Nehemiah6
1जब सम्बल्लत, तोबियाह, अरबी गेशेम, आउर हमर दूसरा दुश्मन के पता चलल कि हम शहरपनाह के पुनर्निमाण के पूरा कर लेली हे, आउर ई कि अखनी एकरा में कोई सुराख बाकी नऽ बचल हल। बाकि हम अखनी तक फाटकवन में पल्लवन के नऽ लगईली हल।2तब सम्बल्लत आउर गेशेम हमरा एगो खबर भेजलन जेकरा में कहल गेल हल, “हम कोई एगो गाँव में ओनो के मैदान में तोरा से भेंट करे ला चाहऽ ही।” बाकि हम जानऽ हली कि ऊ अईसन येहिसे कहऽ रहलन हे काहेकि ऊ हमरा हानि पहुँचावे ला चाहऽ हल।3येहिसे हम स्वर्गदूत के उनका ई बतावे ला भेजली, “जौन काम के हम ईहाँ कर रहली हे ऊ बड़ी जादे खास हे। हम यात्रा करे के लायक नऽ ही। हमरा भीर काम के रोके आउर ओकरा छोड़े के कोई कारण नऽ हे जेकरा से हम तोरा से भेंट कर सकम।”4ऊ हमरा एही समाचार के चार बेरा भेजलन, आउर हर बार हम उनका एही चलते मना कर देली।5तब सम्बल्लत अपन सेवकवन में से एगो के पांचवाँ वार ओही विनती के साथे लेके हमरा भीर भेजलन। ई बार खबर लिखल गेल हल, बाकि ओकरा मुहरबन्द नऽ कईल गेल हल। सम्बल्लत चिट्ठी के बेगर मुहर लगईले अईसहीं छोड़ देलन जेकरा से दूसरा आदमी के पता चल सके कि ऊ का कहलन हे, काहेकि ऊ हमरा पर उनका से मिले लागी दबाब बनावे ला चाहऽ हलन। 6चिट्ठी में अईसन कहल गेल हल, “हमर चारो दने देशवा में रहे वालन लोग कहऽ रहलन हे, आउर गेशेम पुष्टि करऽ हे कि ई सच हे कि तूँ आउर यहूदी राजा अर्तक्षत्र के खिलाफ विद्रोह करे के योजना बना रहलन हे। येहिसे तूँ दीवार के पुनर्निमाण कर रहलऽ हे। ऊ ई भी कह रहलन हे कि तूँ खुद यहूदियन लोग के राजा बने के मनसा रखऽ हऽ।7ई सभे लोग ई भी कहऽ रहलन हे कि तूँ यरूशलेम में अपन बारे में ई बात के ऐलान करे लागी भविष्यद्वक्तावन के ठहरईलन हे। ऊ कह रहलन हे कि, ‘यहूदियन के अब एगो अपन राजा हथिन!’ राजा अर्तक्षत्र ई समाचारवन के जरुरी सुनतन, आउर जब अईसन होत, तऽ ऊ तोरा पर बड़ी जादे गोस्साय होतन। येहिसे हमरा सच में एगो दूसरा के साथे भेंट करे के चाही आउर ई बारे में चर्चा करे के चाही।”8हम उनका ई जबाब दे के वापस भेजली, “तूँ जौन कहऽ रहलऽ हे ओकरा में से कोई भी बात सच नऽ हे तूँ तऽ खाली ओकरा अपन मन से गढ़ रहलऽ हे।”9हमरा मालूम हल कि ऊ सभे हमरा खाली डरावे के कोशिश कर रहलन हल। ऊ सोंचलन हल कि, “यहूदी बड़ी जादे डेरा जईतन जेकरा से ऊ दीवार बनावे के काम करे ला बंद कर देतन, आउर ऊ कहियो नऽ पुनर्निमाण के पूरा नऽ करतन।” येहीगुने हम परमेश्वर से प्रार्थना कईली, “हे परमेश्वर, हमरा हिम्मत दऽ।”10लगभग एही घड़ी हम दलायाह के बेटा आउर महेतबेल के पोता शमायाह से भेंट करे ला गेली। हम ओकरा से ओकर घरे मिले ला गेली हल, काहेकि ऊ अपन घर नऽ छोड़ रहलन हल। ऊ एगो याजक हलन, आउर ऊ ई दिखावे के कोशिस कर रहलन हल कि यहूदी अगुवन लागी सामूहिक रूप से बहारसी जाय ला सुरक्षित नऽ हल। ऊ हमरा से कहलन, “हम ईहाँ भी सुरक्षित नऽ ही। हमरा परमेश्वर के भवन में जाई के आउर दुआरी बंद करे के जरुरत हे, काहेकि लोग हमरा मारे के कोशिस कर रहल हे। कोई रात ओखनी आके हमरा मार देत।”11हम जबाब देली, “हम ऊ तरह के अादमी नऽ ही जौन काम छोड़ के भाग जायेम! एकर अलावे, हम राज्यपाल ही, आउर सभे कोई हमरा जानऽ हे, येहिसे हम आराधनालय में छिपे के कोशिस कर के अपन जान नऽ बचा सकऽ ही। हम अईसन करे से मना कर देली!”12एकबैग हमरा मालूम होल कि परमेश्वर शमायाह के हमरा ला भविष्यद्वाणी से भरल समाचार नऽ देलन हल। एकर बजाय, ऊ ई बतियन के येहिसे कहऽ रहलन हल काहेकि तोबियाह आउर सम्बल्लत उनका अईसन कहे लागी घूंस देलन हल।13ऊ उनका खास रूप से अईसन बात कहे लागी पईसा देलन हल जौन हमरा डेरा दे। ऊ उम्मीद कर रहलन हल कि ऊ हमरा से हमर जिम्मेदारियन के छोड़े आउर आराधनालय में छिपे के द्वारा पाप करऽ सकलन हल। जदि हम अईसन कईली होत, तऽ ऊ हमर इज्जत के बर्बाद आउर हमरा बदनाम कर देलन होत।14येहिगुने हम प्रार्थना कईली, “हे हमर परमेश्वर, तोबियाह आउर सम्बल्लत के साथे ठीक ओईसहीं वर्ताव करऽ कि जईसन ऊ कईलन हे।” औरत भविष्यद्वक्तिन नोअद्याह आउर दूसरा सभे भविष्यद्वक्तावन लागी अईसहीं करऽ जौन हमरा डरावे के कोशिस कर रहलन हे।15हम एलूल महीना के पचीसवाँ दिन में 52 दिन तक ई काम कइला के बाद दीवार के पुनर्निमाण कईलन। 16जखनी हमर सभे दुश्मन के मालूम चललई कि हम एतना कम समय में पुनर्निमाण पूरा कर लेली हे, तऽ ऊ महसूस कईलन कि अईसन जरुर हमर परमेश्वर के मदत से ही होल हे। एकरा से हमर चारो दने के देश के लोग डर गेलन आउर अपन समूचे आत्मविश्वास के भुला देलन हे।17ई घड़ी यहूदा के पाँच मुख्य अगुवा तोबियाह के हमरा बारे में जानकारी देवे लागी ढेर चिट्ठी लिख रहलन हल, आउर ऊ निर्देश के साथे उनका चिट्ठी वापस भेज रहलन हल।18तोबियाह के बियाह समाज लागी एक शक्तिशाली आउर असरदार सदस्य आरह के बेटा शकन्याह के बेटी से होल हल। उनकर बेटा यहोहानान के बियाह बेरेक्याह के बेटा मशुल्लाम एगो दूसरा शक्तिशाली आउर असरदार अादमी के बेटी से होल हल। आउर येहिसे, ऊ ओही वजह से, यहूदा में बड़ी मनी लोग तोबियाह के परति ईमानदार रहे के किरिया खईलन हल19जौन लोग तोबियाह के परति ईमानदार हलन ऊ अईलन आउर हमरा बतईलन कि ऊ कौन तरह के बढ़ियाँ काम कर रहलन हल, आउर तब ऊ उनका जबाब में जौन कुछ हम कहऽ हली ओकर समाचार दे हलन। तोबियाह हमरा डरावे के कोशिस में ढेर चिट्ठी भेजते रहलन हल।
Bridge Connectivity Solutions Pvt. Ltd.