Matthew1
1अब्राहम के सन्तान, दाऊद के सन्तान, यीशु मसीह के वंशज के किताब। 2अब्राहम से इसहाक पईदा होलन, आउर इसहाक से याकूब पईदा होलन, आउर याकूब से यहूदा आउर ओकर भाई पईदा होलन। 3यहूदा पेरेस आउर जेरह के पिता हलन, आउर उनकर माता तामार हल। पेरेस हेस्रोन के पिता हलन। हेस्रोन एराम के पिता हलन।4एराम अम्मीनादाब के पिता हलन। अम्मीनादाब नहशोन के पिता हलन। नहशोन सलमोन के पिता हलन।5सलमोन आउर उनकर मेहरारू राहाब बोअज के माता-पिता हल। बोअज से रूत के द्वारा ओबेद के जनम आउर ओबेद से यिशै होल।6यिशै राजा दाऊद के पिता हलन। दाऊद से लेके ऊ घड़ी ला चौदह पीढ़ी होल, जखनी ऊ लोगवन के बाबुल ले जायल गेल। दाऊद सुलैमान के पिता हलन; सुलैमान के माय उरिय्याह के मेहरारू हल।7सुलैमान रहबाम के पिता हलन। रहबाम अबिय्याह आसा के पिता हलन।8आसा यहोशापात के पिता हलन। यहोशापात योराम के पिता हलन। योराम उज्जियाह के वंशज हलन।9उज्जियाह योताम के पिता हलन। योताम आहाज के पिता हलन। आहाज हिजकिय्याह के पिता हलन।10हिजकिय्याह मनश्शे के पिता हलन। मनश्शे आमोन के पिता हलन। आमोन योशिय्याह के पिता हलन।11योशिय्याह यकुन्याह के भईवन के पिता हलन। ऊ ऊ घड़ी रहऽ हलन जहिया बेबीलोन के सेना इस्राएलियन के बंधक बना के बेबीलोन देश में ले गेल हल। 12बेबीलोनी लोग इस्राएली लोग के बेबीलोन में बंधक बना के भेज देलन, तऽ यकुन्याह शालतीएल के पिता होल। शालतीएल जेरुब्बाबेल के पुरखा होलन।13जरुब्बाबेल अबीहूद के पिता हलन। अबीहूद एलयाकीम के पिता हलन, एलयाकीम अजोर के पिता हलन।14अजोर सादोक के पिता हलन। सादोक अखीम के पिता हलन। अखीम एलीहूद के पिता हलन।15एलीहूद एलीआजर के पिता हलन। एलीआजर मत्तान के पिता हलन। मत्तान याकूब के पिता हलन।16याकूब यूसुफ के पिता हलन। यूसुफ मरियम के पति हलन, आउर मरियम यीशु के माय हल। यीशु ऊ हथन जिनका मसीह कहल जा हे।17यीशु के पुरखावन के सूचि ई तरह से हे: अब्राहम के जीवित रहे के समय से लेके राजा दाऊद के जीवित रहे के समय तक ओखनी में से चौदहगो होल। दाऊद के जिन्दा रहे घड़ी से लेके ऊ समय ला जहिया इस्राएलियन बेबीलोन देश चल जाय के समय तक चौदह आउर होल, आउर ओकर बाद से लेके मसीह के जनम के समय तक आउर चौदह आउर होल।18यीशु मसीह के जनम लेवे से ठीक पहिले जे होल ई ओकर विवरण हे। उनकर माय मरियम के मँगनी यूसुफ के साथ वियाह होवे ला तय हो गेल हल, आउर उनका एक साथ होवे से पहिलहीं, ऊ पवित्र आत्मा से गर्भवती पावल गेल।19फिन उनकर पति यूसुफ जे धर्मी हलन, आउर ऊ दोसरा लोग के सामने उनका बेईज्जती नऽ करे ला चाहऽ हलन, येहिगुने ओकरा चुपके से त्याग देवे के मनसा करलन।20बाकि जखनी ऊ ई बात पर सोच ही रहलन हल, तऽ देखऽ, प्रभु के एगो स्वर्गदूत सपना में उनका पर प्रकट होके कहलन, “हे यूसुफ, दाऊद के संतान, तूँ मरियम के अपन मेहरारू बनावे से मत डरऽ, काहेकि जौन कुछ उनकर पेट में हे, ऊ पवित्र आत्मा के तरफ से हे।21आउर ऊ एगो बेटा के जनम देतन, आउर तूँ ओकर नाम 'यीशु' रखिहऽ, काहेकि ऊ अपन लोगवन के उनकर पाप से उद्धार करतन।”22अखनी ई सभे कुछ येहिगुने होल जेकरा से जे प्रभु के द्वारा यशायाह भविष्यद्वक्ता के द्वारा कहल गेल हल, ऊ पूरा होवे,23देखऽ, एगो कुँवारी गर्भवती होतन आउर एगो बेटा के जनम देतन। आउर ऊ लोग उनकर नाम इम्मानुएल रखतन" जेकर मतलब हे, “परमेश्वर हमर जौरे।” 24आउर यूसुफ नींद से उठ के, ओईसहीं करलन जईसन आज्ञा प्रभु के स्वर्गदूत उनका देलन हल। आउर ओकरा अपन मेहरारू के रूप में रख लेलन।25आउर जहिया ला ऊ अपन पहिला बेटा के जनम नऽ देलन तहिया ला ऊ ओकरा भीर नऽ गेलन। आउर ऊ ओकर नाम यीशु रखलन।
Bridge Connectivity Solutions Pvt. Ltd.