Numbers27
1तऽ यूसुफ के बेटा मनश्शे के बंश में से, एक दिन हेपेर के बेटा, सलोफाद आउर गिलाद के पोता आउर मनश्शे के बेटा माकीर हल, जेकर पांचो बेटी मूसा भीर अईलन। ऊ महला, नोवा, होग्ला, मिल्का, आउर तिर्सा हलन।2ऊ सभे मिलापवाला तम्बू के द्वारा पर अईलन आउर एलीआजर याजक, मूसा, गोत्र के अगुवन, आउर बड़ी मनी इस्राएल के लोगन के सामने खड़ा होलन।3ओखनी कहलन, "जखनी हमनी जंगल में हली तऽ हमर बाबूजी मर गेलन, आउर उनकर कोई बेटा नऽ हल। बाकि ऊ ऊ लोग में से नऽ हलन जे कोरह के समरथन कईलन हल, जौन यहोवा के खिलाफ वाद-विवाद कईलन हल, आउर ऊ अपन पाप के वजह से मर गेलन। उनकर कोई बेटा नऽ हल,4हमर बाबूजी के कोई बेटा नऽ होवे के चलते उनकर कुल के नाम काहे मिट जाय? येहिसे हमरा भी कुछ जमीन दे दऽ जईसे हमर बाबूजी के परिवार के मिलल हल!"5येहिगुने मूसा यहोवा से पूछलन कि उनकर मामला के बारे में का करे ला हे।6आउर तब यहोवा मूसा के उत्तर देलन,7"सलोफाद के सभे बेटी जौन विनती कर रहल हे, ऊ सही हे। तोरा जरुर ओखनी के कुछ जमीन देवे के चाही, जईसे तूँ उनकर बाबूजी के परिवार के दे रहल हे। ओखनी में से सभे के ऊ जमीन में से कुछ दे दऽ जौन ओकर भाई के पास होत हल तऽ उनका देवल जात हल।8आउर इस्राएली लोग से ई भी कहऽ, 'कि जदि कोई बिना संतान के मर जा हे, जौन कुछ उनकर बेटा के होवऽ हे ऊ ओकर बेटी सब के दे देतन।9आउर यदि ऊ आदमी के कोई बेटा चाहे बेटी नऽ हे, तऽ जे भाग उनकर बेटा-बेटी के मिलऽ हे ऊ ओकर भाई के देतन।10आउर जदि ऊ आदमी के कोई भाई नऽ रहे, तऽ ऊ चीज जे उनकर बेटा बेटी आउर भाई के विरासत में मिलल हे, ऊ उनकर बाबूजी के सभे भाई के दे देतन।11जदि ऊ आदमी के बाबूजी के भाई भी नऽ हे, तऽ ऊ सब चीज जे विरासत में मिलत हल ऊ उनकर सब से करीबी परिवार के दे देतन। ई नियम इस्राएली लोग लागी एगो नियम होत, काहेकि हे मूसा, यहोवा तोरा ई आज्ञा दे के ओखनी के सुनावे ला दे ही।12एक दिन, यहोवा मूसा से कहलन, "यरदन नदी के पूरब दने अबारीम पहाड़ के छोटी पर चढ़ जा; तब ऊ देश के देखऽ जेकरा हम इस्राएली लोग के देली हे। 13एकरा देखला के बाद तूँ मर जईवऽ आउर अपन मरल पूर्वजवन में मिल जईवऽ जईसे तोर बड़का भाई हारून मर के मिल गेलन हे।14तूँ मर जईवऽ आउर ऊ देश में नऽ ढूँके पईवऽ, एकर कारण ई हे कि तोहनी दुन्नो सीन जंगल में हमर आज्ञा के उल्लंघन कईलऽ, आउर बलवा कईलऽ। जखनी कादेश शहर भीर मरीबा में इस्राएली लोग हमरा से विवाद कईलन, तऽ हम तोरा कहली, कि ऊ चट्टान से बोलऽ, जेकरा से ओकरा में से पानी निकले लगे। बाकि तूँ चट्टान से बोले के जगह पर ओकरा पर लाठी मारलऽ, एही चलते तूँ लोगवन के हमर पवित्र शक्ति के नऽ देखईलऽ। 15तब मूसा यहोवा से ई प्रार्थना कईलन,16"हे यहोवा, तूँही ऊ परमेश्वर हऽ जौन सभे लोग के आत्मा के चलावऽ हऽ। येहिसे कृपा कर के इस्राएल के लोग लागी एगो नया अगुवा ठहरावऽ। 17कोई के ठहरावऽ जौन तोहर लोगवन के अगुवाई करतन, जखनी ऊ सभे युद्ध करे ला जइतन, जेकरा यहोवा के मण्डली बेगर चरवाहा के भेड़-बकरियन के झुण्ड के जईसन एन्ने ओन्ने नऽ भटकते नऽ रहतन। 18यहोवा मूसा के जबाब देलन, नून के बेटा यहोशू के जिनका में परमेश्वर के आत्मा हे, ले आवऽ। उनका अभिषेक करे लागी उनका पर अपन हाथ रखऽ।19आउर उनका एलीआजर याजक के सामने खड़ा करऽ, जखनी सभे मण्डली देख रहलन हे, आउर ओकरा इस्राएली प्रजा के नया अगुवा होवे ला सौंप दऽ।20जौन महिमा अभी तोरा भीर हे ओकरा में से कुछ उनका दे दऽ, जेकरा से सभे इस्राएल के लोग जान लेतन कि हमनी के उनकर आज्ञा मानेला हे।21जखनी तोहनी के यहोवा अगुवाई के जरुरत होत, तब यहोशू एलीआजर याजक के सामने खड़ा होतन। तब एलीआजर याजक समूचे मण्डली के सामने चिट्ठी डाल के तय करतन कि उनका का करे के चाही। यहोशू के हुकुम से इस्राएल के सभे लोग जमा होतन।22येहिगुने मूसा ओही कईलन जौन यहोवा हुकुम देलन हल। ऊ यहोशू के एलीआजर याजक आउर इस्राएल के सभे लोग के सामने हाजिर कईलन।23तब मूसा उनका अपन उत्तराधिकारी ठहरईलन आउर उनका पर हाथ रखलन, आउर ऊ काम करे ला कहलन जौन यहोवा मूसा से कहलन हल।
Bridge Connectivity Solutions Pvt. Ltd.