Joshua11
1अईसन होल कि जखनी हासोर के राजा याबीन ई सुनल, तऽ ऊ मादोन के राजा योबाब, शिम्रोन के राजा आउर अक्षाप के राजा के पास कहला भेजलन, 2आउर पहाड़ी देशवन में उत्तर दिसा के राजा भीर, आउर किन्नेरेत के दक्खिन में अराबा में, आउर तराई के देश में, आउर पच्छिम के तरफ दोर के ऊँचा जगह में रहे बाला राजवन भीर, 3आउर पूरब आउर पच्छिम में कनानी लोग, आउर एमोरी लोग, आउर हित्ती लोग, परिज्जी लोग, आउर पहाड़ी देश में यबूसी लोग, आउर मिस्पा के देश में हेम्रोन के नीचे हिब्बी लोग।4आउर ओखनी सभे सेना के साथे, जे समुद्र के किनारे के बालू के किनका के बराबर हल, ओखनी ढेर मनी घोड़ा आउर रथ के साथे निकस अईलन।5ई सभे राजा नियत समय पर मिललन, आउर इस्राएल से लड़े लागी मेरोम के झरना में डेरा डाललन।6तऽ यहोवा यहोशू से कहलन, ओखनी के आगे मत डरऽ; काहेकि कल एही समय हम ऊ सभे के इस्राएलियन के सामने मार डाले लागी दे देम। तूँ ओखनी के घोड़ा के कुचल देबऽ, आउर तूँ ओखनी के रथ के आग में जला देबऽ।7तऽ यहोशू आउर ओकर सब योद्धा अचानक मेरोम झरना के जल के पास ओखनी पर चढ़ाई कर देलन, आउर ओखनी ओकरा पर गिर पड़ल।8यहोवा ओखनी के इस्राएलियन के वश में कर देलन, आउर ओखनी ऊ सब के मारलन, आउर महानगर सीदोन, आउर मिस्रपोतमैम, आउर पूरब में मिस्पा के तराई ला ओखनी के पीछा कईलन। ओखनी ऊ सब के जब तक मारते रहलन जब तक ओखनी पूरा रीति से नाश नऽ हो गेल।9तऽ यहोशू ओखनी के जौरे ओईसहीं कईलन जईसन करे के आज्ञा यहोवा देलन हल। ओखनी ऊ सब के घोड़वन के काट देलन आउर ओखनी के रथ के आग में जला देलन।10ऊ घड़ी यहोशू पीछे मुड़ के हासोर के पकड़ लेलन, आउर ओकर राजा के तलवार से मार देलन काहेकि हासोर पहिले ई सभे राज्य के राजधानी हल।11ओखनी सभे आदमी के जे ओकरा में हल, तलवार से मार देलन, आउर ओखनी के नाश करे लागी अलग कर देलन-जेतना जीवन के साँस ले रहल हल ओखनी में से कोई नऽ बचलन आउर ऊ हासोर के आग से जला देलन।12तऽ यहोशू ई राजा आउर ओखनी के राज के सभे नगर के ले लेलन, आउर तलवार से ओखनी के मार देलन। ऊ ओखनी के पूरा रीति से नाश कर देलन, जईसन कि यहोवा के दास मूसा के आज्ञा देलन हल।13बाकि जेतना नगर अपन टीला पर खड़ा हल, ऊ सभे के इस्राएली लोग नऽ जलईलन, खाली हासोर के छोड़ के जेकरा यहोशू जला देलन हल।14ई नगर के सब सम्पति आउर जानवर के, आउर इस्राएलियन लूट लेलन, बाकि ओखनी सभे आदमी के तलवार से मारते रहलन जब ला कि ओखनी नाश नऽ हो गेलन। साँस लेवे वाला सब प्राणी के केकरो नऽ छोड़लन।15जईसे कि यहोवा अपन दास मूसा के आज्ञा देलन हल, ओईसहीं मूसा यहोशू के आज्ञा देलन, आउर यहोशू ओईसहीं कईलन। ऊ, ऊ सब आज्ञा में से कोई भी बेकार नऽ जाय देलन जे यहोवा मूसा के आज्ञा देलन हल।16यहोशू ई सभे देश के, मतलब कि सब पहाड़ी देश, आउर दक्खिनी देश, आउर गोशेन के सभे देश, आउर तलहटी, आउर अराबा, आउर इस्राएल के पहाड़ी देश, आउर तराई के प्रदेश के ले लेलन।17जबकि पर्वत से सेईर ला, हेम्रोन पर्वत के नीचे लबानोन के घाटी में बालगाद ला, ऊ ओखनी के सभे राजा के पकड़ लेलन आउर ओखनी के मार देलन।18यहोशू ई सभे राजा के संग बहुत लंबा समय तक युद्ध कईलन।19गिबोन में रहे वाला हिब्बी लोग के छोड़ आउर कोई अईसन नगर नऽ हल जे इस्राएलियन से मेल मिलाप कईलन होत। ओखनी ऊ सभे शहर के युद्ध में जीत लेलन।20काहेकि यहोवा के तरप से अईसन होल कि ओखनी के मन कठोर कर देवल गेल, कि ओखनी इस्राएलियन से युद्ध करतन, कि ऊ ओखनी सभे के सत्यानाश कर देतन, आउर उनका पर दया नऽ करतन, बाकि जईसन यहोवा मूसा के आज्ञा देलन हल ओकरे मुताबिक ऊ ओखनी के नाश करतन।21ऊ समय यहोशू आके अनाकियन के पहाड़ी देश से, हेब्रोन से, दबीर से, अनाब, यहूदा के सभे पहाड़ी देश से, आउर इस्राएल के सभे पहाड़ी देश में से नाश कईलन। यहोशू ओखनी के ओकर पूरा नगर के साथे नाश कर देलन। 22इस्राएलियन के देश में कोई अनाकवंशी लोग नऽ बचलन, सिवाय एकर कि ओखनी गाजा, गत आउर अश्दोद में रह गेल।23तऽ यहोशू सारा देश के यहोवा के ऊ वचन के मुताबिक ले लेलन, जइसे यहोवा मूसा के आज्ञा देलन हल, आउर यहोशू इस्राएलियन के ओखनी के गोत्र के मोताबिक भाग कर के दे देलन। तऽ देश के युद्ध से शांति मिलल।
Bridge Connectivity Solutions Pvt. Ltd.