Titus3
1उनका हाकिम आउर अधिकारियन के अधीन रहे के सुधि दिलावऽ, उनकर आज्ञा मानतन आउर हर एगो अच्छा काम ला तईयार रहतन,2केकरो निन्दा नऽ कहिया; पर शान्त आउर कोमल स्वभाव के रहत, आउर सभे आदमियन के साथे बड़ी नम्रता के साथे रहतन।3काहेकि हमनी भी पहिले निर्बुद्धी आउर आज्ञा नऽ माने वाला हली। हमनी भरम में पड़ल हली, आउर केतना तरह के अभिलाषा आउर सुख-विलास के गुलाम हली। हमनी बैर-भाव, आउर डाह करे में जिनगी बितावऽ हली, आउर घिनामन हली, आउर एक दोसरा से बैर रखऽ हली।4पर जखनी हमनी के उद्धारकर्ता परमेश्वर के कृपा आउर आदमियन लागी उनकर प्रेम परकट होल,5ई धार्मिकता के कामवन के चलते नऽ, जे हमनी खुद करली, बाकि परमेश्वर अपन दया से हमनी के उद्धार करलन, नया जनम के स्नान, आउर पवित्र आत्मा द्वारा नया बनईला से।6जेकरा परमेश्वर हमनी के उद्धारकर्ता यीशु मसीह के द्वारा हमनी पर भरपूरी से उण्डेललन। 7जेकरा से उनकर अनुग्रह से धर्मी ठहर के, अनन्त जिनगी के मजबूत आशा के मुताबिक वारिस बनतन।8ई सन्देश विश्वासयोग्य हे, आउर हम चाहऽ ही, कि तूँ ई बात के सम्बन्ध में दृढ़ता से बोलऽ, येहिगुने कि जे परमेश्वर पर विश्वास करलन हे, ऊ भला कामवन में लगल रहे के धियान रखतन, ई बात भला, आउर आदमियन के फईदा के हे।9पर मूर्खता के विवादवन, आउर वंशावली, आउर कलह, ऊ झगड़वन से, जे व्यवस्था के बारे में बचल रहऽ; काहेकि ऊ निष्फल आउर बेकार हे।10एक-दू बार चेता के कोई फूट डाले वालन से अलग रहऽ,11ई जान के कि अईसन आदमी सच्चाई के राह से भटक गेल हे आउर खुद के दोषी बना के पाप करते रहऽ हे।12जखनी हम तोरा भीर अरतिमास चाहे तूखिकूस के भेजम, तऽ हमरा भीर निकूपुलिस शहर में जल्दी से आवे के कोशिश करिहऽ: काहेकि हमनी ऊहाँ ठण्डा गुजारे के फईसला करली हे।13जेनास व्यवस्थापक आउर अपुल्लोस के कोशिश कर के आगे पहुँचा दऽ, कि उनका कोई चीज के घटी नऽ होवे।14ओईसहीं हमनी अपन जरुरतवन के पूरा करे लागी अच्छा कामवन में लगे रहे ला सिखऽ जेकरा से बेकार नऽ रहत।15सभे जे हमरा जौरे हथन तोहनी के नमस्कार कहऽ ही, आउर जे विश्वास में हमनी से प्रेम रखऽ हथन, उनका नमस्कार। तोहनी सभे पर परमेश्वर के अनुग्रह बनल रहई।
Bridge Connectivity Solutions Pvt. Ltd.