Matthew17
1आउर छौ दिन के बाद यीशु पतरस, आउर याकूब, आउर ओकर भाई यूहन्ना के अपना साथ लेलन, आउर एगो ऊँचा पहाड़ी पर ओखनी के अकेले ले गेलन।2आउर ऊ ओखनी के सामने रूपांतरित हो गेलन, आउर उनकर मुँह सूरज के जईसन चमके लगल, आउर उनकर कपड़ा ज्योति के जईसन चमकदार हो गेल।3आउर देख, उनका साथ बात करते मूसा आउर एलिय्याह उनका देखाई देलन। 4पतरस जबाब दे के, यीशु से कहलन, “हे प्रभु, हमनी के ईहाँ रहे ला बढ़ियाँ हे। जदि तूँ चाहऽ हऽ, तऽ हम ईहाँ तीनगो तम्बू बनायेम एगो तोरा ला, आउर एगो मूसा ला, आउर एगो एलिय्याह लागी।”5जखनी पतरस ई बोलहीं रहलन हल, तऽ देख, एगो उजला बादल उनका पर छा गेल, आउर देख, बादल में से एगो आवाज अईलक, आउर कहलक, “ई हमर प्यारा बेटा हे, जेकरा से हम बड़ी खुश ही, इनकर सुनऽ।”6आउर ई सुन के तीनो चेलवन मुँह के भरे गिर गेलन आउर बड़ी डर गेलन।7आउर यीशु, नजदीक आके ओखनी के छू के, कहलन, “उठऽ, आउर मत डरऽ।”8बाकि अपन आँख उठा के, देखलन तऽ ओखनी यीशु के छोड़ के आउर कोई के नऽ देखलन।9आउर जब ऊ पहाड़ से नीचे उतर रहलन हल, तऽ यीशु ओखनी के आज्ञा दे के, कहलन, “जब ला आदमी के बेटा, मरल में से नऽ जिन्दा होतन, तब ला ई दर्शन के बारे में कोई से नऽ कहिहऽ।”10आउर उनकर चेलवन यीशु से सवाल पूछलन, “तऽ फिन शास्त्री लोग काहे कहऽ हथन कि एलिय्याह के पहिले आवेला जरुरी हे?”11बाकि यीशु जबाब दे के कहलन, “एलिय्याह तऽ जरुर आ रहलन हे आउर सभे बात के पहिले जईसन कर देतन।12बाकि हम तोरा से कहऽ ही कि एलिय्याह आ गेलन हे आउर ओखनी उनका नऽ पछानलन। एकर बदले, ओखनी उनका साथे जईसन चाहलन ओईसने करलन। एही रीति से आदमी के बेटा के उनका हाथ से दुःख उठईतन।”13तब चेलवन के समझ में आ गेल कि ऊ हमनी से यूहन्ना बपतिस्मा देवे वाला के बारे में कहलन हे।14आउर भीड़ के पास पहुँचला पर, एगो आदमी यीशु भीर अईलन, आउर उनका सामने ठेहुनियाँ मार के15कहे लगलन, “हे प्रभु, हमर बेटा पर दया करऽ, काहेकि ओकरा मिर्गी हे, आउर बेमार हे, आउर ऊ केतना दफे आग में आउर पानी में गिर जा हे।16आउर हम ओकरा तोर चेलवन भीर लईली हल, बाकि ऊ ओकरा चंगा नऽ कर सकलन।”17बाकि जबाब दे के यीशु कहलन, “हे अविश्वासी आउर हठीला लोग! हम कखनी तक तोहनी के जौरे रहम? ओकरा ईहाँ हमरा भीर लावऽ।”18आउर यीशु ओकरा डाँटलन, आउर दुष्टात्मा लईका में से निकल गेल, आउर ऊ लईका ओही घड़ी चंगा हो गेल।19तऽ चेलवन बाद में जखनी ऊ अकेले हलन एकांत में यीशु भीर आके पूछलन, “का कारण हे कि हम एकरा नऽ निकास पईली?”20आउर ऊ ओखनी से कहलन, “तोर कम विश्वास के वजह से। काहेकि हम तोरा से सच कहऽ ही, कि जदि तोर विश्वास राई के दाना के बराबर होत, तऽ तूँ ई पहाड़ से कहवऽ, ‘ईहाँ से ऊहाँ चल जा,’ आउर ऊ चल जायेत, आउर तोरा लागी कुछ भी असंभव नऽ होत।”21बाकि ई जाति बिन प्रार्थना आउर उपवास के नऽ निकलऽ हे।22अखनी ओखनी गलील प्रान्त में जमा होलन, तऽ यीशु उनका से कहलन, “आदमी के बेटा के लोगवन के हाथ में सौंप देवल जायेत,23आउर ओखनी उनका मार देतन, आउर तिसरका दिन ऊ जी उठतन।” आउर ओखनी बड़ी उदास हो गेलन।24आउर जब यीशु कफरनहूम में अईलन, तऽ जौन दिद्राख्मा नामक लगान जमा कर रहलन हल ऊ पतरस भीर आके कहलन, “का तोर गुरु लगान के भुगतान नऽ करऽ हथन?” 25ऊ कहलन, “हाँ, दे हथन।” आउर घर में आके, यीशु उनका पूछे से पहिलहीं ओखनी से कहलन, “हे शमौन! तूँ का सोचऽ हऽ? धरती के राजा चुंगी चाहे लगान केकरा से वसूलऽ हथन? अपन बेटा से कि पराया लोग से?” 26बाकि जखनी ऊ कहलन, “पराया से जिनका ऊ जीत लेलन हल।” तब यीशु उनका से कहलन, “येहिसे, बेटा आजाद हे।27बाकि जबकि हम उनका ठोकर नऽ खिलायेम, येहिसे तूँ गलील झील के किनारे जा के बंसी डालऽ, आउर जे मछली पहिले निकले, ओकरा ले आवऽ, आउर ओकर मुँह खोलला पर तोरा एगो सिक्का मिलत। ओकरा लेके हमर आउर अपन बदले में राजा के चुंगी दे दिहऽ।”
Bridge Connectivity Solutions Pvt. Ltd.