James2
1हे हमर भईवन, पक्षपात के साथ महिमामय प्रभु यीशु मसीह के विश्वास नऽ रखऽ। 2काहेकि जदि एगो आदमी अच्छा पेहनावा सोना के अंगूठी पेहेनले तोर आराधनालय में आवऽ हथन, आउर मैला कुचैला कपड़ा पेहेनले एगो कंगाल आदमी भी आवऽ हथन,3आउर तूँ ऊ अच्छा कपड़ा पेहेनले आदमी के देख के कहऽ हऽ, “तूँ ईहाँ अच्छा से बईठऽ” आउर ऊ कंगाल आदमी से तूँ कहऽ हऽ, “तूँ ऊहाँ खड़ा रहऽ” चाहे, “हमर गोड़ के चौकी भीर बईठऽ”4तऽ का तूँ अपने में भेद भाव नऽ करलऽ आउर दुष्ट विचार वाला न्यायी नऽ ठहरलऽ?5हे हमर प्रिय भईवन, सुनऽ, का परमेश्वर ई संसार में रहे वाला कंगाल के विश्वास में धनी होवे आउर ऊ राज के अधिकारी होवे लागी नऽ चुनलन जेकर प्रतिज्ञा ऊ ओखनी से करलन हे जे उनका से प्रेम रखऽ हथन?6बाकि तूँ ऊ कंगाल के अपमान करलऽ! का धनी लोग तोरा पर प्रबल नऽ होवऽ हथन आउर का ऊ तोरा अदालत में घसीट-घसीट के नऽ ले जा हथन?7का ऊ महान नाम के निन्दा नऽ करऽ हथन जेकरा से तोरा पुकारल गेल हल? 8तईयो, जदि, तूँ ऊ राज व्यवस्था के पवित्रशास्त्र के मुताबिक पूरा करऽ हऽ, कि “तूँ अपन पड़ोसी से अपना समान प्रेम रखिहऽ” तऽ अच्छा करऽ हऽ। 9बाकि जदि तूँ पक्षपात करऽ हऽ, तऽ तूँ पाप करऽ हऽ, आउर व्यवस्था के जरिये अपराधी ठहरावल गेल हऽ। 10काहेकि जे कोई सभे व्यवस्था के पालन करऽ हथन आउर एगो बात में ठोकर खईतन तऽ ऊ सभे बात में दोषी ठहरतन।11येहिगुने कि जे ई कहलन, “व्यभिचार नऽ करिहऽ” ऊ ई भी कहलन, “हत्या नऽ करिहऽ” येहिगुने, जदि, तूँ व्यभिचार तऽ नऽ करऽ हऽ बाकि हत्या करऽ हऽ, तऽ तूँ व्यवस्था के अपराधी बन गेलऽ हे। 12जईसन बोलिहऽ ओईसहीं काम करिहऽ, ऊ लोग के जईसन जिनकर न्याय स्वतंत्रता के व्यवस्था के जरिये करल जाय वाला हे।13काहेकि परमेश्वर के न्याय ऊ लोग लागी दयारहित हे जे दया नऽ करलन हल। दया न्याय के विरोध में दावा करऽ हे।14हे हमर भाई सभे, एकरा से का फईदा होत, कि जदि कोई कहतन कि उनका विश्वास तऽ हल, बाकि ऊ कर्म नऽ करलन हल? विश्वास उनका उद्धार करे में सक्षम नऽ हे, हे नऽ?15जदि कोई भाई चाहे बहिन बिना कपड़ा के आउर रोजदिन के खाना के घटी में होत,16आउर तोहनी में से कोई उनका से कहतन, “शान्ति से जा, अपन आप के गरम रखऽ आउर तृप्त रहऽ” बाकि तूँ उनकर देह लागी जरुरी चीज नऽ देलऽ, तऽ का फईदा होत?17ओईसहीं विश्वास भी अपने आप में, जदि ओकरा में कर्म नऽ होत, तऽ मरल हे।18बाकि कोई कहतन कि, “तूँ विश्वास करऽ हऽ, आउर हम कर्म करऽ ही।” तूँ अपन विश्वास हमरा कर्म बिना देखावऽ; आउर हम अपन विश्वास कर्म के जरिये तोरा देखायेम।19तोरा विश्वास हे कि एक हीं परमेश्वर हथन; तूँ अच्छा करऽ हऽ; दुष्टात्मा भी विश्वास करऽ हे, आउर ऊ थरथरा हे। 20पर हे मूरख आदमी, का तूँ ई नऽ जानऽ हऽ, कि कर्म बिना विश्वास बेकार हे?21का हमर पिता अब्राहम कर्म के जरिये धर्मी नऽ ठहरावल गेल हल जखनी ऊ अपन बेटा इसहाक के वेदी पर चढ़ईलन हल? 22तूँ देखऽ हऽ कि विश्वास उनकर कर्म के साथे मिल के काम कर रहल हल आउर कर्म के जरिये विश्वास सिद्ध होल हल।23आउर ई पवित्रशास्त्र पूरा होल जे कहऽ हे कि, “आउर अब्राहम परमेश्वर पर विश्वास करलन, आउर ई उनका लागी धार्मिकता गिनल गेल हलऽ” आउर उनका परमेश्वर के दोस्त कहल गेल हल। 24तूँ देखऽ हऽ कि एगो आदमी खाली विश्वास के जरिये नऽ बाकि कर्म के जरिये धर्मी ठहरावल गेल हे।25आउर एही रीति से राहाब वेश्या भी का कर्म के जरिये धर्मी नऽ ठहरावल गेल हल, जखनी ऊ दूतवन सभे के स्वागत करलन हल आउर ओखनी के दोसरा राह से विदा करलन हल? 26येहिगुने जईसे आत्मा के बिना देह मरल हे, ओईसहीं विश्वास भी कर्म के बिना मरल हे।
Bridge Connectivity Solutions Pvt. Ltd.