Matthew28
1सब्त के दिन के बाद, सप्ताह के पहिलका दिन भोर होते ही मरियम मगदलीनी आउर दोसरकी मरियम कब्र देखे ला अईलन। 2देखऽ, एगो बड़का भूकम्प होल, काहेकि प्रभु के एगो स्वर्गदूत स्वर्ग से उतरल आउर आके पत्थर लोंघाड़ा देलन आउर ओकरा पर बईठ गेल हल।3अखनी ओकर रूप बिजुली के जईसन, आउर ओकर कपड़ा बरफ के जईसन उजला हल।4पहरदार ओकर डर के मारे काँप उठल आउर मरल आदमी के जईसन हो गेल।5बाकि जबाब दे के स्वर्गदूत औरतियन से कहलक, “मत डरऽ, काहेकि हम जानऽ ही, कि तूँ यीशु के जे क्रूस पर चढ़ावल गेलन हे, खोजऽ हऽ।6ऊ ईहाँ नऽ हथन, काहेकि जईसन ऊ कहलन हल, ओईसहीं जी उठलन हे। आके ऊ जगह के देखऽ जहाँ ऊ रखल गेल हल।7आउर जा के, उनकर चेलवन से कहऽ, कि ‘ऊ मरलकन में से जी उठलन हे। आउर देखऽ, ऊ तोहनी से पहिले गलील में जा रहलन हे। ऊहाँ तोहनी उनका देखे पईवऽ।’ देखऽ, हम तोरा से कह देली हे।”8आउर ओखनी डर आउर बड़ी आनन्द के मारे, तुरन्त कब्र से निकल गेलन, आउर उनकर चेलवन के समाचार देवे लागी दौड़लन।9देखऽ, यीशु ओखनी से मिललन, आउर कहलन, “नमस्कार!” औरतियन आके, उनकर गोड़ छूलन आउर उनका दण्डवत करलन।10फिन यीशु उनका से कहलन, “मत डरऽ। जा के हमर भईवन से कहऽ कि ऊ गलील में चल जईतन। ऊहाँ ओखनी हमरा देख पईतन।”11जब ऊ जाहीं रहलन हल, तऽ देखऽ, पहरदारवन में से कुछ नगर में जा के प्रधान याजकवन के पूरा हाल बता देलन।12आउर ओखनी पुरनियन से मिल के उनका से ई विषय पर राय-मशवरा करलन, आउर सिपाहियन के ढेरमनी धन देलन,13आउर उनका से कहलन, “सभे के अईसे कहिहऽ ‘जखनी हम सुतल हली, तब उनकर चेलवन रात में आके उनकर लोथ चुराके ले गेलन।’14जदि ई समाचार हाकिम भीर पहुँचत, तऽ हमनी उनका मना लेम, आउर तोरा संकट से बचा लेम।”15येहिगुने ओखनी सिपाहियन रुपईया ले लेलक, आउर जईसन ओकरा हुकूम देवल गेल हल ओईसहीं अईलक। ई बात यहूदियन में आज तक फैलल हे।16अखनी ऊ ग्यारहो चेलवन गलील के ऊ पहाड़ पर गेलन, जहाँ यीशु उनका निर्देश देलन हल।17जब ओखनी उनका देखलन, तऽ उनका दण्डवत करलन, बाकि कोई-कोई के संदेह होल।18आउर यीशु उनका भीर आके ओखनी से बात करलन आउर कहलन, “स्वर्ग आउर धरती के सभे अधिकार हमरा देवल गेल हे।19येहिगुने जा के सभे जातियन के लोगवन के चेला बनावऽ, ओखनी के पिता, आउर बेटा, आउर पवित्र आत्मा के नाम से बपतिस्मा दऽ;20आउर ओखनी के सभे बात माने ला सिखावऽ जेकर हम तोहनी के आज्ञा देली हे,। आउर यकीन मानऽ, हम सभे दिन ला, ईहाँ तक कि दुनियाँ के अन्त तक हमेशा तोहनी के साथ हीं।”
Bridge Connectivity Solutions Pvt. Ltd.