Read Efesios 1

Efesios1

¹Ayine' Pawl ati woklene' tu'n Jesukrist naqx tu'n t-xtalb'il Dyos, inxi' ntz'ib'a'ne' u'j lu kyeye' ayeqeye' sk'o'nqeye' tu'n Dyos ex okslalqeye' te Jesukrist najlqe'ye' toj nintnam Epeso.²Awt Qman Dyos ex Qajaw Jesukrist tzaj q'onte txqan t-xtalb'il kyib'aje' ex nak'b'il. Ntzaj tq'o'n Dyos xtalb'il qe naq tu'nel Jesukrist

³Nimanxwit tb'i Dyos aju' Tman Qajaw Jesukrist tu'nju' txqan ky'i'wb'il saj tiq'in Jesukrist toj kya'j qe.⁴O'jaw t-sk'o'n Dyos tu'nel Jesukrist na'mtoqpe' tb'ent twitz tx'otx', tu'ntzun qten mixti' qil twitz Dyos naqx tu'n tk'u'jlalil.⁵Naq tu'n tk'u'jlalil Dyos nimxi'x, maqo' oktq'o'n te tk'wal naqx tu'nel Jesukrist, kub' t-xima'n ikju' qu'n ik tajb'ilju' ex b'a'n ela' toj twitz.⁶Matb'incha ja'lu tu'ntzun kukx txi' qq'o'n chjonte te tu'nju' xtalb'il tb'anilxi'x xtb'incha qe, ma'tzun qokub' tk'i'wla'n naqx tu'nel Qajaw Jesukrist.⁷Naq tu'n tkamikju' Krist twitz krus ex tu'nju' tchk'el kub' qojl xqo' kleta' tjaq' il tu'n Dyos. Qu'n ate Dyos tu'nju' tk'u'jlalil nimxi'x qi'j matzaj tq'o'nju' qnab'l exju' ojtzqib'l tu'ntzun telqnik' ti'j tkyaqil.⁹Ex matzaj tyek'u'nju' tb'is tk'u'j qe aj e'wantoq tu'n nejtl. Qu'n ate ma'toq kub' t-xima'n tu'n tb'inchante ja'lu naqx tu'nel Jesukrist,¹⁰ex tb'incha tu'n tjapunju' oje ttziya, ex che okyel tmujb'a'n tkyaqilju' ti'xti' toj kya'j kyuk'ilju' ti'xti' te twitz tx'otx' tjaq' tkawb'il Jesukrist.

¹¹Naqx tu'nel Qajaw Jesukrist o'jaw t-sk'o'n Dyos atxi'x txetnejel ex ktzajel q'o'n qetzb'il, kse'nxju' tb'is tk'u'j, qu'n ate nb'inchante tkyaqil kse'nxju' tajb'il.¹²Atoqtzunte Dyos tajb'il tu'n tokqe qk'u'j ti'j Krist tnejelxi'x ayoqo' aj Juda, tu'ntzun qajwalinte tb'i te qkyaqilx.¹³Naq tu'n t-xtalb'il Qajaw Jesukrist, ikxkye' matxi' kyb'iye' tyol axxi'x, exju' tpakb'al b'a'n te kolb'il, ex mache okslane' te, matz'ok kyechile' tu'n Xewb'aj Xjan ttziyan Dyos.¹⁴Matzaj q'o'n Xewb'aj Xjan qe tu'n tqexi'x qk'u'j ti'ju' qetzb'il tzultq'o'n Dyos. Ajtzun tjapun tq'ijlalil tu'n qtzaqpet ex ajqok te ttanam, Qkyaqilxtzuntz qo' ajwalil tb'i Dyos nimaqtipumal. Kub'san Pawl twitz Dyos tu'n ttzaj q'o'n knab'lju' okslal

¹⁵Tu'nju' matxi' wile' qa ati kyokslab'le' ti'j Qajaw Jesukrist ex nkk'u'jlan kyib'e' kxolilexe',¹⁶qu'mtzun nchin nq'on chjonteye' kukxju' te Dyos kyi'je', ex kukx nche tzaj nna'ne' toj nna'j Dyose'.¹⁷Inchin kub'sane' te Dyos Tman Qajaw Jesukrist, aju' Manb'aj nimxi'x tajwalil, tu'n ttzaj tq'o'nju' Xewb'aj Xjan kyeye' tu'ntzun tten knab'le' ex tu'n telkynik'e te Dyos axxi'x.¹⁸Inxi' nqanine' te Dyos tu'n tjqonteju' knab'le', tu'ntzun telkynik'e ti'j titi'ju' ktzajel q'o'n kyeye' toj kya'j, tu'nju' mache txokliye' tu'n ex tu'n telkynik'e' ti'j qa aju' etzb'il ktzajel tq'o'n Dyos kyeju' ttanam tb'anilxi'x,¹⁹ex tu'n telkynik'e' ti'j qa aju' tipumal Dyos nimxi'x ex mixti'x b'ajsb'il te, ex lu ati quk'i'l. Aju' ipumalj lu axju' tyek'u Dyos ojtxi'²⁰tej tjaw anq'in Jesukrist tu'n kxol kyimni ojtxi' ex ma'tzun kub' tq'uqb'an Jesukrist toj tb'a'nq'ob' toj kya'j,²¹ex matxi' tq'o'n ipumalj te, ex toklen tu'n tkawin kyib'aj kkyaqilju' nche kawin ex kyib'aj kkyaqil ti'xti' toju' tq'ijlalil ja'lo ex tjax chix.²²Matxi' kub' tq'onte Dyos tkyaqilju' ti'xti' tjaq' tkawb'il Jesukrist, ex matxi' q'o'n toklen tu'n tok nejenel kye kkyaqil okslal.²³Qu'n kkyaqilju' okslal mache ok te t-xmilal Qajaw Jesukrist, qu'n tu'n Krist tz'aqlqeyaju' okslal ex kkyaqilju' ti'xti' toj kya'j ex twitz tx'otx' nojnqe' tu'n tchwinqlal Jesukrist. Maqo klet tu'n t-xtalb'il Dyos

¹Nejku' kkyaqile' kyimnqe'toqe' toj twitz Dyos tu'n tpaj kyile'.²Qu'n o'kxtoq nxi' kb'incha'njuye' taq'wix se'n nkb'incha'nju' xjal twitz tx'otx' ex atoq nkb'incha'njuye' tajb'il tajaw il, aju' nejenel kyeju' ati kyipumal twitz kya'j ex naq'unan toj kyanmi xjal tu'n lalun che niman te Dyos.³Ex ikxqe' ojtxi' maqo ten kxolju' xjal mixti' nche' b'in te Dyos ex atoq nxi' qb'inchanju' tajb'il qchib'jil ex tajb'il qnab'l. Tu'n tpajtzun tkyaqilju' qb'inchb'en myab'a'n, ilxi'xtoqti'j tu'n tkub' tz'eysa'n qwitz tu'n Dyos se'nqe' txqantl xjal.⁴Atzunte Dyos matzaj q'aq'an tk'u'j qi'j ex maqo tk'u'jla nimxi'x,⁵qu'n matzaj tq'o'n qchwinqlal junx tuk'i'l Qajaw Jesukrist tej kyimnqo'toq tu'n tpaj qil. Qu'mtzun noq tu'nju' t-xtalb'il Dyos saj q'onaju' kolb'ilkyeye'.⁶Ex maqo jaw anq'in tu'n junx tuk'i'l Qajaw Jesukrist, ex maqo kub' tq'uqb'an toj kya'j junx tuk'i'l Jesukrist.⁷Tb'incha Dyos ja'lu tu'n tyek'u'nte tjax chix qa nim t-xtalb'il qi'j exqa nq'aq'an tk'u'j qi'j noqx tu'ne'l Jesukrist.⁸Qu'n matxi' tzaj q'o'nju' kolb'ilkyeye' naq tu'n ẍe'okslane' te Krist ex naq tu'n matzaj q'aq'an tk'u'j Dyos kyi'je'. Mixti' ẍe klete kyu'nx kyib'e', qu'n ate Dyos saj q'onte jun oyaj kyeye'.⁹Minti' ẍe klete' tu'n jun kyaq'unb'ene' b'a'n, qu'mtzun mix-a'lo' junkye' tu'n tjaw tniman tib'.¹⁰Qu'n ate Dyos kub' b'inchanqe, ex tu'nju' okslalqo' te Jesukrist maqo' ok ak'a'j ch'isb'en tu'n Dyos, tu'ntzun qb'inchanteju' b'a'n aq'untl se'nxju' nk'u'ntl ti'j tu'n Dyos atxi'x ojtxi'. Noq tu'nel Jesukrist xqb'inchaya qib' tuk'i'l Dyos

¹¹Ayeqeye' mya aj Judaqeye' ex nok kq'o'n kb'iye' Mixti' kyechile' ti'j kychib'jile' aye'tzunkye' aj Juda (aj nok kq'o'n kyechil xjal tu'n kq'ob' ex nok kyq'o'n kyib' atok kyechil ti'j kychib'jil),¹²kna'ntze' se'n ktene' ojtxi' tej mixti'toq Jesukrist kyuk'ile', pa'ntoq kyib'e' ti'ju' tnam Israel ex mixti'toq kyoklene' ti'ju' yol kyejni b'ent t'ij tu'n Dyos kyuk'i'l aj Juda. Mixti'toq Dyos toj kyanmiye' ex mixti'xtoq jun q'uqb'ab'l kk'u'je' twitz tx'otx'.¹³Ate' ojtxi' najchaqtoq tqe'ye' tk'etz Dyos, atzun ja'lo matxi' che ul lq'eye' tk'etz naqx tu'nju' tchk'el kub' qojl tej tkyim.

¹⁴Tu'nte Krist xb'enta qten tuk'i'l Dyos. Junx tnam ẍe oka xjal tu'n b'a'ntzunqa aj Juda mujqa mya aj Juda ex ate xkub' xitunteju' maqb'il te ik'jtib'il atitoq kxolju' xjal aj Juda kyuk'ilju' mya aj Juda.¹⁵Ate Qajaw Jesukrist sel q'inteju' ojtxi' kawb'il ex jate'ya' chaq'b'il ex nuk'b'il, tu'ntzun tten mujb'ab'ltib'il kxolju' kab'e' tnam ex tu'n kyok te ak'a'j.¹⁶Qu'n tu'nju' kyim Krist twitz krus xkub'a naju' q'oj kxolju' kab'e' tnam lu, ex kkab'il mab'ent kten tuk'i'l Dyos ex mache ok te junx tnam.

¹⁷Ul te Qajaw Jesukrist q'olte tpakb'al b'a'n kye kkyaqil xjal, kyeye' najchaqtoq tqe'ye' tk'etz Dyos ex kyeju' nqaku' tqe' tk'etz Dyos.¹⁸Qu'n naqx tu'nel Qajaw Jesukrist saja' q'o'n qoklen tu'n qpon lq'e aj Judaqo' mujqa mya, qu'n axte Xewb'aj Xjanju' npon q'inqe twitz.¹⁹Qu'mtzun, ayekye' mya najchaq xjalqetle' ex mya ajb'etun xjal qe'ye', ja'lo matxi' che okye' tuk'i'l ttanam Dyos ex ikx kyoklenju'ye' se'n txqantl okslal.²⁰Ikqejuye' kse'n jun ja jawni b'incha'n tib'aju' jun tq'uqb'il kub' kyq'o'n apostl exqe' t-sanejlal Dyos, atzunju' ab'j te tq'uqlil ja a Jesukrist.²¹Tib'ajtzu'n tq'uqlil lu ljo'n tjawa' b'incha'nju' ja tzyu'mile' tib', ljo'n tch'iy tu'n tok te tja Dyos Xjan.²²Ex tib'ajtzun tq'uqlil ja lu matxi' tz'oka kmujb'ana kyib'e' kkyaqile' tu'ntzun kyokye' te tja Dyos aj ati Xewb'aj Xjan toj. Aju' taq'un Pawl kxolju' okslal mya aj Juda.

¹Ayine' Pawl, jpu'nqine' naqx tu'n tpaj okslalqine' te Qajaw Jesukrist ex tu'n tpaj nchin ajb'ene' kxole' ayeye' mya aj Judaqeye'.²B'i'ntlnakye' kyu'n qa ate Dyos saj chq'onweye' q'malteju' t-xim kyeye' naqx tu'nju' t-xtalb'il.³Ate Dyos saj yek'unteju' t-xim e'wantoq weye', iku' se'nxju' xintz'ib'a'ne' kyeye'.⁴Ajtzun tjaw kẍch'ine' u'j lu xintz'ib'a'ne' kyeye' atzuntzu' k'elela' knik'e ti'j qa oje tz'el nnik'e ti'ju' tyol Dyos e'wantoq,⁵aj min tzaj yek'u'n tnejel kye ojtxi' xjal, atzu'n ja'lo naq tu'nelju' Xewb'aj Xjan saj tyek'u'n Dyos kyeju' ati kyoklen ex xjansa'nkyib' exqe' t-sanjelal Dyos.⁶Atzunju' yol lu e'wantoq aja'lu: Naqx tu'nel Qajaw Jesukrist kkyaqilju' xjal mya aj Judaqe' b'a'n tu'n kmk'onteju' kolb'il ex tkyaqilju' kyejni ttziya'n Dyos kyeju' aj Israel ex tu'n kyok te naqjunx tnam kyuk'i'l.⁷Ayintzunwe' matzaj tq'o'n Dyos woklene' tu'n npakb'anteye' tpakb'al b'a'n naqx tu'n t-xtalb'il Dyos ex tu'n matzaj laqj tk'u'j wi'je', ex matxi' tzaj tyek'u'nju' tipumal weye'.

⁸Awe' ch'i'nxi'xwe' woklen kyekwitz txqantl okslal, atzunte Dyos saj q'onte t-xtalb'il weye' tu'n txi' npakb'ane' tpkab'al b'a'n kyeju' txqantl xjal mya aj Judaqe'.⁹Ex matzaj tq'o'n Dyos woklene' tu'n txi' nchikb'a'ne' kye kkyaqil xjal se'n tu'me'l kjapumela' tu'n Dyos aju' yol e'wantoq tu'n atxi'x ttzajlen qe twitz tx'otx'.¹⁰Tb'incha Dyos ikju' tu'ntzun naq kyu'nelju' okslal, k'elela' knik'ju' ati kyoklen exqe'ju' nche' kawin toj kya'j qa chukchaq ttenju' tnab'l Dyos.¹¹Tb'incha Dyos ja'lu se'nxju' t-xim atxi'x ttzajlen qe ojtxi', ex mab'ent naq tu'nel Qajaw Jesukrist.¹²Ex naq tu'nel Qajaw Jesukrist atiju' tzaqpib'l qe, ex naq tu'nju' ti'j qo pomila' lq'e tk'etz Dyos tuk'i'l tkyaqil q'uqb'ab'l k'u'jb'aj.¹³Qu'mtzun nchin kub'sane' kwitze' tu'n lalun che kub' numje' tu'nju' nchin yajlanjtze' tu'n kpaje', qu'n ate' lu k'okyel te jun tzalajb'il kyeye' yajxi'tl. Aju' tk'u'jlalil Jesukrist

¹⁴Tu'ntzun ja'lu, chin kb'el mejeya'ye' twitzju' Manb'aj te Qajaw Jesukrist,¹⁵aj b'inchalte tkyaqilju' ati toj kya'j ex twitz tx'otx'.¹⁶Inchin kub'sane' twitz Qman Dyos tu'n ttzaj tq'o'n xtalb'il kyeye', ti'j tkyaqilju' tq'inumal ati toj kya'j ex tu'n tkuwsanjtzu' kyanmiye' tu'n ex tu'n ttzaj tq'o'n kyipumale' tu'nju' T-xew.¹⁷Ex ikx nxi' nkub'sane' twitz Dyos tu'n tnajan Qajaw Jesukrist toj kyanmiye' naq tu'nju' kyokslab'le' ex tu'n knajane' tib'aju' k'u'jlajiltib'il se'n jun tze lok'amnixi'x.¹⁸Ex tu'n tkane toj knab'le' kyuk'i'l kkyaqil okslal, se'n ttenju' tk'ujlalil Krist, qu'n nimxi'x twitzju' tk'u'jlalil Jesukrist ex nimxi'x tnuqub'.¹⁹Qu'mtzun inchin kub'sane' twitz Dyos tu'n tkanexi'x toj kwitze' aju' tk'u'jlalil Krist, qu'n aju' tk'u'jlalil nimxi'xte tu'n tkane' toj qnab'l, tu'ntzun kmk'onteye' kkyaqilju' t-xtalb'il Dyos aj kxe'l tq'o'n kyeye'.

²⁰Ati te Dyos tipumal tu'n tb'inchante tkyaqil ex intzaj tq'o'n qe nimxi'xtl kyetwitzju' nxi' qqani'n te mujqa nkub' qxima'n, tu'nju' tipumal naq'unan toj qanmi.²¹¡Nimanjtzxwit tb'i Dyos kyu'n kykyaqil okslal naq tu'n Jesukrist toj tkyaqil tab'q'iyil ex kuxju'! Ikxwitju'. Junqo' naqx tu'nju' Xewb'aj Xjan

¹Qu'mtzun ayine' jpunqine' tu'n tpaj okslalqine' te Qajaw Jesukrist, nchin kub'san kyeye' tu'n kyanq'ine' tojxi'x tu'me'l tu'nju' matxi' che txkonjtze' tu'n Dyos.²Che okxe' me's ex b'a'n xjal; tenx kpasensiye' ex tzik'xkyu'ne' kxolilexe' ex kk'u'jlam kyib'e' teyile junjun.³Kq'onk tilile' tu'n ktene' junx kyuk'i'l txqantl okslal ex tu'n ktene' toj nak'b'il.⁴Qu'n naq junxte' qxmilal okslalqo', ex naq junxju' Xewb'aj Xjan, ex naq junju' q'uqb'ab'l qk'u'j te kolb'il ktzajel tq'o'n Dyos qe tu'n xqo ttxok.⁵Qu'n naq junte Qajaw, naq junju' okslab'l ex naq junju' jawsb'il a';⁶Ex naq junte Dyos Manb'aj qe qkyaqil, ate Dyos nkawin tib'aj tkyaqil, ate in naq'unan qxol qkyaqil ex ati toj qanmi te qkyaqil.

⁷Extzun teyile junjunqe matxi' tzaj q'o'nju' jun qoklen tu'n Qajaw Jesukrist se'nxju' tajb'il.⁸Qu'n iku' tz'ib'a'n toj Tu'jil tyol Dyos kjalu: Tej tjawx toj kya'j eb'ajx tiq'i'n txqan xjal jpu'nqetoq tuk'i'l, ex xitq'on kyoklen teyile junjun, chiju' tz'ib'a'n.

⁹¿Titi'tzun tz'elpuna'ju' yol lu tej tjawx toj kya'j? Atzun tz'elpuna'ju' tu'nju' ku'x tzmax tjaq'xi' tx'otx'.¹⁰Atzunju' ku'x tzmax tjaq'xi' tx'otx', atzunte ma jawxju' tzmax tib'ajxi' kya'j, tu'ntzun tnoju' toj kya'j ex twitz tx'otx' tu'n.¹¹Qu'n ate Krist ok q'onte kyoklen junjun okslal, tu'n kyok junjun te ati kyoklen, junjuntl te t-sanjelal Dyos, aye'tzun junjuntl tu'n kyok te pakb'al ti'ju' tpakb'al b'a'n ex aye'tzun junjuntl tu'n kyok te k'ik'lel ex xnaq'tzal.¹²Xitq'on Dyos kyoklen kkyaqil ja'lu, tu'ntzun kxnaq'tzan kye kkyaqil okslal ex tu'n kyajb'en toj taq'un Dyos ex tu'n tch'iyju' t-xmilal Krist kyu'n¹³tzmaxi'x aj qmuje' junx toj qokslab'l ex tu'n qojtzqintexi'xju' Tk'wal Dyos, ex tu'n tkanexi'x toj qnab'l se'nte Qajaw Jesukrist tz'aqlixi'x tnab'l.¹⁴Ex lay qo oktl se'n jun k'wal in meltz'aj tnab'l ex nxi' iqi'n tu'nju' xnaq'tzb'il inkq'o'n xjal nakuj kyq'iq', qu'n nche sb'un ex nkma'n yol xmletz' tu'n ktzpet xjal kyu'n.¹⁵Ape' qb'inchamju' qo lpek ti'ju' yol axxi'x, tenx qk'u'jlalil tu'ntzun qch'iy ex tu'n qok iku' se'nte Krist, aj qnejenel ex iku' se'n qwi' te qxmilal.¹⁶Atzunqe okslalqo t-xmilal Kristqo', ex aju' t-xmilal Krist tzyu'mile tib' ex nk'umile tib', extzunqa nche aq'unanju' tmuj qxmilal b'a'n xi'tzun qch'iytzuntzu' ayoqo' okslalqo' naq tu'nju' tk'u'jlalil. Aju' ak'a'j qchwinqlal tuk'i'l Krist

¹⁷Atzun ja'lo kxe'l nqanine' kyeye' ex kxe'l wab'tzine' kyeye' toj tb'i Qajaw: tu'n lalun che anq'intle' se'nqeju' xjal minti' nche okslan te Dyos, qu'n ayeju' xjal lu nche anq'in se'nxju' kyajb'il ex kxim mixti'x kyoklen¹⁸ex matxi' kub' qloljixju' toj knab'l. Alkye xjal lu mixti' kyoklen ti'ju' chwinqlal tzultq'o'n Dyos, qu'n makub' kych'uẍsa'n kyanmi ex mixti' selkynik' ti'j Dyos.¹⁹Matxi' kub' kych'uẍsa'n kyanmi ex matxi' kq'on kyib' toj taq'wixil ex mixti'x nkub' kjk'u'n kyib' ti'ju' b'inchaj taq'wixil.²⁰Aye'tzunkye' mixti' selkye' knik' ti'j Qajaw Jesukrist tu'n kyanq'ine' ikju',²¹qu'n axxi'x ma kb'ijuye' tyol ex mache xnaq'tzanjtze' tu'n ti'ju' tyol tu'ntzun kyanq'ine' se'nxju' tajb'il.²²Qu'mtzun lalun che anq'intle' se'nqeju' xjal lu, ex lalun che anq'intle' se'nxju' nejtl, qu'n aju' il nxi' kb'incha'ne' majx taq'wixix toj twitz Dyos.²³Lalun che ximantle' se'nxju' tnejel, kych'exb'em tu'me'l kychwinqlale',²⁴ex kyoksankye' kychwinqlale' ak'a'j oje tzaj q'o'n tu'n Dyos nakuj jun ch'ix kyi'je' tu'ntzun kyek'unteye' kychwinqlale' tzininxi'x ti'j, tzajni qe tib'aju' axxi'x.

²⁵Qu'mtzun lalun che chantl yole', che yolinqeye' ti'ju' axx kyuk'ilju' kwnaqile', qu'n qkyaqil tmoj t-xmilal Kristqo'.

²⁶Qama che jaw tx'u'jine', lalun che b'inchan ile' tu'n tpaj, ex lalun b'aj q'ij kyu'ne' nche tx'u'jine'.²⁷Lalun txi' kq'o'ne' anb'il teju' tajaw il.

²⁸Alkyetoq nelq'an lalun tz'elq'antl, q'onk tilil tu'n taq'unan tu'ntzun tb'inchante jun b'a'n aq'untl tu'n tq'ob' tu'n tajb'en kyeju' ati nojqelan toj kychwinqlal.

²⁹Lalun che q'man xlab'yole', naq o'kx kmanxjuye' b'a'n yol tu'ntzun tonin kyi'ju' txqantl aye'j nche'x b'inte kyole'.³⁰Lalun tz'ok kq'o'ne' tb'isju' Xewb'aj Xjan, qu'n anate Xewb'aj Xjan sok q'onte kyechile' tu'ntzun telkynik'tzile' qa te Dyosqeye' ajtpon kanunju' q'ij te kolb'il.

³¹Kpa'mil kyib'e' kyi'ju' tk'ayil, kyi'ju' achb'il, kyi'ju' qtx'u'jil, kyi'ju' i'li'n ex kyi'j kkyaqil taq'wixil.³²Che okxe' b'a'n xjal ex tzaj laqjx kk'u'je' kyi'je' kxolilexe', ex knajsankuye' kyile' kxolilexe' iku' se'nte Dyos makub' tnajsa'n kyile' tu'nel Qajaw Jesukrist.

¹Che okxe' se'nte Dyos qu'n k'walb'ajqena'ye' tu'n ex inxi'x che k'u'jlanjtze' tu'n.²Che b'et-xe' toj tk'u'jlalil iku' se'nte Krist ma'xi'x qotk'u'jla ex taq'tib' tu'n tkyim te qxel nakuj jun oyaj ex chojb'il tb'anilxi'x twitz Dyos.

³Ayekye' ja'lo matxi' che okye' kmuju' ttanam Dyos xjan: qu'mtzun mixti' tu'n kyolintle' ti'ju' ajpaji'n ex ti'j alchaqxkyeku' tz'ilil ex jamjo'ni'n.⁴Lalun che yolin xlab'yole' ex yol mixti'x tnab'l ex yaq taq'wixi'x; qu'n myab'a'nju' yol lu, o'kxkye' kb'incham aju' tu'n kyajwalin tb'i Dyose'.⁵Qu'n b'intlkye' kyu'n qa aye' xjal nche b'inchan ajpajil, mujqa nxi' kb'incha'n ti'xti' tz'il ex mujqa nche jamjonin, mixti'x kyoklen ti'ju' tkawb'il Qajaw Jesukrist ex te Dyos.

⁶Lalun kyaje' tu'n kkub' sb'une' kyu'nju' yol mixti'x kyajb'en, qu'n tu'n kpaju' yol lu ntzaja ttx'u'jil Dyos kyi'ju' xjal mixti' nche okslan te.⁷Qu'mtzun lalun che ele' junx kyu'k'i'l.⁸Ayekye' najlqetoqe' toj qlolj nejku', atzun ja'lo tu'nju' okslalqeye' te Qajaw Jesukrist, matxi' che pon kanune' toj spik'un. Qu'mtzun che b'ete' toju' tb'eyil spik'un,⁹qu'n aju' spik'un ntb'incha'n tu'n qok b'a'n, tzinun qi'j ex nqo'x tiq'in toju' axxi'x.¹⁰Kq'onk tilile' b'a'nxi'x tu'n telkynik'e ti'j alkyeju' b'a'n toj twitz Qajaw.¹¹Lalun che ele' junx kyuk'ilju' nche b'inchan ti'xti' mixti'x kyajb'en ex tqe' toj qlolj; akye' kb'incham tu'n kxi' kmyo'ne' ti'ju' myab'a'n.¹²Qu'n majx ch'ixb'ajilx tu'n qyolin ti'ju' nkb'incha'n toj ewaj;¹³naqatzun xpon kanunju' spik'un majx nq'ancha'lixju' kb'inchb'aj lu,¹⁴qu'n tkyaqilju' ti'xti' nq'ancha'lix naqa xpon kanunju' spik'un. Qu'mtzun in tma'na' toj Tu'jil kjalu: Na'ntztib'a aya in wtana; we'ktza kxolju' kyimni, qu'n ate Krist kq'olteju' spik'un toj tchwinqlala.

¹⁵Qu'mtzun kykayinxjuye' tu'me'l kychwinqlale', lalun che okye' mixti' knab'le', naq o'kx tenx knab'le'.¹⁶Tz'ok tilil kyu'ne' toju' tq'ijlalil lu, qu'n myab'a'n qe'ju' q'ij che ul.¹⁷Lalun che okye' mixti' knab'le', naq o'kx kq'onk tilile' tu'n kb'inchanteye tajb'il Qajaw Jesukrist.¹⁸Lalun che tx'ujtiye', qu'n mixti'tl nb'ent kjk'unte kyib'e' ti'j; ape' kb'inchamjuye', kjqonxjuye' kyanmiye' teju' Xewb'aj Xjan tu'n knoje' tu'n.¹⁹Che yolinqeye' kyi'j b'itz ex che kb'itzinxe' xjan b'itz, ex che ajwaline' tb'i Qajaw tu'n tkyaqil kyanmiye'.²⁰Kq'onx chjonteye' te Dyos Manb'aj ti'j tkyaqilju' ti'xti', toj tb'i Qajaw Jesukrist. Se'n tten tu'n kyanq'in okslal toj kja

²¹Kyb'imkyib'e' kxolilexe', tu'nju' ati tchiylal Dyos kyeye'.

²²Aye'ye' qya che b'inqeye' te kychmile' iku' se'n nche b'ine' te Qajaw Jesukrist.²³Qu'n ate chmilb'aj wi'yj teju' t-xu'jil, iku' se'nte Krist a wi'yj kyeju' okslal tqe'k te t-xmilal; ex ax Qajaw kklolkye.²⁴Iku' se'nkye okslal nche b'in te Krist, ex ikxtzunkye qyaju' ati tu'n kyb'inte kychmil.

²⁵Aye'ye' chmilb'aj, kk'ujlame' kxu'jile', iku' se'nte Krist nche' tk'u'jlan kkyaqil okslal ex mataq' tib' tu'n tkyim naqx tu'n kklet.²⁶Ma'tzun tb'incha tkyaqil ja'lu tu'n kyokju' okslal ẍnu'l twitz ex mache txjet tu'n naqx tu'nelju' tyol ex jawsaj a'.²⁷Tu'ntzun kpon tyek'u'n okslal twitz tb'anilqexi'x, mixti'ku' ch'i'n ktz'ilil ex kqu'chil, ex mixti'ku' juntl ti'xti' myab'a'n kyi'j, naq o'kx tu'n kyok xjan ex tzinun kychwinqlal.²⁸Ikxqetzunju' chmilb'aj ati tu'n kk'u'jlante kxu'jil se'nxju' in kk'u'jla'n kxmilal. Alkyete in tk'ujla'n t-xu'jil, in tk'ujla'n tib' tib'xtib'.²⁹Qu'n mix-a'lox jun xjal inwit tx'a'lti'j tk'u'j ti'ju' t-xmilal, ape' ntb'incha'nju' nokten k'achalte ex in t-xq'uqi'n, iku' se'n ntb'incha'n Krist kyi'j tkyaqil okslal,³⁰qu'n ayena' okslal t-xmilal Qajaw. Ex ayo'tzunqe' tmoj t-xmilal Qajaw Jesukrist.³¹Qu'mtzun kjel tq'o'n ichan tman ex ttxu tu'n tmje tuk'ilju' t-xu'jil, ajtzun kmje che okyel kkab'il naq jun wnaqqe'.³²Aju' ntb'incha'n Dyos lu nimaq toklen ex layx tz'el qnik' ti'j. Intzun najb'en yol lu wu'ne' qu'n atzu' nyolina' ti'j Krist exqe'ju' okslal.³³Iktzun tu'me'lju', teyile junjun k'u'jlam t-xu'jil iku' se'n ntk'u'jlan tib' tib'xtib', ex ikxju' xujilb'aj ati tu'n tokslan teju' tchmil.

¹Aye'ye' k'walb'aj, che okslanqeye' te kmane' iku' se'n ntma'n Qajaw, qu'n tu'me'lxi'x ja'lu.²Aju' tnejel chaq'b'il ati tu'me'l t-xel tu'n Dyos qama japun aja'lu: Nimana te tmana ex te ttxuya,³tu'ntzun ttena toj b'anil ex tu'n tanq'ina b'a'npun q'ij twitzju' tx'otx'.

⁴Aye'tzunkye' manb'aj, lalun nok kq'o'ne' ktx'ujilju' kk'wale', ape' kb'inchamjuye' kmanxe' knab'l ex che ktzak'ume' se'nxju' tajb'il Qajaw Jesukrist.

⁵Aye'ye' lq'o'n majen, che okslanqeye' kyeju' tajaw aq'untl twitzju' tx'otx'. Tenx tchiylalju' tajaw aq'untl kyeye' ex che ajb'ene' kye tuk'i'l tkyaqil kyanmiye', iku' se'n nche ajb'ene' te Qajaw Jesukrist.⁶Che aq'unanqeye' kukx mya o'kx se'n nche ka'yin kyeye' tu'n kkyeje' b'a'n kyuk'i'l, che aq'unanqekye' iku' se'n tmajen Kristqeye' ex kb'inchamjuye' tajb'il Dyos tu'n tkyaqil kyanmiye'.⁷Kyb'inchanxe' aq'untl b'a'nxi'x, che aq'unanqeye' nakuxwitloj nche aq'unane' te Qajaw Jesukrist mya kye xjal.⁸Qu'n b'intlkye' kyu'n qa teyile junjun ntb'incha'n b'a'n, tzul q'o'n tu'me'l t-xel te tu'n Qajaw b'a'ntzunlo qa majen mujqa tzaqpi'n.

⁹Ex ikx ayeye' tajaw aq'untl, che okxe' b'a'n kyeju' kmajene' ex lalun txi' kma'n kyole' kye te xob'sb'il. Kyna'ku'ye' qa ate Dyos toj kya'j mixti' nche el tik'un xjal se'nqexku' ex ate kyajawju' majen ex tajaw aq'untl. Aju' qq'ojb'il ntzaj tq'o'n Dyos

¹⁰Atzun ja'lo witz'in ex ntzik kkuwsam kyib'e' tuk'i'l Qajaw tu'ntzun tten kyipumale' nimxi'x.¹¹Tz'ajb'enxju' kq'ojb'ile' tzajni tq'o'n Dyos te kolb'ilkyeye', tu'ntzun lalun che kub' sb'une' kyu'nju' t-sb'ub'l tajaw il.¹²Qu'n myatzu' nqo' q'ojina' kyuk'i'l xjal, anatzu' nqo q'ojinate' kyuk'ilju' nejenel mixti' q'ancha'lqe' ate' twitz kya'j, aye'j nche kawin kyib'aj kkyaqil xjal ex toj qxopin.¹³Qu'mtzun, tz'ajb'enxju' q'ojb'il saj tq'o'n Dyos kyeye', tu'ntzun lalun kub'kyi'je' toju' tq'ijlalil myab'a'n tzul, ex tkub'lenxi'tzun ti'j tkyaqil kyu'ne', che b'elwe'xi'xtle' toj kyokslab'le'.

¹⁴Qu'mtzun kwab'anku' kyib'e' ex kyoksankye' ax kyi'je' ex che okxe' tz'inun kyi'je'.¹⁵Kyb'inchanku' ktene' tu'n kxiye' q'malte tpakb'al b'a'n kyeju' xjal.¹⁶Ex kq'onkye' kyokslab'le' te kolb'ilkyeye' teju' tal t-smal tajaw il ntzaj t-xon kyi'je'.¹⁷Awtju' kolb'il tz'ajb'en kyu'ne' te kolb'ilte kwiye', ex awtju' tyol Dyos tz'ajb'en te kyk'uẍtx'e'nb'ile' ntzaj tq'o'n Xewb'aj Xjan.¹⁸Lalun che qjene' tu'n kyna'n Dyose': che kub'sane' ex kyqaninxe' te Dyos kuxju' kse'nxju' ntma'n Xewb'aj Xjan. Che kub'sane' twitz Dyos, lalun che kub' numje', ex che na'nqe' Dyose' kyi'j kykyaqilju' okslal sk'onqe' tu'n Dyos.¹⁹Ex ikx che na'nqe' Dyose' wi'je', tu'ntzun ttzaj tq'o'n Dyos tyol weye', tu'n lalun chin xob'e' ajnyoline' ti'ju' tyol aj e'wantoq ex tu'n txi' nchik'b'ane' tpakb'al b'a'n kye kkyaqil xjal.²⁰Machin tzajchq'o'ne' tu'n Dyos tu'n nyoline' te t-xel ex tu'n txi' npakb'ane' tpakb'al b'a'n te kolb'il, tu'n tpajtzun ja'lu jpunqinaye' ja'lo. Qu'mtzun che na'nqe Dyose' wi'je' tu'n nyoline' ti'j tyol Dyos ex tu'n lalun chin xob'e'. Eb'aj kyej q'olb'en tu'n Pawl tuk'i'l b'ajsb'il yol

²¹Kxe'ltzun q'ma'n kyeye' titi' nb'aj weye' ex se'n tqinaye' tuk'i'l Tikiko, qu'n ati kk'uje' ti'ju' qtzik lu ex in naq'unan b'a'nxi'x toj taq'un Qajaw Jesukrist.²²Qu'mtzun kxe'l nchq'o'ne' kyk'etze', tu'ntzun txi' tma'n kyeye' se'n to'qo'ye' tzalu ex tu'n tq'uqb'anjtz kk'u'je' tu'n.

²³Awttzun Qman Dyos ex Qajaw Jesukrist q'onte nak'b'il kxole' ex tk'u'jlalil, tu'ntzun ttenxi'x kyokslab'le';²⁴ex awt Qman Dyos k'iwlankye kkyaqilju' in kk'u'jla'n Qajaw Jesukrist tu'n tkyaqil kyanmi.

Bible Society in Guatemala

https://app.library.bible/content/aea9d9099feb3a24