Read Colosenses 1

Colosenses1

¹Ayine' Pawl ati woklene' tu'n Dyos naqx tu'nju' t-xtalb'il, junx tuk'ilju' qitz'in Timotey,²Inxi' qtz'ib'ane' u'j lu kyeye' ex nche'x qq'olb'ene' ayeye' najlqe'ye' toj tnam Kolasas, okslalqeye' te Qajaw Jesukrist ex wa'lqexi'xe' toj kyokslab'le'. Awt Qman Dyos k'iwlankyeye' tu'ntzun tokqexi'x kyk'u'je' ti'j. Kub'san Pawl twitz Qman Dyos kyi'j okslal

³Kukx aj qna'n Dyose' kyi'je' inxi' qq'o'n chjonteye' te Dyos aju' Tman Qajaw Jesukrist.⁴Qu'n matxi' qb'iye' qa ati kyokslab'le' ti'j Qajaw Jesukrist exqa nche' kk'u'jla'ne' kkyaqil okslal,⁵qu'n nche' ayone' ti'ju' ktzajel tq'o'n Dyos kyeye' aju' k'u'n toj kya'j. Ex atxi'x tej kb'inteye' tpakb'al b'a'n te kolb'il exju' yol axxi'x qu'mtzun nche ayona'ye' ti'j⁶ex tej tpon kanun kxole'. Atzunju' tpakb'al b'a'n lu matxi' kub' puqli toj tkyaqil twitz tx'otx' ex matxi' witzan b'a'nxi'x, iku' se'n b'aji kxole' tej kb'inteye' tpakb'al b'a'n ex tk'u'jlalil Dyos elkynik'e' ti'j qa axxi'xtoq.⁷Oje txi' xnaq'tzan ja'lu kyeye' tu'n qtzik Epapras tmajen Dyos junx quk'i'le', wa'lxi'x toj tokslab'l ex najb'en tu'n tkyaqil tk'u'j te Qajaw Jesukrist.⁸Atzunte saj q'inte tqanil qeye' ex matzaj tchik'b'a'n aju' kk'u'jlalile' ntzaj tq'o'n Xewb'aj Xjan.

⁹Qu'mtzun atxi'x tej qb'inteye' tqanil kyi'je', inqo na'n Dyose' kyi'je' kukxju' ex nxi' qqanine' te Dyos tu'n telkynik'e' ti'j tkyaqilju' tajb'il ex tu'n ttzaj tq'o'n Xewb'aj Xjan knab'le' tu'ntzun telxi'x knik'e' ti'j tkyaqil.¹⁰Tu'ntzun kyanq'ine' b'a'n kse'nx tajb'il Qajaw ex tu'n kb'inchanteye' tkyaqilju' b'a'n aq'untl toj twitz, tu'n kych'iye' toj kyokslab'le' ex tu'n telxi'x knik'e' ti'j Dyos.¹¹Ex nxi' qqanine' te Dyos tu'n ttzaj tq'o'nju' ipumalj tb'anilxi'x kyeye'; tu'n tik'xkyu'ne' toj tkyaqil, tu'n tten kpasensiye', ex tuk'i'l tkyaqil tzalajb'il¹²kxe'la kq'o'ne' chjonte te Dyos Manb'aj, qu'n ana' saj q'onte oklenj kyeye' tu'n kyk'monteye' etzb'il kyuk'ilju' okslal ate' toj spik'un.¹³Qu'n ate Dyos xklonqe toju' qlolj jatoq ta'qoya' ex matxi' qopon tiq'in toju' tkawb'il Tk'wal aju' k'u'jlanxi'x tu'n,¹⁴aj xklonqe ex xkub'najsante. Mab'ent qten tuk'i'l Dyos naq tu'nju' tkamik Krist

¹⁵Ate Krist tilb'ilal Dyos minti' q'ancha'l, ate Tk'wal Dyos ex naq junku', atitoqtl tej na'mxtoq tkub' b'incha'n twitz tx'otx'.¹⁶Ex naq tu'nel Krist tb'inchaya Dyos tkyaqilju' ati toj kya'j ex ati twitz tx'otx', tkyaqilju' q'ancha'l ex mixti' q'ancha'l, ex ikxqeju' nche kawin toj xewb'aj, nimaq kyoklen ex nimaq kyipumal. Tkyaqil ja'lu xkub' b'incha'n tu'nel Krist ex tu'n kyajb'en te.¹⁷Atitoqtlte' Krist tej na'mxtoq tb'ent twitz tx'otx' ex tu'nel b'enta' nk'unile tib' tkyaqil.¹⁸Expe' xiq'o'n toklen Krist tu'n Dyos tu'n tok te wi'yj kye kykyaqil okslal ju' t-xmilalqe'. Atitlte' Krist tej na'mxtoq tb'ent tkyaqil ex ate Krist nej jatz anq'in kxol kyimni, tu'ntzun tok nimxi'x toklen kyib'aj kkyaqil.¹⁹Qu'n b'a'n ela' toj twitz Dyos tu'n txi' tq'o'n tkyaqil ipumalj te Qajaw Jesukrist.²⁰Ex noq tu'nel Jesukrist ẍe' b'enta jumajtlu' intoq che' q'ojin ti'j Dyos, aye' ate' twitz tx'otx' exqe' ate' toj kya'j, ma'tzun b'ent kten tuk'i'l Dyos naq tu'nju' tchk'el Qajaw Jesukrist el qojl twitz krus.

²¹Aju' ojtxi' najchaq xjalqetoqe' ex ajq'ojqetoqe' ti'j Dyos toj kyanmiye', tu'n tpaju' myab'a'n intoq kb'incha'ne',²²atzun ja'lo matxi' b'ent ktene' tuk'i'l Dyos naqx tu'nel tkamik Jesukrist. Ma tb'inchate Jesukrist ja'lu tu'ntzun ktene' tk'etz, xjanqetle' ex mixti' kyile'.²³Atzun ja'lo kq'onk tilile' tu'n kwe'xixe' toj kyokslab'le', ex lalun tz'el kypa'n kyib'e' ti'ju' tpakb'al b'a'n matxi' kb'iye'. Aju' tpakb'al lu npakb'anjtz kye kkyaqil xjal toj tkyaqil twitz tx'otx', ex ayintzunwe' Pawl nchin nonine' tu'n tpakb'etju' tpakb'al b'a'n lu. Aju' taq'un Pawl kxol xjal

²⁴Ja'lo inchin tzalaje' tu'nju' nchin yajtiye' tu'n kpaje', qu'n nik'x wu'ne' toj nxmilale' tu'ntzun tjapun wu'ne' se'nte Krist ma'xi'x yajti tu'n kpaj okslal, aye'j t-xmilal.²⁵Matxi' chin oktq'o'ne' Dyos te ajb'el kyxol kykyaqil okslal, qu'n a waq'une' tzaj q'o'n tu'n wajb'ene' kyeye' ex tu'n tpakb'etju' tyol toj tkyaqil twitz tx'otx',²⁶aju' yol lu e'wantoq ojtxi' tu'n Qman Dyos, atzun ja'lo matzaj tyek'u'n Dyos kyeju' sk'o'nqe' tu'n.²⁷Makub' t-xima'n Dyos tu'n ttzaj tyek'u'n ja'lu kye okslal toj tkyaqil nimaqtnam, tu'n telkynik' ti'ju' yol e'wantoq nejtl tu'n Dyos. Atzunju' yol lu e'wantoq ate Kristju', aj ati kxole' ex atzu' q'uqloka kk'u'je' ti'j tu'n kpon kanune' toj kya'j.²⁸Ayo'qe' nqo pakb'ane' ti'j Krist, ex nxi' qq'o'ne' knab'l kkyaqil xjal ex nqo' xnaq'tzane' kye tu'ntzun tten knab'l tz'aqlixi'x ex tu'n kkub' we' toj kyokslab'l se'nte Qajaw Jesukrist.²⁹Tu'n tpajtzun ja'lu inxi'x noktilil wu'ne' tu'n tkyaqil wipumale' ex tu'nju' tipumal Krist tzajni tq'o'n toj wanmiye'.

¹Qu'mtzun wajb'ile' tu'n kb'inteye' qa inxi'x noktilil wu'ne' tu'ntzun kych'iye' toj kyokslab'le', exqetzunju' okslal tqe' toj Laodisya ex tu'n kych'iy kkyaqilju' na'mx tok kka'yi'n nwitze'.²Ex noktilil wu'ne', naqxwitlo tu'n kkuwsanjtz toj kyokslab'l, tu'ntzun ttenxi'x kk'u'jlalil ti'j Jesukrist, ex tu'n telxi'x knik' ti'ju' t-xim Dyos e'wantoq ojtxi', atzunte Kristju' lu;³Qu'n tkyaqilju' tq'inumal nab'l ex tkyaqilju' ojtzqib'l, atzu' e'wana' toj Qajaw Jesukrist.⁴Inxi' nmane' tkyaqil ja'lu kyeye' tu'n lalun che kub' sb'une' kyu'nju' xjal tb'anilxi'x jun kyol extzun mya axx.⁵Expe' maskye mixti'qine' kxole' tuk'i'l nxmilale', aju' wanmiye' atite' kxole', ex inxi'x chin tzalaje' tu'nju' in nb'i'ne' qa b'a'n ktene' ex tu'nju' wa'lqexi'xe' toj kyokslab'le' ti'j Jesukrist.

⁶Qu'mtzun tu'nju' ma kk'ame' Qajaw Jesukrist, ati tu'n kyanq'ine' se'nxju' tajb'il,⁷kyawanku'x kyib'e' tib'aj Krist, che we'ku'ye' toj kyokslab'le' ex kb'inchanxe' se'nxju' ntma'n xnaq'tzb'il oje kk'ame', ex kq'onx chjonteye' kukx te Dyos. Aju' ak'a'j chwinqlal tuk'i'l Krist

⁸Kykxq'uqim kyib'e': lalun kyaq' sb'u' kyib'e' kyeju' xjal naq nche' saqchb'en tuk'i'l kyol mixti'x tnab'l ex mya axx, qu'n myatzu' lepchqe'ka' kye' xjal lu ti'ju' xnaq'tzb'il tu'n Krist, xi'lepchqe'ka' ti'ju' xnaq'tzb'il kyu'n ojtxi' xjal ex kyi'j ipumalj nche kawin twitz tx'otx'.

⁹Qu'n tkyaqilju' tipumal Dyos atzu' nq'ancha'lixa' ti'j Jesukrist,¹⁰ex ate nkawin kyib'aj kkyaqilju' ati kyipumal ex nche' kawin twitz tx'otx' ex toj kya'j. Mixti'x junkye ti'xti' tzul kyi'j tu'nju' mujli ktene' tuk'i'l Krist.¹¹Tu'ntzun mujli ktene' tuk'i'l Krist, matxi' tz'ok q'o'n kyechele' tu'n myaju' se'n kyu'n xjal, qu'n aku'te Dyos sok q'onte tej xkmujb'a kyib'e' tuk'i'l Krist ex tej xkyej ktzaqpi'ne' b'inchaj taq'wixil.¹²Tetzunj xjaw a' kwiye', majx mache' ku'x mqu'ne' junx tuk'i'l Krist ex e'jatz anq'ine' junx tuk'i'l, qu'n matxi' kyoksla'ne' tipumal Dyos, aju' jaw anq'in Krist tu'n kxol kyimni.¹³Qu'n aju' ojtxi' kyimnqe'toqe' twitz Dyos tu'n tpaj kyile' ex tu'n tpaj mitoqjunti' nkyej ktzaqpi'ne' kb'inchb'aje' taq'wix, atzun ja'lo matxi' tzaj q'o'nju' kychwinqlale' ak'a'j junx tuk'i'l Krist ex matxi' kub' najsa'n tkyaqilju' kyile' tu'n.¹⁴Ate Dyos xkub'najsante tu'jil qk'a's ja ntma'na qa ati qil tu'nju' minti' njapunju' kawb'il qu'n, ex majx kyej tklawẍi'n tej tjaw twitz krus.¹⁵Ate Dyos sel q'inte kyipumalju' xewb'aj nche' kawin twitz tx'otx' ex toj kya'j, ex naq tu'nel Jesukrist xkub'a kyi'j kwitz kkyaqil xjal tej tjaw q'o'n twitz krus. Kjyome' ti'xti' ati toj kya'j

¹⁶Lalun kyaje' tu'n kyolin xjal myab'a'n kyi'je' tu'nju' nkwane' mujqa nkyk'wa'ne', mujqa tu'n tpaj ninq'ij, ak'a'j xjaw ex mujqa tu'n tpaju' q'ij te ojb'il.¹⁷Qu'n tkyaqil ja'lu noqx techlalte' ti'j tkyaqilju' atitoq tu'n tul, ate axxi'xju' ex ikyxi'xju' aju' Qajaw Jesukrist.¹⁸Lalun kyaje' tu'n tkub' tz'e'ysa'n kwitze' kyu'nju' xjal nok kyq'o'n kyib' te me's ex nche' k'ulun kwitz anjl, aye'j nok kq'o'n kyib' yolil kyi'ju' na'mx klonte ex inxi'x jaw knima'nkyib' tu'nxju' knab'l mujqa kxim.¹⁹Qu'n ayeju' xjal lu mixti' mujlqe'k tuk'i'l Qajaw Jesukrist, aj nch'iysante qxmilal ex nk'achante ex aj nok mujb'ankye tmoj qxmilal se'nxju' t-xim Dyos.

²⁰Matxi' chekyimkye' tuk'i'l Krist ex mixti'tl teqe'kxe' tjaq' kyipumal xewb'aj nche kawin twitz tx'otx'. ¿Titiquntzun inx che anq'inaye' kse'nqe' xjal te twitz tx'otx' nakuj te twitz tx'otx'qeye' ex inx xikyb'incha'ne' kse'nx ntma'n kawb'il²¹kjalu: Lalun txi' tyekuna lu, lalun txi' twana aju', lalun txi' ttzyu'na toj tq'ob'a?²²Kkyaqilju' nuk'b'il lu che b'ajel tjax chix, qu'n naqna' chaq'b'ilte' ex xnaq'tzb'il kyu'n xjal.²³Ex atzunju' kxnaq'tzb'il lu nakuj majx axx ex nakuj nim knab'l, qu'n ina' tyek'u'n se'n tu'me'l tu'n tiq'itju' tyol Dyos, se'n tu'n qoka' me's ex se'n tu'n tkub'a ti'ju' qxmilal qu'n, naqtzun aju' xnaq'tzb'il lu lay b'ent tch'exb'itju' qchwinqlal tu'n toj il, qu'n nche ajb'en naqx tu'n qb'inchante tajb'il qchib'jil.

¹Qu'mtzun ayekye' oje che jaw anq'ine' tuk'i'l Krist, kkjyome' ti'xti' te toj kya'j, ja q'uqla'ya' Jesukrist toj tb'a'nq'ob' Dyos.²Atzu' che ximanaye' kyi'ju' ti'xti' ate' toj kya'j, myatzu' kyi'ju' ti'xti' te twitz tx'otx'.³Qu'n ayekye' oje che kyime' junx tuk'i'l Krist, k'u'nte kychwinqlale' tu'n Dyos junx tuk'i'l Krist.⁴Qu'n aku'te Krist kychwinqlale'. Naqa sulte Krist ex ikxkye' che tenb'ile' tuk'i'l junx toj tajwalil. Aju' ojtxi' chwinqlal exju' ak'a'j chwinqlal

⁵Qu'mtzun ktzaqpinkje' myab'a'n nkb'incha'n xjal twitz tx'otx': lalun che ajpajine', lalun kub' ktz'ilsa'n kyanmiye', lalun pon kk'u'je' ti'ju' myab'a'n ex lalun che jamjone', qu'n ate jamjoni'n ikx tz'ela se'n qo k'ulun kye witzileb'.⁶Qu'n tu'n tpaj tkyaqil ja'lu tzula tz'e'ysb'il witzb'aj tu'n Dyos kyib'aj kkyaqilju' mixti' xikyoksla'n tyol Dyos;⁷qu'n intoq kb'incha'njuye' lu tej tqe'xtoqe' toju' ojtxi' kychwinqlale'.⁸Atzun ja'lo kq'onkje' tkyaqil ja'lu: lalun che tx'u'jine', lalun nok kb'incha'ne' taq'wix te juntl, lalun che oktene' ik'lelte juntl ex lalun che q'man xlab'yole'.⁹Lalun che chanyole' kxolilexe', qu'n matxina' kyej ktzaqpi'ne' ojtxi' kychwinqlale' exju' taq'wixil intoq kb'incha'ne' ojtxi',¹⁰ex matxi' tzok kyoksa'ne' kyi'je' ak'a'j: matxi' che oke' te ak'a'j ichan, atl junjun q'ij xi' kyokye' te tilb'ilal Dyos Ch'isalkyeye', tu'ntzun telxi'x kynik'e' ti'j Dyos.¹¹Atzuntzu' lay q'ancha'lixa'tl alkye xjal Kryek mujqa aj Juda, alkye xjal tok techil ti'j tchib'jil mujqa mya, alkye najchaq xjal, mujqa xjal mixti'x ch'i'n b'a'n tu'n, alkyeju' lq'o'n majen mujqa tzaqpi'n, qu'n tkyaqil ja'lu mixti'xte' toklen, ate Kristju' ati toklen kyib'aj kkyaqil ex ati kyuk'i'l kkyaqil.

¹²K'u'jla'nqe'ye' tu'n Dyos ex matxi' che jaw sk'o'ne' tu'n te xjan ttanam. Tzaj q'aq'anx kyk'u'je' kyi'j txqantl, che okxe' b'a'nwnaq, che okxe' me's, che okxe' mans ex tenx kypasense'.¹³Tzik'xkyu'ne' tkyaqilju' myab'a'n nok b'incha'n kyeye' kyu'n txqantl ex knajsanku'ye' kyile' kxolilexe'. Ikse'nte Qajaw makub' tnajsa'n kyile', ikxtzunkye kyb'incham.¹⁴Tib'ajxi' tkyaqil ja'lu, kyk'u'jlam kyib'e', qu'n tu'nju' tk'u'jlalil ati mujb'ab'l qxol.¹⁵Awttzun tnak'b'il Krist ten toj kyanmiye', qu'n a tb'is tk'u'j Dyos ẍettxokye' tu'n kyokye' te junx xmilal. Kyq'onxtzun chjonteye' te Dyos kukxju'.

¹⁶Awttzu'n tyol Qajaw Jesukrist ten toj kyanmiye' kukxju'. Kyxnaq'tzam kyib'e' ex kyq'onx kynab'le' kyxolilexe', ex tenx kynab'le'. Che' kyb'itzanxe' salmos tu'n tkyaqil kyanmiye', kyuk'i'l b'itz te ninb'ilte Qman Dyos ex aq'b'il chjonte te.¹⁷Ex tkyaqilju' ma kyb'inchaye' mujqa ma kymaye', kyb'inchanxe' toj tb'i Qajaw Jesukrist, ex kyq'onxe' chjonte te Dyos Manb'aj noq tu'nel Jesus. Se'n tu'n qanq'ina qxolilex

¹⁸Aye'ye' qya, che b'inqeye' kye kychmile', qu'n ilti'j tu'n kb'inchanteye' lu tu'nju' okslalqeye'.¹⁹Ex ikxqekye' chmilb'aj kk'u'jlame' kxu'jile' ex lalun che oktene' ililkye kuw.

²⁰Aye'ye' k'walb'aj, che okslanqeye' te kmane' ex te ktxuye', qu'n aja'lu b'a'n nela' toj twitz Qajaw.²¹Aye'tzunkye' manb'aj lalun tz'ok kq'o'ne' ttx'u'jil kk'wale', tu'ntzun lalun tzaj b'is toj kyanmi.

²²Aye'ye' lq'o'n majen che okslanqeye' kyeju' tajaw aq'untl alchaqxkyeku', mya o'kxju' se'n nche' ka'yink kyi'je', naqxwit tu'n kykyeje' b'a'n kyuk'i'l, che ajb'enqekye' tu'n tkyaqil kyanmiye' ex tenx tchiylal Dyos kyeye'.²³Ex tkyaqilju' ti'ixti' makb'inchaye' kb'inchame' b'a'n, nakuxwitloj in kb'incha'ne' te Dyos ex mya kye xjal.²⁴Qu'n b'i'ntlkye' kyu'n qa ktzajel tq'o'n Qajaw jun etzb'il kyeye' te tu'me'l t-xel teju' kyajb'eb'le'. Qu'n tena' Krist Qajawxi'x nche ajb'ena'ye'.²⁵Ex atzunju' nb'inchante taq'wixil, tzul q'onju' tu'me'l t-xel te se'nxju' xtb'incha, qu'n ate Dyos k'okyel q'onte toj xjel ti'ju' tb'inchb'aj.

¹Aye'tzunkye' tajaw aq'untl che okxe' tnik'alti'j kyuk'ilju' kmajene'. Ex kna'ntze' qa ati junkye' kpatron ati junkye' Kyajaw ati toj kya'j.

²Che' na'nqe' Dyose' kukxju', che xq'uqine' toj na'j Dyos ex kq'o'n chjonteye' te Dyos.³Ex che na'nqe' Dyose' qi'je', tu'ntzun tq'onte Dyos anb'il qeye' tu'n tpakb'etju' tpakb'al b'a'n aj e'wantoq ojtxi' kye xjal, qu'n tu'n tpaju' yol lu jpu'nqinaye'.⁴Che' na'nqe Dyose' wi'je', tu'ntzun tb'ent nchik'b'antejuye' tyol Dyos tojxi'x tu'me'l se'nxju' tajb'il.

⁵Tenx knab'le' ex che b'et-xe' tojxi'x tnik'alti'j kxolju' mya okslalqe', ex tz'ajb'enxju' q'ij kyu'ne' tu'n tb'inchetju' myab'a'n.⁶Che' yoline' tojxi'x tu'me'l kyuk'i'l alchaqxkyeku' xjal, ex ati tu'n kximane' ti'ju' kyole' kxe'l kma'ne' teyile junjun xjal. B'ajsb'il yol te q'olb'eb'l

⁷Tkyaqilju' tqanil wi'je' kxe'l ttx'olb'a'n Tikiko kyeye', qu'n ate Tikiko tmajen Qajaw junx wuk'i'le' ex wa'lxixte toj tokslab'l.⁸Qu'mtzun kxela' nchq'o'ne' kk'etze', tu'ntzun txi' tma'n kyeye' se'n toqoye' ex tu'n txi' tq'uqb'a'n kk'u'je'.⁹Ex ikx matxi' nchq'o'ne' Onesimo junx tuk'i'l, aj jun qitz'in njapunxi'x tu'n ex kwnaqile'. Aye'kye che kxe'l tx'olb'ante kyeye' titi' nb'aji tza'lu.

¹⁰Ex nche'x q'olb'ene' tu'n Aristark aju' ati wuk'i'le' toj kars; ex ikx nche'x q'olb'ene' tu'n Kuẍ aju' tk'wal titz'in mo ttzik B'ernab'e. Qama pon Kuẍ xb'et-salkyeye' lwix kyk'mome' qu'n ojena' txi' nma'n tqanil kyeye'.¹¹Ex ikx nche'x q'olb'ene' tu'n Jesus aj atok tb'i te Just. O'qekx okslal ja'lu kxol aj Juda nche' onin wuk'i'le' tu'n tpakb'etju' tkawb'il Dyos ex aye' nche' q'uqb'ante nk'u'je'.¹²Ex nche'x q'olb'ene' tu'n Epapras, jun tmajen Qajaw Jesukrist; ex ax juntl kwnaqiljuye' in oktilil tu'n kukx tu'n tna'n Dyos kyi'je', tu'ntzun kwe'xixe' toj kyokslab'le' ex tu'n tjapunju' tajb'il Dyos kyu'ne'.¹³Qu'n kanlixi'x nwitze' qa ate Epapras inxi'x b'ajx tk'u'j kyi'je' ex ikx kyi'ju' ate' toj tnam Lawdisea ex ikx kyi'ju' ate' toj tnam yerapolis.¹⁴Ex nche'x q'olb'ene' tu'n Demas ex Lukas aj k'u'jlanxi'x qu'n.

¹⁵Kq'onxe' nq'olb'eb'le' kyeju' qtzik ex qitz'in tqe' toj tnam Lawdisea, ex ikx kq'onxe' nq'olb'eb'le' te Ninpa ex kyeju' okslal nkb'uyi'n kyib' toj tja Ninpa.¹⁶Ajtzun tb'aj kẍch'ine' u'j lu, ksmanxe' kye okslal toj tnam Lawdisea tu'n tjaw kẍch'i'n kxol; ex kẍch'intze' u'j xintz'ib'a'ne' kyetlju' okslal toju' tnam te Lawdisea.¹⁷Kmanxe' ja'lu te Arkyip: Q'onk tilila taq'una tu'n tjapun tu'na toj tb'i Qajaw Jesukrist, che chikuye' te.

¹⁸Ayinku'ye' Pawl ex tu'nku' nq'ob'e' xkub'a ntz'ib'ana'ye' u'j lu. Kyna'nku'ye' qa jpu'nqine'. Awittzun Dyos K'iwlankyeye'. Ikxwitju'.

Bible Society in Guatemala

https://app.library.bible/content/aea9d9099feb3a24