Romans1
1पौलुस, मसीह यीशु के सेवक, बोलावल गेल प्रेरित, जेकरा परमेश्वर ऊ सुसमाचार लागी अलग करल गेल हे,2जेकरा ऊ पहिले से ही अपन भविष्यद्वक्तावन के द्वारा पवित्रशास्त्र में प्रतिज्ञा करलन हल, 3अपन बेटा के बारे जे देह के मुताबिक तऽ राजा दाऊद के कुल में जनम लेलन,4पवित्र आत्मा के मुताबिक मरल में से पुनरुत्थान के द्वारा सामर्थ के साथे परमेश्वर के बेटा ठहरावल गेलन, हमनी के प्रभु यीशु मसीह,5जेकर द्वारा हमनी के उनकर नाम लागी सभे अन्यजातियन के बीच में विश्वास के आज्ञाकारी होवे लागी दया आउर प्रेरिताई मिलल हे,6जेकर बीच में से तूँ भी यीशु मसीह के बोलावल हऽ।7ऊ सभे के जे रोम शहर में हथन, जे परमेश्वर के प्रिय आउर बोलावल गेल पवित्र लोग हऽ: तोरा पर अनुग्रह होत आउर परमेश्वर हमनी के पिता आउर प्रभु यीशु मसीह के तरफ से तोहनी के शान्ति मिलते रहे। 8पहिले, हम तोहनी सभे के बारे में यीशु मसीह के द्वारा अपन परमेश्वर के धन्यवाद करऽ ही, काहेकि तोहनी के विश्वास के चर्चा दुनियाँ भर में हो रहल हे।9काहेकि परमेश्वर ही हमर गवाह हथन, जिनकर सेवा हम अपन आत्मा में होके उनकर बेटा के सुसमाचार में करऽ ही, कि कईसे हम लगातार तोहनी के चर्चा करते रहऽ ही,10अपन प्रार्थना में हमेशा विनती करऽ ही कि जदि कोई तरह से अखनी अन्त में परमेश्वर के इच्छा के द्वारा हम तोहनी भीर आवे में सफल हो जायेम।11काहेकि हम तोहनी के देखे ला ललसा करऽ ही, ताकि तोहनी के मजबूत करे लागी हम तोहनी साथे कुछ आत्मिक अनुग्रहकारी वरदान बाँटम,12आउर एक दोसर के विश्वास से जे तोर आउर हमर दूनो के हे, ई तोहनी के साथे आपस में हौसला बढ़ावे ला होवऽ हे।13अखनी हे भईवन, हम नऽ चाहऽ ही कि तोहनी अनजान रहऽ, कि हम केतना बार तोहनी के भीर आवे के इच्छा करली, बाकि हम अखनी ला रोकल गेली हे, बाकि जईसन दोसर अन्यजाति लोग में भी हमरा फल मिलल, ओईसहीं तोहनी में भी मिलत।14हम यूनानी लोग आउर गैर-यहूदी भाषा बोले वाला दूनो के, आउर बुद्धिमान आउर निर्बुद्धी दूनो के कर्जदार ही।15येहिगुने, जईसन कि ई हमरा पर निर्भर करऽ हे, हम तोरा भी, जे रोम में रहऽ हऽ, सुसमाचार प्रचार करे लागी उत्साहित ही।16काहेकि हम सुसमाचार से नऽ लजा ही, काहेकि ई सभे विश्वासियन के उद्धार लागी परमेश्वर के सामर्थ हे, पहिले यहूदी आउर यूनानी दूनो लागी। 17काहेकि परमेश्वर के धार्मिकता ओकरा में विश्वास से विश्वास ला प्रकट होवऽ हे, जईसन कि शास्त्र में लिखल गेल हे, “बाकि धर्मी विश्वास से जिन्दा रहतन।” 18काहेकि परमेश्वर के गोस्सा तऽ ऊ लोग के सभे अभक्ति आउर अधर्म के खिलाफ स्वर्ग से प्रकट होवऽ हे, जे सच के अधर्म से रोकले रखऽ हे।19काहेकि जे परमेश्वर के विषय के ज्ञान हे, ओकरा लागी प्रत्यक्ष हे, काहेकि परमेश्वर ओकरा ओखनी लागी प्रत्यक्ष करलन हे।20काहेकि उनकर छिपल खासियत, जे उनकर अनन्त सामर्थ आउर अलौकिक स्वभाव दूनो हे, दुनियाँ के सृष्टि से ही साफ तोर से देखल गेल हे, आउर रचल गेल चिजवन के द्वारा समझल गेल हे। येहिगुने ओखनी भीर कोई बहाना नऽ हे। 21काहेकि परमेश्वर के जानला पर भी, ओखनी परमेश्वर के रूप में उनकर महिमा नऽ करलन, आउर नऽ ही ओखनी उनका धन्यवाद देलन। एकर बदले, ओखनी अपन विचार में बेकार हो गेलन, आउर ओखनी के निर्बुद्धी मन में अंधार हो गेल।22बुद्धिमान होवे के दावा कर के, ओखनी मूरख बन गेलन, 23आउर अविनाशी परमेश्वर के महिमा के नाशवान आदमी के, आउर पक्षियन के, आउर चार गोड़ वाला जन्तुवन के, आउर रेंगे वाला प्राणियन के छवि के समानता में बदल देलन। 24येहिगुने, परमेश्वर उनका ओखनी के मन के अभिलाषा के अशुद्धता लागी छोड़ देलन, कि ओखनी अपने में अपन देह के अनादर करतन;25जेखनी परमेश्वर के सच के झूठ में बदल देलन, ओखनी सृष्टि के उपासना आउर सेवा करलन, ऊ सृष्टिकर्ता के बदले जे अनन्तकाल ला धन्य हथन। आमीन। 26येहिगुने, परमेश्वर ओखनी के अनादर के लालसावन के वश में छोड़ देलन, काहेकि दूनो ओखनी के औरतियन स्वभाविक व्यवहार के ऊ काम से बदल देलन जे स्वभाव के खिलाफ हे।27आउर एही रीति से, मरदवन भी, औरतियन के स्वभाविक इस्तेमाल के छोड़ के, एक दोसर के प्रति कामातुर होके जले लगलन, आउर मरद के जौरे मरद बेशरम के काम के करे लगलन आउर अपने में ही ओखनी दण्ड भोगे लगलन, जे ओखनी के बिखरावे लागी जरुरी हल। 28आउर जईसे ओखनी अपन पूरा मन से पछाने में परमेश्वर के होवे ला स्वीकार नऽ करलन, ओईसहीं परमेश्वर भी ओखनी के अस्वीकारल मन पर छोड़ देलन, कि अईसन काम करतन जे सही नऽ हे,29आउर सभे तरह के अधर्म, दुष्टता, लोभ, आउर दुर्भावना से भर जईतन, आउर ओखनी डाह, हत्या, झगड़ा, छल, आउर बुरा विचार से भरल हे। ओखनी चुगलखोर,30बदनाम करे वाला, परमेश्वर से घिन करे वाला, ढीठ, घमण्डी, डिंगमार, बुरा-बुरा बात के बनावेवाला, माता पिता के आज्ञा के उल्लंघन करे वाला,31निर्बुद्धी, विश्वासघाती, कठोर आउर निर्दयी हो गेलन।32ओखनी तऽ परमेश्वर के धर्मी विधि के बढ़ियाँ जानऽ हलन, कि अईसन-अईसन काम करे वाला मार देवल जाय के योग्य हे, ओखनी नऽ खाली ई काम के करऽ हथन, बाकि ओखनी ओकरा अभ्यास करेवालन के सलाह भी दे हथन।
Bridge Connectivity Solutions Pvt. Ltd.