'elel kynik'ju' te najchaq nimaqtnam qa ayine' Dyos Manb'aj, inyek'u'ne' nxjanb'ile' toj Israel.⁸Ilti'j kjapumelju' q'ij inma'ne'. Ayine' Dyos Manb'aj nchin q'mante.

⁹Che b'je'letzju' najliqe' kyoju' nimaqtnam toj Israel ex che b'ajel kytz'e'ysa'n kyq'ojb'ile', e' chukchaq kykolb'ile', kysmaje', tal kysmaje', e'tze xob'l ex kych'ute', ktenb'iltzun kysitz te wuq ab'q'i.¹⁰Lay tz'ojqelan tu'n kyex jyol kysi toj kojb'il, mo tu'n kyex tx'emulte toj k'ul, qu'n tkyaqilju'q'ojb'il lu, k'ajb'el kyu'n te kysi. Ikytzu'n k'elelkyiq'in ti'xti' kyeju' eb'je'l q'inkye ti'xti' kye ojtxi', che kjel kywilb'a'nju' e'kyaj wilb'ankye nejtl. Ayine' Dyos Manb'aj nchin q'mante. Muqb'il te Kok

¹¹Kxe'l nq'o'ne' jun tkb'el Kok toj Israel toju' tq'ijlalil lu, toju' b'ya' kye ajb'etu'n ttzi ninnjab', tu'n tku'x mqu'n. Kmaqulju' najb'il lu, atzu' kb'elexa' mqu'n Kok kyuk'i'l kykyaqilju' t-xjal te q'oj, ex k'okyel q'o'n tb'i Tb'ya' t-xjal Kok te q'oj.¹²Toj wuq xjaw che b'aj b'elexa' mqet kyu'n aj Israel tu'n tkyaj ẍtile'ju' tx'otx'.¹³Kykyaqil xjal che mqulkye toju' q'ij lu ex jun ninb'ilkye. Knyek'u'ye' woklene' toju' q'ij lu. Ayine' Dyos Manb'aj nchin q'mante.¹⁴Expe' che elex jun tnej xjal b'etil tu'n tb'aj kyka'yi'n toj tkyaqilju' tx'otx' tb'ajlenxi' wuq xjaw, ex tu'n tku'x kymqu'n qa ate'x ẍeb'je'l yal lana'jqe' twitz tx'otx', tu'n tkyaj ẍtile'.¹⁵Qatzun matil junju' xjal lu jun tb'aqil xjal, kb'eltq'o'n jun techlal tk'etz, tzmax ajtku'x mqu'n kyu'n muqul toju' tb'ya' t-xjal Kok te q'oj.¹⁶(Ex ati jun nintnam tok tb'i Aye' Xjal te Q'oj.) Ikytzu'n kjel kyẍtilsa'n tx'otx', chi Dyos.

¹⁷Tzaj tma'n Qman Dyos weye': Q'manxa kye kykyaqil pich' ex kye kykyaqil txkup tu'n kyb'uyinte kyib' kyi'jele ex tu'n kyul kywi' witz toj Israel, kyi'ju' chojb'il che kb'el nq'o'ne' kye. B'a'n tu'n kych'yon chib'j ex tu'n kyk'wan chik';¹⁸kxel kych'yo'n kychib'jilju' xjal te q'oj ex kxel kyk'wa'n kychk'elju' kawil twitz tx'otx', naku'xwitloj kychk'el rit, qpoj tman rit e' chib' mo qpoj tman wakx q'u'sqe' toj B'asan.¹⁹Che ch'yol seb' kyi'ju' chojb'il che kb'el nq'o'ne' kye, tzmax ajkyab'ti tu'n, che k'wal chik' tzmax ajkytx'ujti tu'n.²⁰Knb'incha'ye' jun ninwan kye tu'n kychib'jil chej ex kychib'jil chejil, kychib'jil xjal te q'oj ex chukchaq q'ojil, tu'ntzun kych'yon tzmax ajkynoj. Ayine' Dyos Manb'aj nchin q'mante. Che ul jumajtl aj Israel toj kytanam

²¹Ikytzu'n knyek'u'ye' wajwalile' kye najchaq nimaqtnam. Ok kyka'yi' kykyaqil nimaqtnam se'n che okyela' toj xjel wu'ne' ex se'n kntz'e'ysa'ye' kywitze'.²²Txiqex toju' q'ij lu, k'elelkynik' aj Israel qa ayine' Dyos Manb'aj.²³Ex kkyb'i' te najchaq nimaqtnam qa exi'q'i'n aj Israel kyoj junxi'tl tnam tu'n tpaj kyil, qu'n min xikyb'i'n nyole'; ex e'kyaj nq'o'ne' tu'n tkub'kyi'j kyu'n kyajq'oj ex tu'n kykub'yo'n kykyaqilx toj q'oj.²⁴Nb'inchaye' kye tojx kyil tu'n tpaju' kytz'ilil ex kypi'sal, ex e'kyaj nleb'a'ne'.

²⁵Qu'mtzun, ayine' Dyos Manb'aj, inma'ne': Kq'aq'alnk'u'je' ja'lo ti'j tkyaqilju' tnam Israel, kyi'j tyajajil Jakob'. Knch'exb'eye' kyanq'ib'l, tu'n txinma'ne' tu'n kynimanteju' nb'iye' xjan.²⁶Che tzajel nb'u'yi'ntle' kyoju' txqantl najchaq nimaqtnam ex kyoju' tnam ajq'oj; che najaltzuntz toj nak'b'il tojku' kytx'otx', mix-a'lo' kxob'salkye. Ikytzu'n knyek'u'ye' nxjanb'ile', txqan nimaqtnam che ka'yilte. K'ik'ex kyu'n aj Israel toju' kych'ixaw tu'n tpaj min ẍinx kyb'i'ne'.²⁸Ayine' ẍinx q'onkye kyoj najchaq nimaqtnam, ex che tzajel nb'uyi'ntle' tu'n toju' kytx'otx'. Mix-a'lo'te kjel nq'o'ne' toj juntl tnam. K'eleltzun kynik'tz qa ayine' Dyos Manb'aj.²⁹Lay che kyej nq'o'ntle', matxi' tzaj nq'o'ne' wipumale' tib'aju' tnam Israel. Ayine' Dyos Manb'aj nchin q'mante, chi Dyos. Aju' ja te k'u'lb'il yajxi'tl

¹Kub' tq'o'n Qman Dyos tq'ob' wib'aje' toj lajoj tajlal xjaw, toj tq'ij ak'a'j ab'q'i, ex nxitiq'i'ne' toj jun witzik' toju' ttx'otx' Israel. Njapunku' junaqjo' (25) ab'q'i qxi'len q'i'ne' B'ab'ilon, ex kyajlajoj ab'q'i ttzyetlen Jerusalen.
Inkub' tq'o'ne' Qman Dyos twi' jun witz nimin twe' toju' ttx'otx' Israel, tzmaxtzuntzu' na'tz, e'xinka'yi'ne' jun tnej ja toj tnayajkya'j naku'j jun nintnam.³Inxitiq'i'ne' Qman Dyos na'tz, ex wile' jun ichan naku'j q'ank'uxb'il. Wa'ltoq ttzi tnam, tzyu'ntoq jun tznij Sed ex jun tze te echb'il tu'n.⁴Ex tzaj tma'n ichan lu weye': Ka'yintza b'a'nxi'x ex b'intza; q'onk twi'ya ti'j tkyaqilju' kxe'l nyek'une' teya, qu'n matzaj q'i'na tu'n Dyos tzalu tu'n txi' nyek'u'ne' teya. Q'manxtzuntza kye aj Israel tkyaqilju' ktka'yi'ya, chij. Ju' tjpel tnam toj tjawetzq'ij

⁵Atitoq jun nintapi ti'jile tja Dyos. Te oxe' metr twe' tze te echb'il tzyu'ntoq tu'n ichan. Xi'tzun techa'n nintapi, tetoq oxe' metr twitz ex oxe' metr twe'.⁶Xi'tzuntz toju' qokyex toj tjawetzq'ij, jax kywi' peta'n ex kub' techa'n tqul tjpel tnam, tetoq oxe' metr twitz.⁷Aye'tzu'n tal ja ate' junjun plaj te qokyex, te oxe' metrchaq tnuqub' junjun ex oxe' metrchaq kywitz, kab'e' metr tk'i nik'janchaq kyxol. Ex atitlju' tjpel tk'etzu' ja te o'yb'il nka'yintz tu'me'l tja Dyos. Te oxe' metr twitz tqulju' tjpel lu.⁸Kub' techa'n ichan tal ja ttzi tja Dyos, te kyaje' metr toj. Ate'toq kab'e' tqan ja te jun metr kylamal.¹⁰(Ate'toq oxe' tal ja toj junjun plaj teju' qokyex toj tjawetzq'ij, junelniqe', exqe' tqan ja ate' toj junjun plaj ex junelniqe'.)

¹¹Ex kub' techa'n ichan tjpel jatu'n qokxa': te jwe' metr twitz, atzu'n qokyex qaq metr tk'i' nik'jan toj.¹²Atitoq jun b'o's tapi twitz junjunju' tal ja te nik'jan metr twitz toj junjun plaj. Te oxox metr kywitz ex oxox metr kynuqub' junjunju' tal ja.¹³Ex kub' techa'n tkyaqil twitzju' qokex, tzajx t-xe jun tal ja ex ponx t-xexi' tal ja twitzxi', tu'n tokx toj jun tjpel ponx toju' tjpel twitzxi', kab'lajoj (12) metr tk'i' nik'jan.¹⁴Ex kub' techa'n ja te o'yb'il: te lajoj metr. Tkub'ju' tal ja te qokex lu twi' pe'n.¹⁵Junaqjo' (25) metr tnuqub' tkyaqil, tzajx ti'jxi' tjpel ex ponx tojxi' tjpelju' ja te o'yb'il.¹⁶Ate' tokexspik'un kyoju' tal ja, ikyqe'xju' tqan ja, tuk'i'l k'uxb'il tojxi' ex ti'jileju' ja te qokyex. Ex ikxju' ja te oyb'il, ate'yile tokexspik'un ti'j tojxi'. Ate' kyilb'ilal tut kyi'ju' tqan ja. Aju' twi' pe'n ti'jxi'

¹⁷Yajxi'tzuntl nxitiq'i'ne' ichan twi' pe'n ti'jxi'. B'incha'nile ab'j ti'jileju' pe'n, ex b'incha'n junaq lajoj (30) tal ja ti'jile.¹⁸Xi'nixju' ab'j b'incha'n ti'jeleju' ja te qokyex, ikx twitzju' kse'n tnuqub'.¹⁹Xitecha'n ichan, tzajx ttzi tjpel kub'l ponx twitzju' tjpel ti'jxi' tjpel tojxi', kab'naqlajoj (50) metr tqan. Ju' tjpel toj tb'a'nq'ob'kya'j

²⁰Ex atitoq jun qokyex toj tb'anq'ob'ju' pe'n ti'jxi'. B'aj techa'n ichan twitz ex tnuqub'.²¹Ex ate'toq oxe' tal ja junjun plaj, ex ate' tqan ja ex o'yb'il junile echb'enkye kyuk'i'l toj qokyex tjawetzq'ij, te junaqjo' (25) metr tnuqub' ex kab'lajoj (12) tk'i' nik'jan twitz.²²Ayeleqe'xchaq tal ja te o'yb'il, ex tokexspik'un e' tut kse'nqe' toj qokyex toj tjawetzq'ij. Ex inqo' jax kyib'aj wuq peta'n, atzu'n ja te o'yb'il xi'kyajna' tojxi'.²³Ati juntl qokyex toj tjawetzq'ij ex toj tb'a'nq'ob'kya'j, twitzju' qokex ti'jxi', inpon twi' tpen tojxi'. Xitecha'n ichan, te kab'naqlajoj (50) metr kyxol kab'e' qokyex lu. Ju' tjpel toj tnayajkya'j

²⁴Nxi'tzun tiq'i'ne' ichan toj tnayajkya'j, jata' jun qokyex, eb'aj techa'n tqan ja exju' ja te o'yb'il, ikx echb'enkyeju' kse'nqe' txqantl.²⁵Ate' tokexspik'un ti'jileju' ja te qokyex kyuk'i'lju' tal ja toj, kse'nqe'xju' txqantl. Te junaqjo' (25) metr tnuqub' ex kab'lajoj tk'i' nik'jan (12.50) metr twitz tu'n tkyaqil.²⁶Ex atitoq jun qjawex te wuq tpeta'nil, atzu'n ja te o'yb'il kyajniten tojxi'. Ex ate'toq tilb'ilal tut kyi'ju' tqan ja, jun toj junjun plaj.²⁷Ex atitoq jun tjpelju' pe'n tojxi', toj tnayajkya'j. Xitecha'n ichan kyxolju' kab'e' tjpel toj tnayajkya'j, te kab'naqlajoj (12) metr. Ju' pe'n tojxi': aju' tjpel toj tnayajkya'j

²⁸Nxi'tiq'i'ntzuntze' toju' qokyix toj tnayajkya'j tu'n tpon twi' tpen tojxi'. Kub' techa'n tjpel toj tnayajkya'j, ax echb'enteju' kse'nqe' tjpel tnejel.²⁹Ax echb'enkye tal ja, ja te o'yb'il exqe' tqan ja, kse'nqe' txqantl. Ex ate' tokexspik'un ti'jileju' ja te qokyex, tuk'i'lxi' ja te o'yb'il, ex te junaqjo' (25) metr tnuqub', atzun kab'lajoj tk'i' nik'jan (12.50) twitz te tkyaqil.³¹Atzu' ta'ju' ja te o'yb'il tu'me'lju' pe'n ti'jxi'. B'incha'nqe' tilb'ilal tut kyi'ju' tqan ja. Ati jun tal b'e te wajxaq tpeta'nil tu'n qjapun twitzju' tjpel lu. Aju' pe'n tojxi': aju' tjpel toj tjawetzq'ij

³²Inxitiq'i'ntle' twi' pe'n tojxi', toju' plaj toj tjawetzq'ij, ex kub' techa'n qokyex, kyinxju' kse'nqe' txqantl.³³Ex ax echb'enkye tal ja, e'tqanja ex ja te o'yb'il, kse'nqe' txqantl. Ate' tokexspik'un ti'jileju' ja te qokyex, tuk'i'lxi' ja te o'yb'il, te junaqjo' (25) metr tnuqub' atzun kab'lajoj metr tk'i' nik'jan (12.50) twitz.³⁴Xi' ta'ya' ja te o'yb'il tu'me'l twi' pe'n ti'jxi'. B'incha'nqe' tilb'ilal tut kyi'ju' tqanja junjun plaj. Ati tb'eyil te wajxaq tpeta'nil tu'n qjapun twitzju' tjpel. Twipe'n tojxi': aju' tjpel toj tb'a'nq'ob'kya'j

³⁵Nxi'tzun tiq'i'ne' ichan toju' qokyex toj tb'a'nq'ob'kya'j, ex kub' techa'n qokyex, kyinxju' kse'nqe' txqantl³⁶ex ate' tal ja toj, e'tqanja, ja te oyb'il ex tokexspik'un ti'jile. Te junaqjo' (25) metr tnuqub'ju' ja te qokyex, atzun kab'lajoj tk'i' nik'jan (12.50) twitz.³⁷Xi' ta'ju' ja te oyb'il tu'me'l pe'n ti'jxi'. B'incha'nqe' tilb'ilal tut kyi'ju' tqan junjun plaj. Ati tb'eyil te wajxaq tpeta'nil tu'n qjapun twitzju' tjpel lu. Aye' ja tk'etzju' tjpel toj tb'a'nq'ob'kya'j

³⁸Atitoq jun tal ja ntmujb'antib' tuk'i'lju' ja te o'yb'il toju' qokex. Atzuntzu' nche txjeta' alu'mj te chojb'il k'ok'sb'il.³⁹Ate'toq kyaje' mes toju' ja te o'yb'il toju' qokex, kakab' junjun plaj, kyib'ajtzun nche kub'a' b'yo'n alu'mj te chojb'il k'ok'sb'il ex te chojb'il tu'n tpaj il.⁴⁰Ex ate'toq kab'e' mes junjun plaj ti'jxi' ja te o'yb'il toju' qokex toj tb'a'nq'ob'kya'j,⁴¹kyaje'tzun mestz ate' tk'u'ja ex kyaje' mes ti'jxi' ja te qokex: wajxaq mes tu'n tkyaqil. Kyib'ajtzun nche kub'a' b'yo'n alu'mj.⁴²Ab'jqe' kyaje' mes kye alu'mj nche tz'e'yset, b'incha'nqe' tu'n q'ob'aj; masch'i'n oxe' kwart kynuqub' ex masch'i'n oxe' kwart kywitz; te nik'jan metr kywe', kyib'ajtzun nche kub'a' q'o'n chib'j te oyaj. Ati jun pex twitzileju' ja tojxi' te oxe' twiq'ob'j twitz, tib'ajtzun nb'ajkub'a' q'etju' oyaj arin exqe' aq'unb'il nche ajb'en tu'n kyb'yetju' alu'mj te chojb'il k'ok'sb'il.

⁴⁴Ate'toq kab'e' tal ja twi' pe'n tojxi', kyi'jxi' tjpel tojxi', jun tk'etzju' tjpel tojxi' toj qb'anq'ob', nka'yinx toj qnayaj, atzu'n juntl tk'etzu' tjpel tojxi' toqnayaj, nka'yinx toj qb'a'nq'ob'.

⁴⁵Tzaj tma'n ichan weye': Aju' ja nka'yinx toj qnayaj, kyeju' pale nche ajb'en toj tja Dyos,⁴⁶atzu'n ja nka'yinx toj qb'anq'ob', kye pale nche ajb'en ti'ju' q'olb'eb'l. Tyajajil Sadok qe', ex oqe'kx aj Leb'iqe' b'a'n tu'n kypon lq'e ajb'el te Qman Dyos, chij. Aju' pe'n tojxi' exju' tja Dyos

⁴⁷Yajxi'tl kub' techa'n ichan twi' pe'n tojxi', te kab'naqlajoj (12) chaq twitz junjun plaj, junelni twitz toj kykyajel plaj. Atitoqju' q'olb'eb'l tpen tja Dyos.⁴⁸Inxitiq'i'ne' ichan inxi' tiq'ine' toju' ja te o'yb'il ttzi tja Dyos ex e'kub' techa'n tqan ja te o'yb'il: Te kab'e' metr tk'i' nik'jan twitz junjun. Atzu'n tjpel te wuq metr twitz, aye'tzu'n tzuyb'ilte tjpelju' ja te o'yb'il, jun metr tk'i' nik'jan twitz junjun.⁴⁹Te lajoj metr twitzju' ja te o'yb'il, atzun qaq metr tku'xa' toj, njax jun tb'eyil lajoj tpeta'nil tu'n qjapun ttzi. Atitoq jun tqan tk'etz junjun tqan ja.

¹Yajxi'tzuntl nxitiq'i'ne' ichan tojxi'ju' tja Dyos, ex e'kub' techa'n tqan ja: te oxe' metrchaq kylamal.²Te jwe' metr twitzju' tjpel; aye'tzu'n tzuyb'ilte kab'e' metr tk'i' nik'jan twitz junjun. Ex kub' techa'n ninmqo'n toj tnk'yajchaqil, te winqi'n metr tnuqub' ex lajoj metr twitz.³Yajxi'tzuntl xi' toju' mqo'n tojxi' ex eb'aj techa'n tqan ja te qokex, jun metr tlamal junjun. Oxe' metr twitzju' qokyex, aye'tzu'n tqan ja toj junjun plaj te oxe' metr tk'i nik'janchaq kylamal.⁴Ex kub' techa'n mqo'n t-xexi', te lajoj metr junjun plaj. Tzaj tma'ntzuntz weye': Ate najb'il xjanju' lu. Aye' tal ja b'incha'nqe' twitz nintapi

⁵Ex kub' techa'n ichan tapi ti'jxi' tja Dyos, aju' tipumal te oxe' metr. Ti'jileju' tja Dyos, ate'k twitz, e'tal mqo'n te kakab' metrchaq twe'.⁶Aye' tal ja lu, tojx jun tib'aj juntl, te oxox kolchaq, ate' junaq lajoj (30) tal ja toj junjun kol. Noqxi'x ch'i'nchaq toju' nintapi ti'j tja Dyos atl junjun kol, tib'ajtzu'n ttxa'nja etzniten ntzaja'qe kyqul tal ja, tu'n lalun che okx tojxi' nintapi.⁷Jawni b'incha'n jun tnej tx'otx' kyi'jile tal ja ti'jile tja Dyos, japumni tzmax jawtl, tu'ntzunju' kb'antel kyjax xjal, tzajx twitz tx'otx' tu'n kyjapun toju' kol toj nk'yajchaq ex tu'n kyjapun jawtl.⁸Wile' toj tkyaqil plaj, tojxju' tja Dyos tib'a jun tq'uqb'il nim toktza', ex b'incha'nqe' tal ja tib'aj. Te oxe' metr twe'ju' tq'uqlil lu,⁹Atzu'n tapi kyi'ju' tal ja te kab'e' metr tk'i' nik'jan tpimal, ex kyajniten lajoj metr kyxolju' tal ja ti'jile tja Dyos kyuk'i'lju' kyja pale.¹¹Kab'e' tjpel kyajniten jun toj tb'a'nq'ob'kya'j ex juntl toj tnayajkya'j. Ati jun nintapi toj tnuqub'ju' kyajniten, te kab'e' metr tk'i' nik'jan tpimal. Aju' ja toj tkub'exq'ij

¹²Atitoq jun ja toj tkub'exq'ij, tu'me'lju' pe'n jpu'nti'j, te junaq o'lajoj (35) metr twitz, atzun kab'naq jwe' (45) tnuqub', ati jun nintapi ti'j te kab'e' metr tk'i' nik'jan tpimal. Echb'ente tkyaqilju' ja te k'u'lb'il

¹³B'aj techa'n ichan tja Dyos, kab'naqlajoj (50) metr tnuqub' tu'n tkyaqil. Ex kab'naqlajoj (50) metr twitzju' pe'n jpu'nti'j tk'i'xi' ja ex nintapi ti'j.¹⁴Ex kab'naqlajoj (50) twitzju' twitz tja Dyos tuk'i'lxi' twitzju' pe'n jpu'nti'j toj tjawetzq'ij.¹⁵Ex xitecha'n tnuqub'ju' ja ati ti'jxi' tja Dyos, twitzju' pe'n jpu'nti'j, kyuk'i'lxi' nimaqtapi toj junjun plaj, kab'naqlajoj (50) metr tkyaqil. Nuk'b'ente tja Dyos
Aye' tal ja tojxi' tja Dyos exju' ja te o'yb'il,¹⁶tok tz'lan kyi'jile. Tok k'uxb'il kutxb'ilkye tokexspik'un ex tok tz'lan kyi'ju' tqul ti'jile te kyoxil plaj. Ex tok tz'lan ti'ju' tapi tzajx twitz tx'otx' japumni ja ta'qe' tokexspik'un, ex tib'ajxi' tjpel. Exju' ttapiyil tja Dyos, tojxi' ex ti'jxi',¹⁸b'incha'nqe'k kyilb'ilal kyerb'in ex tut twitz, xolpi'nchaq kyten. Teyile junjun tilb'ilal kyerb'in kab'e' plaj twitz;¹⁹twitz ichan toj jun plaj, nka'yin ti'j jun tut, atzu'n jun plajtl, twitz b'alun nka'yin ti'j juntl tut. Ikytzu'n, b'incha'nqe'k kyilb'ilal kyerb'in ex tut ti'jileju' tja Dyos, tzajx twitz tx'otx' japumni tib'aju' tjpel. Atzu'n ti'ju' ttapiyilju' ja toj nky'ajchaq,²¹ate'k tze te kyaje' ttx'u'k te tqulju' tjpel. Aju' q'olb'eb'l tze
Atitoq jun twitzju' qokyex toju' najb'il xjanxi'x, naku'j²²jun q'olb'eb'l tze, te jun metr twitz junjun plaj, atzun jun metr tk'i' nik'jan twe'. Ate'toq ttx'u'k ex tzeyile tq'uqb'il ex ti'jile. Tzaj tma'n ichan weye': Atzun mes ja'lu ati twitz Qman Dyos, chij. Aye' tjpel

²³Kakab' kyjpelju' ja toj nk'yajchaq tuk'i'lju' najb'il xjanxi'x. Kakab' kyxaq junjun tjpel nche jqet tu'me'l tapi.²⁵B'incha'n kyilb'ilal kyerb'in ex tut kyi'ju' tjpel mqo'n toj nky'ajchaq, ikyqe' kse'n ate'k kywitz nimaqtapi. Tok jun kutxb'il tzeyile twitzju' ja te o'yb'il ti'jxi'.²⁶Ate'toq tokexspik'un tok kutxb'il kyi'j toj junjun plaju' ja te o'yb'il, ex b'incha'n kyilb'ilal tut kyi'j. Ex ate'k kutxb'il kyi'ju' tal ja ate'k ti'ju' tja Dyos. Aye' ja tk'etz tja Dyos

¹Yajxi'tzuntl inetz tiq'i'ne' ichan twi' pe'n ti'jxi', toj tb'a'nq'ob'kya'j, ex inokxtiq'ine' kyoju' txqan ja ate' toj tb'a'nq'ob'kya'j, twitzju' pe'n jpu'nti'j ex toju' ja ti'jxi' tja Dyos.²Kab'naqlajoj (50) kynuqub'ju' txqan ja toj tb'a'nq'ob'kya'j, atzun junaqjo' (25) metr kywitz.³Toj jun plaj xinikywitz tu'me'lju' pe'n tojxi', lajoj metr twitz, atzu'n jun plajtl xinikywitz tu'me'l jab'incha'na' ab'j twi' pe'n ti'jxi'. Te oxe' kol, teyile junjun kol okxni lq'e twitzju' kub'l.⁴Atitoq jun b'e kywitzileju' ja, jwe' metr twitz, atzun kab'naqlajoj (50) tqan, inpon tojxi'. Xi' ta'ya' kytziju' ja toj tb'a'nq'ob'kya'j.⁵Noqjni'chaq qe'ch'i'ntlju' ja toju' kol jawl kyekywitzju' toj nky'ajchaq, ex kyekywitzju' kub'l, qu'n teyile junjun kol okxni lq'e ch'intl kyetwitzju' kub'l.⁶Te oxe' kol qe' ja lu, extzun mixti' kyqan kse'nqe' ja twi' pe'n, okxni lq'e qe'ch'i'ntlju' ja kyetwitzju' toj nky'ajchaq ex kyekywitzju' kub'l.

⁷Junaqjo' (25) metr kynuqub'ju' txqan ja twi' pe'n ti'jxi'. Atitoq jun nintapi, junaqjo' (25) metr tnuqub', toj tkyaqil kywitzju' ja, tu'me'l pe'n ti'jxi'. Kab'naqlajoj (50) metr tnuqub'ju' b'e kywitzile jatu'n tkyaqil.⁹Xi'ta' qokyex toju' pe'n ti'jxi', toj tjawetzq'ij japomna' nintapi ti'ju' pe'n ti'jxi', tu'n qokpun toju' ja toj tnejel kol.
Ex ate'toq ja toj tnayajkya'j, ttzi pe'n jpu'nti'j ex tpenju' ja toj tkub'exq'ij te tja Dyos¹¹ikx b'inchb'enkyeju' ex echb'enkye, ikx nuk'b'enkyeju', ati qokex ex qeletz kyoj, kse'nqe' ja toj tb'a'nq'ob'kya'j, ex ati jun b'e kywitzile.¹²Atitoq jun tjpel jantzyeta' b'e kywitzile ja twitz nintapi te kolb'il, tu'n qokx tu'me'l tjawetzq'ij tu'n qpon ja ta'qe' ja toj tnayajkya'j.

¹³Tzaj tma'n ichan weye': Xjan qekye' ja ate' ttziyileju' pe'n jpu'nti'j, toj tb'anqob'kya'j ex toj tnayajkya'j. Atzu' nche pona' pale nche pon lq'e tk'etz Qman Dyos wal kyi'ju' oyaj xjanqexi'x. Ex atzu' nche kub'a' kyq'o'n oyaj xjanqexi'x, kse'nqe' oyaj kywitz awal k'ok'e'kywitz, e'oyaj tu'n kypaj il, qu'n xjante' najb'il lu.¹⁴Aj kyokxju' pale toj tja Dyos, mixti' tu'n kyetz twipe'n ti'jxi' tuk'i'l kyxb'alun najb'en toju' kyajb'eb'l twitz Dyos, qu'n xjanju' xb'alun lu. Ati tu'n tkyaj kyq'o'n toj tja Dyos ex tu'n tok kyq'o'n juntl kyxb'alun ajkyetz jata' tnam xjal, chij. Echb'ente tx'otx' ti'j tja Dyos

¹⁵Tej tb'aj techa'n ichan tojxi' tja Dyos, inetz tiq'i'ne' ti'jxi' toju' tjpel toj tjawetzq'ij ex okten echalte tx'otx' ti'jile tja Dyos.¹⁶Tzaj tiq'i'n tze techb'il ex kub' techa'n plaj toj tjawetzq'ij: kab'lajnaq lajoj (250) metr.¹⁷Ex kub' techa'n toj tb'a'nq'ob'kya'j, ex kab'lajnaq lajoj (250) metr;¹⁸xitecha'ntl toj tnayajkya'j: ex kab'lajnaq lajoj (250) metr;¹⁹Ex xitecha'ntlju' plaj toj tkub'exq'ij, ex kab'lajnaq lajoj (250) metr.²⁰B'aj techa'n toj kykyajel plaj. Ati jun nintapi ti'jileju' tx'otx' ti'j tja Dyos te kab'lajnaq lajoj (250) metr tqan junjun plaj, te aq'pub'lteju' tx'otx' xjan tuk'i'lju' tz'il. Ul jumajtl tajwalil Dyos toju' ja te k'u'lb'il

¹Inxitiq'i'ne' ichan tk'etzju' tjpel toj tjawetzq'ij,²ex wile' tajwalil Dyos janche ajb'ena' aj Israel tzaj toj tjawetzq'ij. Q'ojq'ojtoq kuwxi'x, kse'n tq'ojq'ojel jun nin a', ex majxkub' spik'e' twitz tx'otx'.³Iky tzaj yek'u'nju' kse'n tzaj yek'u'n weye' tej tul Qman Dyos xitulte Jerusalen, ex kse'n tzaj yek'u'n weye' tk'etz nin a' Kyeb'ar. Inkub' mejeye' majx ku'pun nplaje' twitz tx'otx',⁴ex okxju' tajwalil Qman Dyos toju' ja te k'u'lb'il toju' ttzi toj tjawetzq'ij.

⁵Injawtzun tiq'i'ne' tipumala Qman Dyos ex nxitiq'i'ne' toju' tpen tojxi', ex wile' matxitoq noj tja Dyos tu'n tajwalil.⁶Kub'ten ichan nk'etze', ex nb'iye' intoq yolintz Qman Dyos weye' tzmax toju' tja⁷intoq tma'n:
A tkb'el nq'uqb'ile' lu, aju' jankub'a' nq'o'n nqane'; atzu' chin najalaye' kyxol aj Israel tejumajx. Lay kub' kytxa'ju'ntlju' nb'iye' xjan kyuk'i'l kynimaqkawil tu'nju' min nchinx kyb'i'ne': Lay che jawkyb'incha'ntl nnab'ab'lkye kynimaqkawil kykyimlenxi',⁸mo tu'nwt kyjaw kyb'incha'n kyja te nimaqkawb'il tu'n kykyaj kyq'o'n tjpel kyk'etz tjpelju' njaye', ex naqwit jun tapi kyxol. Kub' kytxa'ju'n nb'iye' xjan tu'n kyb'inchb'aj ik'o'n wu'ne'; qu'mtzun tzaj ntx'u'jile' kyi'j ex e'kub' nb'yo'ne'⁹Kyiq'imiltzu'n kytaq'wixil exqe' nab'ab'lkye kynimaqkawil nwitze' ja'lo, chin najaltzuntze' kyxol tejumajx.¹⁰Q'manxa ichan kye aj Israel, aju' xtila ti'ju' ja te k'u'lb'il, se'n tu'me'l ex echb'ente, tu'ntzun kykub' ch'ixwi tu'n tpaj kyil.¹¹Qatzun mache kub'ch'ixwi tu'n tkyaqilju' matxi' b'aj kyb'incha'n, chik'b'anxa kye se'n tu'me'lju' ja te k'u'lb'il exju' ati toj, jachaq tu'n kyokxa' ex jachaq tu'n kyetza', tkyaqilju' tu'me'l, exqe' kawb'il tu'n kyjapun kyu'n. B'inchankuya tilb'ilal tkyaqil ja'lu kye tu'n tkane toj kywitz se'n nuk'b'enkye ex tu'n kyb'inchante. Ex tz'ib'anqeku'ya tkyaqilju' kawb'il tu'n kyjapun kyu'n.¹²A kawb'il ja'lu ti'ju' ja te k'u'lb'il: Tkyaqilju' tx'otx' ti'jile ja te k'u'lb'il twi' witz k'okyel xjanxi'x, chi Dyos. Aju' q'olb'eb'l

¹³A echb'ente q'olb'eb'l ja'lu, tu'nxju' echb'il nejtl, atitoq jun tb'e a' ti'jele q'olb'eb'l nik'jan metr t-xe ex nik'jan metr twitz, ati jun maqb'il jawni b'incha'n ti'jile junaqjo' (25 cm.) sentimetro twe'. Ikytq'uqlil q'olb'eb'l ja'lu:¹⁴jun metr twe' tzajx t-xexi' tb'e a' jawu'l ti'ju' tnejel kol. Nik'jan metr etzna' tenju' t-xmilal t-xexi'. Kab'e' metr twe' toj nky'ajchaq, ex etzniten nik'jan metr.¹⁵Atzu'n t-xmilal jawtl janche tz'e'yseta' chojb'il, kab'e' metr twe'. Ate'toq kyaje' tuk'a jawniqe' ten jawl.¹⁶Kyaje' ttx'u'kju' t-xmilal q'olb'eb'l jawl, qaq metr twitz junjun plaj.¹⁷Ex kyaje' ttx'u'kju' t-xmilal toj nky'ajchaq, wuq metr twitz junjun plaj. Nik'jan metr twitzju' tkb'el a' ti'jile, atzun junaqjo' (25) sentimetro twitzju' maqb'il jawni ten ti'j. Xi'ta' peta'n toj tjawetzq'ij tu'n qjax twi' q'olb'eb'l.

¹⁸Tzajtzun tma'n Qman Dyos weye':
Ajtpon kmoj tu'n tjaw b'inchetju' q'olb'eb'l, ati tu'n kyb'inchetju' nuk'b'il lu: kb'el kytz'e'ysa'n jun alu'mj te chojb'il k'ok'sb'il tib'aj q'olb'eb'l, ex kb'el kywitxk'a'n tchk'el tib'aj q'olb'eb'l.¹⁹Kxel tq'o'na jun qpoj tman wakx kye pale aj Leb'i, tyajajil Sadok, aye' che okyel lq'e nk'etze' tu'n kyajb'en weye', tu'n tkub' kyq'o'n te chojb'il tu'n tpaj il. Ayine' Dyos Manb'aj nchin q'mante.²⁰Oktzun jawil tiq'i'na ch'i'n chik' ex kb'el twitxk'a'na kyi'ju' kyaje' tuk'a q'olb'eb'l, kyi'ju' kyaje' ttx'u'kju' t-xmilal toj nky'ajchaq ex tkyaqilju' ttxa'nile jawni ten. Ikytzu'n kt-ẍtilsa'ya tkyaqil te il.²¹Ex ktzajel tiq'i'na qpoj tman wakx kub' te chojb'il tu'n tpaj il, kb'el ttz'e'ysa'na ti'jxi' ja te k'u'lb'il, tojxju' jantz'e'yseta'.²²Toj juntl q'ij kb'el tq'o'na jun qpoj tman chib' mixti' ttzakajil te chojb'il tu'n tpaj il, aye'tzu'n pale kyẍtilsa' q'olb'eb'l kse'nx kyb'incha tuk'ilju' qpoj tman wakx.²³Ajtb'aj b'antju' ẍtilsab'l lu tu'na, ktzajel tiq'ina jun qpoj tman wakx ex jun rit, mixti' jun kytzakajil,²⁴che b'eltq'o'na nwitze'. Kxel kychto'n pale atz'an kyib'aj ex che b'elkytz'e'ysa'n te chojb'il k'ok'sb'il ninb'ilweye'.²⁵Ati tu'n tkub' tq'o'na atl junjun q'ij, toj wuq q'ij, jun qpoj tman chib' te chojb'il tu'n tpaj il, ex jun qpoj tman wakx ex jun rit, kykyaqil mixti' jun kytzakajil.²⁶Ati tu'n kyẍtilsante pale tkyaqilju' q'olb'eb'l, tkyaqil q'ij toj wuq q'ij, tu'n tkub' q'et toju' ajb'eb'l xjan.²⁷Ikytzun kyb'incha'ju' toj wuq q'ij, tojtzun twajxaqi'n q'ij kxel qe tkub' kyq'o'n chojb'il k'ok'j ex chojb'il te b'inchjtib'il. Che nk'ma'tzuntze' toj tzalajb'il. Ayine' Dyos Manb'aj chin q'malte, chi Dyos. Tajb'eb'lju' tjpel toj tjawetzq'ij

¹Inxitiq'i'ntle' ichan toju' qokyex ti'jxi' tja Dyos toj tjawetzq'ij, jpu'ntoq.

²Tzaj tma'n Qman Dyos weye' atzu':
Kjel jpette' ttzija lu; lay jqet. Mix-a'lo' k'okyex toj, qu'n toj oje tz'okxa' Qman Dyos, janche ajb'ena' aj Israel. Qu'mtzun kjel jpet.³Noq o'kxju' kawil b'a'n tokex, tu'n tkub' qe walteju' wab'j xjan nwitze' ayine' Dyos. Atzu' tu'n tokxa' toju' ttzija te o'yb'il ex axtzu' tu'n tetza', chij. Alkyeqe' b'a'n kyokx toj tja Dyos

⁴Yajxi'tzuntl nxitiq'i'ne' ichan toju' ttzija toj tb'a'nq'ob'kya'j, twitz tja Dyos. Wile' matxitoq noju' ja te k'u'lb'il tu'n tajwalil Dyos, inkub' mejetzuntze' majx ku'pun nplaje' twitz tx'otx'.⁵Tzajtzun tma'n Qman Dyos weye':
Ichan, ka'yina b'a'nxi'x ex b'inku'ya b'a'nxi'x tkyaqilju' kxe'l nma'ne' kyi'ju' kawb'il ex nuk'b'il ti'ju' ja te k'u'lb'il. B'intza b'a'nxi'x alkyeqe' b'a'n kyokx toju' ja te k'u'lb'il ex b'a'n kyetz toj.

⁶Q'manxa teju' pi's tnam Israel: A ntma'n Dyos ja'lu: Tk'i'xtzun kyb'inchan taq'wixju'ye', tnam aj Israel.⁷Inkub' kytxa'ju'ne' njaye', nche okx kyiq'i'ne' najchaq xjal toj, e'xjal min q'i'n techelju' nyole' kyejni b'entti'j, toj kywi' mo ti'j kyxmilal; inkub' kytxa'ju'n ajttzaj kyq'o'n ky-until ex kychk'el chojb'il te nwaye' ex nche ik' tib'aju' nyole' kyejni b'entti'j tu'n tkyaqilju' kyb'inchb'aj taq'wixi'x lu.⁸Ex min nche kyb'incha'n nnuk'b'ile' xjan, nche kyej kyq'o'n toj kyq'ob'ju' najchaq xjal.

⁹Qu'mtzun nmaye' ayine' Dyos Manb'aj: lay tz'okx jun najchaq xjal toju' njaye' qa min iq'i'n techelju' nyole' kyejni b'entti'j tu'n, toj twi' ex ti'j t-xmilal; tk'i'xpe'wt jun najchaq xjal najli kyxol aj Israel.¹⁰Aye' aj Leb'i, elkypa'n kyib' wi'je' tej telkypa'nkyib' aj Israel ti'ju' nb'eye' ex inkyaj kytzaqpi'ne' tu'n kyk'ulun kye witzleb', ati tu'n kychjonteju' kyil.¹¹B'a'n tu'n kyajb'en xq'uqil ttzi njaye', ex kyoj junjuntl ajb'eb'l toju' njaye'; aye' che b'elb'yo'nkye' alu'mj nche kub' tz'e'yset te chojb'il k'ok'sb'il exqe' che b'elkyq'o'n tnam te oyaj; ex ati tu'n kyajb'en onilkyeju' tnam.¹²E'ok ajb'el kye aj Israel tu'n tiq'et twitz k'u'lb'il kye witzleb', ikytzu'n eb'inchana' il kyu'n. Qu'mtzun, kychja'ju' kyil. Ayine' Dyos Manb'aj nchin q'mante.¹³Lay b'ent kyajb'en weye' te pale ex lay che tzaj lq'e kyk'etzju' ti'xti' xjan weye', mixyate' kyk'etzju' xjanqe'xi'x. Kkyiqa' kych'ixaw tu'n kypaju' ti'xti' taq'wixi'x b'aj kyb'incha'n.

¹⁴Che okyel nq'o'ne' b'inchalte ajb'eb'l ch'i'n toklen toju' njaye', tu'n kyb'inchante tkyaqilju' ati tu'n tb'inchet toj. Aye' pale

¹⁵Aye'tzu'n pale aj Leb'i tyajajil Sadok, ljo'xtoq kyajb'en toju' njaye' tej kyel txalpuju' aj Israel ti'ju' nb'eye', b'a'n tu'n kytzaj lq'e nk'etze' tu'n kyajb'en weye'. B'a'n tu'n kyul nwitze' tu'n tkub' kyq'o'n ky-until ex kychik'elju' chojb'il nwitze'. Ayine' Dyos Manb'aj nchin chq'onte.¹⁶Ex b'a'n tu'n kyokx toju' njaye' ex tu'n kyoklq'e ti'ju' q'olb'eb'l weye' tu'n kyajb'en weye', ex aye' che ajb'el weye'.¹⁷Aj kyokx toju' tjpel pe'n tojxi', ati tu'n tok kyq'o'n kyxb'alun sed. Mixti' tu'n tok kyq'o'n kyxb'alun lan ajkyb'inchante ajb'eb'l twi' pe'n tojxi' mujqa toju' njaye'.¹⁸Kjawix jun ẍipb'il kywi' sed, ex che okyel kykalsonsiy sed, ex lay tz'ok k'alb'il kyk'u'j tu'n lalun tz'el a' kyi'j.¹⁹Ajtzun kyetz twipe'n ti'jxi' ja ta'qe' tnam xjal, nejl k'elelkyiq'i'n kyxb'alun najb'en kyu'n toju' ajb'eb'l toj tja Dyos, ex tu'n tkyaj kyq'o'n kyoj tal ja toj tja Dyos, ex k'okyel kyq'o'n juntl kyxb'alun, tu'n lalun tzik'ju' t-xjanb'il xb'alun ti'ju' tnam.

²⁰Lay tz'el kysk'o'ji'n kywi', ex lay kub' ch'isa'n kywi' nimaq; naq k'elel kyjo'n t-xya'mal kywi'.²¹Mixti' tu'n tk'wan b'in jun pale ajtokx twipe'n tojxi'.²²Mixti' tu'n tmje jun pale tuk'i'l jun qya kyimni tchmil mujqa kub'ni tpa'ntib' tuk'i'l tchmil, naq o'kx tuk'i'l jun txin aj Israel qpoj mujqa t-xu'jilb'en jun pale kyimni.

²³Ati tu'nt-xi kyxnaq'tza'n pale ntaname' tu'n telkynik' teju' xjan ex teju' tz'il, teju' ẍtilun ex teju' mya ẍtilun.²⁴Aye' che okyel te ajkawil kyoju' q'oj, ex k'okyela toj xjel kyu'n kse'nx nkyma'n nkawb'ile'. Kjapumel tkyaqilju' nkawb'ile' ex nxnaq'tzb'ile' kyu'n kyi'j tkyaqilju' ninq'ij weye', ex che b'elkynima'n q'ij te ojlab'l te xjan weye'.

²⁵Mixti' tu'n tok kytzyu'n jun kyimni, tu'n lalun che tz'ilix, naq o'kx qa kyman mo kytxu, jun kyk'wal mo kymyal, jun kytzik mo kyitz'in, mo kyanab' mya mjeb'ni.²⁶Qama kyb'incha, ati tu'n kyẍtilsante kyib', ex tu'n kyyonte wuq q'ij.²⁷Ajtzun kyokx jumajtl tpenju' ja te k'u'lb'il tojxi' b'inchalte kyajb'eb'l, kb'el kyq'o'n jun chojb'il tu'n tpaj il. Ayine' Dyos Manb'aj nchin q'mante.

²⁸Naq o'qinkxe' chin kyk'ma' pale te kyetzb'il. Lay txi' kytx'otx' toj Israel. Ayine' kyetzb'il.²⁹B'a'n tu'n kywan kyi'ju' twitz awal k'ok'e'kywitz nkub' kyq'o'n aj Israel weye', ex kyi'ju' a'lumj inche kub' q'o'n te chojb'il tu'n kypaj il. Ex kxe'l kye tkyaqilju' makub' kyxjansa'n aj Israel weye'.³⁰Kyk'ma' pale tb'anilxi'x tnejel twitz awal ex tkyaqilju' oyaj. Ex ajtkub' kyb'incha'ne' tq'otjil wab'j, aju' tb'anil kxe'l kyq'o'ne' kye pale. Kb'eltzun nq'o'n nky'i'wb'iltze' kyib'aju' kyjaye'.³¹Mixti' tu'n t-xikych'yo'n pale jun pich' mujqa a'lumj majaw kyim tu'nxtib', mujqa makub' tzaqu'n tu'n jun tojk'ul txkup. Aju' tx'otx' pa'n te Qman Dyos (Ez 48.9-20)

¹Ajtb'ajx kysipa'ne' tx'otx' jachaq matxa' kye junjun tnej kyyajajile', ati tu'n tkyaj kypa'ne' jun tnej tx'otx' masch'i'n oxe' ajlab' (12.5 Km.) tnuqub', atzun kab'e' ajlab' tk'i' nik'jan (10 Km.) twitz, k'okyel te Qman Dyos. Tkyaqilju' tx'otx' lu kxjansetel.²Ti'jtzu'n tx'otx' lu k'elel pa'yit jun tnej tkb'elju' ja te k'u'lb'il, junelni twitz te kyaje' ttx'u'k, kab'lajnaq lajoj (250) metr twitz toj junjun plaj, awa'n twa wakx ti'jile te junaqjo' (25) metr twitz.³K'elel pa'yet jun tx'otx' ti'ju' pa'n te Dyos, te masch'i'n oxe' ajlab' (12.5 Km.) tnuqub', atzun mas jun ajlab' (5 Km.) twitz, atzun tx'otx'ju' xjanxi'x: atzuntzu' ktenb'ela' ja te k'u'lb'il.⁴Kxe'lju' tnej tx'otx' lu kye pale nche ajb'en toju' tja Dyos ex nche pon lq'e ajb'el te. Atzuntzu' kjawila' kyb'incha'n kyja. K'okyel te jun najb'il xjan, klo'n te tkb'el tja Dyos.⁵Expe' ktenb'el jun tnejtl tx'otx' te masch'i'n oxe' ajlab' (12.5 Km.) tnuqub', atzun mas jun ajlab' (5 Km.) twitz, klo'n te kyetzb'il aj Leb'i nche ajb'en toj tja Dyos, tu'n kyten nimaqkytanam jatu'n kynajana'.⁶Te b'ajsb'iltzun, ati tu'n tkyaj klet jun tx'otx' te tkb'el nintnam, masch'i'n oxe' ajlab' (12.5 Km.) tnuqub', atzun mas nik'jan ajlab' (2.5 Km.) twitz, tk'etzju' tx'otx' xjan. K'okyelju' tx'otx' lu te tkyaqilju' tnam Israel. Ttx'otx' kawil klo'n (Ez 48.21-22)

⁷Ex kjel klet jun tx'otx' teju' kawil. Kjel jun tnej toj tjawetzq'ij atzun jun tnejtl tkub'exq'ij, te jun plaj ex te jun plajtl teju' tx'otx' xjan ex teju' tx'otx' klo'n te nintnam. Toj tjawetzq'ij ex tkub'exq'ij, kyinx tnuqub' kse'n jun tnej tx'otx' kye jun tnej kyyajajil.⁸Kxe'lju' tx'otx' lu teju' kawil toj Israel; laytzun che oktentl kawiltz yajulte ntaname', kjel q'et kytx'otx' kye aj Israel kse'nxju' tnej kyyajajil. Nuk'b'il teju' kawil

⁹Ayine' Dyos Manb'aj nchin q'mante: ¡Tk'i'xtzun kyajunju'ye' ex tu'n kyb'iyone' kawil toj Israel! ¡Kyb'inchame' tnik'alilti'j ex ttzinunal! ¡Lalun tz'el kyelq'a'ntle' kytx'otx' ntaname'! Ayine' Dyos Manb'aj nchin chaq'unte.

¹⁰Tz'ajb'en tkyaqil malb'il tz'aqli kyu'ne'.¹¹Ati tu'n tten malb'il triy ikxju' kse'n malb'il a' twitz. A malb'ilju' k'ajb'el aju' omer, te junlajnaq (220) litr toj. Jun b'ato a' twitz aju' jun tlajoji'n teju' malb'il omer, ex jun epa triy axju' jun tlajoji'n teju' omer.

¹²Ex ikxju' malb'il talal: Winqi'n keras tu'n jun piẍ ch'intlmi nik'jan lib'r; tu'n oxnaq piẍ, junaq oxe' (23) lib'r.

¹³Aye' oyaj ja'lu tu'n kyb'inchet: Kb'el kyaq'pu'n twitz kyawal, triy ex seb'ad, toj oxnaq (60) mlon junelni, jun mlontzun kb'el kyq'o'n te kyoyaj.¹⁴Ikxju' aseyt qama jaw kyu'n, kb'el kyaq'pu'n toj jo'naq (100) mlon junelni, jun mlontzun kb'el kyq'o'n te kyoyaj.¹⁵Atzu'n jun rit kb'el kyq'o'n kyi'j lajnaq (200) rit majx tb'anilqe' toj Israel. Atzun nuk'b'ilju' kyi'ju' oyaj ti'j triy, chojb'il k'ok'sb'il, ex chojb'il te b'inchjtib'il nche kub'q'et te najsb'il il. Ayine' Dyos Manb'aj, nchin q'mante.

¹⁶Kykyaqil xjal toju' tx'otx' ilti'j tu'n kyq'onteju' oyaj lu teju' kawil toj Israel,¹⁷atzunte kb'el q'onkye alu'mj te chojb'il k'ok'sb'il, exju' nojqelan te oyaj twitz awal k'ok'e'kywitz ex b'in atl ak'a'j xjaw, kyoj q'ij te ojlab'l ex kyoj kykyaqilu' ninq'ij toj Israel. Ex ati tu'n kykub' tq'o'n chojb'il tu'n tpaj il, e'oyaj twitz awal k'ok'e'kywitz, e'chojb'il k'ok'sb'il exqe' chojb'il te b'inchjtib'il, tu'n tkub' najset kyil aj Israel. Tq'ij tzaqpib'l

¹⁸Ayine' Dyos Manb'aj nchin yolin: Kb'el kyq'o'ne' jun qpoj tman wakx mixti' ttzakajil te chojb'il toj jun tajlalju' tnejel xjaw, tu'n t-ẍtilsetju' ja te k'u'lb'il te il.¹⁹Ktzajel tiq'i'n pale ch'i'n tchk'elju' alu'mj nkub' te chojb'il tu'n tpaj il, k'okyel t-sun ti'j tqan tjpelju' ja te k'u'lb'il, kyi'ju' kyaje' ttx'u'k q'olb'eb'l ex kyi'ju' tqan tjpelju' pe'n tojxi'.²⁰Ikx kb'inchetelju' toj wuq tajlal xjaw kyi'ju' makyb'incha jun il mya xima'n kyu'n mujqa minxkyil. Ikytzu'n kẍtilsetela' ja te k'u'lb'il.²¹Ktzyetel kyik'santeye' tq'ij tzaqpib'l toj kyajlajoj tajlal tnejel xjaw, ex che wal wab'je' mixti' ttx'amal toj wuq q'ij.²²Kb'eltq'o'n kawil jun qpoj tman wakx te chojb'il toju' q'ij lu, tu'n kypaj til ex tu'n tpaj kyil tkyaqilju' tnam,²³ex che kb'eltq'o'n wuq qpoj tman wakx ex wuq tman rit mixti' kytzakaj, atl junjun q'ij toju' wuq q'ij ninq'ij, te chojb'il k'ok'sb'il weye' ayine' Dyos Manb'aj. Expe' kb'eltq'o'n jun chib' atl junjun q'ij te chojb'il tu'n tpaj il.²⁴Ex kb'el jun oyaj te winqi'n litr twitz awal k'ok'e'kywitz ex oxe' litr tk'i' nik'jan aseyt tmoj junjun qpoj tman wakx ex tmoj junjun tman rit. Kyq'ij pach tq'ob' tze

²⁵Ex ikx toj kyq'ij pach tq'ob' tze, nkub' ik'set toj o'lajoj tajlal twuqi'n xjaw, ati tu'n kykub' tq'o'n kawil chojb'il junelni tu'n tpaj il toju' wuq q'ij, ikyx kyajlal alu'mju' che b'eltz'e'yset ex ax kyajlal oyaju' kywitz awal k'ok'e'kywitz ex aseyt. Aju' tu'n tb'inchante kawil ex tu'n kyb'inchante xjal kyoju' ninq'ij

¹Ayine' Dyos Manb'aj nchin q'mante: Ati tu'n tjpet tjpelju' pe'n tojxi' toj tjawetzq'ij toju' waqaq q'ij aq'untl, kjqeteltzuntz toju' q'ij te ojlab'l ex toju' q'ij te ak'a'j xjaw.²K'okyexju' kawil toju' ja te o'yb'il twipe'n ti'jxi', ex kb'elten tk'etz junju' tqan tjpel. Aye'tzu'n pale che b'elkytz'e'ysa'n alu'mj te chojb'il ex che b'el kytb'incha'n chojb'il te b'inchjtib'il che kb'eltq'o'n kawil, ex kb'el meje kawil ttzija, majx kb'elpumel tplaj twitz tx'otx', k'eletztzuntz. Atzu'n ja kjpetelxi' te qale.³Che k'ululju' tnam twitz Qman Dyos twitzxju' tjpel ja kyoj q'ij te ojlab'l ex kyoj q'ij te ak'a'j xjaw.⁴Qaq qpoj tman rit ex jun tman rit ati tu'n tq'onte nimaqkawil toj q'ij te ojlab'l tu'n kykub' tz'e'yset te oyaj te Qman Dyos, kykyaqilx mixti' kyktzakajil.⁵Kb'eltq'o'n winqi'n litr kywitz awal k'ok'e'kywitz tmoj junjun rit, atzu'n kymoju' qpoj tman rit axi'x jni' tajb'il. Kb'eltq'o'n oxe' litr tk'i' nik'jan aseyt tmoj winqi'nchaq litr kywitz awal k'ok'e'kywitz.⁶Kb'eltq'o'n jun qpoj tman wakx, qaq qpoj tman rit ex jun tman rit mixti' kytzakaj te chojb'il toju' q'ij te ak'a'j xjaw.⁷Kb'eltq'o'n winqi'n litr kywitz awal k'oke'kywitz tmoj junjun qpoj tman wakx ex, ex jni'tl tmoj junjun tman rit, atzun jni'xku' tajb'il kymoju' qpoj tman rit. Atzun oxe' litr tk'i' nik'jan aseyt tmoj winqi'nchaq litr kywitz awal k'ok'e'kywitz.

⁸Ajtokxju' kawil, atzu' tu'n tokxa' toju' ja te oyb'il ttzi tjpel, ex axtzu' tu'n tetza'.⁹Ex aj kyokxju' xjal k'ulul te Qman Dyos kyoju' ninq'ij, a tu'n kyb'inchante ja'lu: Aye' nche okx ttzija toj tqb'anq'ob'kya'j xi' che eletza' ttzija toj tnayajkya'j, aye'tzu'n nche okx ttzija toj tnayajkya'j xi' che eletza' ttzija toj tb'a'nq'ob'kya'j. Lay che etz tojxju' ttzi jaẍe okxa', kxel kyljo'n kyb'e jun plajtl.¹⁰Ati tu'n tokxju' kawil tuk'i'lju' tnam ex tu'n tetz tuk'i'l.¹¹Kb'el q'et winqi'n litr kywitz awal k'oke'kywitz tmoj junjun qpoj tman wakx kyoju' chukchaq ninq'ij, ex txqantl tmoj junjun rit; atzun axi'x jni' kymoju' qpoj tman rit. Expe' kb'el q'etl oxe' litr tk'i' nik'jan aseyt tmoj winqi'nchaq litr triy.

¹²Ajtq'onte kawil jun oyaj tu'n tk'u'j te Qman Dyos, kse'n jun alu'mj te chojb'il k'ok'sb'il mujqa jun chojb'il te b'inchjtib'il, kjqetelju' tjpel toj tjawetzq'ij ex kb'eltq'o'n chojb'il kse'nx nb'incha'n toju' q'ij te ojlab'l. Telentzxi'tzun kjpetelju' ja. Oyaj nkub' q'et atl junjun q'ij

¹³Atl junjun q'ij te prim kb'el jun qpoj tman rit te jun ab'q'i, mixti' ttzakajil, tu'n tkub' tz'e'yset te chojb'il te Qman Dyos.¹⁴Ex kb'el q'et jun oyaj te Qman Dyos atl junjun prim, te wuq litr twitz awal k'ok'e'kywitz ex jun litr aseyt, kb'el qet tib'aju' arin. Ilti'j tu'n tb'inchet ja'lu kukxu'.¹⁵Ilti'j tu'n tkub'ju' chojb'il atl junjun prim, aju' tu'n ttz'e'yset qpoj tman rit, ex oyaj twitz awal k'ok'e'kywitz ex aseyt. Aju' tu'n tb'inchante kawil ti'ju' tx'otx'

¹⁶Ayine' Dyos Manb'aj, nchin yolin: Qama txi' toyi'n kawil jun tneju' tx'otx' ti'ju' ttx'o'tx' te jun tk'wal, kjelten te kyetzb'ilju' tyajajil.¹⁷Qatzun matxi toyi'n kawil jni' tx'otx' ti'ju' ttx'otx' te jun ajb'el te, tzmaxi' teju' ajtpon ab'q'i te tzaqpib'l, ajtanjtlti'j teju' kawil, kjeltzuntz te kyetzb'ilju' tk'wal.¹⁸Mixti' toklen kawil tu'n tel tiq'i'n ttx'otx' jun xjal. Aju' kxe'l tq'o'n te kyetzb'il tk'wal, ti'jxju' te kxela' tq'o'n; mix-a'lo'tzun kjeltz mixti' ttx'otx' ex lay che'x slamju' ntaname', chiju' ichan. Aye' b'inchb'il wab'j teju' tja Dyos

¹⁹Inxi'tzun tiq'i'ne ichan toju' qokyex ttx'u'kju' tjpel, kyoju' tal ja nche ka'yinx toj tqb'anq'ob'kya'j ex xjansa'nqe' naq kyeku' pale. Tzaj tyeku'n jun najb'il weye' toj tkub'exq'ij, ti'jxi',²⁰tzaj tma'n weye: Atzuntzu' tzalu tu'n kytzq'ajsante pale kychib'jil alu'mj nche kub' te chojb'il tu'n kypaj il, ex tu'n kytzq'ajsante oyaj twitz awal k'ok'e'kywitz. Tu'ntzun lay che etzkyiq'i'n ti'xti' lu twipe'n ti'jxi', ex tu'n lan che okxju' tnam kyk'etzju' ti'xti' xjan, chij.

²¹Ex inxitiq'i'ne' twi' pe'n ti'jxi' ex b'aj qb'etine' kykyajel ttx'u'k. Wile' ati jun b'o's pe'n toj junjunju' kyaje' ttx'u'k. Junelni echb'enkye kykyajelx te winqi'n metr tnuqub' ex o'lajoj twitz junjun;²³atitoq jun nintapi ab'jile kyi'jile, ex ate' q'aq' t-xe tkyaqilju' nintapi.²⁴Tzaj tma'ntzuntz weye': Aye'tzun tzq'ajsb'il ja'lu ja che b'ela' kytzq'ajsa'n ajb'el toju' ja te k'u'lb'il, ju' alu'mj nche kub' kyq'o'n tnam te chojb'il. A' netz toju' tja Dyos

¹In okxtiq'i'n jumajtle' ichan ttzi tja Dyos. Wiltzuntze' intoq etz qojl a' tjaq'ju' tjpel ex nxi' tu'me'l tjawetzq'ij, janka'yinxa' tja Dyos. Xi'nku'tza' a' toj tb'a'nq'ob' tja Dyos, nku' toj tnayajkya'j te q'olb'eb'l.²Inetztiq'i'ntzuntze' toju' ttx'otx' tja Dyos toju' ttzi toj tqb'anq'ob'kya'j, inxitiq'i'ne' ti'jile tzmax npone' toju' qokex toj tiawetzq'ij. Ati jun tal b'o's a' netz toju' plaj toj tnayajkya'j teju' qokyex.³Etzju' ichan toj tjawetzq'ij iq'i'n jun ky'jaj te echb'il tu'n, kub' techa'n junk'al jo'naq (500) metr ex inik'x tiq'ine' toju' a'; japun a' weye' tqul nqane'.⁴Ex kub' techa'n junk'al jo'naq (500) metrtl ex inik'x tiq'ine' toju' a'; japuntzun a' weye' toj nch'ekye'. Xitecha'n junk'al jo'naq (500) metrtl ex inik'x tiq'i'ne' toju' a'; atzu'n a' japun weye' twinẍo'pe'.⁵Xitecha'n junk'al jo'naq (500) metrtl, atzu'n a' matxitoq ch'iy nim min b'entl wik'xe' toj; jun nin a'tltoq nim t-xe, o'kx tu'n tb'ant qik'x toj qa b'a'n a' qu'n.⁶Tzajtzun tma'n ichan weye': Q'onk kwenta b'a'nxi'x ti'ju' matxi' tila, chij.
Yajxi'tzuntl nxitiq'i'ntle' ttziyele nin a',⁷ex wile' ate'toq txqan nimaq tze ttziyile toj kykab'il plaj.⁸Tzaj tma'ntzuntz weye': Majx nxi'te' a' lu toju' tx'otx' toj tjawetzq'ij ex npon tzmax toju' nin a' Jordan, ex nponb'aj toj Kyimni Ninnjab'. Ajtzun tpon atzu', kb'el chi'yixju' a' toj ninnjab'.⁹Jaxjaku' mapona' a' lu, kb'antel kyanq'in tkyaqil ch'ix txkup ex txqan kyiẍ. Qu'n kjawil ch'i'yixju' k'a a' tu'n a' toju' nin a' lu, che anq'il tkyaqil txkup tu'n.¹⁰Che tenb'el tzyul kyiẍ tzajx En-kadi ponx En-eklaym, ex atzu' che b'ela' kysa'n kypa tzyub'l kyiẍ. Nim chukchaq kyiẍ ktenb'el atzu' kse'nxju' toj Ninnjab' Mediteraney.¹¹Atzu'n kyoj sob'on ex kyoj xoq'l lay chi'yix a'; pitz'moj a' kjel atzu', che ajb'el tu'n tjatz atz'an kyoj.¹²Che ch'iyel tkyaqil tze nel kywitz te lob'j toj kykab'il plaj ttziyileju' nin a'. Layx che kub'jilj kyxaq, ex layx qen kywitzan. Atl xjaw ktenb'el kywitz, qu'n a'li'n kyxe tu'n a' netz toju' ja te k'u'lb'il. Che ajb'elju' kywitz te k'a'chb'il, aye'tzu'n kyxaq te q'anb'il. Tnaqachalju' tx'otx'

¹³Ayine' Dyos Manb'aj, nxinma'ne': Aye' tnqachil tx'otx' ja'lu kyk'ma' kab'lajoj (12) tnej tyajajil Israel (kab'e' tmalel kye tyajajil Jse kyetzb'il kyk'ma').¹⁴Oje nmaye' tu'n txinq'o'ne' tx'otx' lu kye ojtxi' kychmane'. Kypa'nxe' junelni kyxole'. A kyetzb'ilju' tx'otx' lu.

¹⁵Aju' nqach toj tb'a'nq'ob'kya'j, tzajx ttzi ninnjab' Mediteraney, tu'n tik' jata' nintnam Etlon ex ja ta'qe' nimaqtnam Sedad,¹⁶B'erota ex Sib'raym (ju' ate' toju' tx'otx' Damask ex Amat), ex Asar-atikon (tnaqach tib' tuk'i'l Awran).¹⁷Ikytzu'n, xi'kxe'la' nqach te tb'a'nq'ob'kya'j, tzajx ttzi Mediteraney tu'n tpon tzmax Asar-enan, nche kyejten Damask ex Amat toj tb'a'nq'ob'kya'j.

¹⁸Atzu'n nqach toj tjawetzq'ij ktzajelx kyxol Awran ex Damask tu'n tpon tzmax jata' nintnam Tamar, ttzi Kyimni Ninnjab', ale'x tnuqub' nin a' Jordan, k'ajb'el te nqach te tx'otx' Kalaad tuk'i'l Israel.

¹⁹Atzu'n nqach toj tnayajkya'j ktzajelx Tamar, tu'n tik' jata' a' toj Merib'a-kades ex tk'etzju' tal a' toj Ejipt, tu'n tpon tzmax ttzi ninnjab' Mediteraney.

²⁰Atzu'n nqach toj tkub'exq'ij, kxe'l ttziyile ninnjab' Mediteraney, tzajx ttzi nqach tuk'i'l Ejipt tu'n tpon tzmax mlaj ttzi Amat.

²¹Atzun tx'otx' ja'lu tu'n tkub' pa'yet kyxolju' kab'lajoj (12) tnej tyajajil Israel.²²A etzb'ilju' kxe'l kyeye', ex kyeju' najchaq xjal najlqe' kyuk'i'le' ex ate' kyk'wal kyxole'. Ati tu'n kyok kyu'ne' naku'xwitloj e'itz'ji toj Israel. Ajtkub' kyaq'pu'ne' tx'otx' kyxolju' tnej tyajajil Israel, ikxkye kxe'l kytx'otx'.²³Kxe'l kytx'otx'ju' najchaq xjal toj kytx'otx'ju' tnej tyajajil Israel janche anq'ina'. Ayine' Dyos Manb'aj, manchaq'e'. Kub' pa'yetju' tx'otx' kyxol tnej kyyajajil

¹A kyb'i tnej kyyajajil ja'lu.
Ttzajx twitz nqach toj tb'a'nq'ob'kya'j, ntzajx ttzi ninnjab' Mediteraney in nik' Etlon, ttzi Amat ex Asar-enan, toj tnayajkya'j kye tx'otx' Damask ex Amat, teyile junjun tnej kyyajajil ktk'ma' jun tnej tx'otx' tzajx ttzi nqach toj tjawetzq'ij tu'n tpon toj tkub'exq'ij, a nuk'b'ente ja'lu:DanAserNeptaliManasesEprayinRub'enJuda

⁸Yajxi'tzuntl tzul toju' tx'otx' ati tu'n tkyaj kpa'n, ex ntzajx toj tjawetzq'ij tu'n tpon toj tkub'exq'ij. Kab'lajoj tk'i' nik'jan (12.5 Km.) kyilometr twitz, atzu'n tnuqub' kyinx echb'inteju' kse'n echb'inte junjuntl tx'otx' tzajx tjawetzq'ij tu'n tpon tkub'exq'ij. Tojtzu'n tx'otx' lu ktenb'ela' ja te k'u'lb'il. Aju' tx'otx' xjansa'n te Qman Dyos (Ez 45.1-6)

⁹Aju' tnej tx'otx' xjansa'n te Dyos toju' tx'otx' lu, te kab'lajoj tk'i' nik'jan (12.5 Km.) kyilometr tnuqub' atzun lajoj twitz.¹⁰Tojtzu'n tx'otx' lu ati jun tx'otx' xjansa'n noqxkyeku' pale; kab'lajoj tk'i' nik'jan (12.50) kyilometr tnuqub' toj tb'a'nq'ob'kya'j ex toj tnayajkya'j, atzun jwe' kyilometr twitz toj tjawetzq'ij ex tkub'exq'ij. Toj nky'ajchaqju' tx'otx' lu ktenb'ela' ja te k'u'lb'il.¹¹Kjel kletju' tx'otx' lu kye pale tyajajil Sadok, xjansa'nkyib' weye' ayine' Dyos Manb'aj, nche ajb'en toju' ajb'eb'l weye' ex min ẍe'xlpe kyi'ju' txqantl aj Israel tej tel kypa'n kyib' ti'ju' nb'eye', kse'n kyb'incha aj Leb'i.¹²Qu'mtzun ktenb'el jun kytx'otx'ju' pale xjansa'nxi'x tk'etz kytx'otx' aj Leb'i toju' tnej tx'otx' xjansa'n weye' ayine' Dyos Manb'aj.¹³Tk'etzxtzu'n kytx'otx' pale ktenb'ela' kytx'otx' aj Leb'i, te kab'lajoj tk'i' nik'jan (12.50) kyilometr tnuqub', atzun jwe' twitz. Kab'lajoj tk'i' nik'jan (12.50) kyilometr tnuqub' ex lajoj twitzju' tx'otx' tu'n tkyaqil ktenb'el xjansa'n weye' ayine' Dyos Manb'aj.¹⁴A tb'anilxi'x tnej tx'otx' ja'lu toj tkyaqilju' tx'otx'. Mixti' tu'n tk'ayet jun piẍ ti'ju' tx'otx' lu mo tu'n tch'exb'et mo tu'n txi' te juntl xjal, qu'n xjansa'n weye'.

¹⁵Atzu'n jni'tl tx'otx' nkyajten, te kab'lajoj tk'i' nik'jan (12.50) kyilometr tnuqub' ex kab'e' tk'i' nik'jan kyilometr twitz, mya xjansa'n. Atzuntzu' b'a'n kynajana' xjal ex atzu' ta' kywab'l wakx. Ex toj nky'ajchaq ktenb'ela' nintnam,¹⁶kb'el toj jun tnej tx'otx' te kyaje' ttx'u'k junelni, te jok'al kab'lajnaq lajoj (2,250) metr twitz junjun plaj.¹⁷Ti'jeletzu'n nintnam ktenb'ela' kywab'l alu'mj toj kykyajel plaj, te qaqnaq jwe' (125) metr twitz junjun plaj.¹⁸Kjelten jun tx'otx' tojile junjun plaj teju' nintnam tk'etzju' tnej tx'otx' xjansa'n weye' ayine' Dyos Manb'aj, jwe' kyilometr tnuqub' toj tjawetzq'ij ex jni'tl tkub'exq'ij. Kb'el aq'unetju' tx'otx' lu, atzu'n tawal kjawil k'ajb'el te kywa xjal nche aq'unan toju' nintnam.¹⁹Alkyexku' tnej tyajajil Israel nche aq'unan toju' nintnam, kb'el kyaq'una'n tx'otx' lu.²⁰Tkyaqilju' tx'otx' klo'n, aju' tnej xjansa'n weye' ayine' Dyos Manb'aj, tk'i'xi' te nintnam, junx te kyaje' ttx'u'k junelni te kab'lajoj tk'i' nik'jan (12.50) kyilometr twitz junjun plaj. Ttx'otx'ju' nkawin (Ez 45.7-8)

²¹Teju' nkawin kxe'la' tx'otx' xkyaj t-xontib' kyxolju' kytx'otx' Juda tuk'i'l B'enjamin; aye' tx'otx' ate' junjun plaj teju' tnej tx'otx' pa'n weye' ayine' Dyos Manb'aj exju' tx'otx' te nintnam. Kab'lajoj tk'i' nik'jan (12.50) kyilometr twitz, kpomelx toju' nqach tjawetzq'ij, ex kpomelx tkub'exq'ij toj ninnjab'. Kjeltenju' tnej tx'otx' klo'n weye' toj nky'ajchaq ayine' Dyos Manb'aj, tuk'i'l ja te k'u'lb'il, tk'i'xi' kytx'otx' aj Leb'i ex te nintnam. Kytx'otx' txqantl tnej tyajajil Israel

²³Majx xini kytx'otx' txqantl tnej tyajajil Israel tu'me'l tnayajkya'j. Teyile junjun tnej kyyajajil ktk'ma' jun tnej ttx'otx' tzajx toju' nqach tjawetzq'ij pomnix toj tkub'exq'ij, a nuk'b'ente ja'lu:B'enjaminSimeonIsakarSab'ulonKad

²⁸Aju' nqach tuk'i'l tx'otx' Kad te tnayajkya'j, ktzajelx Tamar, tu'n tik' ja ta'qe' t-xiklil a' Merib'a-kades ex jata' a' te Ejipt, tu'n tpon tzmax toj ninnjab' Mediteraney.

²⁹Atzun tx'otx'ju' kyk'ma' tnej tyajajil Israel te kyetzb'il, ex ikytu'me'lju' tu'n txi' kypa'ne'. Ayine' Dyos Manb'aj nchin q'mante. Aye' tjpel Jerusalen

³⁰Kjpetel ti'ju' nintnam tu'n jun nintapi, te jo'k'al kab'lajnaq lajoj (2,250) metr tnuqub' junjun plaj te kykyajil plaj. Ktenb'el oxe' tjpel junjun plaju' nintapi, teyile junjun ati toklen tuk'i'l junjun tnej tyajajil Israel, ex a ttxolil ja'lu: Aye' tjpel toj tb'a'nq'ob'kya'j: kye Rub'en, Juda ex Leb'i; aye'tzu'n toj tjawetzq'ij: kye Jse, B'enjamin ex Dan; aye'tzu'n toj qnayaj kya'j: kye Simeon, Isakar ex Sab'ulon; aye'tzu'n toj tkub'exq'ij: kye Kad, Aser ex Neptali.³⁵Junmutx' kab'k'al lajnaq (9,000) metr tqanju' nintapi tu'n tkyaqil, ex a tb'i nintnamju' k'okyel yajxi'tl: Atite Qman Dyos tzalu.

Bible Society in Guatemala

https://app.library.bible/content/aea9d9099feb3a24